منے پرمنے شاعر ڈاکٹر اختر شمار دا تعزیتی ریفرنس

پنجابی یونین دے پربندھ ہیٹھ پنجاب ہائوس وچ منے پرمنے شاعر’ دانشور’ ماہر تعلیم تے لکھاری ڈاکٹر اختر شمار دے تعزیتی ریفرنس دا پربندھ کیتا گیا۔ جہدے وچ منے پرمنے ادیباں’ شاعراںتے لکھاریاں سنے اوہناں دے چاہن والیاں دی وڈی تعداد نے رلت کیتی۔ تقریب دا آغاز تلاوت کلام پاک نال کیتا گیا جہدے مگروں ندیم اقبال باہو نے شاہ حسین دی کافی پڑھ کے خوب داد سمیٹی۔ میزبان دے فرائض چیئرمین پنجابی میڈیا گروپ مدثر اقبال بٹ نے ادا کیتے۔ اپنے ابتدائی کلمات وچ اوہنان نے آکھیا کہ اج دا ایہہ اکٹھ ڈاکٹر اختر شمار دی یاد وچ منعقد کیتا گیا اے۔ ڈاکٹر صاحب نال میرا تعلق کئی دہائیاں اتے محیط اے۔ اوہ اک باکمال شاعر تے لکھاری تے ہے ای سن اوہدے نال نال اوہناں دے اندر اک صوفی سی۔ اوہناں دی تحریراں وچ وی صوفی شاعراں دا بے پناہ ذکر تے اوہناں دی تعلیمات دا اثر نظر آندا اے۔ میں اوہناں دے نال اندرون تے بیرون ملک کئی واری سفر وی کیتا۔ اوہناں دے نال اینی یاداں جڑیاں نیں کہ گننا شروع کرئیے تے انج دے کئی پروگرام درکار ہون گے۔
تقریب نال خطاب کردیاں ہوئیاں ندیم رضا نے آکھیا کہ اختر شمار اردو تے پنجابی ادب دا اک وڈا ناں نیں۔ چنگی شاعر دی ایہو نشانی ہوندی اے کہ سنن والے نوں اوہ شعر اوہدی اپنی قلبی واردات محسوس ہووے’ ڈاکٹر صاحب دے ایسے شعر کئی سو دی تعداد وچ نیںجہڑے اوہناں دے اک بہترین شاعر ہون دی دلیل اے۔ اوہناں دا ہور آکھنا سی کہ کسے دے وڈے سکالر ہون دا اندازہ ایس گل توں لایا جا سکدا اے کہ اوہدا کینوس وسیع ہوندا اے جہدے وچ کوئی حد نہیں ہوندی’ اختر شمار صاحب دے قلم دی وی کوئی حد نہیں سی۔ اوہناں دی تحریراں وچ جتھے انگریزی ادب توں گوئٹے تے شیکسپیئر دا ذکر ملدا اے اوتھے اردو شاعراں وچ غالب تے میر دے نال نال پنجابی صوفی شاعر بلھے شاہ’ وارث شاہ تے دوجے پنجابی لکھاریاں دا ذکر وی ملدا اے۔
فاروق ندیم نے گل کردیاں ہوئیاں آکھیا کہ میرا اوہناں نال غائبانہ تعلق اوہناں دی تحریراں تے شاعری دے ذریعے سی لیکن جدوں پہلی واری اوہناں نال ملاقات ہوئی تے میں ویکھ کے حیران رہ گیا کہ اک جواں سال شاعراینی پختہ شاعری کیویں کر سکدا اے۔ ایہدے مگروں اوہناں دے نال بیرون ملک سفر دا موقع وی ملیا۔ بلاشبہ اوہ اک عظیم شاعر تے لکھاری سن۔
خالد اعجاز مفتی نے آکھیا کہ ایہہ مدثر اقبال بٹ دا کمال اے کہ جان والیاں نوں یاد کردے تے سانوں ایسی محفلاں وچ دعوت دیندے رہندے نیں۔ اوہناں دا ہور آکھنا سی کہ اختر شمار جئے لوک ساڈا اثاثہ نیں ‘ اسیں اوہناں دی یاد مناندے رہواں گے۔ کسے نوں گوا دین دا غم بہت وڈا ہوندا اے اسیں اپنا ایہہ سنگی گوا دتا، ایہہ بہت ای دکھ تے تکلیف دی گھڑی اے۔
مشتاق قمر نے آکھیا کہ اسیں خوش نصیب آں کہ جہڑے درخت تھلے آں اوہدی چھاں دے نال نال سانوں پھل وی مل رہیا اے۔ اختر شمار جئے لوکاں دا سانوں میسر آنا ساڈی خوش بختی اے۔ ہن اوہ ساڈے کولوں وچھڑ گئے ۔ اوہناں نوں یاد رکھنا وی ضروری اے تے اوہناں جئے جہڑے ہیرے ساڈے وچ زندہ نیں اوہناں نوں مان دینا وی ویلے دی اہم لوڑ اے۔
عتیق انور راجہ دا آکھنا سی کہ اختر شمار جیسا نفیس انسان میں کدی نہیں ویکھیا۔ اوہناں نال جدوں وی ملاقات ہوئی اینی محبت نال ملدے کہ ا نسان اوہناں دا گرویدہ ہو جاندا۔ ایس گل وچ کوئی شک نہیں کہ اوہ اک اعلیٰ پایہ دے شاعر تے معلم سن۔ا وہناں دا ہور آکھنا سی کہ مینوں پنجابی وچ لکھن تے مدثر اقبال بٹ نے آمادہ کیتا جہدے مگروں ماں بولی نال محبت دا ایہہ سلسلہ ٹر پیا تے ہن اسیں گوجرانوالہ وچ نجی سکولاں نوں اپنے نال جوڑ کے بالاں نوں پنجابی زبان تے ثقافت نال واقف کروا رہے آں۔
ذبیح اللہ بلگن نے اپنے خطاب وچ آکھیا کہ کجھ لوک شاعر چنگے ہوندے نیں کجھ لکھاری چنگے ہوندے نیں۔ ایہہ وی اک ہنر اے جیویں کوئی پلمبر چنگا اے’ کوئی ڈاکٹر چنگا اے کوئی انجینئر چنگا اے یا کوئی کیمرہ مین چنگا اے۔ میں سمجھنا واں کسے ہنر وچ کمال ہونا کوئی وڈی گل نہیں’ اصل گل ایہہ اے کہ کوئی ہنر مند شخص بطور انسان کنا چنگا اے تے میں ایس گل داشاہد آں کہ اختر شمار اک بہت ای چنگے انسان سن۔ ایہو اوہناں دی سب توں وڈی خوبی سی کہ اوہ محفل وچ باحیا ہون دے نال نال تنہائی وچ وی باحیا سن۔
قائد پنجابی تحریک الیاس گھمن نے آکھیا کہ ڈاکٹر اختر شمار نال میرا تعلق بہت ڈونگھا سی۔ اج توں کوئی 35ورھیاں پہلاں جدوں اوہناں دی پہلی اردو کتاب ”اختر شماریاں” پبلش ہوئی تے اوہدی بہت پذیرائی ہوئی۔ میں اوہناں نوں آکھیا کہ پنجابی وچ وی لکھو۔ اوہناں نے ایس گل نوں قبول کیتا تے کجھ ای عرصہ مگروں اوہناں دی پنجابی شاعری دی کتاب ”اکھیا دے وچ دل” شائع ہوئی جہنوں ویکھ کے بہت خوشی ہوئی۔ اوہدے مگروں اگلی پنجابی کتاب ”میلہ چار دیہاڑ” شائع ہوئی اوہدے مگروں ایہہ سلسلہ ٹر پیا تے اوہ آخری دم تک پنجابی تحریک دا حصہ رہے تے پنجابی وچ لکھدے رہے۔
ڈاکٹر طارق شریف زادہ نے آکھیا کہ اختر شمار دے اخلاق تے سچائی دی گواہی اینے وڈے وڈے لوک دے رہے نیں اللہ پاک اپنی بارگاہ وچ قبول فرماوے۔ اوہناں دا ہور آکھنا سی کہ اوہ اک درویش صفت انسان سن۔ پروگرام دے اختتام تے ڈاکٹر طارق شریف زادہ نے مرحوم دے ایصال ثواب لئی دعا وی کروائی۔