ڈائمنڈ جوبلی تے پینا ڈول

پاکستان ماشاء اللہ 75 ورھیاں دا ہو گیا اے۔ لنگھے ہوئے ایہناں سالاں وچ اسیں ترقی کیتی اے تے کرپشن وچ’ چور بازاری وچ’ لوٹ گھسوٹ وچ تے آبادی وچ وادھے وچ۔ اسیں اپنی زندگیاں وچ ایہہ سب کجھ شامل ایس لئی کر لیتا اے کہ اسیں پاکستان بندے ویکھیا نہ بنان دی جدوجہد توں لنگھے۔ سانوں تے بنیا بنایا ملک ملیاجہدی صرف ایسی تیسی پھیرن وچ اسیں اپنا حصہ ضرور پایا۔ پاکستان دے اوہ شہری جہناں نے ”لے کے رہیں گے پاکستان ” تے ”پاکستان کا مطلب کیا لاالہ اللہ” دا نعرہ نہیں چھڈیا تے فیر ہجرت دی اوہ تکلیفاں برداشت کیتیاں جہناں نوں اسیں اج وی سنیے تے جسم کنب جاندا اے۔ داتا دربار کمیٹی دے پچھلے چیئرمین سیٹھ اختر سعید چشتی قیام پاکستان ویلے ہجرت کرن والیاں وچ شامل سن۔ قتل و غارت دے اوہ چشم دید گواہ نیں۔ اوہناں نے اوس ٹرین دی لاشاں وی
ویکھیاں نیں جہدے وچ انساناں نوں گاجر مولی وانگوں وَڈ کے پاکستان روانہ کیتا گیا سی تے فیر اوہدے بدلے ساڈے غیور نوجواناں نے جو کیتا اوہ وی تریخ داد حصہ اے۔ ساڈے بزرگ اوہ نایاب’ نادر’ انمول تے خوبصورت اثاثہ نیں جہناں نوں اسیں اپنے ہتھیں ضائع کر رہے آں۔ پاکستان دی آبادی ایس ویلے تقریباً23کروڑ توں تجاوز کر چکی اے۔ پنجاب دی آبادی ایس ویلے تقریباً 12کروڑ توں ودھ ہو چکی اے جہدے وچ 4فیصد ساڈے بزرگ نیں تے ایہناں بزرگاں دی جوانی دی وجہ نال اسیں آزاد ملک حاصل کرن وچ کامیاب ہوئے۔ ایہہ ساڈے محسن نیں۔ سانوں اوہناں دا اپنے توں ودھ کے خیال رکھنا چاہیدا اے۔اج ایہو بزرگ کسی نہ کسی سہارے دے طلبگار نیں۔ عمران خان نے اپنے دور حکومت وچ بزرگاں لئی اولڈ ہومز بنائے۔ احساس پروگرام شروع کیتا’ لنگر خانے کھولے تے ہن وزیراعلیٰ پنجاب چودھری پرویزالٰہی نے اورنج لائن ٹرین وچ بزرگاں تے خصوصی افراد نوں خصوصی سہولت دین دا فیصلہ کیتا اے۔ میں سمجھنا واں کہ پنجاب حکومت دا ایہہ اپنے محسناں لئی بہت چنگا کم اے۔ ایہدے نال نال ہسپتالاں وچ دوائیاں وی مفت کردتیاں نیں۔ اک تے غربت تے اُتوں مہنگی دوائیاں خریدنا عام بندے دے بس دی گل نہیں سی تے رہی گل بزرگاں دی اوہناں دے کول تے کجھ وی نہیں ہوندا۔ جہڑا سی اوہ اپنے بچیاں اتے لا کے فارغ ہو چکے نیں۔ ایہناں حالات وچ اورنج لائن وچ مفت سفر دی سہولت تے ہسپتالاں وچ مفت دوائیاں دی فراہمی نال بزرگاں دی زندگی کجھ آسان ہو جاوے گی۔ میں سمجھنا واںکہ ساڈے بزرگ شہریاں دے نال نال ٹرانس جینڈر نوں وی ایہہ سہولتاں فراہم کیتیاں جان۔ نہ صرف اورنج لائن ملک بھر وچ آن جان لئی پاکستان ریلوے تے پی آئی اے وچ وی اوہناں نوں صرف 10فیصد کرایہ دی سہولت دتی جاوے۔ پنجاب حکومت نے سرکاری ہسپتالاں وچ دوائیاں مفت دین دا اعلان کیتا اے تے ایہہ وی دسدا چلاں کہ ایس ویلے پاکستان وچ ضروری تے جان بچان والی دوائیاں دی قلت دا بحران شدت اختیار کر چکیا اے۔74 ضروری تے جان بچان والی دوائیاں مارکیٹ توں غائب نیں۔ مقامی ادویہ ساز کمپنیاں نے عالمی منڈی وچ خام مال دی قیمتاں وچ وادھے دے بوہتی پیداواری لاگت دی وجہ نال ایہدی درآمد روک رکھی اے تے ادویہ ساز کمپنیاں نے 200مولیکیولز دے خام مال دی درآمد وی روک دتی اے جہناں دی عالمی منڈی وچ قیمتاں ودھ گئیاں نیں تے اوہناں دی پیداواری لاگت کمپنیاں دی استطاعت توں باہر اے۔ ادویہ ساز کمپنیاں دا موقف اے کہ جے حکومتی سطح اتے ٹیکسز وچ چھوٹ نہ دتی تے دوائیاں دی قیمتاں وچ وادھا نہ کیتا گیا تے ایہناں دوائیاں دی تیاری ناممکن ہو جاوے گی تے ایہہ مسلسل تیجا ہفتہ اے کہ خام مال لئی کوئی نواں آرڈر نہیں دتا گیا ۔ موجودہ پیداوار کجھ دستیاب سٹاک دے نال جاری اے لیکن ایہہ بوہتی دیر تک نہیں چلے گی تے جھیتی ای دوائیاں وی ختم ہو جان گئیاں تے ملک بھر وچ دوائیاں دی قلت دا بحران مزید شدت اختیار کر جاوے گا۔ مارکیٹ توں غائب دوائیاں دی جولائی وچ جہڑی فہرست بنائی گئی سی ایہدے وچ 40مختلف دوائیاں دے نام سن جہناں وچ گولیاں’ شربت’ انجیکشن تے مرہم یا قطرے شامل سن۔ ہن74 دے کول دوائیاں ایسیاں نیں جہڑیاں دستیاب نہیں۔ جہناں وچ دماغی تے اعصابی بیماریاں دی دوائیاں وی شامل نیں حتیٰ کہ ایہناں وچ ایسی دوائیاں وی نیںجہناں نوں خودکشی توں بچائو دی دوائیاں آکھیا جاندا اے۔ لیتھیم کاربونیٹ دے سارے برانڈز مارکیٹ وچ دستیاب نہیں جہڑی کہ کئی نفسیاتی بیماریاں دے علاج لئی موثر ترین دوائی اے۔ ایہناں ضروری دوائیاں وچ بچیاں وچ توجہ دی کمی ہائپر ایکیٹیویٹی ڈس آرڈر دے علاج لئی میتھا ئلفینڈیٹ تے بچیاں تے وڈیاں وچ مرگی لئی کلونازپم دے قطرے تے گولیاں شامل نیں جہڑی پچھلے کئی ہفتیاں توں مارکیٹ وچ دستیاب نہیں سن۔ ٹی بی’ مرگی’ پارکنسن’ امراض قلب تے دوجی بیماریاں دے مریضاں لئی دوائیاں وی مارکیٹ وچ دستیاب نہیں ۔ لیتھیم کاربونیٹ 9مختلف کمپنیاں تیار کردیاں نیں لیکن خام مال دی ودھدی ہوئی قیمتاں تے پیداواری لاگت دے اسمان نوں چھون مگروں ہن ایہناں وچوں کوئی وی ایہنوں تیار نہیں کر رہیااے۔ انج محسوس ہوندا اے کہ پی پی ایم اے دوائیاں دی قلت دے معاملے اتے بلیک میلنگ کر رہی اے تے اوہناں دی کوشش اے کہ ساری دوائیاں دی قیمتاں اتے 40فیصد وادھا کر لیتا جاوے حالاں جے ایسی کوئی دوائی نہیں اے جہدی پیداواری لاگت دا مسئلہ ہووے۔ تسیں صرف پیناڈول لین کسے وی میڈیکل سٹور اتے چلے جائو ‘ نہیں ملے گی تے ایہہ اک عام دوائی اے جہڑی کدی پان سگریٹ والے کولوں وی مل جاندی سی۔ ایہہ ہے اوہ ترقی جہڑی اسیں 75 ورھیاں وچ کیتی ایس لئی سلنسر کڈ کے ڈائمنڈ جوبلی منانا تے بندی اے۔ کوئی ہور نہ سہی پنجاب حکومت ادویہ ساز کمپنیاں دی بلیک میلنگ اتے وی توجہ دیوے تاں جے سردرد تے بخار دی پیناڈول تے فوری دستیاب ہو سکے۔