میرٹ ڈگدے ڈگدے کتھے اپڑ گیا اے

سچ پچھو تے سیاسی گل بات دے سلسلے وچ معاملہ ہن کوفت’ بیزاری’ تنگی تے الجھن توں اگے نکل گیا اے۔ ہن تے اکثر اوقات سیاسی گل بات کرن والیاں نال باقاعدہ لڑ پین نوں دل کردا اے۔ معاشرے وچ سیاسی اختلاف نے نفرت دی خلیج دی صورت اختیار کر لئی اے تے ایہ خلیج دن بدن کھلی ہوندی جا رہی اے۔ میوزیکل چیئر نامی اک تفریح ہوندی اے جہدے وچ میوزک چلن دے دوران ایس کھیڈ دے شرکاء چلدے رہندے نیں تے ایس دوران منتظمین درمیان وچ دائرے دی صورت وچ لگی ہوئی کرسیاں وچوں اک کرسی گھٹ کر دیندے نیں۔ ایہناں کرسیاں دے دوالے گھمدے ہوئے ہر بندے نوں پتہ ہوندا اے کہ ایہناں کرسیاں دے دوالے گھمن والیاں دی گنتی دی نسبت ہن اک کرسی گھٹ چکی اے تے میوزک رکدیاں ای کوئی اک بندہ کھیڈ توں باہر ہو جاوے گا ایس لئی ہر بندے دی نظر اگلی کرسی تے ہوندی اے۔ چالاک تے سمجھدار لوک اوس میوزک دوران کسے دوجے بندے دی تھاں صرف کرسی دے حصول تے اکھ ٹکائی بیٹھا ہوندا اے تے اپنے پہلو والی کرسی دے کول اودوں تک ہولی ہولی گزردے ہوئے نظراں جمائی رکھدے نیں جدوں تک اوہناں توں اگلا بندہ اگلی کرسی توں اگے نہ نکل جاوے تے اوہ اوہدے گزردے ای تیز قدماں نال اگلی کرسی دے کول اپڑ جاندے نیں تے ایہ کھیڈ آخر تک انج ای چلدا رہندا اے۔ ایس کھیڈ وچ کسے نوں کسے دے نال رعایت ورتدے ہوئے نہیں ویکھیا۔ ایہ صرف وقتی کھیڈ دا معاملہ ہوندا اے۔ ساڈے ایتھے اقتدار دے کھیڈ وچ کرسی دے حصول لئی ساڈے سیاستدان کس حد تک خودغرض ہو سکدے نیں ایہدا اندازہ ایس گل توں لا لوو کہ بہت ساریاں نوں پتہ اے کہ ملکی معیشت دا تختہ ہو چکیا اے۔ دنیا بھر وچ پاکستان دی معاشی بدحالی تے اللہ نہ کرے دیوالیہ پن دیاں گلاں ہن معاشی حلقیاں وچ گل بات دا موضوع نیں پر حکمران نوں اپنی کرسی دے تحفظ تے اپوزیشن نوں کرسی دے حصول توں علاوہ نہ کجھ سجھ رہیا اے تے نہ ای دکھائی دے رہیا اے۔
اسیں نفرت نوں نفرت نال’ بدکلامی نوں بدکلامی نال تے عدم برداشت نوں جوابی عدم برداشت نال حل کرن دی کوشش کر رہے آں۔ تحمل’ بردباری’ برداشت تے اخلاقیات تے سمجھو جیویں بالکل ای ماضی دا حصہ بن کے رہ گئیاں نیں۔ ہن ساڈے ایتھے حزب اقتدار تے حزب اختلاف اک سیاسی جمہوری منظرنامے دے دو فریق نہیں سگوں مخالف فریق نیں۔ اک دوجے دے نال حالت جنگ وچ مشغول دو سیاسی دشمن نیں جو اک دوجے نوں ہران دے نہیں سگوں فنا کرن دے تلے ہوئے نیں۔ ایس نفرت تے دشمنی دا اندازا ایس گل توں لا لوو کہ اک ٹی وی پروگرام وچ مسلم لیگ ن دے رکن قومی اسمبلی ارمغان سبحانی نے میزبان دے سوال کہ تہانوں مجبوری دے تحت جے اپنے گھر وچ اک فوٹو لانی پوے تے اوہ فوٹو کہدی ہووے گی؟ آپشن تہاڈے کول اے عمران خان تے نریندر مودی۔ جواب وچ ارمغان سبحانی کہن لگا کہ ایس توں بہتر اے کہ نریندر مودی۔ ہن تسیں ایس مائنڈ سیٹ توں اندازا لا لوو کہ سیاسی نفرت کس حد تک اپڑ چکی اے کہ ساڈا اک رکن اسمبلی مسلماناں تے پاکستان نال دشمنی دی بنیاد تے ہندو انتہاپسنداں دے ووٹاں نال برسراقتدار آن والے مودی نوں عمران خان تے ترجیح دے رہیا اے۔
ایہ صرف فوٹو دا اک رخ اے’ دوجے پاسے وی ایسے قسم دی صورتحال اے۔ عمران خان صاحب الیکشن جتن تے نریندر مودی نوں مبارکباد دا پیغام گھل سکدے نیں پر اپوزیشن لیڈر نال گل کرن توں صاف انکاری سن۔ میاں نوازشریف سجن جندال نوں ویزے وچ مری دی اجازت نہ ہون دے باوجود میری سد کے ملاقات کر سکدے نیں۔ نریندر مودی نوں امباں تے ساڑھیاں دا تحفہ دے سکدے نیں پر عمران خان دے نال نہیں بیٹھ سکدے۔ کوئی اوہناں نوں سمجھاوے کہ اللہ دے بندو جے تسیں ایس پارلیمانی جمہوری نظام وچ حصول اقتدار لئی الیکشن لڑنا قبول کیتا اے تے ایس نظام دے تحت آئینی مجبوری ای سہی پر تہانوں اک ای اسمبلی وچ بیٹھنا ہووے گا تے بحیثیت قائد حزب اقتدار تے اختلاف اک دوجے دے نال بہہ کے بہت سارے اجہے ضروری آئینی معاملات جہناں وچ بہت ساری اہم آئینی حیثیت دی حامل تقرریاں وی شامل نیں کرنیاں ہون گئیاں۔ بھلا ایہ کیہ ہویا کہ تسیں ایس آئین دے تحت الیکشن لڑو’ اقتدار دے مزے لوو’ حزب اختلاف دے لیڈر دا پروٹوکول انجوائے کرو تے آپس وچ بہہ کے گل کرن تے دوجیاں آئینی ذمہ داریاں نوں نبھان دی گل ہووے تے تسیں اک دوجے دی شکل ویکھنا وی گوارا نہ کرو۔
ہن ایہدے نال بحث نہیں کہ میاں شہبازشریف کس طریقے نال وزیراعظم پاکستان بنے سگوں ایہ گل طے اے کہ جے اودوں تحریک انصاف دے اپنے ای ارکان قومی اسمبلی لوٹے نہ بن دے تے ایہ سب کجھ نہ ہوندا۔ اوہناں دے لوٹا بنن دی کہانی دیاں جڑاں کتھے اپڑدیاں نیں یاں اوہناں دیاں ڈوریاں کتھوں ہلائیاں جا رہیاں سن ایہ اخلاقیات دا معاملہ اے۔ اودں بے شک سب کجھ صاف دکھائی دے رہیا سی پر اخلاقی حوالیاں توں ہٹ کے سب کجھ آئینی دائرہ کار وچ ہویا۔ عدم اعتماد دی تحریک دنیا وچ پہلی واری کامیاب نہیں ہوئی سی پر اسلام آباد وچ ہون والی ایس تحریک عدم اعتماد تے اپنی پارٹی دی اندرونی کمزوریاں دا سارا ملبہ وی امریکہ بہادر تے سٹ کے اک بیانیہ تشکیل دے دتا گیا۔ ایہو حال حمزہ شہبازشریف دی وزارت اعلیٰ دے حلف تے کیتا گیا اودوں وی جے پی ٹی آئی دے پنجی اراکین صوبائی اسمبلی لوٹے نہ بن دے تے حمزہ شہباز کیویں وزیراعلیٰ منتخب ہوندا؟ ٭٭