جماعت اسلامی دا یوم تاسیس تے سراج الحق

جماعت اسلامی دا81واں یوم تاسیس 26اگست نوں منایا گیا۔ جماعت اسلامی نے چالو صدی نوں بانی جماعت سید ابوالاعلیٰ مودودی نال منسوب کیتا اے۔ جماعت اسلامی اک اسلامی سیاسی جماعت اے جہدی بنیاد نوآبادیاتی ہندوستان وچ 26 اگست 1941 نوں لہور شہر دے اسلامیہ پارک وچ تقسیم ہند توں پہلاں رکھی گئی سی۔ جماعت اسلامی اک اسلامی سماجی تے سیاسی تحریک دے طور تے شروع ہوئی۔ پہلی میٹنگ وچ 75 لوکاں نے رلت کیتی جہڑی تحریک دے پہلے ممبر بنے۔ مولانا امین احسن اصلاحی’ مولانا نعیم صدیقی’ مولانا محمد منظور نعمانی تے مولانا ابوالحسن علی حسنی ندوی سید ابوالاعلیٰ مودودی دے نال جماعت اسلامی دے بانیاں وچوں سن۔ جماعت اسلامی نے ذیلی تنظیماں وی تیار کیتیاں بالخصوص خواتین تے طلبہ لئی جہناں نے مہاجر کیمپاں وچ رضاکارانہ طور تے کم شروع کیتا۔ جماعت اسلامی دا مقصد بتدریج قنونی تے سیاسی عمل دے ذریعے پاکستان نوں اک اسلامی ریاست وچ تبدیل کرنا اے جہڑی شرعی قنون دے تحت چلدی ہووے۔ جماعت اسلامی سرمایہ داری’ کمیونزم ‘ لبرل ازم ‘سوشلزم تے سکیولرازم دے نال نال بینک سود دی پیشکش جیویں معاشی طریقیاں دی سختی نال مخالفت کردی اے۔ جماعت دے سربراہ نوں امیر آکھیا جاندا اے۔ جماعت اسلامی دی بنیاد لہور وچ 1941 وچ مسلم ماہر الہیات تے سماجی و سیاسی فلسفی ابوالاعلیٰ مودودی نے رکھی سی جہڑے مغل بادشاہ اورنگزیب دے شریعت اتے مبنی دور نال وڈے پیمانے اتے متاثر سن۔ ہندوستان دی آزادی دی تحریک ویلے مودودی تے جماعت اسلامی نے ہندوستان دی تقسیم دی سخت مخالفت کیتی تے فیر تقسیم ہند مگروں جماعت دو تنظیماں جماعت اسلامی پاکستان تے جماعت اسلامی ہند (ہندوستانی ونگ) وچ تقسیم ہو گئی۔ جماعت دے دوجے ونگز وچ جماعت اسلامی کشمیر 1953 وچ’ جماعت اسلامی آزادکشمیر 1974 وچ تے بنگلہ دیش جماعت اسلامی 1975 وچ قائم ہوئی۔ جماعت اسلامی پاکستان 1953,1948 تے 1963 وچ شدید حکومتی جبر دی زد وچ رہی۔ جنرل محمد ضیاء الحق دے دور حکومت دے ابتدائی سالاں دے دوران جماعت اسلامی دی پوزیشن وچ بہتری آئی تے اوہنوں ”حکومت کے نظریاتی اور سیاسی بازو” دے طور تے ویکھیا جان لگیا تے بعض اوقات اوہناں دے کول اطلاعات و نشریات’ پیداوار’ پانی و بجلی تے قدرتی وسائل دے قلمدان وی رہے۔ 1971 و چ جماعت اسلامی نے سقوط ڈھاکہ دی شدید مخالفت کیتی۔ 1972 تک جماعت اسلامی دے بانی تے رہنما ابوالاعلیٰ مودودی سن جہڑے اک وسیع پیمانے اتے پڑھے جان والے اسلام پسند فلسفی تے سیاسی مبصر سن جہناں نے جنوبی ایشیا وچ اسلام دے کردار بارے لکھیا۔ اوہناں دی سوچ بہت سارے عوامل توں متاثر سی۔ مولانا مودودی دا خیال سی کہ سیاست اسلامی عقیدے دا اک اہم حصہ تے اک دوجے دے نال الزم تے ملزوم اے۔ مولانا مودودی نے برطانوی حکمرانی دی مخالفت کیتی تے پورے ہندوستان اتے محیط اک ”اسلامی ریاست” دے قیام لئی تحریک چلائی۔ جماعت اسلامی وچ بے شمار منفرد خصوصیات نیں۔ تقسیم ہند مگروں مودودی نے برطانوی حکمرانی دی مخالفت کیتی تے پورے ہندوستان اتے محیط اک ”اسلامی ریاست”د ے قیام لئی تحریک چلائی۔ جماعت اسلامی وچ بے شمار منفرد خصوصیات نیں۔ تقسیم ہند مگروں مودودی تے جماعت اسلامی مشرقی پنجاب توں ہجرت کر کے لہور آ گئے تے اوہناں نے رضاکارانہ طور تے ہندوستان توں ملک وچ آن والے ہزاراں پناہ گزیناں دی مدد دی سماجی کم انجام دیندے ہوئے ہسپتال تے طبی کلینک کھولے۔ عیدالاضحیٰ تے غریباں لئی قربانی دے جانوراں دی کھلاں اکٹھی کیتیاں۔ حسین شہید سہروردی دی وزارت عظمیٰ دے دوران (ستمبر 1956ـ اکتوبر1957) جماعت اسلامی نے مختلف مذہبی برادریاں لئی وکھری ووٹنگ سسٹم لئی بحث کیتی۔ سہروردی نے ڈھاکہ وچ قومی اسمبلی دا اجلاس بلایا تے ریپلکنز دے نال اتحاد دے ذریعے اوہناں دی پارٹی نے مخلوط ووٹنگ سسٹم دا بل منظور کیتا۔1953وچ جماعت اسلامی نے احمدیاں دے خلاف براہ راست ایکشن دی قیادت کیتی جہناں نوںجماعت اسلامی دا خیال سی کہ اوہناں نوں غیر مسلم قرار دتا جانا چاہیدا اے۔ مارچ 1953 وچ لہور وچ فسادات لٹ مار’ آتش زنی تے گھٹ توں گھٹ 200احمدیاں دے قتل تے منتخب مارشل لا دے اعلان اتے منتج ہوئے۔ فوجی رہنما اعظم خان نے مولانا مودودی نوں گرفتار
کیتا تے رحیم الدین خان نے اوہناں نوں بغاوت (احمدیہ مخالف پمفلٹ لکھن) دے جرم وچ موت دی سزا سنائی تے سینکڑاں جماعتاں نوں گرفتار کر لیا گیا سی۔ آخرکار حکومت نے جماعت اسلامی دے بہت سارے مطالبیاں نوں پورا کرن مگروں 1956 دا آئین منظور کیتاجہدے اتے مولانا مودودی نے آئین دی توثیق کیتی تے اوہنوں اسلام دی فتح قرار دتا۔ 1958وچ جماعت اسلامی نے عبدالقیوم خان (مسلم لیگ) تے چودھری محمد علی (نظام اسلام پارٹی) دے نال اتحاد کیتا۔ ایس اتحاد نے سکندر مرزا (1958-1956) دی صدارت نوں غیر مستحکم کر دتا تے پاکستان دوبارہ مارشل لا دی گود وچ چلا گیا۔ فوجی حکمران صدر محمد ایوب خان (1964-1958) دا جدید ایجنڈا سی تے اوہ سیاست وچ مذہب دی مداخلت دی مخالفت کردے سن۔ا وہنے سیاسی جماعتاں اتے پابندی لا دتی تے مولانا مودودی نوں مذہبی سیاسی سرگرمیاں جاری رکھن توں خبردار کیتا۔ جماعت اسلامی دے دفتر بند کر کے فنڈز ضبط کر لئے گئے تے مودودی نوں 1964توں 1967 وچ قید کردتا گیا۔ مگروں جماعت اسلامی نے اپوزیشن جماعت پاکستان ڈیمو کریٹک موومنٹ (PDM)دی حمایت کیتی۔ 1965-1964 دے صدارتی انتخابات وچ جماعت اسلامی نے سیاست وچ خواتین دی مخالفت دے باوجود اپوزیشن لیڈر فاطمہ جناح دی حمایت کیتی۔ 1965 وچ پاک بھارت جنگ دے دوران جماعت اسلامی نے حکومت دے جہاد دی کال دی حمایت کردے ہوئے ریڈیو پاکستان اتے حب الوطنی اتے مبنی تقریراں پیش کیتیاں تے عرب تے وسطی ایشیائی ملکاں توں تعاون حاصل کیتا۔جماعت نے ذوالفقار علی بھٹو تے مولانا بھاشانی دے
اوس ویلے دے سوشلسٹ پروگرام دے خلاف مزاحمت کیتی۔ جماعت اسلامی نے 1970 دے عام انتخابات وچ حصہ لیتا۔ 151 امیدوار کھڑے کرن مگروں قومی اسمبلی دی صرف چار تے صوبائی اسمبلیاں دی وی چار نشستاں حاصل کیتیاں۔ ذوالفقار علی بھٹو (1977-1973) دے منتخب ہون مگروں جماعت اسلامی دے طلبہ ونگ نے لہور وچ اوہناں دے پتلے جلائے تے اوہناں دے انتخاب نوں ”یوم سیاہ” قرار دتا۔ 1973 دے اوائل وچ جماعت نے فوج کولوں بھٹو دی حکومت دا تختہ الٹن دی اپیل کیتی۔ جماعت اسلامی نے نظام مصطفی دے مذہبی جھنڈے تھلے بھٹو مخالف سیاسی تحریک دی ”قیادت” کیتی۔ بھٹو نے جماعت اسلامی تے اسلامی جمعیت طلبہ دی قید دے ذریعے جماعت اسلامی نوں دبان دی کوشش کیتی۔ 1975 دے انتخابات وچ انتخابی بے ضابطگیاں ہوئیاں جہناں وچ جماعت اسلامی دے ارکان نوں کاغذات نامزدگی داخل کرن توں روکن لئی گرفتار کیتا گیا۔ جماعت اسلامی نے بھٹو نوں معزول کرن لئی پاکستان نیشنل الائنس (PNA) دی مدد کیتی تے بھٹو دی پھانسی توں پہلاں دی رات ضیاء الحق نال نوے منٹ تک ملاقات کیتی۔ جماعت اسلامی واحد سیاسی جماعت سی جہنے ضیا دی مسلسل حمایت جہدے بدلے وچ جماعت دے ہزاراں کارکناں تے ہمدرداں نوں نوکریاں نال نوازیا گیا سی۔ تاہم ضیا ویلے تے انتخابات کران وچ نکام رہے تے خود نوں جماعت ا سلامی توں دور کر لیتا۔ جدوں ضیاء نے طلبہ یونینز اتے پابندی لائی تے اسلامی جمعیت طلبہ تے جماعت اسلامی دی حامی مزدور یونیناں نے احتجاج کیتا۔ تاہم جماعت اسلامی نے پاکستان پیپلز پارٹی دی بحالی جمہوریت دی تحریک وچ حصہ نہیں لیتا۔ 1987 وچ میاں طفیل نے خرابی
صحت دی وجہ نال جماعت اسلامی دے سربراہ دی حیثیت توں مزید خدمات توں انکار کردتا تے قاضی حسین احمد نوں منتخب کر لیتا گیا۔ 1987 وچ جدوں ضیا دا انتقال ہویا تے پاکستان مسلم لیگ نے دائیں بازو دا اتحاد اسلامی جمہوری اتہاد (IJI) تشکیل دتا۔ 1990وچ جدوں نواز شریف برسر اقتدار آئے تے جماعت اسلامی نے ایس بنیاد اتے کابینہ دا بائیکاٹ کیتا کہ پاکستان پیپلز پارٹی تے پاکستان مسلم لیگ دے درمیان برابری دا مسئلہ اے۔ 1993 دے الیکشن وچ جماعت اسلامی نے تن نشستاں حاصل کیتیاں۔ 20 جولائی 1996 نوں قاضی حسین احمد نے حکومت دے خلاف کرپشن دا الزام لا کے احتجاج شروع کرن دا اعلان کیتا۔ قاضی حسین نے 27ستمبر نوں سینیٹ توں استعفیٰ دے دتا تے بے نظیر بھٹو دی حکومت دے خلاف لانگ مارچ شروع کرن دا اعلان کیتا۔ ایہہ احتجاج 27اکتوبر 1996 نوں جماعت اسلامی تے اپوزیشن جماعتاں نے شروع کیتا۔4نومبر1996 نوں بھٹو دی حکومت نوں صدر لغاری نے بنیادی طور تے کرپشن دی وجہ نال برطرف کردتا۔ ایہدے مگروں جماعت ا سلامی نے 1997 دے انتخابات دا بائیکاٹ کیتا۔ 1999 وچ پرویز مشرف نے فوجی بغاوت دے ذریعے اقتدار سنبھالیا۔ جماعت اسلامی نے پہلے تے جنرل دا خیر مقدم کیتا لیکن فیر ایہدا اعتراض کیتا جدوں مشرف نے سکیولر اصلاحات کرنا شروع کیتیاں تے فیر 2001 وچ جدوں پاکستان نے دہشت گردی دے خلاف جنگ وچ شمولیت اختیار کیتی تے ایہہ الزام لایا کہ مشرف نے طالبان دے نال غداری کیتی اے۔ جماعت اسلامی نے 11ستمبر 2001 دے واقعات دی مذمت تے افغانستان اتے حملہ کرن ویلے امریکہ دی وی یکساں مذمت کیتی۔ 2002دے انتخابات وچ’ جماعت اسلامی نے متحدہ مجلس عمل (ایم ایم اے) دے نام توں مذہبی جماعتاں دا اتحاد بنایا تے 53 نشستاں حاصل کیتیاں جہناں وچ زیادہ تر صوبہ خیبر پختونخواہ دی نمائندگی کرن والے وی شامل سن۔ جماعت اسلامی نے دہشت گردی دے خلاف جنگ خاص طور تے پاکستان وچ امریکی فوجیاں تے ایجنسیاں دی موجودگی دی مخالفت جاری رکھی۔ جماعت اسلامی نے عدلیہ دی بحالی دا وی مطالبہ کیتا۔23 جولائی 2007 نوں قاضی حسین احمد نے لال مسجد اتے فوجی آپریشن دے خلاف احتجاج کردے ہوئے قومی اسمبلی توں استعفیٰ دے دتا۔ 2008 وچ جماعت اسلامی تے پاکستان تحریک انصاف نے دوبارہ انتخابات دا بائیکاٹ کیتا۔ قاضی حسین احمد نے خرابی صحت دی وجہ نال جماعت دا انتخاب لڑن توں انکار کر دتا تے سید منور حسن نوں امیر منتخب کر لیتا گیا۔30مارچ 2014 نوں سراج الحق خیبر پختوانخوا حکومت وچ سینئر وزیر تے
پارٹی دے نائب سربراہ دے طور تے خدمات انجام دے رہے سن کہ اوہناں نوں نویں امیر دے طور تے منتخب کر لیتا گیا۔ اوہناں نے منور حسن تے پارٹی دے جنرل سیکرٹری لیاقت بلوچ نوں شکست دتی۔ ایہہ پہلا موقع سی جدوں پارٹی نے صرف اک میعاد مگروں کسی امی نوں ووٹ دتا سی جہدے تے اوہناں نے سینئر وزیر دے عہدے توں استعفیٰ دے دتا۔ جے آئی ڈاکٹراں’ استاداں’ وکیلاں’ کساناں’ کارکناں تے خواتین لئی یونین فراہم کردی اے۔ جماعت دے کول ادارہ معارف اسلامی’ لہور’ اسلامک ریسرچ اکیڈمی’ کراچی ‘ ادارہ تعلیم’ لہور’ مہران اکیڈمی تے انسٹی ٹیوٹ آف ریجنل سٹڈیز جئی منسلک ایجنسیاں دی متعدد اشاعتاں نیں۔ ایہدے پرنٹ میڈیا دی اشاعتاں دا نمبر 22اے جہدے وچ روزنامہ جسارت’ ہفتہ وار فرائیڈے سپیشل’ ہفتہ وار ایشیا’ ماہانہ ترجمة القرآن تے پندرہ روزہ جہاد کشمیر شامل نیں۔ جماعت اسلامی حراسکولز (پاکستان) پروجیکٹ تے الغزالی ٹرسٹ نوں وی چلاندی اے۔ فائونڈیشن سکولاں’ خواتین دے پیشہ ورانہ مرکز بالغاں دی خواندگی دے پروگرام ہسپتال تے موبائل کیمسٹ تے دوجے فلاحی پروگراماں دا انتظام کردی اے۔مجموعی طور تے پاکستان وچ جماعت اسلامی نال جڑے 1000دے کول رجسٹرڈ مدرسے نیں۔ صوبہ خیبر پختوانخوا وچ بوہتے نیں جہناے دی تعداد 245 یا کل دا تقریباًاک چوتھائی اے۔پاکستان وچ جے کسے ایماندار تے مخلص سیاسی رہنما دی مثال دتی جاندی اے تے اوہ سراج الحق دی دتی جاندی اے جہڑے بطور وزیر ہوندے ہوئے رکشہ وچ سفر کردے رہے تے جہناں دی تقریراں وچ پاکستان دے غریب لوکاں دا دکھ جھلکدا اے۔ اوہناں نے پنے دور وچ ہر ظالم نوں کھل کے للکاریا اے۔ اک کمزور تے ناتواں جسم وچ پہاڑاں توں بوہتی مضبوط جہڑی وڈے وڈے طوفاناں توں بے خوف و خطر ٹکرا جاندے نیں جماعت اسلامی ایس ویلے مولانا سراج الحق دی قیادت وچ متحد اے تے بہت کجھ کرن دا جذبہ رکھدی اے۔