والدین دی عظمت

پچھلے کجھ دناں توں اک آزمائش وچ آں’ والد گرامی دی طبیعت ناساز ہوئی تے اک نجی ہسپتال وچ ویلا لنگھایا’مریضاں نال بھریا ہویا ہسپتال ایس گل دی غمازی کردا اے کہ اسیں صحت عامہ وچ بہت پچھے نیں’ بیماری تے شفااللہ دے ہتھ وچ اے’ انسان جدوں وی بیمار ہوندا اے تے شفایابی اللہ تعالیٰ ای عطا فرماندے نیں’ ڈاکٹرز حضرات نوں مسیحا آکھیا جاندا اے کیوں جے اوہ انساناں دی جان بچاندے نیں’ ایس ہسپتال وچ ڈاکٹر نور العارفین نال ملاقات ہوئی’ اوہ اپنے شعبے دے انتہائی قابل ڈاکٹر نیں۔ اوہ علاج دے نال نال مریضاں دی جیب دا خیال وی رکھدے سن۔ کاش باقی ڈاکٹر وی اوہناں کولوں کجھ سکھ سکن۔ اج دا کالم والدین دی عظمت تے خدمت اتے لکھ رہیا واں تے دین اسلام سانوں اوہدی کیہ تائید کردا اے ملاحظہ فرمائو۔ قرآن پاک وچ اللہ تعالیٰ فرماندے نیں کہ تیرا پروردگار صاف صاف حکم دے چکیا اے تسیں اوہدے سوا ہور کسے دی عبادت نہ کرنا تے ماں پیو دے نال احسان کرنا۔ جے تیری موجودگی وچ اوہناں وچوں اک یا دونویں بڑھاپے وچ پہنچ جان تے اوہناں دے اگے اف وی نہ آکھنا’ نہ اوہناں نوں ڈانٹ ڈپٹ کرنا بلکہ اوہناں دے نال ادب و احترام نال گل کرنا (بنی اسرائیل:23)
اللہ تعالیٰ فرماندے نیں: تے اللہ دی عبادت کرو تے اوہدے نال کسی نوں شریک نہ ٹھہرائو تے والدین دے نال چنگا سلوک کرو’ نیز رشتہ داراں’ یتیماں’ مسکیناں’ قریب والے پڑوسی’ دور والے پڑوسی’ نال بیٹھے یا (نال کھڑے) ہوئے شخص تے راہگیر دے نال تے اپنے غلام باندیاں دے نال وی (چنگا برتائو رکھو) بیشک اللہ کسی اتران والے شخی باز نوں پسند نہیں کردا۔ (النساء 36)
اللہ تعالیٰ ہور فرماندے نیں۔ لوک تہاڈے کولوں پچھدے نیں کہ اوہ (اللہ دی خوشنودی لئی) کیہ خرچ کرن؟ تسیں آکھ دیو کہ جہڑامال وی تسیں خرج کرو اوہ والدین’ قریبی رشتہ داراں’ یتیماں’ مسکیناں تے مسافراں لئی ہونا چاہیدا اے تے تسیں بھلائی دا جہڑا کم وی کرو اللہ اوہدے توں پوری طرح باخبر اے(البقرہ:215)
رسول کریمۖ نے وی سانوں والدین نال حسن سلوک دا حکم دتا اے۔ آپۖ نے فرمایا: کیہ میں تہانوں سب توں وڈے گناہ دساں؟ لوکاں نے عرض کیتا’ کیوں نہیں یارسول اللہۖ’ آپۖ نے فرمایا: اللہ دا شریک نہ ٹھہرانا تے نہ والدین دی نافرمانی کرنا ۔(صحیح بخاری)
دین اسلام وچ تے ماں پیو دی نافرمانی تے کجا’ ناراضگی دے اظہار تے جھڑکن
توں وی روکیا گیا اے تے ادب دے
نال نرم گل بات دا حکم دتا گیا اے۔ اللہ تعالیٰ فرماندا اے تے اپنے والدین نوں جھڑکو نہ تے اوہناں نال نرمی نال پیش آئو۔ نیز اللہ تعالیٰ پوری زندگی والدین لئی دعا کرن دا حکم دیندا اے۔ چنانچہ فرمایا: اے میرے رب’ میرے والدین اتے رحم کر جیویں بچپن وچ اوہناں نے میرے اتے رحم کیتا۔ (بنی اسرائیل:25)
صحیح بخاری وچ حضرت عبداللہ بن مسعود فرماندے نیں کہ میں رسول اللہۖ کولوں دریافت کیتا کہ اللہ نوں کہڑا عمل بوہتا محبوب اے؟ آپۖ نے ارشاد فرمایا: نماز نوں اوہدے ویلے تے ادا کرنا۔ حضرت عبداللہ فرماندے نیں میں آکھیا اوہدے مگروں کہڑا عمل اللہ تعالیٰ نوں بوہتا پسند اے؟ تے آپۖ نے فرمایا: والدین دی فرمانبرداری۔ صحیح مسلم وچ حضرت عبداللہ بن عمر فرماندے نیں کہ اک شخص رسول اللہۖ دے کول آیا تے آکھن لگیا کہ میں اللہ تعالیٰ کولوں اجر دی امید دے نال آپۖ دے نال ہجرت تے جہاد کرن لئی بیعت کرنا چاہنا واں۔ رسول اللہۖ نے فرمایا: کیہ تیرے ماں پیو وچوں کوئی زندہ اے؟ تے اوس شخص نے آکھیا: دونویں حیات نیں۔ نبی اکرمۖ نے اوس شخص نوں پچھیا: کیہ توں واقعی اللہ تعالیٰ کولوں اجر عظیم دا طالب ایں؟ اوہنے آکھیا ‘ہاں۔ تے آپۖ نے ارشاد فرمایا: اپنے والدین دے کول جا تے اوہناں دی خدمت کر۔
صحیح بخاری وچ اک حدیث اے کہ اک شخص نے رسول اللہۖ دی خدمت وچ حاضر ہو کے دریافت کیتا کہ میرے حسن سلوک دا سب توں بوہتا مستحق کیہڑا اے؟آپۖ نے ارشاد فرمایا’ تیری ماں۔ اوس شخص نے پچھیافیر کون؟ آپۖ نے ارشاد فرمایا: تیری ماں۔ اوہنے پچھیا فیر کون؟ آپۖ نے ارشاد فرمایا تیری ماں۔ اوہنے پچھیا فیر کون؟ آپۖ
نے ارشاد فرمایا تیرا پیو۔ ایسے طرح جامع ترمذی وچ آندا اے کہ رسول اللہۖ نے فرمایا: پیو جنت دے بوہیاں وچوں بہترین بوہا اے۔ چناںچہ تہانوں اختیار اے خواہ (اوہدی نافرمانی کر کے تے دل دکھا کے ) اوس بوہے نوں ضائع کر دیو یا اوہدی فرمانبرداری تے اوہنوں راضی رکھ کے اوس بوہے دی حفاظت کرو۔ مسند احمد بن حنبل وچ درج اے کہ رسول اللہۖ نے فرمایاجہڑے شخص نوں ایہہ پسند ہووے کہ اوہدی عمر دراز کیتی جاوے تے اوہدے رزق نوں ودھا دتا جاوے اوہنوں چاہیدا اے کہ ا پنے والدین دے نال چنگا سلوک کرے تے رشتہ داراں دے نال صلہ رحمی کرے۔ حدیث وچ آپۖ نے فرمایا:رب دی رضامندی والد دی رضامندی وچ اے۔ رب دی ناراضگی والد دی ناراضگی وچ اے۔ اللہ تعالیٰ کولوں دعا اے کہ اوہ والدین دی کماحقہ خدمت تے اطاعت کرن دی توفیق عطا فرماوے تے جہناں دے والدین بیمار نیں اللہ اوہناں نوں شفایابی تے برکت والی عمر عطا فرماوے۔ آمین۔