امریکہ تے چین وچ ثالثی دی پیشکش

امریکہ تے چین جئی دنیا دی دونویں وڈی طاقتاں وچ محاذ آرائی دن بدن شدت اختیار کردی جا رہی اے۔ محاذ آرائی ودھن نال ترقی پذیر ملکاں نوں درپیش تجارتی’ اقتصادی تے معاشی مسائل وچ وادھے دا خدشہ اے۔ جے دونویں وڈی طاقتاں تنازعات گل بات نال حل کرن دے بجائے کشیدگی نال اک ہور سرد جنگ دا ماحول پیدا کردیاں نیں تے چاہے مذکورہ دونویں ملکاں وچ فوجی ٹکرائو نہ ہووے مگر کرہ ارض دے دوجے چھوٹے تے وڈے ملکاں وچ مڈبھیڑ دا امکان مکمل طور تے رد نہیں کیتا جا سکدا۔ انج ہونا سوچے سمجھے منصوبے دے تحت ترقی پذیر ملکاں دے مسائل وچ وادھا کرن دے مترادف ہووے گا جہدے توں نہ صرف خوراک دی کمی دا مسئلہ ہور شدت اختیار کر سکدا اے بلکہ غربت دے خاتمے دی عالمی کوششاں وی متاثر ہو سکدیاں نیں۔ جے دنیا نوں پرامن تے معاشی طور تے خوشحال بنانا اے تے دونویں وڈی معاشی طاقتاں نوں اک دوسرے نوں نیچا وکھان تے اقوام عالم نوں امتحان وچ پان دے بجائے گل بات جیا ذمہ دارانہ طرزعمل اپنانا ہووے گا۔ مذاکرات توں تنازعات دا حل تلاش کرنا کجھ بوہتا مشکل نہیں کیوں جے بوہتے مسائل غیر حقیقی تے من گھڑت نیں۔اک دوجے نوں معاشی طور تے نقصان پہنچان لئی مداخلت دی پالیسی توں دنیا دا امن دائو اتے لگ سکدا اے جد کہ دونویں ملک اک دوجے دے تجربیاں توں فیدہ چک کے نہ صرف غربت تے بے روزگاری جئے مسائل گھٹ یا ختم کر سکدے نیں بلکہ غریب ملکاں دی وی زیادہ بہتر طریقے نال مدد کر سکدے نیں مگر شرط ایہہ اے کہ بے لچک رویے دے بجائے لچکدار رویہ اپنایا جاوے۔ مداخلت تے بے لچک رویے توں بھک تے افلاس جئے عالمی مسائل برقرار رہن گے۔ کسے حوالے نال دنیا ہور کسے سرد جنگ یا بلاک دے قیام دی ہرگز متحمل نہیں ہو سکدی۔ دونویں ملکاں دے تعلقات وچ رخنہ دا کارن بنن والے مسائل ایسے نہیں جہڑے حل نہیں ہو سکے کیوں جے ایہہ اک دوجے نوں نیچا وکھان دی جنگ اے ۔ چین نوں مداخلت دا شکوہ اے جد کہ امریکہ نوں خدشہ اے کہ چین تجارتی آڑ وچ جاسوسی دے آلات دے ذریعے اوہدی قومی سلامتی لئی خطرہ بن سکدا اے۔ چین دا شکوہ تے بجا اے مگر واشنگٹن دے خدشات بے بنیاد نیں کیوں جے زمینی فضا توں خلا تک ا یسے کئی ذرائع نیں جہناں دی مدد نال کسی دی نقل و حمل اتے نظر رکھنا تے معلومات حاصل کرنا نہایت ای آسان اے۔ ایسے بنا تے امریکی الزام بے وزن لگدے نیں۔
امریکی جریدے نوں انٹرویو دے دوران وزیراعظم شہباز شریف نے امریکہ تے چین وچ ثالثی کران دی پیشکش کیتی اے تاں جے نہ صرف دنیا دی دونویں وڈی معاشی تے فوجی طاقتاں نوں دشمنی دے بجائے دوستی ول لیایا جا سکے بلکہ اقوام عالم نوں نویں سردجنگ دا ایندھن بنن توں بچایا جاسکے۔ ایہہ درست اے کہ دنیا توں بھک تے افلاس نوں گھٹ کرنا اے تے فوجی تنازعات نوں ودھن توں روکنا ہووے گا مگر ویکھن یا غور کرن والی گل ایہہ اے کہ کیہ پاکستان ایسی پوزیشن وچ اے کہ دنیا دی دونویں وڈی طاقتاں وچ ثالثی دا کردار ادا کر سکے؟ ایہدے جواب وچ ہاں تے کسی صورت وچ نہیں آکھ سکدے آںجہدی وڈی وجہ پاکستان دی کمزور معیشت اے تے ایہہ معاشی کمزوری ویلے دے نال گھٹ ہون دے بجائے ودھدی جا رہی اے۔ قرضیاں دے انبار نے قسطاں دی ادائیگی تک اوکھی کر دتی اے ۔ جے قومی قیادت ایس اوکھی صورتحال نوں ختم کرن لئی چھیتی ٹھوس تے نتیجہ خیز اقدامات نہیں کردی تے ملک نوں خدانخواستہ سری لنکا جئے حالات دا سامنا کرنا پے سکدا اے۔ ایس دے علاوہ موجودہ حکومت اتے امریکی طفیلی ہون دے الزامات نیں۔ ایسے لئی بظاہر ایسا کوئی امکان نہیں کہ دونویں ملک پاکستان جئے ملک دی ثالثی نوں قبول کرن۔ ثالثی محض منت سماجت نال نہیں ہوندی بلکہ ثالث دی اینی حیثیت ہونی چاہیدی اے کہ فریقین لئی قابل قبول ہون دی بنا تے مذاکرات دی میز اتے لیا سکے۔ نیز تصفیہ طلب مسئلیاں اتے گل بات نال ہون والے اتفاق رائے دا پابند وی کر سکے مگر جوہری طاقت دے باوجود امن وامان دے مسائل تے معاشی بھنور وچ پھسیا پاکستان ایسی کسی صلاحیت توں محروم اے ایسے لئی چین تے امریکہ ولوں اجے تک ثالثی دی پیشکش دے جواب وچ مثبت ردعمل دا اظہار سامنے نہیں آیا۔
پاک چین تعلقات دی خاص گل ایہہ اے کہ دونویں ملکاں نے پچھلی کجھ دہائیاں توں اک دوجے نال تعاون وچ کافی وادھا کیتا اے۔ ایہہ تعاون صنعتی ‘ تجارتی’ زرعی توں لے کے فوجی شعبیاں تک وسعت اختیار کر چکیا اے۔ دونویں ملک غربت تے بے روزگاری دے خاتمے لئی وی مشترکہ کوششاں وچ مصروف نیں تے ایس حوالے نال کئی اک منصوبیاں اتے کم جاری اے۔ سی پیک دے ذریعے چین اپنے علاقائی قریبی حلیف پاکستان نوں معاشی مسائل توں نجات دوان لئی سنجیدہ اے۔ ایسے طرح عدم اعتماد دے ذریعے اقتدار دی تبدیلی مگروں پاک امریکہ دو طرفہ تعلقات وچ وی نہ صرف حیران کن بہتری ویکھن وچ آئی اے بلکہ مالی تے تجارتی تعاون وچ وی وادھے دا رجحان اے ایسے لئی سفارتی حلقیاں نوں قوی امید اے کہ پاک امریکہ دیرینہ تریخی تعاون دا اوہ منقطع سلسلہ اک واری فیر بحال ہو جاوے گا جہدے وچ بھارت نوں قریبی اتحادی بنان پاروں دراڑ آ گئی سی۔ اسلام آباد دے نالاں پالیسی ساز حلقے ہن راضی نیں جہدے توں جنوبی ایشیا دی جوہری طاقتاں بھارت تے پاکستان نال امریکی تعلقات وچ بہتری ویکھن وچ آ رہی اے۔لیکن پیش نظر رکھن والی گل ایہہ اے کہ امریکہ لئی پاکستان وچ سماجی دے نال ہن وی کئی سیاسی مسائل موجود نیں۔ طاقتور اپوزیشن رہنما اقتدار توں محرومی نوں امریکی سازش نال نتھی کر رہے نیں۔ ایہہ بیانیہ دونویں ملکاں نوں کول لیان دی راہ وچ ہن وی اک اہم رکاوٹ اے۔ اپوزیشن رہنما دا ایہہ بیانیہ ا مریکہ تک محدود نہیں اوہ چین نوں وی محدود رکھن دے متمنی نیں۔ اوہناں دے دور وچ سی پیک منصوبیاں اتے جاری کم وچ تساہل ویکھن وچ آیا۔ ایہناں وجوہات دی بنا تے امریکہ سنے چین لئی پاکستان قابل اعتماد یا قابل اعتبار حلیف نہیں رہیا بلکہ دونویں ملک شکوک و شبہات دا شکار نیں۔ ایس دے علاوہ شہباز شریف مقبول عوامی رہنما نہیں بلکہ کمزور پوزیشن دے مالک نیں۔ ایہہ کمزوری اوہناں دے فیصلیاں توں وی جھلکدی اے ایسے لئی وزیراعظم ولوں ثالثی دی پیشکش نوں محض پیشکش ای تصور کرنا چاہیدا اے۔ عملی طور تے قبولیت دا امکان معدوم اے۔
پاکستان نے ماضی وچ چین تے امریکہ نوں کول لیان وچ پل دا کردار ضرور ادا کیتا مگر ہن حالات بدل چکے نیں۔ روس دی شکست و ریخت مگروں امریکی ہدف چین دی وحدت نوں نقصان پہنچانا اے۔ ایس منصوبے اتے عملدرآمد لئی تائیوان دا انتخاب کیتا گیا اے۔ ماضی وچ روس نوں توڑن لئی معیشت تباہ کرن دی حکمت عملی اپنائی گئی مگر چین چوکنا اے اوہنے امریکی عزائم بھانپدے ہوئے صبرو تحمل دی پالیسی چھڈ کے جارحانہ اقدامات شروع کر دتے نیں۔ امریکی ایوان نمائندگان دی سپیکر نینسی پیلوسی دے دورہ تائیوان نے محاذ آرائی وچ شدت پیدا کردتی اے جہدے توں سفارتی حلقیاں نوں خدشہ اے کہ روس تے یکورین وانگوں چین تے تائیوان وچ وی محدود فوجی جھڑپاں ناممکن نہیں۔ انج ہون نال آبنائے تائیوان جئی اہم تجارتی گزرگا ہ وچ جاری تجارتی سرگرمیاں متاثر ہو سکدیاں نیں۔ امریکہ جیویں اپنی سلامتی دے حوالے نال حساس اے تے کسی ملک نوں خطرہ بنن دی اجازت نہیں دیندا جے دوجے ملکاں دی سلامتی دے متعلق خود وی خطرہ بنن توں گریز کرے تے سماجی تے اقتصادی شعبیاں وچ تعاون دے ذریعے اعتماد دی فضا بہتر بناوے تے نہ صرف چین تے امریکہ وچ تنائو گھٹ سکدا اے بلکہ سرد جنگ جئے ماحول دا خطرہ وی ٹل سکدا اے جہدے مگروں کسی ثالثی دی لوڑ وی نہیں رہوے گی بلکہ کووڈ19 جئی عالمی وباواں اتے قابو پان وچ وی آسانی ہو سکدی اے۔ جے انج نہیں ہوندا تے تنائو دی کیفیت وچ وادھا ہوندا رہوے گا جہدا واضح امکان اے ۔ لہٰذا پاکستانی قیادت نوں چاہیدا اے کہ عالمی تنازعات وچ دخل اندازی نال اوہناں دا حصہ بنن دے بجائے ملکی مسائل حل کرن ول توجہ دیوے۔