15اگست،بھارت داآزادی دیہاڑ ، اصل وچ کالا دیہاڑ

پنجابی دی اک مشہور کہاوت اے پئی” کئیاں نوں مانھ موافق ، کئیاں نوں مانھ بادی” انج وی کہیا جا سکدا ہے پئی ویکھن والا کسے شئے نوں اپنی تھاں، زاویا نظر توں ای ویکھدا اے۔ ایہدا مطلب ہے پئی کوئی گل نہ تے ساری دی ساری غلط ہوندی اے تے نہ ای ساری ٹھیک۔ سگوں فرق ویکھن والے دی اکھ دا تے نکتۂ نظر دا ہوندا اے۔ جیویں جدوں ادھی دنیا تے رات ہووے تے عین اوس ویلے ادھی دنیا تے دن وی ہووے گا۔ اللہ دی خاص حکمت ہے جیس ہر شئے دے جوڑے بنائے۔ ایس پچھوکڑ وچ ویکھیے تے جدوں بھارت 15اگست نوں ‘آزادی دیہاڑ’ دے طور تے مناندا ہے تے عین اوس ویلے بھارت وچ وسن والیاں ساریاں اقلیتاں ایہنوں ‘کالا دیہاڑ’ دے طور تے مناون دا حق رکھدے ہین۔ فرق صرف سوچ تے زاویا نظر دا ہے۔
ایتھے ایہ گل وی مکھ رکھن والی ہے پئی ‘بر طانوی قانونِ آزادی ٔ ہند1947ء مطابق 15اگست نوں ( مگروں اسیں 14اگست نوں اپنے لئی آزادی دیہاڑ متھ لیا)پاکستان تے ہندوستان دی صورت وچ ہون والی ونڈ نوں عام کر کے ‘ تقسیمِ ہند’ آکھیا جاندا ہے، جیہڑا اک وڈا جھوٹھ ہے۔ ایتھوں تیک تے ایہ گل منی جا سکدی ہے پئی دوواں ملکاں بظاہر انگریزاں توں آزادی ضرور لئی( آزادی وی نہیں لئی سگوں انج کہنا چاہی دا ہے کہ انگریز اپنی مجبوری پاروں آپ ای ڈنڈا ڈوری چک کے چلا گیا، دوجا اک غلامی چوں نکل کے دوجی غلامی وچ آگئے) پراوہدے جان پچھوں وی حالات اوویں دے اوویں ہی رہے۔ایہ وی کیڈی ہاسو ہینی گل ہے پئی دو وکھری سوچ، رہتل تے وسیب رکھن والیاں،اک دوجے دیاں ویری ریاستاں دیاں فوجاں دا موہری اکو انگریز جرنیل ہائی، جیس پاکستان یاں بھارت نہیں سگوں ‘تاجِ برطانیا’ نال وفاداری دی سونہ کھادی ہوئی سی ، انج ای 47وچ ہند نہیں ونڈیا گیا سگوں ونڈے تے پنجاب تے بنگال گئے سن۔
ایس پچھوکڑ نوں مکھ رکھن دی وی لوڑ ہے پئی انگریزاں 1857وچ جنگِ پلاسی راہیں ، میر جعفر( جیہدا اجکل بڑا چرچاہے) جہے منکھ دی غداری پاروں نواب سراج الدولہ نوں بھانج دے کے بنگال تے مل ماری تے1846مگروں سانجھے پنجاب سگوں ‘گریٹر پنجاب'(کیوں جے اوس ویلے پنجاب دیاں حداں اک پاسے دل توں پشور تیک تے دوجے پاسے جموں کشمیر توں سندھ تیک پھیلیاں سن)دے مہا راجا رنجیت سنگھ دے چلانا کر جان مگروںحکمران ٹبر دیاں اقتدار لئی آپسی لڑائیاں پارو ں سکھ ریاست کمزور ہون کر کے بڑی آسانی نال پنجاب تے قبضا کر لیا۔
ایتھے ایہ حقیقت وی مکھ رکھنی پئے گی پئی بنگال تے پنجاب دوویں مسلم اکثریت دے علاقے سن، ایتھے وسن والے مسلمان انگریز جہے حکمران نوں دلوں قبول کرن تے کدی تیار نہیں ہوئے۔ سگوں پنجاب تے انگریزاں دے قبضے دے صرف 8سال مگروں ہی آزادی دی تحریک دا مڈھ بنھیا۔ایس وجہوں ہون والی بغاوت نوںبھاویں کچل دتا گیاپر ایس دے اثرات دور رس ثابت ہوئے۔ہولی ہولی مسلماناں دے نال نال دوجیاں قوماں وچ وی انگریز اں توں آزادی دی الیل پنگرن لگ پئی،اصل وچ پہلی عالمی جنگ تے وبائی مرض پھٹ پین پاروں دوجے کئی ملکاں وانگ برطانیا اندروں ٹٹ بھج دا شکار ہو یا، جس پاروں دنیا وچ جتھے جتھے برطانوی راج سی اوتھوں برطانوی حکومت نے اپنا بوریا بستر گول کرنا شروع کر دتا کیوں جے اوتھے ایہناںدی گرفت ڈھلی پین لگ پئی سی۔
ایہوای تاریخی حقیقت ہے پئی برصغیر تے 8سوسالاں دے مسلم اقتدار پاروں ہندوواں نوں محکوم بن کے رہنا پیا سی، ایس لئی اوہناں مسلماناں دے خلاف انگریزاں دے بانہ بیلی بنے رہے۔انگریزاں دی اقتدار تے گرفت ڈھلی ہوندیاں ہی ہندوواں دے دل دماغ وچ اقتدار دی ہوس انگڑائیاں لین لگ پئی۔ اکثریت وچ ہون کر کے اوہناں نوں ایہ زعم سی پئی انگریز جائے گا تے ہندوستان دی حکومت سانوں مل جائے گی فیرا سیں مسلماناں کولوں پچھلے اٹھ سو سالاں دی محکومی تے غلامی دا بدلا لاں گے۔ ایس سدھر نوں عملی جاما پوان لئی اوہناںانگریز دا ہر طرح ساتھ دتا۔ ایس دوران 23مارچ1940 نوںلاہور وچ مسلماناں قائدِ اعظم تے علامہ اقبال دی سوچ تے نظریات مطابق وکھرے دیس دی قرارداد منظور کروا لئی۔ ایس قرار داد مطابق برصغیر دے مسلم اکثریتی خطیاں دے پاکستان نال شامل ہون دا حق منیا گیا سی۔ایس کر کے برصغیر دیاں دوجیاں قوماں جیہڑیاں کھیرو کھیرو سن ، ہولی ہولی منظم ہون لگ پئیاں سن۔
دوجی وڈی جنگ نے رہی سہی کسر وی
کڈھ کے رکھ دتی تے برطانیا دی کمر توڑ دتی۔ایس لئی اوہدے برصغیر چھڈن توں وکھ کوئی راہ نہیں سی رہ گیا۔ 3جون 47ء نوں ونڈ دا جیہڑا فارمولا دتا گیا اوہدے مطابق سانجھا پنجاب، کشمیر تے بنگال مسلم اکثریتی خطے ہون کر کے پاکستان نال رلن دا حق رکھدے سن۔ اوس ویلے دی سکھ قیادت نوں ” سیکولر ہندوستان” دا جھوٹھا لارا لا کے پاکستان نال رلن توں روکیا۔ جس تے سکھ اج وی نموں جھان نیں۔ دوجے پاسے کشمیر تے زبردستی مل مارن لئی پنجاب دے مسلم اکثریت دے پنج ضلعے دھکے زوری بھارت دی جھولی وچ پا دتے گئے۔جس پاروںچڑھدے پنجاب وچوں مسلماناں دی وڈی گنتی نوں ہجر ت کرنی پئی جیہڑی تاریخ دی سبھ توں وڈی مہاجرت اکھوائی، دوجے پاسے لہندے پنجاب توں40فیصد توں ودھ سکھاں نوں ہجرت کرنی پئی۔ایس کر کے پنجاب تے کشمیردا تنازعہ دوناں ملکاں وچکار دشمنی دی وجہ بن گیا اے۔اوس دن توں سکھ تے کشمیری آزادی دی جدوجہد لئی جتن کر رہے نیں۔
پاکستان نے ہر پدھر تے کشمیریاں تے سکھاں دی اخلاقی حمایت جاری رکھی ہوئی ہے۔84وچ ایس تحریک وچ اوس ویلے نواں موڑ آیا جدوں سکھاں دے سبھ توں ودھ پاک تے پوتر تھاں ” گولڈن ٹیمپل” تے فوج کشی کر کے ، سکھ حریت رہنما ‘سنت جرنیل سنگھ بھنڈراں والا ‘نوں ‘ آپریشن بیلو سٹار’ راہیں سورگ واسی کر کے سکھاں دے بھخدیاں جذبیاں تے تیل پان والی غلطی کیتی۔ جس دا سکھاں اندرا گاندھی نوں جہنم واصل کر کے بدلا لیا۔ہن تک ہون والے ظلم، جبر تے تشدد دے باوجود نہ خالصہ تحریک نوں مکایا جا سکیا تے نہ ہی کشمیریاں نوں آزادی دی جدو جہد توں روکیا جا سکیا سگوں کشمیریا ں تے سکھاں بھارت دے نک وچ دم کر رکھیا ہے۔انج بھارت وچ70توں ودھ علیحدگی پسند تحریکاں وچوں خالصہ تے کشمیر تحریکاں اج وی سرکڈھویاں نیں۔ایس پاروں سکھاں، کشمیریاں توں وکھ ہندوستان دیاں اقلیتاں 15 اگست نوں ‘کالا دیہاڑ ” دے طور تے مناندیاں نیں۔