گوادر دی ترقی پر ساڈے دکھ

چائنہ پیس اینڈ ڈویلپمنٹ فائونڈیشن دے تعاون نال بلوچستان دے شہر گوادر وچ قائم پرائمری سکول نوں سکینڈری سکول بنا دتا گیا اے ایہ اک توسیعی منصوبہ اے ایہ سکول اصل وچ چین پاکستان اقتصادی راہداری دے تحت معاش دے ذریعے لئی اک سنگ میل اے مقصد ایہہ وے کہ خطے دے لوکاں نوں تعلیم ول ودھ توں ودھ راغب کیتا جا سکے۔ چائنہ ریڈکراس سوسائٹی نے گوادر بندرگاہ تے پاک چین دوستی ہنگامی مرکز وی قائم کیتا اے۔ ایس مرکز توں عملی طور تے کم دا آغاز ہو چکیا اے تے ادارے نال جڑیاں طبی ٹیماں گوادر دے شہریاں لئی بھرپور خدمات انجام دے رہیاں نیں۔ گوادر فری زون وچ پین دے صاف پانی دا پلانٹ وی ایس ویلے اک ہزار ٹن پین لئی صاف پانی دے رہیا اے۔
گوادر وچ توانائی دی کمی ہمیشہ لئی اکتوبر 2023ء وچ ختم ہو جاوے گی۔ کوئلے نال چلن والا پاور پلانٹ 2023ء وچ کم شروع کر دیوے گا ایس پلانٹ توں ڈیڑھ لکھ مقامی لوکاں دی لوڑ وی پوری ہووے گی ایہ پلانٹ چین پاکستان اقتصادی راہداری دے تحت توانائی دے منصوبیاں وچوں اک اہم منصوبہ اے جہدا مقصد بلوچستان دے مقامی لوکاں دی بجلی دی لوڑ نوں پورا کرنا اے۔ تہانوں پتہ ہووے گا کہ ساڈا ملک ایس ویلے ڈیزل نال بجلی پیدا کرن لئی سالانہ لکھاں ڈالر خرچ کر رہیا اے ایس لئی کوشش ایہہ وے کہ گوادر وچ ایہ پلانٹ چھیتی توں چھیتی کم شروع کر دیوے تاں جے ایس شاندار بندرگاہ تے توانائی دی کمی دا سامنا نہ کرنا پوے۔ گوادر دے حوالے نال چین پاکستان اقتصادی راہداری دے وڈے منصوبیاں وچ گوادر الیکٹرک پاور پلانٹ’ گوادر انٹرنیشنل ایئرپورٹ’ پاک چین دوستی ہسپتال’ پارک چائنہ گوادر’ ٹیکنیکل پروفیشنل سکول’ گوادر ایسٹ ایکسپریس وے دا منصوبہ شامل اے۔ ایہناں منصوبیاں دی تکمیل نال گوادر خطے دی اک اہم بندرگاہ بن جاوے گا تے ایہ منصوبے بلوچستان دی اقتصادی ترقی وچ وی سنگ میل ثابت ہون گے۔ بلوچستان دی ترقی اصل وچ پاکستان دی ترقی اے تے حقیقت وچ ایہ پورے خطے دی ترقی اے’ ترقی دا ایہ سفر جاری رہنا چاہیدا اے۔
ترقی دے نال نال سانوں اپنے دکھاں دا مداوا وی کرنا چاہیدا اے۔ پاکستان پنشنرز ویلفیئر ایسوسی ایشن دے سیکرٹری جنرل چوہدری ریاض مسعود دا اک خط ملیا اے جہدے وچ بزرگ پنشنراں دے دکھاں دی کہانی اے۔ صنعتی رجسٹرڈ ورکرز دی موجودہ ای او بی آئی پنشن ایس ویلے مہینہ وار اٹھ ہزار پنج سو روپیے اے ایس تھوڑی جہی رقم وچ کیویں گزارا ممکن اے ایسے لئی ایس ورھے جون وچ ایہناں بزرگ پنشنراں نے پارلیمان ہائوس تے فیر نیشنل پریس کلب دے سامنے مظاہرہ کیتا اوہناں دا مطالبہ اے کہ پنشن وچ گھٹو گھٹ پنجاہ فیصد وادھے نال ای موجودہ حالات دا مقابلہ کیتا جا سکدا اے کیوں جے مہنگائی دی وڈی لہر موجودہ حکمراناں دے دور وچ آئی اے۔ پنشنراں دی سب توں وڈی تنظیم (پاوا) توں 37 وفاقی تے 39 صوبائی پنشنراں دیاں تنظیماں منسلک نیں جو ای بی او آئی پنشنراں دے حق وچ مظاہرے کر رہی اے۔ ای بی او آئی پنشنراں دی مجموعی گنتی تقریباً چھ لکھ اے ایہناں وچ ڈیڑھ لکھ بیوگان تے پنجاہ ہزار معذور وی نیں پر حیرت اے کہ مہنگائی دے ایس دور وچ اوہناں نوں ماہانہ صرف 8500 روپیے ملدے نیں حکمراناں نوں ایس پاسے وی دھیان دینا چاہیدا اے وڈیاں تنخواہواں تے ایہناں تنخواہواں دے برابر پنشن لین والے ججاں نوں وی ایہناں مظلوماں بارے سوموٹو ایکشن لینا چاہیدا اے یاں کسے ہور ڈھنگ نال اوہناں دا مسئلہ حل ہونا چاہیدا اے۔
ایسے طرح دا اک مسئلہ افسرشاہی دے نال وی درپیش اے۔ 19جولائی 2022ء نوں حکومت ولوں اک نوٹیفکیشن جاری ہوندا اے جہدے و چ مخصوص لوکاں نوںنواز دتا جاندا اے ایگزیکٹو الائونسز دی ایس ہیراپھیری دے خلاف پلاننگ’ ڈویلپمنٹ تے خصوصی اقدامات دی وزارت دے چار سو افسراں نے اسلام آباد ہائیکورٹ دا رخ کر رکھیا اے۔ وزیراعظم شہبازشریف نوں اوہناں دی وڈی اتحادی جماعت دے سربراہ تے پیپلزپارٹی دے چیئرمین بلاول بھٹو نے وی اک خط گھلیا اے جہدے وچ اوہناں نے بڑی تفصیل نال لکھیا اے کہ جو کم 1947ء توں اج تک نہیں ہویا سی اوہ کارنامہ موجودہ حکومت نے انجام دے دتا اے ایس لئی ایس سنہری کارنامے نوںختم کر دتا جاوے کیوں جے ایہ پہلی واری ہو رہیا اے کہ افسراں دے الائونس تے وی ٹیکس لا دتا گیا اے۔ بلاول بھٹو نے خاص طور تے وزارت خارجہ دے اوہناں افسراں دا تذکرہ کیتا جو بیرون ملک خدمات نبھا رہے نیں۔ اوہناں نے نال ای وزارت تجارت تے اطلاعات دے افسراں دا وی ذکر کر دتا اوہنا ںدے ایس تذکرے وچ آئی بی’ آئی ایس آئی تے افواج دے اوہناں افسراں دا ذکر وی شامل اے جو بیرون ملک پاکستان دی خدمات تے مامور نیں۔ ایس سلسلے وچ نویدقمر نے وی لکھیا اے کجھ محکمیاں دے سیکرٹریاں نے وی وزارت خزانہ دا دھیان ایس پاسے کروایا اے پر معاملہ انج دا انج ای اے۔ وزیراعظم نوں چاہیدا اے کہ اوہ اپنی کابینہ دا فیصلہ پڑھن تے فیر دیکھن کہ دس جون نوںاوہناں دی کابینہ نے کیہ فیصلہ کیتا سی؟ فیر ایہ کیویں ہویا کہ وزارت خزانہ ایس فیصلے دی خلاف ورزی کرن لگی؟ خدارا ایس امتیازی رویے نوں ختم کرو صرف مخصوص دھڑیاں نوں نوازنا بند کرو تے حق داراں نوں حق توں محروم نہ رکھو کہ بقول ڈاکٹر خورشید رضوی:
جس پھول کو دیکھوں یہی لگتا ہے کہ اس میں
اک رنج بھی رہتا ہے مسرت کے علاوہ