پنجاب وچ ترقی تے خوشحالی

ساڈے قومی جھنڈے وچ چٹا رنگ اقلیتاں دی نمائندگی کردا اے تے 11اگست نوں اسیں اقلیتاں دا عالمی دن منانے آں۔ ایہدے تے قائداعظم نے کیہ فرمایا سی اخیر وچ لکھاں گا، پہلاں دو اہم کماں دا ذکر کراں گا جہدے پاروں پنجاب دوجے صوبیاں تے بازی لے گیا۔ پہلاں کم احساس راشن پروگرام تے دوجا کم تاجر برادری ویلے دی قید توں آزاد ہو گئی۔وزیراعلیٰ پنجاب چودھری پرویزالٰہی نے صوبہ بھر وچ کاروبار دے اوقات کار دی پابندی سنے اتوار دی چھٹی وی ختم رکن دے نال ای مارکیٹاں دی پارکنگ توں حاصل ہون والی آمدنی دا 30فیصد تاجراں نوں سہولتاں دی فراہمی اتے خرچ کرن دا اعلان کیتا اے جد کہ مارکیٹاں وچ ریسکیو 1122 دے سنٹر بنائے جان گے تاں
جے کسی وی ایمرجنسی دی صورت وچ فوری طور تے کسی وی مریض نوں ہسپتال پہنچایا جا سکے۔ تاجر برادری نوں پچھلے کجھ سالاں وچ کورونا تے دوجے مسئلیاں دی وجہ نال مشکلاں دا سامنا رہیا۔ خاص کر چھوٹے تاجر تے مہنگائی دی چکی وچ بالکل پس کے رہ گئے سن۔ اک پاسے اوہناں دے اخراجات کنٹرول توں باہر ہو رہے سن تے دوجے پاسے مارکیٹاں دے اوقات کار نے تاجر برادری دا جینا اوکھا کر رکھیا سی۔ پورے ملک وانگوں لہور دے دل مال روڈاتے وقت دی قید دی وجہ نال کاروباری طبقہ بالخصوص چھوٹے تاجر تے اکثر سویر توں شام تک بغیر کسی گاہک دے دکان بند کرن تے مجبور ہوندے سن کیوں جے 9وجے مگروں ساڈی پلس روایتی انداز نال مارکیٹاں وچ داخل ہوندی تے فیر جو کجھ اوہناں دے ہتھ لگیا اوہنوں وی اپنے نال لے گئے۔ مال روڈ چونکہ لہور دی تاجر برادری دا گڑھ اے۔ اک پاسے ہال روڈ اے تے دوجے پاسے اوہدے نال ای بیڈن روڈ اے جتھے پورے پاکستان توں لوک خریداری کرن آندے نیں۔ پنجاب دے دوردراز علاقیاں وچ کاروباری حضرات جمعہ دی چھٹی کردے نیں تے ایتھے اتوار نوں مارکیٹاں بند ہوندیاں سن تے بوہتا رش عام دناں وچ ہوندا سی۔ ہن ویلا تے دناں دی قید توں آزادی مگروں تاجر برادری وچ وی خوشحالی آئی جہدے توں ملک وچ ٹیکس دا نظام وی ودھے گا تے حکومت دی آمدن وچ وی وادھا ہووے گا۔جدوں حکومت دے کول ٹیکساں دا پیسہ اکٹھا ہووے گا اوہدوں حکومت عوام نوں وی ریلیف دیوے گی۔ لہور دی تاجر برادری دے دو وڈے نام ناصر انصاری تے فاروق آزاد وی چوہدری پرویزالٰہی دے ایس فیصلے توں بڑے متاثر نظر آ رہے نیں جہاں دا آکھنا اے کہ وزیراعلیٰ پنجاب دے ایس فیصلے توں پنجاب وچ کاروباری سرگرمیاں وچ وادھا ہووے گا جہدے توں عوام نوں ریلیف ملے گا تے ٹیکساں دی مد وچ حکومتی ریونیو وچ وی وادھا ہووے گا جد کہ کاروباری مراکز بند ہون تے مہنگائی توں تاجر برادری پریشانی دا شکار سی۔ ایس فیصلہ توں ساریاں دی مشکلاں وچ کمی واقع ہووے گی۔ ایہدے نال نال پارکنگ دی آمدن دا 30فیصد تاجراں اتے خرچ کرنا وی اک فلاحی اقدام اے۔ پنجاب حکومت دے ایس فیصلے نال تاجراں نوں ریلیف ملے گا کیوں جے مہنگائی نے سب توں ودھ تاجراں نوں متاثر کیتا اے۔ ایس فیصلے نال چھوٹے تاجراں دی مشکلاں دا ازالہ وی ہووے گا۔ پنجاب حکومت دا دوجا کم احساس راشن پروگرام دا دوبارہ اجرا اے۔ ایہہ پروگرام غربت دے خاتمے تے فلاحی ریاست ول اک وڈا قدم اے۔ احساس راشن پروگرام دے تحت غریباں نوں ماہانہ 15 سو روپے ملن گے۔ آٹا’ دالاں تے گھیو سستے ریٹس اتے فراہم کیتا جاوے۔ ایس پروگرام لئی احساس اایکٹ تیار کرن’ سماجی تحفظ دے مختلف پروگراماں نوں اک پلیٹ فارم اتے یکجا کرن تے احساس ایکٹ نوں اسمبلی توں منظور کروایا جاوے گا۔ مسلم لیگ ق دی رکن پنجاب اسمبلی خدیجہ عمر فاروقی دا ایس حوالے نال بڑا خوبصورت جملہ مینوں یاد اے کہ احساس ای انسانیت اے کیوں جے سماجی تے معاشرتی تحفظ توں محروم افراد فلاحی ریاست دی ذمہ داری اے جہنوں اسیں بخوبی پورا کراں گے تے احساس راشن پروگرام غربت دے خاتمہ تے فلاحی ریاست ولوں اک وڈا قدم ثابت ہووے گا۔ ہن اوہناں دا ذکر کرنا چاہنا واں جہناں دے بغیر ساڈا جھنڈا مکمل نہیں ہوندا تے جے قیام پاکستان وچ اوہناں دی قربانیاں شامل نہ ہوندیاں تے شاید اسیں اج وی غلام ہوندے۔ اسیں ہر سال 11 اگست نوں پاکستان وچ موجود اقلیتاں نوں خراج تحسین پیش کرنے آں۔ اسلام امن تے رواداری دا مذہب اے تے دین دے معاملے وچ کوئی جبر نہیں اے۔ ایہہ قرآنی حکم’ سنت نبویۖ دے نال رل کے ایس صورتحال دی بنیاد فراہم کردا اے جہڑا قائداعظم محمد علی جناح نے 11 اگست 1948 نوں قوم نال اپنے خطاب وچ بیان کیتا سی۔ ساڈے آئین وچ مذہب
دی آزادی تے ساڈی اقلیتاں دے افراد تے املاک دی تکریم نوں باقاعدہ قنونی شکل دتی گئی اے۔ حکومت نوں نہ صرف ایہناں ذمہ داریاں دا بخوبی ادراک اے بلکہ ایہناں مقاصد دے حصول لئی اپنے عزم دی مستقل یاددہانی دے طور تے حکومت نے 11اگست نوں سرکاری سطح اتے شاندار طریقے نال قومی اقلیتی دن دے طور تے منان دا فیصلہ وی کیتا۔ پاکستان وچ اقلیتاں دے مسائل دا خاتمہ تے خامیاں دی اصلاح کرنا جہڑی سماجی تے مذہبی استحصال دا کارن بن سکدیاں نیں ساڈی حکومت دی پالیسیاں دا بنیادی ستون اے۔ میں ایس موقع تے ساری اقلیتژ برادریاں دے اپنے بھراواں کولوں وی اپیل کراں گا کہ اوہ رواداری تے باہمی اتفاق دی فضا نوں فروغ دین لئی اپنا کردار ادا کردے رہن کیوں جے ساڈے معاشرے وچ ایہو واحد رستہ اے
جہڑا بین المذاہب ہم آہنگی تے امن نوں فروغ دین دے ساڈے مشترکہ مقصد دے حصول دا کارن ہووے گا۔ پاکستان بلا کسی ذات پات’ رنگ ونسل تے مذہب دی تفریق دے ساڈے ساریاں دا اے تے اسیں ساریاں نے رل کے ای ایہدی ترقی تے خوشحالی لئی اپنی جدوجہد جاری رکھنی اے۔