مَنے پرمنے شاعر نذیر قیصر دے اعزاز وچ شام

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربندھ ہیٹھ نامور شاعر نذیر قیصر دے اعزاز وچ اک شام دا پرآہر کیتا گیا جہدے وچ دانشوراں’ ادیباں تے شاعراں نے اوہناں دے فن شاعری تے شخصیت دے مختلف پہلوواں اتے چانن پایا۔ اظہار خیال کرن والیاں وچ شوکت پاسٹر، عابد قیصر، افضل ساحر، شاہد اشرف، شہزاد رندھاوا، کلیان سنگھ کلیان، آسناتھ کنول، زیباناز، منیر ہوشیار پوری تے ڈاکٹر صغرا صدف ڈی جی پِلاک شامل سن۔
مقررین نے آکھیا کہ نذیر قیصر نوں اوہناں دی علمی تے ادبی خدمات دے پیش نظر کئی ایوارڈاں نال نوازیا گیا جہناں وچ آدم جی ایوارڈ’ صدر پاکستان ولوں انسانی حقوق ایوارڈ’ گورونانک ایوارڈ’ لوک ورثہ ایوارڈ’ نیشنل کلچرل ایوارڈ دے علاوہ دوجے ایوارڈ شامل نیں۔ اوہناں دی شخصیت تے شاعری اتے ایم فل دے مقالہ جات لکھے جا چکے نیں۔ ہمسایہ ملک بھارت وچ اوہناں دی شاعری نوں تعلیمی نصاب وچ شامل کیتا گیا اے۔ اوہناں دے پنجابی تے اردو شاعری دے 15مجموعے منظر عام اتے آ چکے نیں۔ اوہناں نے کئی فلمی گیت وی لکھے۔ امرتا پریتم وی اوہناں دے مداحواں وچ شامل سی۔
نذیر قیصر نہایت ای شفیق’ ملنسار تے محبت کرن والے انسان نیں ۔ جہڑا وی اک واری ملدا اے اوہناں دا ہو کے رہ جاندا اے۔ اوہناں دی شاعری دے اندر رومانیت’ صوفیانہ رنگ تے پسماندہ طبقے دے جذبات دی جھلک نمایاں اے۔ نذیر قیصر نے اپنی شاعری نال سامعین نوں خوب محظوظ کیتا تے بھرویں داد وصول کیتی۔ حامد علی بیلا نے شاہ حسین دا کلام ”مائے نی میں کہنوں آکھاں” پیش کر کے خوب رنگ جمایا۔ ڈائریکٹر جنرل پلاک ڈاکٹر صغرا صدف نے پروہنے شاعر نوں پھلاں دا تحفہ پیش کیتا تے آکھیا کہ نذیر قیصر دی شاعری ادب وچ اک انمول وادھا اے۔ پروگرام وچ نظامت دے فرائض ڈاکٹر خاقان حیدر غازی نے سرانجام دتے۔

٭٭٭