سسٹم توں وائرس کڈنا پوے گا

ویسے تے سارے پاکستان نوں ای آبی مسئلیاں دا سامنا اے لیکن بلوچستان’ جنوبی پنجاب تے سندھ دے لوک سال دے دس مہینے پانی لئی فریاد کردے نظرآندے نیں تے ساون دے مہینے ایتھے دے باسی پانی توں پناہ منگدے نیں۔ جدوں دا ہوش سنبھالیا اے ایہہ سندے چلے آ رہے آں کہ پاکستان اک زرعی ملک اے تے قدرت نے ایس ملک نوں ہر طرح نال نوازرکھیا اے لیکن اسیں پچھلے کئی سالاں توں گندم تک دوجے ملکاں توں خرید رہے آں۔ زرعی زمیناں نوں طاقتور لوک ہائوسنگ سکیماں دے نام تے تباہ کر رہے نیں۔ فیر پاکستان دے پانی دے مسئلے کیویں حل ہو سکدے نیں ایہدے تے کدی
کوئی بامقصد بیٹھک منعقد ہوندی نہیں ویکھی اے۔ کجھ سیاستدان پانی دی تقسیم نوں لے کے اپنے لوکاں اندر محرومیاں پیدا کرن دی کوشش کردے نیں جد کہ کجھ لوک وقتی گلاں وچ ویلا ضائع کردے نیں تے بس شاعر امید دواندا اے لیکن پتہ نہیں شاعر نے کیہ سوچ کے لکھ دتا ”ہم زندہ قوم ہیں” زندہ قوماں کیہ ساڈے وانگوں ہوندیاں نیں۔ اسیں تے دیہاڑی باز قوم آں۔ جہنوں ویکھو اوہ اپنی بساط دے مطابق دیہاڑی لان دی کوشش کر رہیا اے۔ اک مگروں اک بحران ساڈے سامنے آ رہیا اے لیکن ساڈا سسٹم کسے اک بحران اتے وی قابو نہیں پا سکیا یعنی اسیں ایہہ آکھ سکنے آں کہ ساڈے سسٹم وچ وائرس آ چکیا اے۔ ایس ملک وچ اسیں جدوں دا ہوش سنبھالیا اے ملک تے مذہب دونواں نوں مشکل وچ پایا اے۔ حالاں جے ایہناں دونواں دی بنیاداں بہت مضبوط نیں لیکن چونکہ ساڈے رہنماواں دی سوچ قوم دا مستقبل بنان دے بجائے اپنے بچیاں دی زندگیاں سنوارنارہی اے ایس لئی اوہناں نے ہر دور وچ قوم نوں ایسے فکر وچ لائے رکھیا اے کہ ملک خطرے وچ اے۔ ویکھیا جاوے تے ہر طبقے دے لوک ایس گورکھ دھندے وچ شامل نیں تے ایہدی اک ای وجہ اے کہ ایس ملک دا سسٹم خراب ہو چکیا اے۔ ایس ملک دے سسٹم وچ ایسا وائرس آ چکیا اے جہڑا ساری فائلیاں کرپٹ کر چکیا اے۔ ہن جے اسیں بہتری دا سفر شروع کرنا اے جے اسیں اک بہترین’ مثالی تے فلاحی معاشرہ تشکیل دینا اے تے سانوں اپنا سسٹم ٹھیک کروانا پوے گا۔ ایہہ سسٹم آسانی نال ٹھیک ہون والا نہیں اے بلکہ ایہنوں ٹھیک کرن لئی ایسے مکینک تلاش کرنے نیں جہڑے نہ صرف ایہدی پچھلیاں خرابیاں نوں سمجھدے ہون بلکہ اوہ ایہہ وی جاندے ہون کہ مستقبل وچ ایس سسٹم وچ وائرس نہیں آوے گا۔ سسٹم وچ اینٹی وائرس پانا پووے گا تاں جے ایہہ مسلسل تے بہترین رفتار نال چلدا رہوے۔ آسان لفظاں وچ گل کراں ‘ ایہہ آکھاں گا کہ خدا لئی اپنے اپنے کماں وَل دھیان دیو۔ عوام نوں اپنی مرضی نال حکومتاں بنان دا حق دے دیو۔ ساڈی قابل احترام عدالتاں وچ موجود فائلاں ول توجہ دیو۔اسٹبلشمنٹ نویں سیاستدان متعارف کروان دے بجائے دنیا دی بدلدی صورتحال نوں ویکھدے ہوئے اپنے ہدف مقرر کرے۔ پنجاب وچ نویں نویں ہائوسنگ سوسائٹیاں بنان دا رجحان زرعی زمیناں نوں کھائے جا رہیا اے ایس لئی نویں ہائوسنگ سوسائٹی بنان اتے مکمل پابندی لگنی چاہیدی اے تے جے بنانیاں ای نیں تے بلوچستان تے سندھ وچ بنان دی کوشش کیتی جاوے تاں جے اوہناں صوبیاں دے لوکاں دا وی معیار زندگی بہتر ہونا شروع ہووے۔
صاحبو’ اج سانوں ایہہ سوچنا ہووے گا کہ پاکستان وچ اک کلرک توں لے کے وزیراعظم تک کیوں دیہاڑیاں لان دی کوشش وچ رہندے نیں۔ پاکستانی بحیثیت قوم کیوں اخلاقیات تے معاملہ فہمی توں دور نیں۔ پاکستانی لوک جہڑی اخلاقی پستی دا شکار نیں اوہنوں ختم کرن لئی کوئی محکمہ’ کوئی عدالت’ کوئی عدالت اک قابل عمل پالیسی کیوں نہیں بنا پا رہی اے۔ تعلیم ہووے یا صحت میڈیکل دا شعبہ ہووے یا صحافت دا مقدس پیشہ’ کھیڈ دا میدان ہووے یا عدالتی نظام ہر پاسے کرپشن تے لاپروایاں دی ان گنت کہانیاں سامنے آندی رہندیاں نیں۔ ساڈے مزاج وچ شدت پسندی دا عنصر
غالب آندا جا رہیا اے۔ لوک بڑی چھیتی غصے وچ آ جاندے نیں۔ معمولی گلاں اتے قتل جئے واقعات رونما ہونا عام جئی گل بن چکیا اے۔ اعتدال دی فضا ساڈے مزاجاں نوں راس ای نہیں آندی ۔ پاکستان دے دریاویچن والیاں نوں بہت سارے لوک بھُلدے جا رہے نیں۔ اوہناں دی نسلاں اج وی ہر حکومتی اتحاد دا حصہ بن کے مال بنان وچ لگی ہوئیاں نیں۔ا جے ویلا اے قدرت ساڈے اتے مہربان ہو سکدی اے۔ اپنی اناواں توں باہر نکلو تے پاکستان نوں پہلے رکھدے ہوئے آبی مسئلیاں لئی سارے رل بیٹھو۔ انگریز جہنے بغیر مشینری دے ایس خطے وچ نہراں دا جال پھیلا دتا سی لیکن اج تے سانوں جدید ترین مشینری میسر اے۔ خدارا’ بلوچستان’ جنوبی پنجاب تے سندھ دے نال نال پورے ملک وچ چھوٹے وڈے ڈیم بنانے شروع کرو۔ اوہناں توں نہراں کڈ کے نہ صرف ملک نوں سرسبز بنان دا عمل شروع کرو بلکہ نال ای اپنی غذائی ضروریات وچ خودکفیل ہون دے مسافر بنن دی کوشش شروع کرو۔