خواجہ عبدالوہاب سچل سرمست

سراں دے تاج تے ہفت زبان شاعر دا اصل ناں خواجہ عبدالوہاب تے لقب سچل سرمست سی۔ آپ رح ہوراں خواجہ صلاح الدین دے گھر 1152ھ /1739 نوں درازا شریف ریاست خیرپور اج دے ضلع خیرپور،سندھ وچ پیدا ہوئے۔شجرہ نسب انتالیویں پشت وچ حضرت عمر فاروق رضہ ہوراں نال جا ملدا اے۔چھ ورھیاں دی عمر سی جدوں والد دا انتقال ہویا تاں داداخواجہ محمد حافظ نیں آپ رح دی پرورش کیتی۔آپ دی پرورش اک حبشن عورت نیں کیتی جس نوں آپ ہوراں “کالی اماں” آکھدے سن.14ورھیاں دی عمر وچ دادا دا سایہ وی سر توں اٹھ گیا۔اوہدے مگروں چاچا عبدالحق سائیں ہوراں نیں پرورش کیتی تے صوفی سالک دیاں منزلاں تیکر اپڑا چھڈیا۔آپ رح ہوراں ست ورھیاں دے سن جدوں دادا نیں شاہ عبد الطیف بھٹائی ہوراں دی خدمت وچ پیش کیتا تے انہاں آپ نوں ویکھ کے آکھیا” اساں جیہڑا خم چڑھایا ایاوہدا ڈھکنا ایہہ بچہ اتارے گا تے اک دن بہت وڈا روحانی مرتبہ حاصل کرے گا۔”
آپ دا قد درمیانہ،رنگ بادامی،وڈیاں وڈیاں روشن چوڑیاں اکھاں،لمے وال تے چوڑا متھا سی۔ کپڑے ستھرے تے سادہ ہوندے سن،روٹی گھٹ کھاوندے سن تے فرش اتے سمدے سن۔چاچا عبدالحق سائیں رح ہوراں نیں سندھی،فارسی تے عربی زبان دی تعلیم دین دے بعد مولوی عبداللہ قریشی ہوراں کول قرآن،حدیث،تفسیر،فقہ تے دوجے اعلی عصری و مذہبی علوم حاصل کرن لئی بھیجیا۔آپ رح نیں 14 ورھیاں دی عمر وچ حفظ کیتا ۔اپنے استاد عبداللہ قریشی رح ہوراں نال گوڑھی محبت سی تے انہاں دی قبر آپ دے مقبرے دے سامنے صحن وچ موجود اے۔مشہور اے پئی آپ دنیا دیاں محفلاں توں دور ریہندے سن تے گھٹ بولدے سن اس لئی آپ نوں لوک سچو یا سچل کیہندے سن۔سچل سرمست ہوراں دی عمر 40 ورھیسی جدوں اپنے چاچا عبدالحق سائیں ہوراں دی بیعت کیتی، دونواں نوں اک دوجے نال انس سی۔آپ دا ویاہ وی چاچے دی دھی نال ہویا تے صرف اک پتر سی۔گھر والی کجھ سالاں بعد اللہ نوں پیاری ہو گئی تے دوجے ویاہ ول کدی نہ سوچا۔سچل سرمست رح ہوراں خدا ترس ،صابر، شاکر،نرم دل،نرم گفتار سن۔محفل سماع دے شوقی سن ۔فقیر نانک رح،قادر بخش بیدل رح،عثمان فقیر رح تے میاں محمد صالح رح ہوراں آپ دے شاگرد سن۔اک واری ریاست خیرپور دے حاکم میر رستم خان دا پتر میر میر محمد حسن بیمار ہوگیا تے آپ رح نوں دعا لئی بلوایا گیا۔سچل سرمست رح ہوراں نیں آکھیا میر رستم خان تیرے پتر لئی میں اپنا پتر قربان کردا واں۔اوہدے لئی دعا کیتی تے او ٹھیک ہو گیا پر آپ رح دا پتر فوت ہو گیا۔اوہ خاندان آپ رح دا دل وجان نال احترام کردا سی۔سچل سرمست رح ہوراں دا وصال 13/14رمضان المبارک 1242ھ/1829 نوں ہویا۔آپ رح ہوراں دا عرس ہر سال 14 رمضان المبارک نوں گوٹھ درازا شریف قصبہ رانی پور ضلع خیرپور وچ وڈی دھوم دھام نال منایا جاندا اے۔ حضرت صاحب ہورں نیں اپنا کلام اگ دے وچ سٹ دتا سی ۔آپ کوئی روایتی شاعر نیں سن سگوں جماندروں شاعرسن۔آپ رح دی شاعری عربی،فارسی،پنجابی،سندھی، سرائیکی ، ہندی تے اردو وچ ملدی اے۔ اک اندازے دے مطابق شعراں دی تعداد لگ بھگ 9لکھ 36 ہزار 600 اے تے اتنے شعر اج تیکر کسے زبان دے لکھاری نہیں لکھے ہون گے۔آپ رح دا کلام مرزا علی قلی بیگ ہوراں نیں1902 وچ آگرہ توں رسالے وچ شائع کروایا تیفارسی کلام نوں پہلی وار میر علی مراد خان نیں 1894 نوں چھپوایا۔پنجابی تے سرائیکی مجموعے وی چھپ چکے نیں۔شاعری صنفاں وچ کافی،ابیات،سی حرفی،مثنوی،رباعی، مسدس ،مخمس ،مولود ،جھونسہ تے گھڑولی قابل ذکر نیں۔ کتاباں وچ مثنوی عشق نامہ،مثنوی درد نامہ،مثنوی گدا نامہ،مثنوی تار نامہ،مثنوی وحدت نامہ،مثنوی وصیت نامی تے مثنوی رازنامہ شامل نیں۔آپ رح ہوراں نیں شاعری وچ ابن العربی دے نظریہ ہمہ اوست دا پرچار کیتا اے اس توں وکھ رومانی داستاناں تیتہذیب و ثقافت دیاں گوڑھیاں گلاں دی دس پائی،عشق حقیقی دا تھاں تھاں تے ذکر اے۔
عشق لگا گھر وسر گیوسے مطلب سدھ تھیوسے۔
حاصل تھیوسے سارا جو کجھ اپنے آپ منگیوسے۔
سود زیاں توں میاں سچل ہن تاں جھٹ پیوسے۔
٭٭٭٭٭٭٭٭٭٭٪