ہن موجاں ای موجاں

ملزماں’ مجرماں نے اپنے وکیلاں دے نال رَل کے اپنے کیساں نوں سامنے رکھ کے اجہی نیب ترامیم کر دتیاں کہ ہن جے چیئرمین نیب عمران خان نوں وی لا دتا جاوے تاں وی منظور پاپڑ فروش’ محبوب پھیری والے توں شہبازشریف تک تے فالودے والے توں آصف زرداری تک سارے سرخرو۔
پہلے دن توں کہہ رہیا سی عمران خان دے گھر گھلن’ پی ڈی ایم دے حکومت وچ آن دا مقصد مہنگائی’ غربت’ بیروزگاری نہیں سی’ مقصد ملک و قوم دی حالت بدلنا نہیں سی’ مقصد ریاست بچانا نہیں سی’ مقصد سی آل بچائو’ مال بچائو’ کھل بچائو’ مقصد سی الیکٹرانک ووٹنگ مشین’ بیرون ملک پاکستانیاں دے ووٹاں توں جان چھڑانا’ کیوں جے ساریاں نوں پتہ اے بیرون ملک 80 توں 90فیصد پاکستانی عمران خان دے ووٹر تے ایہ ووٹر قومی اسمبلی دے 40 حلقیاں دے نتیجیاں تے اثرانداز ہوندے نیں۔ الیکٹرانک ووٹنگ مشین’ بیرون ملک پاکستانیاں دے ووٹاں توں جان چھڑانا’ نیب دا مکو ٹھپیا تے ہن عمران خان نوں نااہل کروان جد کہ نوازشریف نوں خیروعافیت نال واپس لیا کے اہل کروان تے کم ہو رہیا اے۔ ایہ کم کیویں ہو رہیا اے ایہدے وچ کون کون شامل اے ایہ فیر سہی’ اج موضوع کس طرح آل بچائو’ مال بچائو’ کھل بچائو گروپ نے جنازہ پڑھائے بناں نیب دفنا دتا۔ ملاحظہ کرو کہ کیہ کیہ نیب ترامیم ہوئیاں تے اوہناں نال مبینہ طور تے کہڑا کہڑا مستفید ہووے گا۔
اک ترمیم ہوئی بیرون ملک توں آیا ثبوت قابل قبول نہیں ہووے گا۔ مطلب مریم نواز دا کیلبری فونٹ کیس ختم’ اک ترمیم ہوئی ملزم دی منی ٹریل دین دی ذمہ داری ختم’ مطلب نوازشریف کیس سنے اوہ سارے کیسز ختم’ جتھے پچھیا جا رہیا سی کہ پیسہ آیا کتھوں’ پیسہ کمایا کتھوں’ اک ترمیم ہوئی منی لانڈرنگ نیب دے دائرہ اختیار چوں باہر’ مطلب بیسیوں منی لانڈرنگ کرن والے معززین گھر بیٹھے بٹھائے نیب توں بچ نکلے’ اک ترمیم ہوئی’ اثاثیاں دی تعریف بدل دتی گئی مطلب جو اثاثہ ملزم دے ناں اوہو اثاثہ سمجھیا جاوے گا’ ملزم دی بیوی’ بچیاں’ رشتے داراں’ ملازماں دے ناں تے جائیداداں ملزم دے اثاثے نہیں سمجھے جان گے۔ مطلب باقیاں دے نال نال شہبازشریف ٹی ٹی کیس’ زرداری صاحب جعلی اکائونٹس کیس توں بری’ اک ترمیم ہوئی بے نامی دار دی تعریف بدل دتی گئی۔ سوکھے لفظاں وچ کوئی پبلک آفس ہولڈر ہن دل کھول کے اپنی جائیداداں’ اثاثے دوجیاں دے ناواں تے بنائے’ بالکل پچھیا نہیں جاوے گا’ اک ترمیم ہوئی جائیداداں دی مارکیٹ ویلیو نہیں’ اوہناں تے ڈی سی ریٹ لاگو ہووے گا مطلب ملزم دی جائیداد کروڑاں’ ملزم اوہنوں ہزاراں’ لکھاں دی دس کے پتلی گلی چوں نکل جاوے گا۔ اک ترمیم ہوئی کابینہ ایکنک’ ریگولیٹری اتھارٹیز’ بیورو کریسی دے فیصلیاں نوں نیب توں تحفظ حاصل’ مطلب کوئی وی دونمبری کرو اوہنوں کابینہ’ ایکنک’ ریگولیٹری اتھارٹی توں منظور کروا لوو یاں بیورو کریسی جو دو نمبری کرے’ دوہاں صورتاں وچ نیب منہ ویکھدا رہ جاوے گا۔ اک ترمیم ہوئی نیب نوں صدر دے دائرہ اختیار چوں کڈھ کے وزارت داخلہ دے ماتحت کر دتا گیا۔ مطلب نیب دی خودمختاری ختم’ ہن ایہ اک وزارت دا ذیلی ادارہ’ سوکھے لفظاں وچ نیب اہن ایف آئی اے ٹو۔ اک ترمیم ہوئی مفاد عامہ دا اوہ کیس جہدے وچ متاثرین دی گنتی سو ہووے گی’ نیب اوہدے تے کاروائی کرے گا جے متاثرین دی گنتی 99 وی ہووے تے ایہ نیب دا کیس نہیں۔ ایس ترمیم نال خواجہ سعدرفیق نوں فائدہ اپڑے گا۔ اوہناں دے آشیانہ ہائوسنگ کیس وچ متاثرین دی گنتی 67′ اک ترمیم ہوئی’ بار ثبوت نیب دی ذمہ داری مطلب جے کسے دے اثاثے ذرائع آمدنی توں ودھ یاں کسے نے کرپشن نال مال بنایا تے ہن ایہ ملزم نہیں نیب نوں ثابت کرنا ہووے گا کہ ایہ جائیداداں نجائز طریقے نال بنائیاں گئیاں ایہو نہیں کسے دے اختیارات دا غلط استعمال وی نیب نوں ای ثابت کرنا پوے گا۔ اک ترمیم ہوئی جے نیب افسر کیس ثابت نہیں کر سکے گا تے اوہنوں پنج ورھے دی سزا’ سوچو کون نیب افسر ہووے گا جو کسے طاقتور تے ہتھ پاوے تے فیر اوہنوں ایہ ڈر وی لگا رہوے کہ پنج ورھے سزا ہو سکدی اے۔ اک ترمیم ہوئی نیب پنجاہ کروڑ روپیے توں گھٹ دے کرپشن کیساں دی تحقیقات نہیں کر سکے گا۔ ایس ترمیم دے بعد بیسیوں شرفاء نیب نوں ٹاٹا بائی بائی کر گئے۔ اک ترمیم ہوئی احتساب عدالتاں وچ ججز تقرری دا اختیار صدر توں واپس لے کے وفاقی حکومت نوں دے دتا گیا۔ مطلب کوشش ایہو کہ مرضی دے جج دے کول اپنا کیس۔ اک ترمیم ہوئی ملزماں دے خلاف تحقیقات لئی کسے سرکاری ایجنسی توں مدد نہیں لئی جا سکے گی۔ مطلب ایجنسیاں ہر کیس چوں باہر’ مانیٹرنگ دا خوف ختم’ چیک اینڈ بیلنس ختم’ موجاں ای موجاں۔ اک ترمیم ہوئی کسے ملزم دے خلاف مقدمہ’ تحقیق، تفتیش اوسے علاقے وچ ہووے گی جتھے جرم دا ارتکاب ہووے گا۔ سوکھے لفظاں وچ دسنا واں’ ہن زرداری صاحب دے کیس سندھ (کراچی) شفٹ ہو جان گے۔ ذرا سوچو زرداری صاحب دے خلاف سندھ وچ کہدی مجال کہ کجھ کر سکے’ یاد رہوے زرداری صاحب دی اک عرصے توں خواہش سی کہ اوہناں دے کیس سندھ شفٹ کیتے جان۔
سچ ایہہ وے کہ ایہناں ترمیماں دے بعد کرپشن جائز’ کرپشن حلال’ سچ ایہہ وے کہ ساریاں سیاسی جماعتاں’ بیورو کریسی’ سرمایہ دار سارے نیب توں جان چھڑانا چاہندے سی کیوں جے کوئی نہیں چاہندا کہ کوئی اوہناں توں اوہناں دے کالے کرتوتاں تے پچھے’ سچ ایہہ وے کہ ایتھے سٹیٹ بینک’ ایف بی آر’ ای سی پی’ ایف آئی اے’ پولیس تے طاقتور مینج کر چکے’ نیب رہ گیا سی اوہ وی مینج ہو گیا۔سچ ایہہ وے کہ اک پاسے سسلین مافیا’ گاڈفادر’ اوہناں دے کول بہترین وکیل’ ہر ادارہ اوہناں دے دبائو وچ’ ہر تھاں اوہناں نوں ریلیف ملے’ جد کہ دوجے پاسے نیب دی کمیاں’ کوتاہیاں’ نکماپن’ اکراس دا بورڈ’ بلاامتیاز احتساب نہیں ایہو وجہ اے اوہ نتیجے نہ ملے جہناں دی توقع’ پر نیب دا ایہ انجام’ توبہ توبہ’ ملزماں’ مجرماں نے اپنے وکیلاں دے نال رَل کے اپنے کیساں نوں سامنے رکھ کے اجہی نیب ترامیم کر دتیاں کہ ہن جے چیئرمین نیب عمران خان نوں وی لا دتا جاوے فیر وی منظور پاپڑ فروش’ محبوب پھیری والے توں شہبازشریف تک تے فالودے والے توں آصف زرداری تک سارے کامیاب ہون گے۔٭٭