ہاتھی دی لاعلمی

سعد اللہ شاہ

اس سے پہلے تو کسی سے نہیں پوچھا تیر
اب ترے نام پر کیوں برپا ہے ہنگامہ سا
آزمانا ہے جو خود کو تو اتر جا مجھ میں
اس سمندر کا نہ اندازہ کناروں سے لگا
جے اپنے ول ویکھ لیے تے حقیقت کھل جاندی اے۔ میں ایہہ کہنا چاہندا واں کہ اک ای بندے تے ہنگامہ کیوں؟ اہمیت تے کسے دی نظرکرم یاں نظر التفات نال بن دی اے۔ مخالفین اوہنوں طوطا کہندے رہن تے اوہ طوطا کہ جہدے وچ اک دی نہیں کئی دوجیاں دی جان اے۔
کہدا کہدا ناں لیے۔ زرداری صاحب دی وی زبان کٹی سی تے اوہ لاٹھی پھڑ کے جھک جھک کے چلدے رہے۔ فیر جدوں رہا ہوئے تے اوہو ہشاش بشاش زرداری صاحب برآمد ہوئے۔ آپ شہبازشریف تے جدوں وی قیدوبند آئی تے اوہناں نے وی اپنی کمریا نوں پھڑ لیا کہ ایہ بھار چکن دے قابل نہیں۔ اک شعر غالباً استاد قمر جلالوی دا کجھ ایس طرح دا اے: تیر و تلوار تم مت اٹھائو یونہی بے کار کرتے ہو زحمت جانتا ہوں میں تیری کلائی بار اٹھانے کے قابل نہیں ہے۔ اوہو لک جہنوں شہبازشریف نے پھڑ رکھیا سی جدوں اقتدار ملیا تے اوہو لک کس لیا تے کم وچ جٹ گئے جیویں ایس کل نوں صرف اقتدار ای راس اے تے ایس توں وی ودھ کے محترم نوازشریف علاج لئی برطانیہ گئے یاں اوہناں نوں گھلیا گیا کہ ایہ معمہ اجے تک حل نہ ہویا۔ بہرحال زیرعتاب آئے تے اوہناں دے پلیٹ لیٹس گھٹ گئے تے عمران خان نے پہلی واری پلیٹ لیٹس دا سنیا سی (بقول اوہناں دے) تے فیر جدوںاوہ باہر جان لئی ایئرپورٹ تے اپڑے یاں جہاز اوہناں تک اپڑیا تے اوہ ساریاں نوں چوق و چوبند نظر آئے بہرحال تفصیل وچ جان دی بالکل لوڑ نہیں میں تے ہور کوئی گل کرنا چاہنا واں کہ اوہ گئے تے علاج کروان سن پر مریم اورنگزیب کہہ رہیاں نیں کہ اوہ چھیتی واپس آ کے ساریاں دا علاج کر دین گے۔ لگدا اے اوہ مریض بن کے گئے سن تے ڈاکٹر بن کے پرت رہے نیں۔ ایہدے پچھے وی اک پیغام اے کہ شاید کجھ میل ملاقاتاں لندن وچ ہو چکیاں نیں ہن ایہدا تے سچ مچ کسے دے کول کوئی علاج نہیں۔ پہلے وی تے انج ای ہویا سی کہ اچانک ملاقاتاں ہوئیاں تے جہناں نوں سکیورٹی رسک دسیا جاندا رہیا خاص طور تے محترمہ بینظیر بھٹو نوں تے اوہ واپس آ گئیاں تے اوہناں لئی رسک بن گئیاں جو وی ہویا’ پھل زرداری دی جھولی وچ جا ڈگا۔ فیر زرداری دا اپنا اک انداز سیاست’ اوہ کہندے نیں کہ ایوان صدارت وچ اوہ ایمبولینس وچ ای باہر جان گے بیماری دا تعلق اکثر سیاستداناں دے نال رہیا تے اوہناں نوں لیان والے تے اوہناں نوں بیماری سمجھدے رہے نیں تے اوہناں دے علاج وچ اوہ اقتدار تے اختیار اکسیر دسدے تے اوہناں دے حوالے کر دیندے۔
ہن تسیں آپ ای دسو کہ ایہ جو کجھ میں لکھ رہیا واں ایہ مزاحیہ اے یاں سنجیدہ ایہ تے وقت دسے گا کہ کون کہدا علاج کردا اے۔ میرا موقف اصل وچ ایہ سی کہ دسیا جاوے کہ جدوں وی کوئی سیاستدان جیل جاندا اے کہ بیمار پے جاندا اے کہ اوہنوں ہسپتال دی سہولتاں دتیاں جان تے ایہ سہولتاں سندھ وچ تے زیادہ دستیاب نیں کہ اوتھے ہر چیز دتی جاندی اے۔ اوتھے بوتل آپ چیف جسٹس چھاپہ مار کے پھڑ لوے تے اگلے ای دن اوہ شہد دی بوتل ثابت ہو جاندی اے۔ پر خان صاحب نے اپنے دشمناں لئی جیل نوں مشکل بنا دتا سی ایسے لئی نوازشریف دا دل اوتھے نہیں لگا پر ایہ معمہ کسے توں حل نہ ہو سکیا کہ خان صاحب دے اپنے خاص ڈاکٹر نے نوازشریف نوں گرین سگنل دتا تے اوہ پرواز کر گئے اک گل میں ہور کہنا چاہنا واں کہ ایس حوالے نال عمران خان سخت جان نیں کہ اوہ بیمار وی نہیں ہوندے تے مسلسل چومکھی لڑائی لڑ رہے نیں اک نہیں 9 سیٹاں توں الیکشن لڑ رہے نیں اوہناں دی فرسٹریشن بہرحال ایہہ وے کہ اوہ گرفتار نہیں کیتے جا رہے حکومت وی ایہدے وچ دلچسپی نہیں رکھدی کہ حالات سانبھنے مشکل ہو جان گے۔ مینوں اچانک یاد آیا کہ بیمار تے اک واری مولانا فضل الرحمن وی ہوئے سن اودوں اوہناں نے زہریلا حلوہ کھا لیا سی ایہناں دناں تے تروتازہ نیں اوہناں دی بیماری تے اصل وچ خان صاحب نیں۔ سب کجھ الٹ پلٹ ہوکے رہ گیا اے پہلے لوک اندر دی گل کڈھ لیاندے سن تے ہن ہر گل باہروں لیائی جاندی اے۔ انداز سیاست وی بدل چکیا اے اوہ جو کہندا سی مجھے کیوں نکالا ہن اوہدے بارے خان صاحب نوں چنتا اے کہ اوہناں نوں کیوں لیاندا جا رہیا اے شاید فارن فنڈنگ تے توشہ خانہ والا معاملہ سنجیدہ ہو چکیا اے اوہ ڈکٹیشن جو احتجاج دی دتی گئی اوہ گل دے معاملے وچ کم نہیں کر سکی۔
آخر وچ اک دلچسپ خبر دا تذکرہ کہ اک ہاتھی نے بچے دا چھڈیا ہویا جتا سونڈ نال چک کے واپس کر دتا ایہ ویڈیو بڑی وائرل ہوئی اے ایہ لہور دے چڑیا گھر دا ہاتھی سی بڑا شریف ہاتھی۔ ایہ ہاتھی جے اسلام آباد یاں پنڈی دا ہوندا تے جتا واپس ملنا مشکل سی۔ ہاتھی ہے ای پیارا جانور’ انج وی ہاتھی سب دا ساتھی مشہور اے۔ بس تسیں اوہنوں چھیڑو نہ’ کہندے نیں ناں کہ اک دن شیر نوں شوق چڑھیا کہ سب توں اپنی عظمت دا لوہا منوائے۔ اوہ جس وی جانور توں پچھدا کہ میں کون آں؟ ہر کوئی کہندا تسیں جنگل دے بادشاہ۔ اینے وچ شیر نوں اک مست ہاتھی نظر آیا اوہنوں روک کے پچھیا میں کون آں ہاتھی نے شیر نوں سونڈ وچ چک کے زمین تے پٹخ دتا شیر کنڈ جھاڑدے ہوئے اٹھیا تے ہاتھی نوں کہیا جس گل دا پتہ نہ ہووے تے کسے ساتھی توں پچھ لئی دا اے۔٭٭