شاہ نال وفاداری لے ڈبتی اے

کسے زمانے وچ اک بادشاہ سی جنہے جنگلی کتے پالے ہوئے سن اوہدے وزیراں توں جدوں وی کوئی وزیر غلطی کردا بادشاہ اوہنوں اوہناں کتیاں اگے سٹوا دیندا کتے اوہدیاں بوٹیاں نوچ نوچ کے مار دیندے۔ اک واری بادشاہ دے اک خاص وزیر نے بادشاہ نوں غلط مشورہ دتے دتا جو بادشاہ نوں پسند نہیں آیا اوہنے فیصلہ سنایا کہ وزیر نوں کتیاں دے اگے سٹ دتا جاوے۔ وزیر نے بادشاہ اگے التجا کیتی کہ حضور میں دس ورھے تہاڈی خدمت وچ دن رات اک کیتے نیں تے تسیں اک غلطی دی مینوں اینی وڈی سزا دے رہے او تہاڈا حکم سر اکھاں تے پر میری بے لوث خدمت دے بدلے مینوں تسیں صرف دناں دی مہلت دیو فیر بلاشبہ مینوں کتیاں اگے سٹوا دیو’ بادشاہ ایہ سن کے دس دن دی مہلت دین تے راضی ہو گیا۔ وزیر اوتھوں سدھا رکھوالے دے کول گیا جو اوہناں کتیاں دی حفاظت تے مامور سی تے جا کے کہیا مینوں دس دن ایہناں کتیاں دے نال گزارنے نیں تے ایہناں دی مکمل رکھوالی میں کراں گا۔ رکھوالا وزیر دے ایس فیصلے نوں سن کے چونکیا پر فیر اجازت دے دتی۔ اوہناں دس دناں وچ وزیر نے کتیاں دے کھانے پینے’ نہلان تک دے سارے کم اپنے ذمے لے کے بڑی تندہی دے نال نبھائے۔ دس دن مکمل ہوئے بادشاہ نے اپنے پیادیاں نوں وزیر نوں کتیاں اگے سٹوایا پر اوتھے کھڑا ہر بندہ ایس منظر نوں ویکھ کے حیران ہویا کہ اج تک پتہ نہیں کنے ای وزیر ایہناں کتیاں دے نوچن نال اپنی جان گنوا بیٹھے اج ایہو کتے ایس وزیر دے پیراں نوں چٹ رہے نیں۔ بادشاہ ایہ سب ویکھ کے حیران ہویا تے پچھیا کیہ ہویا اج ایہناں کتیاں نوں؟ وزیر نے جواب دتا بادشاہ صاحب میں تہانوں ایہو وکھانا چاہندا سی میں صرف دس دن ایہناں کتیاں دی خدمت کیتی تے ایہ میرے ایہناں دس دناں وچ کیتے گئے احسانات بھل نہیں پا رہے تے ایتھے اپنی زندگی دے دس سال تہاڈی خدمت کرن وچ دن رات اک کر دتے پر تسیں میری اک غلطی تے میری ساری زندگی دی خدمت گزاری نوں کنڈ پچھے سٹ دتا۔
بادشاہ نوں شدت نال اپنی غلطی دا احساس ہویا اوہنے وزیر نوں چکوا کے مگرمچھاں دے تالاب وچ سٹوا دتا۔ ایہدے توں ایہ گل ثابت ہوندی اے کہ جدوں مینجمنٹ اک واری فیصلہ کر لوے کہ تہانوں رگڑا دینا اے تے فیر تہانوں رگڑا لگے گا بھاویں تسیں جو مرضی کر لوو میں ایس سیاست وچ جو ویکھیا اے تے کجھ محسوس کیتا اے؟ اوہ ایہ کہ بہت سارے لوک شاہ توں ودھ شاہ دے وفادار بن دے نیں تے اوہو رگڑے وچ آندے نیں۔ اوورکونفیڈنس ہمیشہ انسان نوں نقصان دیندا اے سگوں بے عزت کرواندا اے۔ مریم اورنگزیب’ رانا ثناء اللہ خان’ خواجہ سعدرفیق’ شیخ رشید’ ڈاکٹر شہباز گل’ فیصل جاوید’ مراد سعید’ ڈاکٹر بابراعوان پیپلزپارٹی دے کرتا دھرتا تے مریم نواز صفدر توں ودھ شاہ دے وفادار بن دے نیں۔ ایہو اوہ لوک نیں جہناں دی وجہ نال ایہ سیاسی گتھیاں سلجھن دا ناں نہیں لیندیاں۔ ایہو اوہ لوک نیں جہناں نے سیاست د ارخ بدلیا ہویا اے۔ ڈاکٹر شہباز گل اوہ بندہ اے جو پڑھیا لکھیا اے تے تعلیمی میدان وچ اپنی بہتر کارکردگی وکھا رہیا سی پر اپنے آپ نوں سیاست دی دلدل وچ پھسا کے ہر طرح نال لیت و لعل ہو رہیا اے۔ ذلت و خواری نوں اپنا مقدر بنا رہیا اے۔ جے سیاست دا ایناں ای شوق سی تے اپنے رویے تے اخلاق نوں بہتر رکھدا۔ نپی تلی گل بات نوں جنم دیندا۔ ہن ”منجی پیڑھی ٹھوکنا” ورگے الفاظ میڈیا تے بولنا اک اینے پڑھے لکھے بندے نوں زیب نہیں دیندا۔ انسان اپنے اخلاق تے رویے نال صدیاں تک لوکاں تے آن والی نسلاں توں علاوہ تریخ وچ زندہ رہ سکدا اے۔ گل ہمیشہ سچی تے تحقیقی معیار نوں سامنے رکھ کے کرنی چاہیدی اے۔ ایہ حال شہباز گل دا ای نہیں درج بالا لوکاں توں علاوہ باقی سیاستدان وی ایسے کھاتے وچ آندے نیں۔
دوجی گل اک استاد اپنے طالب علماں لئی مشعل راہ ہوندا اے جے استاد ای اپنی راہ ٹیڑھی کر دیوے یعنی اوہ اکھڑ مزاج’ بدتمیز’ کرپٹ تے غیرذمہ دارہو جاوے تے اوہدے موجودہ طالب علم تے آن والی نسل راہ راست توں بھٹ جاوے گی۔ ایسے طرح سیاستدان اپنے ملک’ اپنی قوم تے اپنی پارٹی دے سربراہ تے استاد ہوندے نیں جے اوہناں دا اخلاق’ اوہناں دا رویہ تے اوہناں دا کردار مثبت نہیں ہووے گا تے سمجھ لو و بائی کروڑ عوام وی کرپٹ’ بدتمیز’ لاقانون’ غیرذمہ دار’ فراڈی تے چور ہووے گی۔ ہن تسیں اپنے گلمے وچ جھاتی مارو کیہ ساڈے وچ ایہ ساریاں برائیاں نہیں پائی جاندیاں’ اسیں خاک مسلمان آں؟ بس اسیں ناں دی اسلامی ریاست وچ رہندے آں جدوں اذان ہوندی اے اودوں پتہ چلدا اے کہ ایہ اسلامی ملک اے۔ ساڈے دلاں توں لے کے ساڈے کرداراں توں کدھرے اسلام نظر نہیں آندا۔ ایس لئی ایہ تے شاہ توں ودھ شاہ دے وفادار بن دے نیں۔ ایہناں نوں نصیحت اے کہ اوہ کرداراں تے دھیان دین۔ اپنے قول و فعل تے دھیان دین۔ جے مینجمنٹ اوہناں نوں رگڑا نہیں دیوے گی تے فیر قیامت دور نہیں۔ یاد رکھو جہنم اجہے لوکاں لئی ای اے۔ ٭٭