پرویز الٰہی دا عوام دوست فیصلہ…گجرات ڈویژن

کجھ دن پہلاں وزیراعلیٰ پنجاب پرویزالٰہی نے ضلع گجرات نوں ڈویژن بنان دا حکم صادر کیتا تے دنیا بھر وچ رہن والے گجراتیاں نوں اک عجیب جئی خوشی ہوئی جد کہ کجھ لوکاں نے ایہدے اتے تنقید وی کیتی۔ ایہہ اک حقیقت اے کہ چودھری پرویزالٰہی نوں جدوں وی اقتدار نصیب ہویا اے اوہناں نہ صرف اپنے آبائی ضلع گجرات بلکہ نال نال پنجاب بھر وچ لوکاں لئی آسانیاں مہیا کرن دی عملی کوششاں کر کے ثابت کیتا اے کہ اوہ عوامی مسائل نوں بہتر طور تے جاندے نیں تے عوام دی مشکلاں نوں ختم کرن یا گھٹ توں گھٹ کرن لئی نویں نویں منصوبہ جات شروع کرواندے رہندے نیں۔ اپنے پچھلے دور وچ وزیراعلیٰ نے گورنمنٹ سکولاں وچ مفت تعلیم تے درسی کتاباں مہیا کرن دا سلسلہ شروع کروایا۔ اوہناں ویلے دی لوڑ دے پیش نظر تے پڑھے لکھے نوجواناں نوں نوکریاں دین لئی ٹریفک وارڈنز بھرتی کیتے تے سب توں اہم کم جہڑا پرویزالٰہی نے شروع کیتا اوہ سی ریسیکیو1122۔ ایہہ اک ایسی خدمت اے جہدے توں روزانہ سینکڑاں لوکاں دی مدد ہو رہی اے۔ شہر توں کجھ ہٹ کے بنائی گئی خوبصورت یونیورسٹی آف گجرات نہ صرف بلکہ گوجرانوالہ تے دوجے اضلاع دے نوجواناں دی علمی پیاس بجھا رہی اے۔ گجرات دی تریخ بہت پرانی اے لیکن قیام پاکستان مگروں ضلع گجرات نے پنکھا سازی’ برتن سازی’ سروس شوز تے دوجے صنعتی شعبیاں وچ خوب نام کمایا اے تے ملکی معیشت وچ اپنا بھرواں کردار ادا کردا چلیا آ رہیا اے۔ بہادر’ شہید تی غازیاں دا مسکن گجرات صوبہ پنجاب دا اہم ترین شہر منیا جاندا اے۔ گجرات پاکستان دے صوبہ پنجاب دے شمال وچ واقع اے۔ا یہدے مشرق وچ گرداسپور شمال مشرق وچ جموں شمال وچ بھمبھر جہلم’ مغرب وچ منڈی بہائوالدین’ جنوب مغرب وچ سرگودھا’ جنوب وچ گوجرانوالہ تے جنوب مشرق وچ سیالکوٹ واقع اے۔ دو دریاواں جہلم تے چناب وچ واقع ہون دی وجہ نال گجرات دی زمین بہت زرخیز اے۔ لوک زیادہ تر گندم’ گنے تے چاول دی فصل کاشت کردے نیں۔ گجرات اک قدیمی شہراے۔ برطانوی تریخ دان Gen. Cunningham دے مطابق گجرات شہر 460 قبل مسیح وچ گجر راجا بچن پال نے دریافت کیتا جد کہ شہر دے محکمانہ نظام دی بنیاد 1900وچ برطانوی سامراج نے پائی۔ مغلیہ دوروچ مغل بادشاہواں دا کشمیر جان دا رستہ گجرات ای سی۔ جدوں مغل بادشاہ جہانگیر دا کشمیر توں واپسی تے انتقال ہو گیا تے ریاست نوں بدامنی توں بچان لئی اوہدے درباریاں نے انتقال دی خبر نوں لکان دی کوشش کردے ہوئے اوہدے ڈھڈ دی انتڑیاں کڈ کے گجرات وچ ای دفنا دتی گئیاں۔ فیر انگریزاں تے سکھاں وچ دو وڈی لڑائیاں ایسے ضلع وچ لڑی گئیاں جہناں وچ چیلیانوالہ تے گجرات دی لڑائی شامل نیں تے گجرات دی لڑائی جتن دے فوراً مگروں انگریزاں نے تخت لہور اتے قبضہ کردے ہوئے 22فروری 1849 نوں پنجاب دی جت دا اعلان کردتا۔ ایسی کئی تریخی عمارتاں تے باقیات کھنڈراں دی شکل وچ گجرات دے آسے پاسے موجود نیں۔ گرینڈ ٹرنک روڈ جہنوں ”جی ٹی روڈ” وی آکھیا جاندا اے۔ شیر شاہ سوری نے بنوائی سی جہڑی گجرات دے کولوں لنگھدی اے۔ گجرات دے بوہتے لوک راجپوت (راجہ) گجر آرائیں مہر’ جٹ’ وڑائچ نیں تے سادات دی وی اک کثیر تعداد ایس ڈویژن وچ آباد اے۔ اپنی جوانمردی’ بہادری تے شجاعت دی وجہ نال گجرات دے تن فوجی جوان راجہ عزیز بھٹی شہید’ میجر شبیر شریف شہید تے میجر محمد اکرم شہید نشان حیدر حاصل کر چکے نیں۔پچھلے چیف آف آرمی سٹاف جنرل راحیل شریف دا تعلق وی گجرات نال ای اے۔ گجرات دے نوجواناں دی پہلی ترجیح فوج وچ بھرتی ہو کے مادر وطن دی حفاظت لئی خدمات سرانجام دینا اے۔ ایہدے مگروں ایس شہر دے نوجواناں دی کثیر تعداد عرب ملکاں تے یورپ وچ محنت مزدوری کر کے ہر مہینے وطن عزیز نوں قیمتی زرمبادلہ کما کے بھیج رہے نیں۔ ہن جد کہ گجرات نوں ڈویژن دا درجہ دے دتا گیا اے تے میرے سنے بہت سارے لوکاں دی خواہش اے ڈویژن دے آخری وڈے قصبہ کوٹلہ ارب علی خان نوں وی تحصیل بنایا جاوے۔ کوٹلہ بارے آکھیا جاندا اے کہ ایہہ شہر گجرات توں وڈی کاروباری منڈی اے۔ اک وڈا ہسپتال’ عدالتی نظام تے انتظامی مشینری نال کوٹلہ دے لوکاں دے بہت سارے مسائل حل وچ آسانیاں ہو سکدیاں نیں۔ اقتدار آنی جانی چیز اے لیکن کسے وی حکمران دے چنگے کم اوہنوں ہمیشہ لوکاں دے دلاں وچ زندہ رکھدے نیں۔ میرے خیال وچ پرویزالٰہی نوں وزارت اعلیٰ ایسے لئی ملی ا ے کہ اوہ دوجیاں توں ہٹ کے تھلڑی سطح دے عوامی مسائل نوں بہتر طور تے حل کروان دی صلاحیت رکھدے نیں۔