‘اقلیتاں دے قومی دیہاڑ’دے حوالے نال اُچیچی تقریب

”آپ آزاد ہیں، آپ آزادہیں،اپنے مندروں میں جانے کیلیے، آپ آزاد ہیں اپنی مساجد میں جانے کیلیے اور ریاستِ پاکستان میں اپنی کسی بھی عبادت گاہ میں جانے کیلیے ، آپ کا تعلق کسی بھی مذہب ، ذات یا نسل سے ہو ، ریاست کا اس سے کوئی لینا دینا نہیں”ایہ اوہ الفاظ نیں جیہڑے قائداعظم دی اوس تقریر دا حصا نیں جیہڑے اوہناں نے 11اگست 47ء نوں پاکستان دی پہلی دستور ساز اسمبلی وچ کیتی۔ ایہ اوہناں دا دستور ساز اسمبلی نوں پہلا خطاب سی ۔ ایس اجلاس دی صدارت جوگندر ناتھ منڈل نے کیتی۔ قائد دی ایہ تقریر جذباتی لفظاں تے مشتمل نہیں سی سگوں اوس ریاست دا واضح نک نقشا سی جیہڑی بنن جا رہی سی۔ قائدِ اعظم دی ایس تقریری نوں بنیاد بنا کے حکومتِ پاکستان نے 11اگست نوں ” قومی اقلیت دیہاڑ” یعنی نیشنل مینارٹیز ڈے(National minoritys day)قرار دتا۔ ایس نسبت نال پچھلے دنیں ،’محکمہ ETPB’متروکہ وقف املاک بورڈ’نے ‘دیال سنگھ ریسرچ اینڈ کلچرل فورم’دے آڈیٹوریم وچ اک شاندار تقریب دا آہر کیتا۔ ایس تقریب دا عنوان ‘ اس پرچم کے سایے تلے ہم سب ایک ہیں’ متھیا گیا۔
‘ تقریب دے مہمانانِ خصوصی حبیب الرحمٰن گیلانی چیئر مین متروکہ وقف املاک بورڈ تے بورڈ دے ایڈیشنل سیکرٹری رانا شاہد سلیم سن۔ تقریب وچ مختلف مذاہباںنال تعلق رکھن والی نمائندہ شخصیات نے شرکت کیتی۔ پادری شاہد معراج’ڈین کیتھڈرل چرچ’ نے کرسچئن کمیونٹی دی نمائندگی کیتی۔ امرنا رندھاوا ‘پاکستان ہندو مندرزمنیجمنٹ کمیٹی’ ہندو برادری دے نمائندہ دے طورتے شریک ہوئے۔ ڈاکٹر کلیان سنگھ کلیان’پروفیسر جی سی یونیورسٹی’نے سکھ برادری دی نمائندگی کیتی جد کہ سہیل احمد رضا’ ممبر بورڈETPBو ڈائریکٹر ‘منہاج القرآن’ مسلم برادری دے نمائندے دی حیثیت نال شریک ہوئے۔ تقریب وچ سیکرٹری رویت ہلال کمیٹی مولانا عبداللہ نے وی شرکت کیتی۔ ETPBدی ممبر جیکولین ٹریسلر وی تقریب دی مہمانِ اعزازسن۔ تقریب وچ ہندو ، سکھ تے کرسچئن برادری دے علاوہ مسلمانوںنے بڑڈی تعداد وچ شرکت کیتی۔
‘قومی اقلیت دیہاڑ’دے حوالے نال ہون والی ایس تقریب دا پہلا حصا ‘دعاواں لئی مختص سی۔تقریب دا باقاعدہ مڈھ تلاوتِ کلامِ پاک توں بجھا ۔ ایہ سعادت عمران احمد نے حاصل کیتی۔ سکھ برادری ولوں’ سردار دیا سنگھ نے ‘ گرو گرنتھ صاحب دی نظم ‘جپ جی ‘ چوںاقباس پڑھیا ۔ کرسچیئن تے ہندو برادری دے نمائندیاں نے وی انجیلِ مقدس تے گیتا چوں دعاواں پڑھ کے تقریب دے مذہبی تقدس نوں جلا بخشی۔ تقریب دے اگلے حصے ،جس داعنوان”اس پرچم کے سایے تلے ہم ایک ہیں’ متھیا گیا ہائی۔ ننکانہ صاحب توں تشریف لیائے بچیاں نے محفل دے رلتیاں نال مل کر قومی ترانا پڑھیا تے ملی نغمے گا کے محفل دے حسن کو دوبالا کیتا۔
تقریب دے مہمانِ اعزاز پادری شاہد معراج نے گفتگو کردیاںہوئیاں کہیا کہ ‘ پاکستان طویل جدو جہد، عظیم قربانیاں تے قائد اعظم دی ولولہ انگیز قیادت دے سبب معرضِ موجود وچ آیا۔ قائد اعظم دے ارشاد دے مطابق پاکستان وچ اقلیتاں دا ہر طرح دا تحفظ حاصل ہے۔سانوں مل کے ایس دی ترقی وچ اپنا اکردار ادا کرنا چاہی دا اے’، امرناتھ رندھاوا نے کہیا کہ ‘ ہندو برادری نے پاکستان دی جدو جہد وچ بڑیاں قربانیاں دتیاں،اسیں ایس اعتبار نال خوش قسمت ہاں کہ اسیں پاکستانی آں تے پاکستان وچ پیدا ہوئے، اسیں تقریب دے شرکاء دے سامنے عہد کرنے ہاں کہ اسیں پاکستان دے وقار تے ترقی لئی کسے قربانی توں پچھے نہیں ہٹاںگے۔ ڈاکٹر کلیان سنگھ کلیان نے کہیا کہ ‘ اج دا دن تاریخ دا اہم دن اے، قائد اعظم دے ویژن مطابق پاکستان وچ رنگ، نسل،مذہب تے کلچر دے امتیاز توں بغیر برابری دی سطح تے حقوق حاصل نیں،سانوں چاہی دا اے پئی اسیں سارے رل کے ، اک مٹھ ہو کے، وطن دی ترقی وچ اپنا کردار ادا کریے۔ سہیل احمد رضا نے کہیا کہ ‘ پاکستان بنیاں 75سال ہو چکے نیں ،ہن اسیں76واں آزادی دیہاڑ منان جا رہے ہاں،برطانیوی سامراج توں آزادی دی ایس جدو جہد وچ ہندوواں،سکھاں تے عیسائی برادری نے مسلماناں دے نال موڈھے نال موڈھا جوڑ کے حصا لیا ۔ جوگندر ناتھ منڈل دستور ساز اسمبلی دے پہلے صدر سن جو ایس گل دا ثبوت اے کہ پاکستان وچ اقلیتاں نال کوئی امتیازی سلوک نہیںورتیا جاندا’۔مولانا عبداللہ نے وی سہیل احمدرضا دی گل نوںاگے ودھاندیاںپاکستان دی تشکیل لئی ہندوواں، سکھاں تے عیسائیاں دے سانجھے کردارتے قربانیاںنوں سراہیا۔ جیکولین ٹریسلر نے کہیا کہ سانوں پاکستانی ہون تے فخر ہے، ساڈے بزرگاں نے پاکستان دا انتخاب اپنی مرضی نال کیتا، اج اسیں کہہ سکنے ہاں کہ اوہناں نے اچھا فیصلا کیتاسی۔
تقریب دے مہمانِ خصوصی رانا شاہد سلیم نے ETPBدیاں اقلیتاں لئی کیتیاں گئیاں کاوشاں داتفصیلی ذکر کردیاںدسیا کہ’ ہندو برادری دے لاہور وچ سبھ توںوڈے مندرنوں قابضین توںچھڑوایا جا چکا اے۔ جین مندر، جیہنوں سانحہ بابری مسجد دے ردِ عمل دے طور تے نقصان پہنچا یاگیا سی، اوہنوںتزئین تے آرائش دے بعد عبادت لئی کھول دتاگیا اے۔ اوہناں آکھیا پئی جین مت دے کجھ ہور مندر وی نیں ، اسیں چاہنے ہاں پئی پاکستان یا باہروں کوئی جین فیملی ساڈے نال رابطہ کرے تاں جے اسیں ایہ مندر اوہناں دے نگرانی وچ دے سکیے تاں جے ایتھے وی عبادت دا عمل شروع ہو سکے۔ اوہناں دسیا کہ یاتریاں دے رہائشی مسئلے حل کرن لئی100کمروںتے مشتمل ہوسٹل مکمل ہو چکا اے تے انتظامیا دے حوالے کیتا جا چکا اے۔اوہناں نے اقلیتاںدے ورثے نوں محفوظ کرن لئی ‘سٹیٹ آف دی آرٹ’ میوزیم بنان داوی اعلان کیتا۔تقریب دے مہمانِ خصوصی حبیب الرحمٰن گیلانی چیئر مینETPBنے اپنے خطاب وچ رانا شاہد سلیم ولوں دسیاں گئیاں ETPBدیاں کاوشاں دی تصدیق کردیاںہوئیاں اوہناں نوں سراہیاا، اوہناں نے تمام مذاہب دے نمائندیاں دا تقریب وچ شرکت کرن تے شکریا وی ادا کیا۔ اوہناںشاندار تقریب دے کامیاب انعقاد تے ‘ دیال سنگھ رریسرچ اینڈ کلچرل فورم’ دیاں محنتاں دی صلاحتا وی کیتی۔ اوہناں نے آخیرتے محفل وچ شریک ہون والیاںنون منگ کیتی پئی اوہ ساڈا پیار محبت دا سنیہا اگے پھیلان تے دنیا نوں دسن پئی پاکستان اقلیتاں دے رہن لئی کسے جنت توں گھٹ نہیں۔تقریب دے آخیر وچ مختلف مذہباں دی نمائندگی کرن والے رلتیاں نوں ‘دیال سنگھ ریسرچ فورم ‘ دیاں لکھتاں تے میگزین تحفے دے طور تے پیش کیتے گئے، ملی نغمے تے قومی ترانا پڑھن والے بچیاں نوں ETPBولوں تحائف تے نقد انعامات وی دتے گئے۔ تقریب دے دوران سبز ہلالی پرچماں دی بہار پاروں تقریب وچ پاکستانیت دا رنگ اگڑواں رہیا۔ ایہ شاندار تقریب چراں تائیں اک یاد گار تقریب وانگ چیتے رکھی جائے گی۔