واقعی دنیا مکافات عمل اے

اک فیملی میاں بیوی تے چار بچیاں تے مشتمل سی۔ گھر وچ پالتو کتا وی سی۔ فیملی ممبران نوں سیرسپاٹے دا بڑا شوق سی اوہناں دِناں مشہور کروز ٹائی ٹاننک شپ دا بڑا چرچا سی ایس شپ وچ شاپنگ سنٹر وکھووکھ ریسٹورنٹ’ بارز’ جم تے کیسینو وی سن۔ فیملی دے نال جان والیاں لئی خاص رعایت سی۔ ایس فیملی نے رَل کے اوس بحری جہاز تے دنیا دی سیر دا پروگرام بنایا۔ ساریاں نے اوہدے تے سیرو تفریح تے جان دی رضامندی ظاہر کیتی۔ فیملی سربراہ نے ایڈوانس ٹکٹ لئے۔ ہن جہاز دی روانگی دا بے تابی نال انتظار سی۔ اجے چار دن باقی سن کہ پالتو کتے نے چھوٹے بیٹے نوں وڈھ لیا جہنوں کلینک لے جایا گیا۔ ڈاکٹر صاحب نے مکمل آرام دا مشورہ دتا۔ فیملی نے ایس حالات وچ نہ جان دا فیصلہ کیتا۔ بحری جہاز دے ٹکٹ واپس کرن دی کوشش کیتی تے دسیا گیا کہ ایہ ناقابل واپسی نیں۔ ماں نے کہیا میں بیٹے دے پاس رک جانی آں باقی سارے چلے جائو ایس لئی ماں تے بیٹا گھر تے رہے باقی بچے اپنے والد صاحب دے نال اوس شپ تے ٹر گئے۔ سفر دوران ایہ ہر ویلے اوہناں نوں مس کردے رہے۔ تن چار دن دا سفر کر چکے تے اوہناں دی کمی شدت نال محسوس ہون لگ پئی۔ ساریاں نے واپسی دا پلان بنایا جدوں ایہ بحری جہاز فرانس دی بندرگاہ اپڑیا تے فیملی ممبران اوتھے رک گئے تے جہاز نوں خیرباد کہہ کے گھر واپسی دا راہ لیا۔ ہن واپسی بائی روڈ ہوئی۔ گھمدے پھردے کجھ دناں دے بعد گھر اپڑے۔ ساریاں نوں پالتو کتے تے غصہ سی کہ جے ایہ نہ وڈھدا تے اسیں سارے ایس ویلے دنیا دی سیر کر رہے ہوندے؟ کجھ ای دناں دے بعد ٹی وی تے بریکنگ نیوز چلی کہ مشہور بحری جہاز سمندروچ ڈب گیا۔ ایہ سن دیاں ساریاں نے اک دوجے نوں گلے لایا سی تے پالتو کتے نوں غیرمعمولی پیار کیتا کہ جے ایہ نہ وڈھدا تے ایس ویلے اسیں سارے اوس جہاز وچ ڈب چکے ہوندے۔ ایس کتے دی حرکت نے سانوں حادثے توں بچا لیا۔
کہیا جاندا اے انسان جدوں دوجیاں لئی چنگا سوچدا اے تے اللہ آپ ای خیر دا راہ بنا دیندا اے۔ تہاڈا رب جس چیز نوں تہاڈے نیڑے کر دیوے اوہدے وچ حکمت لبھو تے جس چیز نوں تہاڈے توں دور کر دیوے اوہدے تے صبر اختیار کرو۔ اللہ دے فیصلیاں نوں سمجھنا انسان دی عقل توں باہر اے۔ بچ جان والی فیملی دی اک چنگی عادت ایہ سی کہ ایہ سب اک دوجے نال مخلص سن۔ سچے سن’ پیار کردے سن۔ فیر اسیں ایہ وی کہہ سکنے آں قدرت دے کول ایہناں دیاں عمراں وچ اضافہ لکھیا ہویا سی۔ زندگی موت دی حفاظت کردی اے۔ وقت توں پہلاں نہیں آن دیندی۔ ایتھے وی کجھ انج ای سی۔ کتا تے اک وسیلہ بنیا جنہے اپنے مالک نوں وڈھ لیا سی۔ پالتو جانور کدی وی انج نہیں کردے۔ کتا تے ناں ای وفاداری دا اے۔ ایسے طرح انسان جے اپنے بندیاں دی خدمت کردا اے اوہناں لئی کم کردا اے بھاویں اوہ کسے دا باس ہووے یاں قوم دا لیڈر لوک اوہدی عزت کردے نیں۔ اوہدے ریٹائر ہون تے روندے نیں۔
جرمنی دی لیڈر انجیلا مرکل سولاں ورھے تک اقتدار تے رہیاں۔ ایس عرصے وچ اوہنے اپنے کسے رشتے دار نوں ریاستی عہدے تے تعینات نہیں کیتا ایہ اوہدی خوبیاں وچوں اک سی۔ اوہنے رئیل اسٹیٹ’ لگژری گڈیاں’ پلازے’ فارم ہائوس تے نجی جہاز نہیں خریدے۔ غیر ملکاں وچ پراپرٹیاں نہیں بنائیاں۔ سولاں ورھے تک اوہنے اپنی الماری دا انداز نہیں بدلیا۔ پریس کانفرنس وچ اک صحافی نے سوال کیتا کہ تسیں ہمیشہ اک ای سوٹ پایا’ کیہ کوئی دوجا سوٹ نہیں؟ جواب دتا میں اقتدار مری حیثیت ریاست دے ملازم ورگی اے۔ کسے صحافی نے پچھیا سنیا اے گھر دے کم کاج تسیں آپ کردیاں جے’ کہیا جی ہاں’ انج ای اے۔ میں تے میرا شوہر رَل کے کپڑے دھونے آں۔ دسیا ساڈے گھر کوئی ملازم نہیں۔ سارے کم اسیں آپ کرنے آں۔ ایہ عام شہریاں وانگوں عام جہے اپارٹمنٹ وچ رہندیاں نیں جتھے اوہ چانسلر منتخب ہون توں پہلاں رہندیاں سن۔ یورپ دی چانسلر انجیلا مرکل ہمیشہ اقدار’ اصولاں’ دیانت داری’ ہمدردی نال سچ تے چلن والی قیادت بن کے رہیاں۔ اقتدار توں الوداع ہون تے اپنے گھر دی بالکونی تے باہر آئیاں تے پوری رعایا نے کھلو کے کئی منٹ تک تاڑیاں ماریاں’ لوک روندے رہے۔ کجھ حکمران دنیا وچ اجہے وی آئے جہناں دے جان دے بعد ستائے ہوئے لوکاں نے اوہناں نوں برے الفاظ نال الوداع کیتا۔ واقعی دنیا مکافات عمل اے۔
کوئی تو ایسا ہو زندگی میں
جو لرزشوں کو قرار بخشے
خزاں رسیدہ سنہرے پتوں کی
سسکیوں کو بہار بخشے
کوئی تو ایسا ہو زندگی میں
جو مدتوں کا عذاب توڑے
جو رنجشوں کے حساب چھوڑے
جو درد بانٹے ، جو آہ سن لے
ستم کے مارے غریب دل کی
اذیتوں سے بھری غزل پر
تڑپتے اشکوں کی واہ سن لے
کوئی تو ایسا ہو زندگی میں
امام جعفر صادق دے فرمان دے نال اجازت: آپ نے فرمایا اللہ کریم نے ہر بندے دی موت دا دن مقرر کر دتا اے۔ کجھ لوک اجہے وی ہوندے نیں جو اپنی نیکیاں پاروں موت دے دن وچ توسیع کروا لیندے نیں۔٭٭