شہباز گل ٹیسٹ کیس

کجھ دن پہلاں میں ٹی وی چینل 92ویکھ رہیا سی جہدے وچ اک بہت وڈے مبصر ناقد تے تجزیہ نگار موجودہ حالات اتے اپنا تجزیہ دے رہے سن۔ اینکر یاسردے ایس سوال اتے کہ بنی گالہ نوں پلس تے دوجی ایجنسیاں نے چاروں پاسوں گھیر رکھیا اے تے عمران خان (پچھلے وزیراعظم) نوں گرفتار کیتے جان دے امکانات دا جواب دیندے ہوئے وڈے بلندو بانگ دعوے کردے ہوئے گویا ہوئے ۔ اوہ آکھ رہے سن یاسر! میں تہانوں دساں عمران خان نوں کسی صورت وی گرفتار نہیں کیتا جا سکدا۔عمران خان نوں کوئی گرفتار نہیں کر سکدا’ بہت اعتماد سی اوہناں دی گل بات وچ۔ بقول اوہناں دے عمران خان نوں گرفتار کرنا وفاقی حکومت لئی انتہائی ناممکن اے۔ میزبان نے فیر سوال کیتا کہ جے اوہناں نوں گرفتار کر لیتا گیا تے کیہ ہووے گا جہدے تے اوہناں نے اعتماد نال بھرپور انداز وچ جواب دتا کہ یاسر جے عمران خان نوں گرفتار کیتا گیا تے حکومت لئی بڑی مشکل ہو جاوے گی۔ لینے دے دینے پے جان گے
حکومت نوں۔ حکومت دے ایس اقدام اتے عوام دا اک خوفناک ردعمل آوے گا جد کہ لوکاں نوں کنٹرول کرنا حکومت وقت لئی مشکل ای نہیں بلکہ ناممکن ہو جاوے گا۔ لوک پورے ملک وچ احتجاج کرن لئی سڑکاں اتے نکل آن گے تے پورے پاکستان نوں بند کر دین بلکہ پورے ملک نوں جام کر دتا جاوے گا۔ اینا شدید ردعمل ہووے گا عوام دا تے عوام دے ایس سمندر وچ ہر شے خس و خاشاک وانگوں بہہ جاوے گی تے میزبان نے پچھیا کیہ ہن وی لوک خان نوں بچان لئی اسلام آباد پہنچ چکے نیں یا نہیں تے جواب وچ رانا صاحب نے دسیا ایس ویلے بہت سارے لوک بنی گالا موجود نیں تے بہت سارے لوک خان نوں گرفتاری توں بچان لئی بنی گالا پہنچ رہے نیں۔ اوہناں نے ہور دسیا کہ ایس ویلے علی افضل ساہی خرم شہزاد ورک وغیرہ وغیرہ اپنی ٹیماں دے نال اوتھے موجود نیں۔ عوام نکل آن گے’ عوام طوفان برپا کر دین گے۔ لوک احتجاج کرن گے ۔ پتہ نہیں لوک کیہ کر دین گے۔ ایہہ ساری گلاں سن کے مینوں شہید ذوالفقار علی بھٹو یاد آ گیا۔ بھٹو بہت وڈا تے تگڑا لیڈر سی تے اک پاورفل وزیراعظم وی جہنے امریکہ نوں للکارن دی غلطی کیتی سی ایس زعم وچ کہ میں ملک دا پاپولر تے عوام دے دلاں وچ وَسن والا لیڈر آں۔ میں کسی نوں وی اکھاں وکھا سکنا واں فیر ایہدے خلاف 9جماعتاں نے عوامی اتحاد بنایا جہنوں 9ستارے دے نام نال وی جانیا جاندا اے’ اوہناں دے بارے وچ وی آکھیا جاندا سی کہ اوہناں نوں امریکہ دی سرپرستی حاصل اے۔ بھٹو دے خلاف 1977 وچ باقاعدہ تحریک چلائی گئی لیکن بھٹو کسی طرح وی اوہناں دے قابو نہیںآ رہیا سی۔ تحریک اینا زور پھڑ گئی کہ ضیاء الحق نوں ملک وچ مارشل لاء لانا پیا۔ اوہ وکھری گل اے بقول کجھ لوکاں دے کہ ضیاء الحق نے مارشل لا غلط لایا سی کیوں جے جہڑی رات مارشل لا لگیا اوس دن اپوزیشن تے حکومت وچ جاری مذاکرات کامیاب ہو گئے سن تے اختلافات ختم ہو گئے سن۔ باقاعدہ معاہدہ ہو چکیا سی تے بھٹو صاحب اسمبلی تحلیل کر کے الیکشن دی تریخ انائونس کرن والے سن۔ بہرحال مارشل لا لا دتا گیا تے بھٹو صاحب نوں گرفتار کر لیتا گیا۔ بھٹو دا خیال سی لوک ملک وچ افراتفری مچا دین گے تے مینوں بچا لین گے۔ مینوں رہا کروا لین مگر انج نہیں ہویاتے بھٹو صاحب دے خلاف نواب احمد رضا قصوری دے قتل دا مقدمہ چلایا گیا تے اوہناں نوں ایسے جرم وچ سزائے موت دے کے رستے توں ہٹایا گیا۔ لوک نکلے مگر ایس طرح نہیں جہڑی توقع بھٹو صاحب نوں سی۔ اج وی اوہو حالات نیں’ بھٹو نے
پاکستان وچ ایٹم بم دی بنیاد رکھ کے امریکہ نال دشمنی لیتی تے عمران خان نے Absolutely not کہہ کے امریکہ نوں ناراص کر لیتا فیر اوہو یا جو ہونا سی۔ عمران دے خلاف تحریک اعتماد آئی تے حکومت بدل گئی۔ اوس ویلے بھٹو دے خلاف 9جماعتاں دا اتحاد سی تے اج عمران خان دے خلاف 14 جماعتاں دا اتحاد اے تے اوہو لوک فیر توں اک شخص دے خلاف برسر پیکار نیں جو 1977وچ بھٹو دے خلاف تحریک وچ شامل سن۔ فرق صرف اینا اے 77 تحریک وڈیاں نے چلائی تے پی ڈی ایم وچ اوہناں محرکین دے بچے شامل نیںجیویں مفتی محمود دا پتر فضل الرحمن’ انس نورانی شاہ احد نورانی دا پتر ولی خان دا پتر وغیرہ وغیرہ۔ جیویں 1977 وچ بھٹو 9جماعتاں دا کلا مقابلہ کردے کردے زندگی دی بازی ہار گیا انج ای ہن خان 14جماعتاں دے گھیرے وچ اے۔ قومی اتحاد وانگوں اج فیر اوہو تریخ اوہناں دے پتر دہرا رہے نیں۔ اوس ویلے وی عدالتاں نوں مینیج کیتا گیا تے اج وی کوشش کیتی جا رہی اے۔ اوس ویلے اک جنرل صدر سی تے ہن ہو سکدا اے کسے دی صدر بنن دی خواہش ہووے ۔ اوس ویلے وی اداریاں دی ہواواں دا رخ بھٹو دی مخالف سمت سی۔ اوہدے حالات تے اج دے حالات وچ اک فرق ایہہ وی اے۔ اوس ویلے صرف پی ٹی وی سی تے اج بہت سارے نیوز چینل دے نال نال سوشل میڈیا بہت ایکٹو اے جتھے کوئی وی خبر لکی نہیں رہندی۔ ہر خبر منظر عام اتے لے آندے نیں لیکن حالات سارے دے سارے اوہو 77 والے نیں۔ بھٹو قابو نہیں آندا سی اوہدے خلاف قتل دا مقدمہ گھڑ لیتا گیا۔ خان نوں قابو کرن لئی فارن فنڈنگ جہڑا فارن فنڈنگ توں ہن ممنوعہ فنڈنگ ہو گیا اے لیکن خان مطمئن نیں ۔ عوامی حمایت تے عوام دی والہانہ محبت دی وجہ نال جد کہ بھٹو وی عوام دی محبت دے دھوکے وچ ماریا گیا ۔ اللہ کرے عوام دا رسپانس خان دی توقعات دے عین مطابق ہووے کدھرے بھٹو والا ہتھ نہ ہو جاوے۔ خان دے نال خان دی گرفتاری دی بنیاد شہباز گل نوں گرفتار کر کے رکھ دتی گئی اے۔ حکومت نے عوام دی نبض چیک کرن لئی ایہہ قدم چکیا اے۔ جے عوام ولوں کوئی ردعمل آیا تے فیر سٹرٹیجی تبدیل ہو سکدی اے۔