کشمیر دا امتحان

5اگست پاکستانی قوم یوم استحصال کشمیر دے طور تے مناندی اے۔ ایہہ دیہاڑ 5اگست 2019نوں ہندوستان دے اوس غیر منصفانہ تے ظالمانہ اقدام دی مذمت کرن لئی منایا جاندا اے جہدے تحت مقبوضہ ریاست نوں ہندوستان دے آئین دے آرٹیکل 370 تے 35-A دے تحت حاصل مخصوص حیثیت نوں ختم کردے ہوئے اوہنوں ہندوستان دا اک باقاعدہ حصہ بنا دتا گیا سی۔ مقبوضہ کشمیر اتے ہندوستان دے غاصبانہ تے غیر منصفانہ قبضے نوں ہن 75ورھے ہون نوں نیں۔ ایہہ مسئلہ اک علاقائی نہیں بلکہ بین الاقوامی حیثیت دا حامل اے تے اقوام متحدہ دی سلامتی کونسل دی قرارداداں دے مطابق ایہہ غیر جانبدارانہ استصواب رائے دے ذریعے ای ممکن اے۔
ایہہ مسئلہ اقوام متحدہ وچ وی ہندوستان
لے کے گیا سی جتھے اک قرارداد دے ذریعے مقبوضہ کشمیر دے عوام دا حق خود ارادیت تسلیم کیتا گیا تے ایہہ آکھیا گیا کہ ہندوستان تے پاکستان دونویں ایس گل نوں یقینی بنان کہ مقبوضہ کشمیر دے عوام نوں استصواب رائے دے ذریعے ایہہ حق دتا جاوے کہ اوہ خود فیصلہ کرن کہ اوہناں نے ہندوستان دا حصہ بننا اے یا فیر پاکستان دا۔ ہندوستان’ پاکستان تے کشمیری عوام تناں ایس مسئلے دے فریق نیں۔ہندوستان نے ایس قرارداد نوں تسلیم کیتا مگر اج 75 ورھے لنگھن مگروں وی اوہدے اتے عمل کرن نوں تیار نہیں۔ ہندوستان نے اپنے آئین وچ مقبوضہ ریاست نوں خصوصی سٹیٹس دے رکھیا سی جہدے تحت اک مخصوص علاقہ ہون پاروں مقبوضہ کشمیر دے عوام نوں کجھ مخصوص رعایتاں حاصل سن۔
5اگست 2019نوں نریندر مودی دی انتہا پسند حکومت نے اچانک پارلیمنٹ توں آئین وچ تبدیلی کروائی جہدے تحت آئین دے آرٹیکل 370 تے 35-A نوں ختم کردتا گیا جہدے تحت مقبوضہ کشمیر دی خصوصی حیثیت نوں وی تبدیل کردتا گیا۔ایہہ عمل غیر قنونی تے سی ای مگر ایہدے نال ایہہ اقوام متحدہ دی قرارداداں دی وی صریحاً خلاف ورزی سی کیوں جے ایہناں قرارداداں دے مطابق مسئلہ کشمیر دے منصفانہ حل تک مقبوضہ علاقے دی حیثیت تبدیل نہیں کیتی جا سکدی تے ایہہ منصفانہ حل صرف تے صرف آزادانہ استصواب رائے دے ذریعے ای ممکن اے۔ ایس فیصلے مگروں مقبوضہ کشمیر وچ غیر کشمیری وی زمین خرید سکدے نیں جہڑا کہ ہن دھڑا دھڑ ہو رہیا اے۔ ایس دے علاوہ ہزاراں دی تعداد وچ غیر کشمیریاں نوں ڈومیسائل دتے جا چکے نیں۔ لداخ جہڑا کہ ایس تنازعے دے تحت مقبوضہ کشمیر دا حصہ اے اوہنوں ہن اک وکھری حیثیت دے کے مرکز دے زیر کنٹرول دے دتا گیا اے۔
ایہہ سارا عمل اک سوچے سمجھے منصوبے دے تحت کیتا جا رہیا اے جہدا بنیادی مقصد مقبوضہ کشمیر وچ آبادی دے تناسب نوں تبدیل کرنا اے تاں جے مسلماناں دی اکثریت نوں اقلیت وچ بدلیا جا سکے۔ علاقے وچ نویں حلقہ بندیاں لئی اک کمیشن بنایا گیاجہدا سربراہ ممبئی نال تعلق رکھن والے اک ہندو ریٹائرڈ جج نوں لایا گیا جد کہ نیشنل کانفرنس جئی کٹھ پتلی سیاسی جماعت دے دو ارکان نوں رکن نامزد کیتا گیا۔ حسب توقع ایس کمیشن نے اپنی سفارشات پیش کردتیاں نیں جہدے تحت مقبوضہ کشمیر دی اسمبلی وچ جموں جہڑا کہ ہندو اکثریتی علاقہ اے لئی نشستاں دی تعداد 37توں ودھا کے 43کردتی گئی اے جد کہ مسلم اکثریت والے علاقہ کشمیر وادی لئی نشستاں دی تعداد 46 توں ودھا کے 47 کردتی گئی اے۔ ایس طرح وادی وچ اک نشست دا ودھا جدکہ جموں لئی 6نشستاں دا وادھا کیتا گیا اے۔ آبادی دا تناسب تبدیل کرن دا ایہہ عمل جنیوا کنونشن دی صریحاً خلاف ورزی اے۔ ایس منصوبے دے تحت پہلے مرحلے وچ اک ہندو وزیراعلیٰ لیان دی کوشش کیتی جاوے گی جہدے مگروں بتدریج ایہہ تناسب تبدیل کردتا جاوے گا کہ جے کدی استصواب رائے کروانا وی پووے تے مسلماناں دی تعداد اقلیت وچ ہووے۔ ہندوستان دے ایس یکطرفہ تے غیر منصفانہ اقدام اتے بین الاقوامی برادری حسب معمول خموش ہے ای پاکستان دی حکومت دا طرزعمل وی مایوس کن رہیا اے۔ اک اینے وڈے اقدام نوں جہدے مگروں مقبوضہ علاقے دی حیثیت ای بتدریج تبدیل ہو رہی ا ے جہدا براہ راست اثرایس تنازع دے حل اتے پووے گا اوہنوں اجاگر کرن تے اپنا بھرواں احتجاج ریکارڈ کروان لئی تے پاکستان نوں دنیا بھر وچ جارحانہ سفارت کاری کرنی چاہیدی سی تاں جے ہندوستان نوں دنیا دے سامنے ایکسپوز کیتا جاندا مگر بدقسمتی نال پاکستان دا ردعمل وی صرف بیاناں تے اپنی پارلیمنٹ توں منظور کروائی گئی چند قرارداداں تک ای رہیا۔ اوس ویلے دے وزیراعظم عمران خان دے دعوویاں دے برعکس نہ بیرونی ملکاں دا کوئی دورہ کیتا تے نہ ای بین الاقوامی لیڈرشپ نوں ایس بارے اپنے موقف بھرویں طریقے نال دسیا۔ ایہدے برعکس ہندوستان دی حکومت اپنے طے شدہ ایجنڈے دے مطابق اگے ودھ رہی اے۔ حریت قیادت دے اہم ارکان جہڑے پاکستان نال والہانہ عقیدت رکھدے سن یا تے ایس دنیا توں رخصت ہو گئے نیں یا فیر پابند سلاسل نیں جہدی زندہ مثال یاسین ملک نیں جہناں نوں حال ای وچ غیر منصفانہ طریقے نال عمر قید دی سزا سنائی گئی اے۔