ؑجنگ نامہ حضرت امام حسین

فارسی تے اردو شاعری وچ مرثیہ صرف واقعہ کربلا نال مخصوص کیتا گیا اے۔ جس وچ اہلِ بیت تے ایہناں دے ساتھیاں دے مصائب و آلام دا ذکر کیتا ویندا اے۔ مرثیہ دی اس قسم نوں مذہبی مرثیہ آکھیا ویندا اے۔ اوہ مرثیہ جہڑا کسے قومی رہنما دے مرن تے رنج و الم دے اظہار لئی لکھیا ونجے اوہ رسمی مرثیہ اکھواندا اے۔ کسے شہر، حکومت، سلطنت یا گہوارہ علم و ادب دے زوال تے لکھے جاون آلے مرثیے نوں تشریفاتی مرثیہ آکھیا ویندا اے۔ اردو مرثیے دے آغاز ویلے اس واسطے کوئی خاص ہیئت مخصوص ناہیں۔ مثلث، مربع، مخمص تے مسدس اتے ہر شکل وچ مرثیے لکھے گئے۔ کربلا دے حوالے نال لکھے گئے جنگ نامیاں وچ وی چوکھا سارا رثائی عنصر موجود اے۔
مرثیہ دے اجزائے ترکیبی دی ترتیب کجھ انج بیان کیتی گئی اے:
-1چہرہ(2)سراپا(3) رخصت (4)آمد (5)رجز(6)جنگ
(7)شہادت(8) وین (9)دعا
فقیر میاں رحمت دے لکھے جنگ نامے وچ رثائی عناصر پائے ویندے ھن۔ ایہناں دے کلام وچ رثائی عناصر دی ونکی ملاحظہ کرو:
ڈیوا بجھ گیا دین دا پیا، اندھیر غبار
جتنی امت رسول دی رووے ڈھائیں مار
وچ مدینے زلزلہ روون لوگ ہزار
پَٹ پَت سٹن میڈھیاں شہراں وچ ہڑتال
مومن رو رو، پٹدے کرن یزیدیئے چین
ڈاھاں مار کے رووندا کول امام حسین
روون سبھے بیبیاں کر کر اُچی وین
ں
ماتم دے وچ آوندی امام حسن دی ما
ڈھاہاں مار کے رووندا کول حسین بھرا
ماتم امام حسن دا رحمت جان نہ کوڑ
میں روندی ڈٹھی فاطمہ نالے پاک رسول
ماتم امام حسن دا کردے آہے جو مسلمان
جن فرشتے آدمی رووے کل جہان
ں
زینب خاتوں ویکھیا پیا حسین بھرا
ویکھ کے لاش حسین دی رووے گھت قہا
لہو دے نال لپیٹیا کوئی نہ کول ہمراہ
رووے دھی خاتون دی کر کر اُچے وین
آون آوازے غیب تھیں ہائے ہائے شاہ حسین
جن، فرشتے، آدمی رووندے مول نہ آوے چین
حوراں پریاں روندیاں لے لے نام حسین
(جاری اے)