ڈاکٹر اخترشمار وی اگلے جہان ٹُر گئے

ڈاکٹر اخترشمار نال میرا رابطہ اوس ویلے توں اے جدوںاوہ چوبرجی وچ کرائے دے مکان وچ رہندا سی۔ اوہ اک ہمہ جہت شخصیت دا مالک سی۔ اوہ ادیب’ شاعر’ افسانہ نگار’ نقاد’ محقق تے استاد سی۔ کجھ عرصے توں اوہدا رجحان تصوف ول بہت زیادہ ہو گیا سی۔ ڈاکٹر صغراصدف نے دسیا کہ 3جون نوں ڈاکٹر اخترشمار نے پلاک وچ تصوف دے راہیں ڈپریشن توں نجات تے خوش رہن دے حوالے نال لیکچر دتا تے 8اگست 9محرم نوں اوہ سارے دوستاں نوں گہری اداسی وچ کر کے رخصت ہو گئے۔
ڈاکٹراخترشمار نے 2016ء وچ مینوں اپنی کتاب گھلی جہدا ناں ”جی بسم اللہ” اے۔ ایہ کتاب درویشاں دے حوالے نال لکھی جو دل نوں چھو لین لین والیاں لکھتاں تے مشتمل اے۔ ہن اوہ آپ وی اک درویش تے صوفی سی۔ اوہنوں جدوں وی فون کیتا جاندا تے جواب وچ جی بسم اللہ کہندا جی بسم اللہ کتاب چھوٹے چھوٹے مضموناں تے مشتمل اے۔ اک مضمون تن چار صفحیاں توں ودھ نہیں۔ ایہدے وچ 35 مضمون شامل نیں۔ پہلا مضمون رب دلاں وچ رہندا تے آخری مضمون سچی خوشی تے سکون کہاں ہے شامل اے۔ کتاب دا دیباچہ ظفرسپل نے لکھیا اے تے فلیپ ڈاکٹر صفدر محمودا دا لکھیا اے۔ ڈاکٹر اخترشمار سرخ و سفید رنگت تے دراز قد شخصیت دا مالک سی۔ مینوں اک واری اوہنے دسیا کہ اوہ گوشت خور نہیں’ میں بڑا حیران ہویا کہ اینی چنگی صحت دا مالک گوشت خوری توں کیویں پرہیز کر سکدا اے؟ ظفرسپل نے اپنے دیباچے وچ ایہدی تصدیق کیتی اے۔ اوہ لکھدا اے پر اوہناں دِناں مینوں اوہدے ولوں اک ہور خطرے نے متوجہ کیتا ہویا اے تے اوہ اے کہ اوہدا صوفیانہ تے درویشانہ لب و لہجہ ہن اوہ اپنی ہر گل بات دا آغاز جی بسم اللہ توں کردا اے۔ گوشت کھان توں اجتناب دی تبلیغ کردا اے باطنی نظام تے جسم وچ موجود پانی دی کرشمہ سازیاں دا ذکر کردا اے۔ مثلاً اوہ لکھدا اے: گوشت خوری میری فہم توں بالاتر اے’ میں حیران آں آخر اک گوشت پوست دا انسان گوشت دے نیڑے ای کیوں جاندا اے ایس طرح دیاں گلاں اوہنے اپنی اک کتاب آداب خود آگاہی وچ وی کیتیا ںنیں۔ ایس کتاب دے بیک ٹائٹل تے اوہدی جو فوٹو اے اوہدے وچ وی اوہ لباس صوف وچ ملبوس نظر آندا اے۔ صوفیانہ رنگ وچ رنگیاں اجہیاں گلاں اوہ اوس ویلے وی کردا سی جدوں اوہ ملتان دے اک بابا جی نوں ملدا سی تے ہن ایہناں دیہاڑیاں اوہ تکیاں تے جاندا اے تے بابیاں نال مکالمہ جاری رکھے ہوئے اے۔ نتیجتاً ہن گیروارنگ اوہدی شاعری’ ادبی’ لکھتاں تے کالماں وچ راہ پاندا نظر آ رہیا اے۔ کیہ ہن اوہ تصوف دے محاذ تے پیش قدمی کرے گا؟ آخری مضمون وچ اوہ لکھدا اے اسیں ساری زندگی بہترین تے مرغن غذاواں تے آسائشاں لئی نسدے پھرنے آں’ جنیاں آسائشاں زیادہ ہون گئیاں جناں زیادہ کھایا جاوے گا اوناں ای موت ول جان دا ڈر ہووے گا۔ ایس لئی قناعت تے صبر دا راہ اختیار کرن نال انسان سکون تے سچی راحت دی منزل حاصل کر سکدا اے۔
اپنے اک ہور مضمون وچ اوہ لکھدا اے: دوستو! سانوں دنیا دی سب توں وڈی نعمت تے دولت تندرستی لئی سوچنا چاہیدا اے تے ہر حال وچ ایہنوں حاصل کرنا چاہیدا اے کہ دنیا صحت تے تندرستی نال اے۔ انج وی صحت و تندرستی اعلیٰ غذاواں کھان وچ نہیں گھٹ’ سادہ تے صاف ستھری غذا کھان وچ اے۔ زیادہ کھانے دی حرص توں نجات حاصل کرنی چاہیدی اے تے کھانے دے لالچ توں باز رہن دی کوشش کرنی چاہیدی اے پر ایہدے لئی محنت’ جدوجہد تے ریاضت کرنی پیندی اے۔ انج وی زیادہ کھانے والا ذہین نہیں ہو سکدا۔ اک صحت مند دماغ رکھن لئی ضروری اے کہ گھٹ کھادا جاوے۔ زیادہ کھان نال صلاحیتاں گھٹ جاندیاں نیں تے گھٹ کھان نال ستیاں ہوئیاں قوتاں وی جاگ جاندیاں نیں انسان دا باطن مضبوط ہوندا اے۔ اوہنے محنت تے جدوجہد نال اپنا مقام بنایا تے اوہناں دِناں اوہ ایف سی کالج وچ صدرش عبہ اردو سی اوہ نوائے وقت وچ کالم وی لکھدا رہیا۔ اوہنے اپنا ذاتی ادبی اخبار بجنگ آمد کڈھیا۔ کجھ عرصہ اوہدا دفتر غزنی سٹریٹ اردو بازار وچ قائم رہیا۔ اوہ محکمہ تعلیم پاکستان ولوں اردو اینڈ پاک سٹڈیز چیئر تے تقریباً پنج ورھے شعبہ اردو جامعہ عین شمس’ جامعہ الازھر قاہرہ وچ تعینات رہیا۔ 2012ء وچ اوہ مصر توں واپس آیا تے فیر 2013ء وچ اوہ اپنی ذاتی کوٹھی ٹرائی کون ویلج نزد بحریہ ٹائون تے شفٹ ہو گیا۔ اوہدے ماشاء اللہ تن بیٹے نیں۔ تیمور اختر’ وقار اختر تے احتشام اختر۔ وڈا بیٹا تیمور جاب کردا اے باقی دوویں اجے پڑھ رہے نیں۔ چھوٹے بیٹے احتشام اختر نے مینوںدسیا کہ والد دی تدفین آبائی پنڈ چکری (سہال) ضلع راولپنڈی وچ والدہ دے قدماں وچ ہوئی۔ اللہ تعالیٰ مغفرت فرمائے۔