جنگ نامہ حضرت امام حسین

دنیا جہان تے جتنیاں وی جنگاں ہوئیاں ایہناں دے پچھے کجھ نہ کجھ نظریے پائے ویندے نیں۔ جداں کوئی جنگ کسی نظریے دی بنیاد تے لڑی ویندی اے اوس لئی لوکاں نوں لڑائی کان اکٹھا کرنا بہوں سوکھا ہوندا اے۔ جیویں کہ عقیدے اتے لڑیاں جاون آلیاں لڑائیاں دے اثرات چوکھے ملدے نیں۔
کجھ لڑائیاں طاقت دے بل بوتے لڑیاں گئیاں اپنے آپ توں نیویں وکھاون لئی تے اپنا رعب طاقت منواون لئی لڑیاں گئیاں جہناں وچ لکھاں دی گنتری وچ بندیاں دی قتلامی ہوئی۔ ووہٹیاں دے سہاگ اجڑے کئی بھیناں دے ویر تے ماواں دے پتر مارے گئے۔ ہک شاہی نے ودجھی نوں لتاڑن کان لشکر کشی کیتی مار دھاڑ ہوئی۔ دھرتی نے لہو نال اپنی تس مکائی۔ انساناں دی کھوپڑیاں دے مینار بنا کے اپنی عظمت دے جشن منائے گئے۔ شراب کباب تے شباب دیاں محفلاں سجا کے موئے بندیاں تے کیتے جاون آلے ویناں نوں دبایا گیا تے انسانی قدراں دی پامالی کیتی گئی۔ کئی جنگاں ویر اگاڑن لئی لڑیاں گئیاں۔ کئی مذہب تے عقیدے دے پرچار تے بچا لئی لڑیاں گئیاں تے ایہناں دے اثرات صدیاں توں انسانی حیاتی تے موجود نیں۔ جدوں توں ایہ دنیا بنی ادوں توں لئے کے ھن تائیں وِن گانجیاں لڑائیاں ہوئیاں جہناں دے نظریے وکھو وکھ رہے۔ عقائد دی بنیاد تے وی لڑیاں جاون آلیاں لڑائیاں دی گنتری وی چوکھی ساری اے۔ آپو آپ نظریاں تے طاقتاں دیاں لڑائیاں نوں اس ویلے دے شاعراں نے اس نوں نظم دے رنگ وچ بیان کر کے لوکاں دے دلاںتے نقش کر چھوڑیا اے۔ مذہبی لکھے گئے جنگ نامے سب توں ڈھیر مقام کربلا وچ ہوون آلی جنگ وچ امام حسین دی شہادت تے لکھے گئے جنگ نامے چوکھے مشہور ہوئے۔
کربلا دے حوالے نال جتنے وی جنگ نامے لکھے گئے دوجھے لکھے جنگ نامیاں نالوں چوکھی نامناں کھٹ چکے نیں۔ کربلا وچ لڑی جان والی لڑائی حق تے باطل دی جنگ ہائی تے دوجا ایہ عقیدے دی بنیاد تے لڑی گئی اے۔ اس جنگ وچ ہک پاسیوں بہتر 72 نیں تے دوجے پاسیوں ہزاراں تے لکھاں دی تعداد اچ لشکر ہائی۔
ایہ جنگ کربلا دے میدان اچ لڑی گئی۔ اس وچ امام حسین دے نال بہتر (72) جانثاراں وچ بُڈھڑے، جوان، مس لاہندے گبھرو، کھارے چڑھدے گھوٹ تے چھیہاں مہینیاں دا ہک نینگر وی ھا۔ جہڑا اس جنگ وچ ماریا گیا۔ اس چھیہاں مہینیاں دے نینگر نوں ظالماں تیر مار کے ماریا۔ تیر وی اوہ ماریا جہڑا جنگاں وچ گھوڑیاں تے ہاتھیاں نوں مارن واسطے بنیا سی۔ (جاری اے)