جنگ نامہ حضرت امام حسین

Syed Tahir Shirazi

ایہ جنگ دیہیں دے کجھ حصے وچ مک گئی خیمیاں نوں بھاہ لادتی گئی۔ امام حسین شہید ہو گئے۔ ایہناں دیاں زنانیاں قیدی کر کے شام لئے گئے تے فتح دا جشن مناندے رہے۔ اس جنگ وچ نواسہ رسول نوں بے دردی نال شہید کیتا گیا۔ اس سارے منظر نوں ساڈے دھرتی دے شاعراں نے سوہنے تے سچجے ڈھنگ نال تریخی واقعات تے روایت نال جوڑ کے لکھیا اے ایہناں وچ رثائی عنصر چوکھا ملدا اے۔
اج وی جدوں کربلا دا واقعہ بیان کیتا جاندا اے تاں اس دے سنن نال بے وس ڈاکراں نکلدیاں نیں۔ اس واقعہ نوں شاعراں نے مرثیے، چو مصرعے، نوحہ، ذوالجناح دی صورت وچ لکھیا اے۔ اس واقعے نوں بیان کرن والے جدوں بیان کردے نیں چاہے اوہ نثر دی صورت ہووے یا بند دی صورت یا نوحے دا رنگ ہووے سنن آلیاں تے ایہناں دا ڈھیر سارا اثر ہوندا اے تے اوہدیاں ہنجوں وس لڑپوندیاں نیں۔ نوحے نوں ماتمی حلقے وچ پڑھیا جاندا اے۔ اس وچ جذبیاں دا بیان ظلماں دا ذکر، رشتیاں دی فطری محبت تے دکھاں نوں بیان کیتا جاندا اے۔
جنگ نامہ امام حسین دا فنی فکری ویروا
جنگ نامیاں دا فنی تے فکری ویروا کرن لئی ایہ گل چیتے رکھن ضروری اے جوں جنگ نامیاں دی ہک اپنی تکنیک ہوندی اے۔ پہلاں جتنیاں جنگاں تے لڑائیاں دا ذکر ملدا اے ایہناں دے لڑائیاں دے حالات تے واقعات وار دے انگ وچ بیان کیتے جاندے رہے جس وچ ایہناں قوماں دی وڈی تے بہادراں دی بہادری دے قصے تے ایہناں دا خاندانی پس منظر دسیا جاندا اے۔ ایہناں جنگاں تے لڑائیاں وچ رثائی عنصر دا وجود کوئی نہیں پایا ویندا پر مذہبی حوالے نال لکھے گئے جنگ نامے چوکھی شہرت حاصل کردن۔ ایہناں وچ جذبات نگاری، رثائی عنصر چوکھا ملدا اے۔ اس نوں بیان کرن والا جدوں واقعہ نوں بیان کردا اے تاں ایس نوں سنن والا بے وس ہو کے روون لگ پوندا اے۔
ہنن تک جتنے وی جنگ نامے لکھے گئے ایہناں وچ چوکھی گنتری وچ لکھے جان والے جنگ نامے کربلا تے شہادت امام حسین دے حوالے نال ملدے نیں۔
زبان تے بیان
زبان تے بیان دے ورتارے توں ای شاعر دے فنی اسلوب دا نتارا ہوندا اے۔ شاعر نے کہڑی زبان ورتی اے۔ اوہ زبان مشکل اے یا سادہ تے آسان اے۔ اوس دی شاعری وچ ورتی گئی زبان تکنیکی زبان ہے یا عام فہم سادہ تے لوکائی تے عام بول چال تے ورتارے دی بولی اے۔
ایہ گل تاں منی پرمنی اے جہڑی گل عام لوکائی دی سادہ تے گھروگی زبان اچ گل کیتی ونجے اوہا تاں چر تائیں یاد رہ ویندی اے۔ اوہے قصے کہانیاں یا واقعات یاد رہ ویندے ہن جہڑی گل ایہناں اپنی ماں بولی وچ کیتی گئی ہووے۔ دوجھیاں زباناں دیاں گلاں چراں تائیں کدی وی یاد نہیں رہندیاں۔ فقیر میاں رحمت دے لکھے جنگ نامے امام حنیف دی زبان دی لوکائی دی زبان اے تے اس دے بیان کرن دا انداز وی سادہ تے سوکھا اے۔ ایہناں دی ورتی زبان ایہناں دا اپنی وسوں نال پیار تے جڑت ویکھن نوں ملدا اے۔ ایہناں سادہ صاف تے ٹھیٹھ لوکائی دی زبان نوں ورت کے اپنی گل نوں سمجھان لئی سوکھیائی پیدا کیتی اے۔ ایہناں دی شاعری وچ ورتی گئی زبان گھروگی تے دیہاتی وسوں دی اے۔
اس گل دی پکیائی تے ایہناں دے بیان کرن دی سچیائی لئی ایہناں دی کلام دے ونکی ویکھنے آں۔ (جاری اے)

اپنا تبصرہ گھلو