پروفیسر مفتی عبدالرئوف خان… عظمت دا روشن مینار

ممتاز پاکستانی ادیب’ نقاد’ محقق’ شاعر’ خطیب’ ماہر فنون لطیفہ’ لسانیات تے دانشور پروفیسر مفتی عبدالرئوف خان نے 29اکتوبر 2012بمطابق 12ذوالحجہ 1434ھ دی درمیانی شب عدم دے کوچ لئی رخت سفر بنھ لیتا۔ گل چین ازل نے گلشن علم و ادب توں اوہ مہکدا پھل توڑ لیتا۔ جہدی عطر بینری نال پچھلے 65 ورھیاں توں اکناف عالم دا گوشہ گوشہ مہک رہیا سی۔ علم و ادب دا اوہ خورشید جہدی ضیا پاشیاں توں سفاک ظلمتاں نوں کافور کرن وچ مدد ملی۔ عدم دی بے کراں وادیاں وچ ہمیشہ لئی غروب ہو گیا۔
یہ کیا دست اجل کو کام سونپا ہے مشیت نے
چمن سے پھول چننا اور ویرانے میں رکھ دینا
پروفیسر مفتی عبدالرئوف خان 18اپریل 1945 نوں امرتسر (بھارت) وچ عبدالطیف خان دے ہاں پیدا ہوئے۔ تہاڈے والد نیک تے پارسا’ انسان ہون دے علاوہ تصوف نال خاص مناسبت رکھدے سن۔ والدہ وی پرہیزگار سن۔ والدین دے فیض دی وجہ نال دین اسلام نوں عمر بھر حز جان بنائے رکھیا ۔ جہناں نے بچپن دے زمانے توں عبدالرئوف خان دی تعلیم وتربیت ول خصوصی توجہ دتی تے اوس دور دی دستوری روایت دے مطابق دینی تے شروعاتی پرائمری درجات دی تعلیم شاہدرہ لہور توں دوائی۔ اوہناں دے وڈے بھرا عبدالقیوم خان جہڑے کہ گورنمنٹ کامرس کالج لہور دے پرنسپل رہ چکے نیں تے دوجے بھرا عبدالقدوس خان محکمہ واپڈا وچ جیالوجسٹ دے عہدہ اتے فائز رہے نیں۔ اوہناں گورنمنٹ ہائی سکول شاہدرہ لہور ای توں میٹرک دا امتحان 1960 وچ امتیازی نمبراں نال پاس کیتا۔ میٹرک کرن مگروں گورنمنٹ اسلامیہ کالج ریلوے روڈ لاہور وچ داخلہ لے لیتا۔ جتھوں 1962وچ P-46 گلی نمبر11′ گورونانک پورہ فیصل آباد انٹرمیڈیٹ دا امتحان پاس کیتا۔ اوہدے مگروںپنجاب یونیورسٹی اورینٹل کالج لاہور توں لسانیات دا تن سالہ آنرز کورس 1965 وچ پاس کیتا۔ 1966 وچ پنجاب یونیورسٹی لہور دے شعبہ فارسی دی ایم اے کلاس وچ داخلہ لے لیتا۔ 1967 وچ ایم اے فارسی فائنل وچ فسٹ کلاس کرن تے گولڈ میڈل حاصل کیتا۔ ایم اے فارسی دے دوران ملک دے کئی نامور ادیب اوہناں دے کلاس فیلوز بنے جہناں وچ نامور ادیب اقبال صلاح الدین دا نام اہم اے۔
1967 نوں گورنمنٹ کالج آف ایجوکیشن لہور توں فسٹ ڈویژن وچ بی ایڈ دا امتحان پاس کیتا۔ جد کہ 1968وچ ایم اے اردو دا امتحان وی پرائیویٹ طور تے اعزاز دے نال پاس کر لیتا۔ 1968 وچ مفتی عبدالرئوف خان دی پہلی تقرری محکمہ تعلیم وچ گورنمنٹ کالج بوچھال کلاں کلرکہار ضلع چکوال وچ بطور لیکچرار فارسی ہوئی۔ او بچپن ای توں غیر معمولی ذہانت دے مالک سن۔ قدرت نے ذہن’ مزاج تے طبیعت وچ علمی’ ادبی تے فکری توانائی بھر دتی سی۔ گورنمنٹ کالج بوچھال کلاں دی علمی’ ادبی سرگرمیاں وچ پیش پیش رہندے۔ نصابی تے ہم نصابی سرگرمیاں دے انچارج بنائے گئے۔ اوتھے بہت سارے مقرر تے چنگے لکھاری (ادیب) تیار کیتے۔ اوہناں دے شاگرد اوہناںنال ایس قدر مانوس سن کہ اک لما عرصہ گزرن مگروں وی شاگرد اوہناں نال رابطے وچ رہندے سن۔ اوس دور دے کجھ طالبعلم استاد بن کے شعبہ تعلیم و تدریس نال جڑے نیں۔
بوچھال کلاں نال ملحقہ پنڈ وچ کدھرے وی محفل نعت ہوندی’ محفل شب برات ہوندی’ محفل شب قدر ہوندی یا واقعہ کربلا دا ذکر کرنا مقصود ہوندا اوناں دے مداح سنن لئی میلاں دور وی لے جاندے۔ اوہناں دے شوق تے عقیدت دی وجہ نال رات دی تریکی وچ کٹھن سفر کرن تے مجبور ہو جاندے۔ بوچھال کلاں وچ چار سال اپنی تدریسی خدمات سرانجام دتیاں۔ اردو ادب دے نامور شاعر ادیب ڈاکٹر ریاض مجید اوہناں دے بوچھال کلاں کالج وچ کولیگ رہے نیں۔ ایہدے مگروں تبادلہ گورنمنٹ کالج لالہ موسیٰ ہو گیا جتھے آ کے وی اوہناں اپنے ہون دا بھرواں احساس دوایا۔ اوہناں دی سیماب صفت طبیعت وچ یکسوئی تے مزاج وچ ٹھہرائو نہیں سی۔ اوہ اک درویش صفت’ سادہ تے علم دوست انسان سی۔ لالہ موسیٰ وچ وی اپنی وکھری پہچان تے شناخت بنائی۔اوہناںنوں لمی نظماں لکھن اتے مکمل عبور حاصل سی۔ اکثر ویلے فی البدیہ نظماں پڑھ جاندے سن جہڑی کہ موقع محل دے مطابق ہوندیاں۔ مفتی عبدالرئوف خان دے فن آشنا تی مزاج شناس جاندے نیں کہ تسیں ہر دور وچ محبتاں ونڈیاں تے محبتاں سمیٹیاں نیں۔اوہ جتھے وی گئے اوتھے دوستاں تے ارادت منداں وچ وادھا ہوندا چلا جاندا۔اوہ اپنے شاگرداں دے پرخلوص ‘ قابل اعتماد دوست تے رازدان بن جاندے سن۔ کسے دی تعریف کردے تے قصیدے جئی تمکنت دے نال’ برائی تے کسے دی کدی کیتی ای نہیں۔ جے کسی نے ایسا سوال کر وی دتا تے ہتھ جھٹک کے اوہناں دا خاص انداز وچ” کیہ لینا” آکھنا لوکاں نوں غلط خیال چھڈن اتے مجبور کر دیندا۔ لالہ موسیٰ وچ اوہناں سنہری دور گزاریا۔ کسی تقریب وچ اپنی تقریر دے ذریعے ذہناں دے زنگ اتار رہے ہوندے تے کسی تقریب وچ اپنی کسی مزاحیہ نظم نال محفل نوں کشت زعفران بنا رہے ہوندے۔مارننگ اسمبلی وچ گورنمنٹ کالج سمن آباد فیصل آباد وچ بلاناغہ بارہ سال درس قرآن و حدیث دتا۔ کالج دی اوہ واحد تے متحرک شخصیت سن جہڑے کالج دے اوقات کار توں پہلاں ای مارننگ اسمبلی لئی گرائونڈ وچ پہنچ جایا کردے سن۔ کالج دا ہر نواں آن والا پرنسپل اوہناں دیاں ایہناں کاوشاں تے سحر انگیز شخصیت دا اسیر ہو جاندا سی۔ پرنسپل چودھری منیر احمدمرحوم ہووے یا چودھری منظور احمد مرحوم سارے اوہناں نال دوستانہ مراسم قائم کر لیندے سن تے عقیدت تے احترام نال پیش آندے سن۔ چودھری منیر احمد تے ریٹائرمنٹ مگروں مفتی صاحب دے دولت کدہ اتے تشریف لیاندے رہے۔کدی اوہ مفتی صاحب نوں اپنے ہاں بلوا لیندے تے مختلف موضوعات اتے سیر حاصل گل بات کردے۔ ایس نشست وچ مفتی عبدالرئوف خان’ مشتاق احمد بٹ(بنکر) چودھری منیر احمد تے مولانا محمد بخش رضوی یا چند دوجے دوست مدعو کر لیتے جاندے۔ بعض ویلے مفتی صاحب گھر اتے موجود نہ ہوندے تے چودھری منیر گلی دی نکڑ اتے بیٹھ کے مفتی صاحب دا انتظار کر رہے ہوندے۔ محبت و ارادت تے پیار دی ایہہ کہانی بڑھاپے تک جاری رہی۔ گورنمنٹ کالج سمن آباد فیصل آباد وچ بطور اسسٹنٹ پروفیسر تے فیر ایسوسی ایٹ پروفیسر دی حیثیت نال اک لما عرصہ پڑھایا۔
مفتی صاحب نوں اسلامی مشاہیر نال بڑی محبت سی۔ اوہناں دی عظمتاں دے اوہ قائل سن۔ ایس دے علاوہ ساڈے اکابرین نال وی بڑی عقیدت رکھدے سن۔ اوہناں دے کارنامیاں دا ذکر اپنے دینی خطبیاں وچ اکثر کردے رہندے سن۔ بلا دے طباع’ قادرالکلام تے دریاواں دی راونی سی۔ طوفان آفرین جذبیاں نوں شعراں دے نازک آبگینیاں وچ بند کردین دا سلیقہ اوہناں نوں بخوبی آندا سی۔ قافیاں دے تے اوہ بادشاہ سن۔ نویں نویں قافیے بنھنا اوہناں اتے اخیر سی۔ اگرچہ شاعری دا شغف بڑھاپے وچ کجھ ماند پے گیا سی مگر ذوق تے شوق وچ کمی نہیں آئی سی۔
شہر دی اسلامی تقریباں وچ شمولیت دے نال نال اوہ اپنی رہائشی النجف کالونی وچ ہون والی کسے وی اسلامی تقریب محفل نعت یا وڈی گیارہویں شریف دے موقعے اتے ختم پاک توں مکمل واقفیت رکھدے سن۔ اوہناں نوں پتہ ہوندا سی کہ اج محفل نعت دی تقریب کہڑے گھر وچ ہون والی اے۔ محلے دی محفلاں توں باخبر رہن لئی اپنے اک نوجوان عقیدت مند تے ہمسائے حافظ رضوان علی نال تعلق خاطر رکھدے سن۔ جہدی ڈرائی کلینر دی دکان اوہناں دی گلی دی نکڑ اتے سی۔ کافی واری راقم دے سامنے مفتی صاحب ہتھ دی ہتھیلی دا اشارہ اوہدے ول کر کے جوش و محبت نال پچھدے۔ حافظ صاحب اج کتھے کتھے محفل نعت اے۔ حافظ صاحب کجھ لمحیاں دے توقف مگروں دسدے کہ غوثیہ ٹینٹ سروس والیاں دے تے رانا محمد ریاض دے ہاں محفل نعت ہو رہیاں نیں۔ تہانوں وی دعوت اے ۔ اوہناں دی زبانی محلے دی رپورٹ سن کے مفتی صاحب خوش ہو جاندے۔فیر جدوں راقم اوہناں دے ڈرائنگ روم وچ داخل ہوندا تے اوہناں دے ڈبل بیڈ دے اتے کتاباں’ اخباراں’ یوٹیلٹی بلز تے یونیورسٹی توں آئے ہوئے پیپراں تے مختلف تقریباں دے دعوت نامے الجھے نظر آندے۔ بسا اوقات تے مفتی صاحب دے لیٹن لئی وی جگہ تنگ نظر آندی۔اک واری میں کتاباں نوں بیڈ توں چک کے قرینے تے سلیقے نال لوہے دی اک وڈی شیلف وچ سجانا شروع کر دتا تے مسکراندے ہوئے آکھن لگے تہاڈے جان مگروں کتاباں دا الجھائو فیر ایسے طرح ہو جانا اے۔ تسیں تکلف نہ کرو۔
ریٹائرمنٹ مگروں ساری مصروفیت دینی محفلاں ول مبذول ہو گئی سی۔ ہفتے بھر وچ کئی کئی محفلاں نعت دی صدارت تے خطابت اوہناں دے ذمے ہوندی۔ غوثیہ دربار پیپلز کالونی دے سجادہ نشین شاہ صاحب نے اپنی جامعہ مسجد غوثیہ وچ نماز جمعہ دے بیان لئی مفتی صاحب دی خدمات حاصل کر لیتیاں سن۔ تقریباً پنج جمعیاں وچ اپنے روح پرور تے ایمانی بیان نال اہل ایمان دے قلب تے روح نوں منور کیتا۔ اوہناں مگروں عیدالاضحی دی نماز دا بیان تے واعظ وی اوہناں دتا۔ جہدے تے تہاڈے عقیدت منداں نے بڑی خوشی تے مسرت دا اظہار کیتا۔ رات گئے دیر تک احباب تے دوستاں دا آنا جانا لگیا رہیا تے ذکر ہوندا رہیا کہ مفتی صاحب نے عیدالاضحی دا خطبہ تے خطاب سنا کے دوستاں دے دل لٹ لیتے نیں۔ 12ذوالحجہ 1434 ٹرو دی رات آئی تے نصف صدی توں ودھ اپنی نورانی تے روحانی شعاعواں بکھیرن والا آفتاب ہمیشہ لئی غروب ہو گیا۔ لمحہ فرقت دے آنچل وچ برساں دی قبرتاں دے نشاں سو گئے۔ میں جدوں وی سوچنا واں کہ پروفیسر مفتی عبدالرئوف صاحب داغ مفارقت دے گئے نیں تے کلیجہ منہ نوں آندا اے تے کاروان خیال’ یاداں دے تعاقب وچ نکل کھڑا ہوندا اے۔ مفتی صاحب دی وفات نال ای باب وفا بند ہو گیا لیکن مسکراہٹاں دی خشبو تے خشبو دی مسکراہٹاں دا راز دل تے نگاہ دے ساز اتے ہنوزباقی اے۔ انساناں دے ایس جنگل وچ اک دلنواز شخصیت دا سایہ مقدر سی… اوہ وی نہ رہیا۔
حضرت مفتی صاحب نال میری گلاں تے ملاقاتاں دا سلسلہ 20ورھیاں اتے رہیا۔ اوہناں دے قرب تے محفلاں وچ بیٹھیا تے پتہ چلیا کہ اوہ تے علم و نور دی روشن دلیل تے اسرارو رموز دا اک وگدا ہویا دریا نیں۔ سچائی تے روشنی دے ایس پیکر نال مجالست ہوئی تے پتہ چلیا کہ ایقان دی دولت کتھے ای تے کیویں ملدی اے؟… وگرنہ میں ارباب بصیرت نوں تقلید تے روایتاً مندا تے سی لیکن جاندا بالکل نہیں سی۔ پتہ چلیا کہ کسی مرد فقیر دے فیض صحبت توں کس طرح اک بدوسیارکار اتے وی کشور باطن دے بھید روان ہون لگدے نیں۔ پروفیسر مفتی عبدالرئوف صاحب محو کلام ہوندے تے مولانا روم’ حافظ شیرازی’ رومی’ جامی’ سعدی’ اقبال دے شعر گل بات دے دوران ادا کردے۔ فارسی ادب دے تے اوہ استاد سن۔ ساری حیاتی فارسی نوں پڑھیا تے پڑھایا۔ جدوں اوہ فارسی شعر نوں اپنے خوبصورت انداز وچ نذر سامعین کردے تے لفظ دلاں وچ اتردے چلے جاندے۔ علاوہ ازیں قرآنی آیتاں تے احادیث مبارکہ دے حوالیاں نال کسی وی محفل نوں روحانیت نال مالا مال کردے چلے جاندے۔ مفتی عبدالرئوف گل بات کردے ہوئے آکھدے کہ شب برات’ معراج تے قدر دی درمیانی کڑی اے۔ شب معراج انسانیت دا نقطہ عروج اے تے شب قدر خدا دے روحانی افعال دا نقطہ عروج جد کہ برات وچ رزق دی تقسیم’ موت تے حیات دے فیصلے ہوندے نیں۔ ماہ رمضان’ ماہ محرم الحرام’ ماہ ربیع الاول شریف آندے تے اوہناں دی مصروفیات ودھ جاندیاں سن۔ رات گئے تک مطالعہ وچ مستغرق رہندے کہ اگلے دن کسی تقریب وچ عظمت رمضان نوں اجاگر کرنا اے۔ محرم الحرام وچ سید الشہدا حضرت امام حسین تے اوہناں دے جانثار ساتھیاں نوں عاجزانہ نذرانہ عقیدت پیش کرن لئی بے قرار نظر آندے۔ میرے نال اوہ کئی واری محرم الحرام دی تقریباں وچ اپنے ایمان تے روح پرور بیان لئی گئے۔ اوہ صحابہ کرام’ بزرگان دین تے ساڈے اسلاف دے سچے عاشق تے عقیدت مند سن۔ جدوں وی ربیع الاول دا مبارک مہینہ آندا تے ربیع الاول شریف دا چن ویکھ کے تے مفتی صاحب دی خوشی خوشی نال نہال ہو جاندے۔ اوہ فون اتے اپنے دوست احباب نوں ماہ ربیع الاول دے ہلال دی مبارکباداں دیندے۔ ایس ماہ مبارک وچ اوہناں دی مصروفیات بہت ودھ جاندیاں۔ ہر پاسوں عقیدت مند ہلال ربیع الاول ویکھدے ای اوہناں نال ملن تے اوہناں توں اپنے ہاں منعقد کیتی جان والی محفلاں دا ویلا متعین کرن چلے آندے۔ شہر تے مضافات وچ ہون والی اکثر محفلاں درودوسلام تے نعت وچ قبلہ مفتی عبدالرئوف خان دا صدارتی خطاب ضرور ہوندا۔ اوہ زیادہ تر مسند صدارت اتے ای جلوہ افروز ہوندے۔
مفتی عبدالرئوف خان دا حلقہ ارادت بہت وسیع سی۔ علم و ادب دی کہکشاں دے درخشندہ ستارے جہناں وچ پروفیسر ریاض احمد قادری’ احمد شہباز خاور’ صاحبزادہ مسعود احمد’ مولوی غلام رسول عالمپوری اکیڈمی’ ڈاکٹر افضال احمد انور’ ڈاکٹر شبیر احمد قادری’ ڈاکٹر محمد ریاض شاہد’ پروفیسر وقار اصغر پیروز’ ڈاکٹر شوکت علی قمر’ پروفیسر غلام رسول شوق’ پیر آصف مسعود’ چشتی علی شیر مرزا’ ڈاکٹر سعید احمد وٹو’ ڈاکٹر ریاض مجید’ ڈاکٹر محمد اختر چیمہ، پروفیسر خالد عباس بابر، پروفیسر منظر مفتی، پروفیسر محمد صدیق ناگی، فقیرِ مصطفی، دلشاد احمد چن، حاتم بھٹی، مقصود احمد قادری( کراچی)، پروفیسر توکلی، قمر حجازی، منظر فارانی، حکیم صوفی نذیر احمد قادری، فقیر فیصل آبادی، شاہد فاروق، ڈاکٹر عبدالشکور ساجد، اصغر علی نظامی، رانا دلدار احمد، ڈاکٹر حمید محسن، پروفیسر اخلاق حیدر آبادی، محمد عامر گلزار، غلام رسول کاہلوں اور بدر الدین ہوشیارپوری دے علاوہ دوجے بہت سارے نام اہم نیں جہڑے موصوف نال عقیدت تے احترام دا جذبہ رکھدے سن۔
زیر نظر اوہناں نعت وچ دل و نگاہ دی تطہیر تے پاکیزگی دا سامان موجود اے۔
رات سجنے لگی دن نکھرنے لگا زندگی کو ملا اک نیا بانکپن
آفتابِ نبوت ہوا ضوفشاں جس سے روشن ہوئی انجمن انجمن!
ہے وما ینطق جس زباں کیلئے جو ہے والعصر اس کے زماں کی قسم
اس کے گیسو کی شرح جو وللیل ہے والضحی کا بیاں اسکے رخ کی پھبن
ہے جو صادق وہی تو امیں بھی وہی بزم عالم کا مسند نشیں بھی وہی
اس کی تعریف کوئی کرے بھی تو کیا جس کا قرآن بیاں جس کا قرآن سخن
رہنمائی ملی اس کے کردار زندگی جگمائی ہے انوار سے
بخش دیں جس نے ذروں کو تابانیاں ، راستی کا جہاں کو سکھایا چلن
راہ ویران تھی بلکہ تاریک تھی اس کے آنے سے ہر سو اجالے ہوئے
دور جس سے ہوئیں کفر کی ظلمتیں پھوٹی غارِ حرا سے اِک ایسی کرن
سید الانبیا خاتم المرسلین لے کر دنیا میں آئے جو دینِ مبین
شان اس کی میں صلِ علی کیا کہوں ، جس کے دم سے کھلا وحدتوں کا چمن
مفتی بے نوا کی فریاد ہے اے مرے مصطفی وقت امداد ہے
دور کر دیں مری سب پریشانیاں میرے دل سے مٹا سارے رنج و محن
اوہناں دی شاعری’ تحریراں تے تقریراں اوہناں دے فرزند دے کول موجود نیں جہناں دی اشاعت دی بہت لوڑ اے۔ مینوں ایس گل دا بخوبی علم سی کہ اوہ اپنے عزیز رشتہ دار زنانیاں نوں عیدین دے علاوہ وی کئی واری چادراں’ دوپٹے تے زنانہ سوٹ بذریعہ کورئیر تحفہ وچ بھجواندے رہندے سن۔ ایس دے علاوہ غریباں دی مدد خموشی نال کردتا کردے سن۔ اوہ بڑے خدا ترس سن۔ اوہناں نوں جوڑ توڑ بالکل نہیں آندا سی۔ مینوں اکثر صلہ رحمی بارے تاکید کردے رہندے سن کہ رشتہ داراں دے نال ہمیشہ نرم رویہ رکھیا کرو تے جدوں میں عمرہ دی سعادت لئی گیا تے دونویں واری قبلہ مفتی صاحب میرے توں بوہتے خوش سن۔ مدینہ منورہ وچ مسجد نبوی وچ خادم نعت امیر نواز امیر (فقیر مصطفی) نال اچانک ملاقات ہوئی تے میرا چھوٹا بھرا عزیزم محمد عامر گلزار اپنی کار وچ مینوں تے فقیرمصطفی نوں نماز تراویح مگروں رات دے کھانے لئی ریسٹورنٹ لے گئے۔ سعودی عرب دے ویلے دے مطابق اوس ویلے رات دے جد کہ پاکستان دے دو وجے سن۔ فقیر مصطفی کولوں اجازت طلب کر کے میں پاکستان وچ قبلہ مفتی صاحب دے گھر دے نمبراتے فون کردتا۔ مفتی صاحب نے رات نیندر دے عالم وچ اٹھ کے فون سنیا تے ایویں جیویں اوہناں نوں کوئی گواچا خزانہ مل گیا ہووے۔ جیویں رات دے سکوت بھرے لمحیاں وچ مفتی صاحب نے پرجوش اظہار مسرت کیتا اوہ شاید میں صحیح طرح بیان نہ کر پاواں۔ شاباش ڈاکٹر اظہار صاحب’ تسیں تے کمال کر دکھایا اے۔ کتھے مدینہ منورہ تے کتھے میں’ میری حاضری… اللہ اللہ… ایس ویلے فقیر مصطفی تے عامر گلزار نال ملاقات۔ مرحبا مرحبا ماشااللہ ماشااللہ۔ یقینا اوہناں دی اچی آواز نے پورے گھر نوں نیندر توںبیدار کر دتا سی۔ عزیزم محمد عامر گلزار نال گل کردے ہوئے ایہو تلقین کردے کہ صلہ رحمی دا خیال رکھیا کرو۔ اوہناں دی عادت سی کہ خوش نیں تے ایہدا اظہار بڑے جذبے تے شدومد نال ہوندا۔ اوہ اپنے ہر ملن والے نال پیار و خلوص تے عجزو انکساری نال ملدے سن۔ تعلیم دے معاملے تے اوہ آکھیا کردے سن کہ تعلیم دھپ تے تازہ ہوا وانگوں اے جہڑا کوئی اوہدی جستجو وچ نکلے اوہنوں اوس توں محروم نہیں کرنا چاہیدا۔ اوہناں دا ہر لیکچر سنن نال تعلق رکھدا ایسے لئی اوہناں دے پرستار اوہناں نوں اپنی اسلامی تقریباں اتے بار بار مدعو کردے رہندے سن۔ جدوں اوہ گل کردے سن تے لگدا جیویں لہجے وچ اک دریا وگدا ہووے۔ رواں دواں چھوٹے چھوٹے جملے’ خوبصورت معانی بے بہا بندشاں’ برمحل شعر’ بے دھیان بیٹھے طلبہ اتے دل آوایز چوٹاں’ جذبیاں دا چشمہ صافی سی۔ دوست احباب دے متعلق وی پوری معلومات رکھدے سن۔ جہدے نال اک واری مل لیندے فیر اوہدا نام بھلدے تے نہ کم۔ میرے خاندان دی مختلف تقریباں وچ آن دی وجہ نال اوہ اکثر عزیزاں دے نام تک جاندے سن۔ اوہناں نال گرمجوشی نال ملدے تے حال احوال پچھدے۔
اوہناں دی وفات دا صدمہ ایس لئی بوہتا اے کہ ایسے قابل’ وضع دار’ مرنجاں مرنج تے سچے عاشق رسولۖ روز روز پیدا نہیں ہوندے۔ ایسی جامع العلوم ہستی توں محروم ہون دا جنا وی غم ہووے گھٹ اے۔
تا حشر تیرے سائے کو ترسیں گی نگاہیں
تجھ سے بچھڑنے کا وہم و گمان بھی نہ تھا
پچھے مڑ کے ویکھنا واں تے ایس بحر علم و عرفاں دے کنے موتی میری اکھاں دے سامنے آسودہ خاک ہو چکے نیں۔ اوہناں وچوں ہر اک اپنے اپنے میدان وچ اک جہان علم و دانش سی۔ اوہ اج گئے… کل ساڈی واری اے…رہے نام اللہ دا…
مقدور ہو تو خاک سے پوچھوں کہ اے لیئم
تو نے وہ گنج ہائے گراں مایہ کیا کئے؟