ہور چوپو گنے

میری سجری معلومات دا ذریعہ دوست نیں پر ایہ راوی ثقہ’ بااعتبار تے باخبر نیں۔ ایس لئی ایہناں دی روایت چوں نتیجہ کڈھن وچ نہ کوئی حرج اے نہ ای کوئی قباحت نالے ایس سجری صورتحال دے پس منظر وچ بہت ساریاں چیزاں توں میں آپ وی چنگی طرح واقف آں۔
مسلم لیگ (ن) دے اک پہلی صف دے رہنما نے میرے توں پچھیا کہ ملتان دے حلقہ این اے 157 وچ مسلم لیگ ن دا امیدوار کھڑا ہون دی صورت وچ تہاڈے خیال وچ کیہ صورتحال ہووے گی۔ (اجے غفار ڈوگر نوں وزیراعظم دا معاون خصوصی بنا کے معاملہ سدھا نہیں سی کیتا گیا تے غفار ڈوگر ٹکٹ توں مایوس ہو کے آزاد امیدوار دے طور تے الیکشن لڑن دا سوچ رہے سن) میں کہیا: تسیں میری عادت توں چنگی طرح واقف او کہ میں سوال دے جواب وچ کسے پسند ناپسند یاں مصلحت توں بالکل کم نہیں لیندا تے جس گل نوں عقلی طور تے ٹھیک سمجھنا واں اوہ کہہ دینا واں۔ ممکن اے میں ایہدے وچ غلطی کر جاواں’ پر جھوٹ نہیں بولدا۔ غلطی تے غلط بیانی وچ بڑا فرق ہوندا اے۔ صورتحال ایہہ وے کہ علی موسیٰ گیلانی نوں چار پنج مہینے پہلاں ایس حلقے وچ اپنے حریفاں وچ جہڑی سبقت وکھائی دیندی سی اوہ ہن نہیں۔ تہاڈے امیدوار نے ایس واری وی تریجے نمبر تے آنا اے تے نہ صرف تریجے نمبر تے آنا اے سگوں پہلے توں وی گھٹ ووٹ لینے نیں پر تہاڈے امیدوار دی موجودگی دی صورت وچ علی موسیٰ گیلانی نے شاہ محمود قریشی دی صاحبزادی دے مقابلے وچ جو مقابلے دی فضا بنانی سی اوہ نہیں بن سکے گی تے تہاڈا امیدوار علی موسیٰ گیلانی دی آسانی نال شکست تے مہربانو قریشی دی فتح نوں باسہولت بنان وچ اپنا پورا حصہ پاوے گا۔ مسلم لیگ ن دا اوہ رہنما ایس حلقے نوں پیپلزپارٹی یاں تحیک انصاف لئی خالی نہیں چھڈنا چاہندا سی تے ایتھوں مسلم لیگ ن دا امیدوار کھڑا کرن دے حق وچ سی کہ اوہدے بقول جے اسیں ایہ حلقہ ہن چھڈ دینے آں تے ایہدا مطلب اے کہ اسیں مستقبل وچ ایس حلقے توں مستقل آئوٹ ہو جاواں گے۔ ایہ صورتحال ویکھ کے اوہ کہن لگا کہ جے غفار ڈوگر نوں ٹکٹ نہ دیئے تے کیہ ہووے گا؟ میں کہیا تہانوں تے پتہ اے کہ میرا کسے سیاسی جماعت نال تعلق نہیں تے میں نہ صرف ایہ کہ مسلم لیگ ن تے اوہدی سیاست نوں پسند نہیں کردا سگوں تہاڈے متوقع امیدوار دے بارے ڈھیر ساری بری رائے رکھنا واں پر تہاڈے سوال دا جواب ایس ایمانداری نال دے رہیا واں جو کسے مشورہ منگن والے نوں اخلاقی تقاضیاں تے حضرت محمدۖ ہوراں دے فرمان دے مطابق دینا چاہیدا اے تے جواب ایہہ وے کہ جے تسیں غفار ڈوگر نوں اوہدی مرضی مطابق راضی نہ کیتا تے اوہ اوس حلقے وچ اوہو کجھ کرن گے جو پی پی 217 وچ تہاڈے ایس حلقے وچ اپنے سیاسی مستقبل توں مایوس’ تہاڈے متوقع امیدواراں نے کیتا سی تے تہاڈی شکست نوں ہور یقینی بنن وچ اپنا حصہ پایا سی۔ اوس دوست نے کہیا کہ میں سمجھ گیا تے گل ختم ہو گئی۔
دو دن بعد میں پڑھیا کہ مسلم لیگ ن نے اپنے متوقع امیدوار غفار ڈوگر نوں وزیراعظم میاں شہبازشریف دا معاون خصوصی بنا دتا اے۔ میں اللہ دی شان تے بے نیازی تے حیران آں کہ کیہ ویلا آ گیا اے تے کیویں کیویں دے لوک معاون خصوصی بنائے جا رہے نیں پہلے تے ایہ سی کہ صرف رکن اسمبلی تے وزراء ای نالائق تے نااہل ہوندے سن کہ اوہناں دا کم کرن لئی واہوا پڑھے لکھے لوک موجود ہوندے سن پر مشیر تے معاون خصوصی تے اجہے لوکاں نوں لایا جاندا سی جو علم و حکمت نال مالا مال ہون تے اپنے توں گھٹ علم حکمراناں نوں مشورہ دے سکن’ مناسب راہ وکھا سکن تے متوقع غلطیاں توں بچا سکن’ پر ہن سب کجھ تلپٹ ہو کے رہ گیا اے۔ اجہے لوکاں نوں مشیر تے معاون خصوصی بنایا جا رہیا اے کہ قرب قیامت دی نشانیاں دی یاد تازہ ہوندی جا رہی اے۔ شاہ جی نال گل ہوئی تے اوہ کہن لگے کہ اوہ وزیراعظم نوں ڈیری ڈویلپمنٹ تے اپنے تجربے توں مستفید فرمان گے۔
پرانی گل اے اک دوست نے دسیا کہ اوہ اپنے اک افسر دوست دے دفتر وچ جا بیٹھا۔ میں اوس دفتر تے افسر دا اتا پتا تے عہدہ وغیرہ ایس لئی نہیں لکھ ریہا کہ اوہ چھپنا تے ہے نہیں فیر فضول وچ لکھن دا بھلا کیہ فائدہ؟ کجھ موقعیاں تے مصنف کسے بری تے ناقابل بیان صورتحال دے بارے لکھدے لکھدے رک جاندا اے تے کہندا اے کہ ”اگے تسیں آپ ای سوچ لوو کہ کیہ ہویا ہووے گا”۔ دوستو! ایس جملے نوں پڑھن دے بعد اپنے خیالات دا گھوڑا ایس توں وی کدھرے اگے لے جانے آں جتھوں تک مصنف دے خیال دے گھوڑے نے زقند بھرنی سی۔ ایسے دوران اوس افسر دے بوہے تے کھڑے ہوئے دربان نے اندر آ کے اطلاع دتی کہ فلاں ڈوگر آیا اے۔ جواباً اوس افسر نے دراز چوں اک لفافہ کڈھ کے اپنے دربان نوں دتا تے کہیا کہ جا کے ڈوگر نوں دے دیو تے معاملہ ختم ہو گیا۔ میرے دوست دے چہرے تے سوالیہ تاثرات ویکھ کے اوہ افسر کہن لگا: ایہ بندہ ساڈے کم آندا رہندا اے۔ ہن ایہ یونین کونسل دے ناظم دا الیکشن لڑ رہیا اے اوہنوں ایہ دو تن سو بیلٹ پیپر دتے نیں اوہدی جت یقینی بنان لئی اینے ای ووٹ چاہیدے نیں۔ میرا دوست کہن لگا تسیں ایس بندے نوں جان دے او؟ اوہ افسر ہس کے کہن لگا’ ایناں تے ضرور جاننا واں جناں تسیں جان دے او پر جو گل تسیں نہیں جان دے اوہ ایہہ وے کہ سانوں انج دے ای بندیاں دی ضرورت اے تے ایہو ساڈے کم آندے نیں۔ ایہدے بعد راوی چل سو چل لکھدا اے۔٭