سیاستدان پہلاں اپنا قبلہ درست کرن

عمران خان نے اپنے جلسے وچ اعلان کیتا اے کہ میں امریکہ نال دوستی چاہنا واں’ غلامی نہیں۔ عمران خان دے ایس بیان توں اندازہ لا لوو کہ جہڑا شخص کئی مہینے توں ایہہ راگ الاپ رہیا سی کہ امریکہ نے میرے خلاف سازش کیتی اے تے رجیم چینج امریکہ دی وجہ نال ہویا اے۔ امریکہ مینوں ایس لئی پسند نہیں کردا کہ میں امریکہ نوں پسند نہیں کردا۔ میں امریکہ نوں ایبسولیوٹلی ناٹ آکھیا۔ ایس لئی مینوں ہٹایا گیا۔ میں امریکہ دی اکھاں وچ کھٹکدا سی۔ امریکہ نے سازش کر کے امپورٹڈ حکومت مسلط کیتی وغیرہ وغیرہ۔ جہڑا شخص امریکہ توں اینا خائف ہووے’ اوہ ہن امریکہ نال دوستی دا طالب اے۔ ہر جلسے’ ہر تقریر’ ہر انٹرویو تے ہر ساہ وچ امریکہ نوں برا بھلا آکھن والا امریکہ نال اج دوستی دا خواہشمند اے۔ دلچسپ گل ایہہ اے کہ عمران خان دے متعلق کئی
سیاستداناں دا بیان وی آ چکیا اے کہ عمران خان دے فلیٹ دا کرایہ اٹھ سال امریکی عہدیدار ادا کردے رہے نیں۔
سب توں وڈا ثبوت ایہہ اے کہ عمران خان دی حکومت وچ زلفی بخاری’ شہباز گل’ شبرزیدی’ ڈاکٹر ثانیہ تے درجناں عہدیدار گرین کارڈ ہولڈر نیں۔ ایہہ درجناں امپورٹڈ عہدیدار امریکہ دے رہائشی نیں۔ اکثریت دے کول امریکی نیشنلٹی اے تے کسے نے وی وزیر تے مشیر بنن مگروں امریکن نیشنلٹی نہیں چھڈی۔ پچھلے تن مہینے وچ عمران خان دی کجھ امریکی عہدیداراں نال ملاقاتاں وی رہیاں خصوصاً خیبر پختوانخوا وچ امریکیاں دا پرتپاک استقبال تے فنڈز دی وصولیاں دی خبراں تے پرنٹ’ الیکٹرانک تے سوشل میڈیا دی زینت وی بنیاں۔ جے تسیں امریکہ دی غلامی نہیں چاہندے تے ہتھ پھیلا پھیلا کے فنڈز کیوں وصول کردے او۔امداداں کیوں منگدے او۔ مختلف چینلاں توں ڈونیشن کیوں لیندے او۔
دوستی ہمیشہ برابری دی سطح اتے ہوندی اے۔ بھیک منگن تے چندہ کھان والے کدی دوست نہیں بندے۔ ویسے وی ا مریکہ اتے اینی الزام تراشیاں مگروں ہن دوستی دی بھیک کیوں منگی جا رہی اے۔ عمران خان نوں تے ایہہ اعتراض سی کہ ا مریکہ نے پاکستان وچ اوہناں دی حکومت دا تختہ الٹیا اے تے سرخم کرن والیاں’ یس سر آکھن والیاں تے ڈرون حملیاں دی کھلی اجازت دین والیاں نوں حکومت وچ لا بٹھایا اے۔ فیر ہن اچانک امریکہ دے ترلے منتاں کیوں کیتی جا رہیاں نیں تے ایہہ پیغام دتا جا رہیا اے کہ چنگا سانوں دوبارہ حکومت وچ لے آئو۔ اسیں موجودہ حکومت توں ودھ تابعداری وکھاواں گے۔
دوجے پاسے موجودہ حکومت دے کارنامے ویکھ لوو جہناں نے امریکہ نوں یس باس آکھ کے اپنی قومیت’ حاکمیت تے حمیت دا جنازہ کڈ لیتا۔ امریکہ دی فرمانبرداری تے غلامی دا طوق گلے وچ پا لیتا۔ وزیراعظم شہباز شریف نے جہڑے بیانات دتے اوہناں توں شدید قسم دی خوئے غلامی دی بو آ رہی سی۔ وزارت عظمیٰ لئی شہباز شریف نے اطاعت دا طوق گلے وچ پا لیتا تے پچھلے وزرائے اعظم توں ودھ کورنش بجا لیائے۔تاں جے جوبائیڈن دی گڈ بک وچ شامل ہو جان لیکن وزارت عظمیٰ دا ایسا چسکا اے جہنے ساڈے سیاستداناں دے اندر غیرت’ خوداری تے وقار تک دی پرواہ نہیں کیتی اے۔
امریکہ دی آشیرباد ساڈے ہر سیاستدان تے حکمران دی پہلی ترجیح اے خواہ اوہدے لئی دو زانو ای کیوں نہ ہونا پووے۔ پاکستانی حکمراناں تے سیاستداناں لئی اقتدار دا رستہ امریکہ دی غلامی وچ ای مضمر اے۔ ایس غلامی دے نتیجے وچ مذکورہ سیاستداناں نوں اقتدار ملدا اے تے دولت دے انبارسمیٹن دا موقع ملدا اے۔ ایہہ دولت تقریباًہر حکمران نے کھرباں دے حساب نال جمع کیتی اے۔ اوہناں دی درجناں نسلاں دا عیاشیاں دا سامان پیدا کیتا اے مگر نتیجے وچ ملک گروی رکھیا جاندا رہیا۔ ایس ملک دی بربادی دی داستاناں وچ اقتدار دی رسہ کشی دا ہتھ رہیا اے۔ کسی حکمران نے جدوں امریکہ دی مدد چاہی تے وطن عزیز دے ٹکڑے ہوئے۔ ایس ملک وچ مداخلت ہوئی۔ ایس ملک دی جڑاں وڈی گئیاں۔ ایمل کانسی’ خالد شیخ’ یوسف رمذی’ عافیہ صدیقی تے بے شمار محب وطن پاکستانی حکمراناں دی ہوس دا شکار ہوئے۔ ریمنڈ ڈیوس’ کلبھوشن یادیو’ ابھی نندن’ آسیہ جیسیاں دے متعلق ساڈے حکمراناں نے قانون نوں موم دی نک بنا دتا۔ موجودہ حکومت نے فرمانبرداریاں دے ریکارڈ توڑدتے مگر امریکہ نے پاکستان اتے کیہ مہربانی کیتی؟ کہڑی مدد کیتی؟ کہڑے ڈالر بھیجے؟ حد تاں ایہہ اے کہ آئی ایم ایف دے اگے سجدہ ریز ہو جان دے باوجود تال مٹول چل رہی اے۔
عمران خان دی حکومت محض ایس لئی گئی کہ عمران خان نے ہر قدم اتے جھوٹ بولیا۔ لوکاں نوں سبز باغ وکھائے’ بہکایا تے محض تقریراں کیتیاں مگر ڈیلیور کجھ نہیں کیتا۔ مہنگائی مسلط کیتی مگر ہن تے مہنگائی دے سارے ریکارڈ ٹٹ گئے تے جدوں وی مہنگائی آندی ا ے تے لازماً حکومت جاندی اے۔ ایہناں بدترین حالات وچ ہن امریکہ ساڈی مدد کیوں نہیں کر رہیا؟ پاکستان وچ کوئی مڈل کلاس یا غریب’ اعلیٰ تعلیم یافتہ’ شریف تے ایماندار بندا اج تک حکمران نہیں بن سکیا اے تے ایسے وجہ نال اج پاکستان دا ایہہ حال اے۔ عوام نوں ہوش دے ناخن لینے چاہیدے نیں تے نام نہاد اشرافیہ نوں ووٹ دین دا بائیکاٹ کرنا چاہیدا اے۔