شہباز عمران دا راہ صاف کر رہے نیں

وہ طبیعت کہاں بہل جائے
وصل سے اور جو مچل جائے
یہ بھی رکھا ہے دھیان میں
ہم نے وہ اچانک اگر بدل جائے
دوستو! ساڈا تے دل ای جل گیا اے سارے رومانس دھرے دے دھرے رہ گئے کہ ایہ سوچ کے سُتے سی کہ پٹرول اٹھاراں روپیے سستا ہووے گا صبح پٹرول پواواں گے۔ خدا دی پناہ حکومت دا ایناں وڈا یوٹرن ہور تے ہور اوہ قطعہ جو میں حکومت نوں داد دیندے ہوئے لکھیا سی اوہ چھپیا تے طنزیہ بن گیا۔ حالاں کہ میں تے سچی مچی حکومت دی تعریف کیتی سی پر قطعہ دے چھپدیاں ای حکومت اپنے اعلان توں پھر گئی۔ تقریباً ست روپیے فی لٹر پٹرول دی قیمت ودھ گئی۔ تسیں ایہنوں نرم توں نرم الفاظ وچ ایہ کہوو گے کہ پوری قوم دا مذاق اڑایا گیا مسلسل چرچا ہوندا رہیا کہ شہبازشریف قوم نوں 14 اگست تے تحفہ دینا چاہندے نیں تے اوہ پٹرول وچ ریلیف دین جا رہے نیں بڑی دھوم مچی ایس اقدام دی۔ ایہ وی ن لیگ والیاں نے ای کہیا کہ ایس کمی نوں ایہ نہ سمجھیا جاوے کہ عمران دے جلسے پاروں ہوئی سگوں عمران نے ایس کمی دے اعلان دے بعد گھٹ کرن دا کہیا سی۔ دہائی خدا دی اجہی کہہ مکرنی۔ ایہ تے صرف کتاباں وچ پڑھی’ ہائے ہائے غالب:
گھر پہ رہنے کو کہا اور کہہ کے کیسے پھر گیا
جتنے عرصے میں میرا لپٹا ہوا بستر کھلا
وقت گزرن دے نال نال حکومت اکھڑی اکھڑی دکھائی دیندی اے۔ ایناں وڈا ہتھ کرن دے بعد وی نوازشریف دی اہمیت ایہہ کہہ کے ودھائی جا رہی اے کہ اوہ تے رنج ہو کے اجلاس توں اٹھ گئے تے مریم نواز نوں وی ایہ فیصلہ پسند نہیں آیا۔ بندہ پچھے لوکاں نے نوازشریف دی رضامندی یاں رنجگی نوں چٹنا اے۔ تسیں اوہناں تے ایس عالم وچ وی پٹرول بمب سٹ رہے او جدوں اوہناں نوں جان دے لالے پئے ہوئے نیں۔ ددھ 140 روپیے ہو چکیا اے ہر کوئی قیمت ودھا رہیا اے کوئی پچھن والا نہیں’ شہبازشریف دی بدن بولی بالکل وزیراعظم دی نہیں سگوں ہن تے وزیراعلیٰ دی وی نہیں’ محسوس انج ہو رہیا اے کہ عمران خان دا راہ صاف کیتا جا رہیا اے۔
ہیں کواکب کچھ نظر آتے ہیں کچھ
دھوکہ دیتے ہیں یہ بازی گر کھلا
سمجھ وچ نہیں آندا کہ ہو کیہ رہیا اے۔ عمران خان دا لب و لہجہ وی بدل گای۔ کارکردگی دا جائزہ لیا جا رہیا اے اوہ کارکردگی جو سانوں نظر نہیں آندی۔ خان صاحب نے قذافی سٹیڈیم دے ہاکی گرائونڈ وچ جلسہ وی کر لیا۔ پر ایس عمل دا مقصد پوری قوم دی سمجھ وچ نہیں آیا کہ جلسہ تے کرکٹ گرائونڈ وچ وی ہو سکدا سی۔ بہرحال اسیں اقبال دے معترف ہون دے باوجود ایس گل نوں نہیں من دے کہ کوئی بھی چیز نکمی نہیں زمانے میں۔ ایہ گل قدرت دے کارخانے دے خلاف بس ساڈا مشاہدہ اے کہ اسیں رج کے نکمے تے نااہل ویکھ لیے۔ ہو سکدا اے اوہ کسے ہور لئی فائدہ مند ہون کہ اوہ اکلے تھوڑا کھاندے نیں اُتوں تھلے تک ای طلب تے رسد دا سلسلہ اے۔ اسیں تے آخری یقین خان تے کیتا سی:
اپنا تو اصل زر سے بس نقصان بڑھ گیا
سچ مچ کا عشق مر گیا اک دل لگی کے ساتھ
اک ابتری تے بدامنی’ امن و سکون تباہ ہو کے رہ گیا۔ تسیں اک خبر توں اندازا لائو کہ پنجاب وچ تبادلیاں دا جھکھڑ 37 ڈی سی’ 42 ایس پی’ ڈی ایس پی تبدیل۔ کوئی ٹک کے نہ بیٹھے۔ ہن دسو اجہے حالات وچ کیہ کم ہو سکدا اے۔ بھگتن گے صرف عوام’ ملک نوں جزیریاں وچ ونڈ دتا گیا اے تسیں منوں یاں نہ منوں انج ای اے مرکزی جزیرہ اسلام آباد اے جتھے اک مسلم لیگ دی حکومت اے۔ زرداری دا سندھ’ پختونخوا عمران تے ایسے طرح بلوچستان’ ویکھیا جاوے تے ایہناں ساریاں دے وچکار کدھرے بینظیر زنجیر ہوندی سی۔ ہن رہی گل کہ وزیراعظم کیہ کر رہے نیں تے اوہ سعودی ولی عہد رابطہ مہم تے نیں۔ تعاون ودھان تے اتفاق’ ایہدے وچ اتفاق والی کہڑی گل اے ایہ تے رضامندگی اے۔ پر ہاں ایہ اتفاق ایس لئی اے کہ اوہناں توں امداد دی امید نہیں سی۔ شہبازشریف جدوں توں آئے نیں ایہو مہم چلا رہے نیں۔ ادھار تیل ملن دی امید اے تے پاکستان دی دعوت قبول ہو چکی کہ اوہ محمد بن سلمان دورہ کرن گے پر ہووے گا اوہو کہ آئے او تے کیہ لے کے آئے او تے جائو گے تے کیہ دے کے جائو گے:
ہے خبر گرم ان کے آنے کی
آج ہی گھر میں بوریا نہ ہوا
آخری تذکرہ اوس تقریب دا کہ جہدے وچ مرد تے عورتاں رقص کر رہے سن تے مفتی تقی عثمانی ایہدا برا منا گئے۔ قبلہ ایہ تے ہن اک سٹیٹس بن چکیا اے ایہ سرکاری تقریب سی کہ ایہدے وچ تے ہوندا ای موج میلہ اے۔ تعلیمی اداریاں وچ شاید تسیں نہیں جاندے اص طور تے جو پرائیویٹ وچ اوہ ثقافت دے ناں تے کیہ کجھ نہیں کردے۔ اصل وچ اسیں سچ مچ اللہ نوں بھُلے ہوئے آں تے اوہدے پیغام توں دور۔ اسیں اصل وچ دنیادار آں تے دنیا توں علاوہ کجھ نہیں۔ یعنی کھیڈ تماشا ساڈے ایتھے تے سیاست چھڈ کے ہر تھاں تماشا اے نہیں تے اصل چیز دین اے۔ کیہ کریئے کہ حالت ای ساڈی انج دی ہو گئی اے کہ اج مرا نچنے نوں جی کردا’ فیر ایہدے تے کمنٹ کرن والے ای رانا ثنا اللہ ورگے نیں سب کجھ شرمناک اے۔ اوہی کہ عالم دوبارہ نیست۔ ذی ہوش تے ایہ سب کجھ ویکھ کے اپنے حواس کھو بیٹھے نیں۔ باقی رہی گل کہ جتھوں گل شروع ہو گئی سی مریم نواز نے وی حکومت دے فیصلے نوں کہ پٹرول مہنگا ہو گیا تے اتفاق نہیں کیتا تے نوازشریف رنج:
کی مرے قتل کے بعد اس نے جفا سے توبہ
ہائے اس زود پشیماں کا پشیماں ہونا