انجمن ترقی پسند مصنفین تے کہانی گھر دے پربندھ ہیٹھ شاعر، کہانی کار تے نقاد خالد حسین تھتھال دی پہلی برسی دا اِکٹھ

”انجمن ترقی پسند مصنفین” تے ”کہانی گھر” دے پربندھ ہیٹھ پنجابی دے منے پرمنے شاعر ‘ کہانی کار’ نقاد تے دانشور خالد حسین تھتھال دی پہلی برسی اتے اچیچی تقریب دا پربندھ کیتا گیا۔ خالد حسین دی علمی تے ادبی خدمات دے حوالے نال جاوید آفتاب ‘ آزاد مہدی’ وقار گل تے ابرار ندیم نے گل بات کیتی۔ راقم نے اوہناں دی حیاتی تے کم دا تعارف پیش کردیاں ہویاں آکھیا کہ خالد حسین تھتھال’ مہمند چک’ کھاریاں ضلع گجرات وچ 23نومبر 1953 وچ پیدا ہوئے۔ اوہناں نے شروع دی تعلیم اپنے ابائی قصبہ توں تے ثانوی تعلیم قریبی شہر توں حاصل کیتی تے بیڑی چھیتی ناروے’اوسلو چلے گئے جتھے اوہناں نے اقوام متحدہ دے ڈائریکٹر جنرل آفس جنیوا دی انفارمیشن سروس توں گریجوایٹ کورس کیتا۔ ناروے ریڈیو دی اردو سروس توں کئی سال تک معلوماتی پروگرام ”بات سے بات” کردے رہے۔ ادبی سنگت’ اوسلو نوں کئی سال تک چلاندے رہے۔ اوہناں نے ناروے توں تعلیم حاصل کیتی تے اوتھے دے بعض سکولاں وچ درس و تدریس نال وی جڑے رہے۔ اوہناں نوں اپنی ماں بولی پنجابی نال خاص لگائو سی تے اپنے وطن نال وی۔ ایہو وجہ اے کہ اوہ سال وچ اک واری پاکستان دا چکر ضرور لاندے۔ اوہ پنجابی وچ شاعری کردے سن۔ کہانیاں تے مضمون لکھدے سن۔اوہناں دی پاکستانی پنجاب دے نال نال دنیا بھر وچ موجود پنجابی دنیا وچ خاص پہچان سی تے اوہ پنجابی حلقیاں وچ بطور خاص رلت کردے’ پنجابی ادبی دنیا وچ اوہناں نوں بے حد احترام دتا جاندا سی۔ جاوید آفتاب نے گل بات کردیاں آکھیا کہ میری اوہناں نال ملاقات زاہد حسن دے ذریعے ہوئی لیکن ایہہ اوہناں دے اخلاق’ محبت تے ادب نال کمٹمنٹ دے کارن ای سی کہ کئی سال اوہناں نال تعلق قائم رہیا۔ اوہ اک محبت کرن والے تے دوجیاں دا خیال رکھن والے انسان سن تے پنجابی دے نال اردو وچ وی لکھدے رہندے۔ اوہ جدوں وی لہور آندے تے انجمن ترقی پسند مصنفین وچ بطور پروہنے شاعر رلت کردے تے اپنی تازہ نظماں تے غزلاں نال محظوظ کردے۔ اوہناں نے پنجابی شاعری دی چار’ اک کہانیاں تے اک مضمون دی کتاب لکھی جہدے وچ پنجاب دی تہذیب و ثقافت’ ادب تے سفر دے حوالے نال اہم مضمون شامل نیں۔ آزاد مہدی دا آکھنا سی کہ مینوں یاد اے کہ نویں لو’ انملے پھل’ تلی اتے چھالے’ بھنڈا بھنڈار’ سفنے بیچے برف وچ تے ”جیون جوبن رت بہار” دے ایس عظیم ادیب دے نال کئی شاماں پرانی انارکلی تے پاک ٹی ہائوس وچ گزریاں تے اوہناں دے نال بحث و تمحیض وچ ویلا لنگھیا۔ وقار گل نے گل بات کردیاں آکھیا کہ اتفاق دی گل اے کہ میں اوہناں دی شروع دی کوئی کتاب نہیں پڑھی لیکن اوہناں دا آخری مجموعہ ”جیون جوبن رت بہار” مینوں زاہد حسن نے پڑھن لئی دتا۔ جدوں میں ایہدا مطالعہ شروع کیتا تے ایہنوں چھڈ ای نہیں سکیا تے ہن ایہہ مجموعہ میری پسندیدہ کتاباں دے ریک وچ پیا اے تے اکثر میرے زیر مطالعہ رہندا اے۔خاص طور تے ایس مجموعہ وچ شامل اوہناں دی نظماں پنجاب دے تہذیبی تے ثقافتی اثاثے دی آئینہ دار نیں۔ ابرار ندیم احمد نے خالد حسین تھتھال دے نال اپنی ملاقاتاں دے علاوہ اوہناں دے ادبی کم دے حوالے نال گل کردیاں ہویاں آکھیا کہ اوہ ویلے توں بہت پہلاں داغ مفارقت دے گئے۔ اگست ای دی سولہ تریخ نوں پچھلے سال اوہناں دی وفات ہوگئی۔ اوہناں دی ایس ناگہانی وفات پاروں پنجابی ادب نوں بہت نقصان ہویا۔ اخیر وچ اوہناں دے ایصال ثواب لئی دعا کیتی گئی تے اوہناں دے ادبی کم نوں ہمیشہ اہم پنجابی ادب دے حصہ دے طور تے یاد رکھن دے عزم دا اظہار کیتا گیا۔