آزاد میڈیا لئی عمران دی رابطہ عوام مہم

انج تے ساڈے ہر جمہوری تے غیر جمہوری حکمران دا دعویٰ رہیا اے کہ اوہ آزادی اظہار رائے دے اصولاں اتے غیر متزلزل یقین رکھدا اے۔ کسے نوں خبر نہیں کہ توانا تے آزاد صحافت ای اک صحتمند تے ترقی پذیر معاشرے دی ضامن ہوندی اے۔ حقیقی جمہوری ارباب حکومت نے ہمیشہ مثبت تے تعمیری تنقید توں رہنمائی حاصل کیتی اے تے اوہ قومی زندگی دے مختلف شعبیاں وچ اہل صحافت دی تجویزاں دا خیر مقدم کردے نیں۔ کاش’ موجودہ حکمراناں نوں ایس امر دا کامل ادراک و احساس ہوندا کہ اہل صحافت قومی رہنائی دے مشکل ترین چیلنج توں بحسن و خوبی عہدہ برآ ہون لئی کہڑے مصائب و آلام دا سامنا کردے
نیں۔ ارباب صحافت دا بنیادی فریضہ عوامی مشکلات تے مسائل تے عوامی جذبات تے محسوسات ای دی ترجمانی تے آئینہ داری کرنا ہوندی اے۔ اہل صحافت’ اہل سیاست وانگوں حزب اقتدار یا حزب اختلاف وچوں کسے اک دے پارٹنر نہیں ہوندے۔ اوہ ہمیشہ حق تے سچائی دا ساتھ دیندے نیں۔ اظہار رائے دی آزادی دے ایس دور وچ کسے مہذب جمہوری مملکت دے ارباب حل و عقد نوں ایہہ توقع نہیں رکھنا چاہیدی کہ شعبہ صحافت نال تعلق رکھن والے ارباب قلم اگلے وقتاں دے مجبور دانشوراں وانگوں صرف دربار داری ای دے مقتضیات نوں پیش نظر رکھ کے قلم چکن گے۔ آزادی صحافت دے جھنڈے نوں سربلند رکھن لئی وطن عزیز دے اہل قلم نے لائق رشک تے گرانقدر قربانیاں دتیاں نیں۔ ایس حقیقت توں انکار نہیں کیتا جا سکدا کہ اقوام تے ملکاں دی ترقی وچ آزاد صحافت نے اک کلیدی کردار ادا کیتا اے۔ صحافی مجموعی طور تے غیر جانبدار ہوندا اے لیکن مسلمہ اقدار تے ملکی سلامتی دا سفینہ جدوں بعض حکومتی اقدامات دی وجہ نال اوہنوں گرداب تے بھنور وچ ہچکولے کھاندا نظر آندا اے تے عوام تک حقائق پہنچان لئی متاع لوح و قلم کھوہ جان دے باوجود اوہ اپنی انگلیاں نوں خون دل وچ ڈبو کے جنوں دی حکایات خونچکاں لکھدا اے۔ ایس حقیقت توں دنیا دا اک وی ذی شعور شہری انکار نہیں کر سکداکہ دریدہ پیرہن تے افلاس گزیدہ صحافیاں دے قلم دی کمزور جئی نوک نے بسا اوقات موروثی شہنشاہیتاں تے عسکری آمریتاں دے مضبوط ترین تخت ہائے اقتدار تے اختیار دے فولادی پایاں نوں ہلا تے لرزا کے رکھ دتا۔ دیانتدار تے بے باک صحافی دے قلم توں نکلن والا اک لفظ ہزار نیو کلیئر پاور پلانٹس توں ودھ توانائیاں رکھدا اے۔ آزاد صحافت ای صحت مند معاشرے دی ضامن اے۔ ہر باشعور شہری تسلیم کردا اے کہ معاشرے دی ترقی دے عمل وچ جمہوریت تے پریس لازم و ملزوم نیں۔ جیویں جیویں آزادی صحافت تے اطلاعات دا عمل گہرائی اختیار کرے گا۔ ایس توں جمہوریت تے سیاسی ادارے مضبوط ہون گے تے بیورو کریسی ہور ذمہ دار بن جاوے گی۔ مہذب تے ترقی یافتہ جمہوری معاشریاں تے مملکتاں وچ کسے وی ایسی حکومت یا حکمران نوں جہڑا آزادی صحافت تے حریت اطلاعات دی راہواں مسدود کرن لئی کالے قنون دا سہارا لیندا اے۔ انسانی تریخ دے دامن دا سیاہ حاشیہ تصور کیتا جاندا اے۔ ایہہ منے بنا چارہ نہیں کہ آزاد پریس نے احتسابی اداریاں دے قیام توں پہلاں وی وطن عزیز وچ محتسب دا کردار ادا کیتا اے۔ ایہہ وی طے اے کہ جدوں تک کسے ملک دے صحافیاں دا دامن آلودہ حرص و ہوس نہیں ہوندا’ کسے وی ریاستی ادارے نوں بے اعتدالی’ بے ضابطگی تے کج روی دی شاہراہ دا بے دھڑک مسافر بنن دی جرات نہیں ہوندی۔صحافی بے غرض تے بے طمع ہووے تے اوہدا قلم آزاد تے رائے بے باک ہوندی اے لیکن جدوں اوہ پیش پا افتادہ مفادات لئی اپنے قلم تے ضمیر نوں طاقتور تے با رسوخ طبقات دے ہاں رہن رکھ دیندا اے تے اخبار تے جرائددے صحفیاں اتے چیخدی’ چلاندی تے چنگھاڑدی سچائیاں وی حلقہ قارئین نوں متاثر کرن وچ نکام رہندیاں نیں۔ آزاد صحافت ای حقیقی محتسب دا کردار ادا کردی اے۔ ایسے تناظر وچ تحریک انصاف دے چیئرمین تے پچھلے وزیراعظم عمران خان نے اوہناں صحافیاں نوں جہناں نوں دھمکیاں’ پرتشدد حملیاں تے گرفتاریاں’ ایف آئی اے وچ بے جا طلبیاں دا سامنا کرنا پیا۔ 13اگست 2022 دی شب تحسینی تے تعریفی کلمات دا خراج پیش کیتا۔ ایہہ امر صحافتی حلقیاں لئی خوش آئند اے کہ عمران خان نے اگلے ہفتے توں آزاد میڈیا تے آزادی اظہار دے ایشو نوں اپنی ملک گیر عوامی رابطہ مہم دا حصہ بنان دا اعلان کیتااے۔
ایہدے وچ کوئی شک نہیں کہ آزاد صحافت وی بعض اقدار تے روایتاں تے ضابطہ ہائے اخلاق دی پابند ہوندی اے۔ دنیا دے اوہ ملک جتھے پریس نوں بے پناہ آزادیاں عطا کیتی گئیاں نیں اوتھے وی جدوں کوئی ابلاغیاتی تے نشریاتی ادارہ’ جریدہ یا اخبار مسلمہ حدود و قیود نوں پامال کرن دی سعی کردا اے تے شہری’ سیاسی’ سماجی تے دانشور حلقیاں ولوں ایہدے ایس اقدام نوں ناپسندیدگی دی نظر نال ویکھیا جاندا اے۔ ایہہ حقیقت ماورائے اشتباہ تے مبالغہ اے کہ آزادی دی منزل مراد نوں قریب تر لیان وچ سیاستداناں توں کِتے زیادہ صحافت داناں نے قربانیاں دتیاں نیں۔
قیام پاکستان مگروں وی حریت فکر تے جرات اظہار دے نمائندہ صحافیاں نے اپنے پیش روواں دے نقوش قدم اتے چلنا ترک نہ کیتا۔ روشنی دے ایہناں پرستاراں نے جدوں وی مطلع حق ول جبر’ ظلم’ فسطائیت تے آمریت دے سایاں نوں سحاب در سحاب تے خیل در خیل ودھدے ویکھیا تے ایس شب تریک وچ اوہ تریکیاں نوں زائل تے کافور کرن لئی اپنی ہتھیلیاں اتے جرات اظہار دے سورج لے کے نکلے۔ حریت فکر تے آزادی اظہار دے ایہناں عظیم پرچم برداراں جناب حمید نظامی’ آغا شورش کاشمیری تے جناب مجید نظامی (نشان امتیاز) نوں اپنا رول ماڈل تصور کرن والے میڈیا دے کارکن اج وی آزادی صحافت دے تحفظ’ صحافیاں دے حقوق دے دفاع تے قلم دی آزادی نوں برقرار رکھن لئی ہرقسم دی قرانی دین دے عزم دا اظہار کر رہے نیں۔