پاکستان فیسٹیول مسقط ، عمان

اوورسیز پاکستانیاں دا مسئلہ ایہہ اے کہ اوہ پہلاں تے بہتر حصول رزق لئی ہجرت کردے نیں تے اوہناں دی ایہہ کوشش وی ہوندی اے کہ اوہ ماں پیو’ بیوی بچے یا بھین بھراگھر والے رشتے دار جہناں نوں اوہ پاکستان وچ پچھے چھڈ آئے نیں خود جہنی وی محنت کر لین مگر اوہناں دا خیال رکھن۔ اوہناں دی جدائی اوہناں نوں رواندی وی اے تے اداس وی کردیندی اے۔ یاد رکھو خوشی نال کوئی اپنا وطن تے گھربار نہیں چھڈدا جتھے جہدا وس چلدا اے اوہ اپنی حیاتی نوں بہتر بنان دی کوشش ضرور کردا اے۔ چاہے اوہ پاکستان وچ رہ کے ہووے یا دیار غیر بس ایہہ حیاتی ای ہوندی اے جہڑی کسی لئی ساکن ہو جاندی اے تے کسی اتے ہجرت واجب کر دیندی اے۔ خدا نے جہنوں جتھے رزق پہنچانا ہوندا اے فیصلے وی اوہو کردا اے۔
فیر اک ویلا آندا اے جدوں رزق دی فراوانی ہون لگدی اے۔ معاملات زندگی بہتری ول چل پیندے نیں تے ایسے تارک وطن نوں وطن عزیز دی گلیاں’ اوتھوں دی ثقافت’ رہن سہن دی یاد ستان لگدی اے تے جہڑے ملک وچ اوہ رہ رہیا ہوندا اے اوہدا دل چاہندا اے ایتھے وی اوہدی ثقافت’ علم و ادب تے رسم و رواج دی جھلک نظر آوے جتھے اوہ رہندا اے اوتھے وی اوہدا ملک نظر آوے۔ پوری دنیا وچ جتھے وی کوئی کمیونٹی آباد ہوندی اے۔ اوہ اپنے رنگ و ثقافت’ علم و ادب تے رسم و رواج نال جڑی تقریباں منعقد کردا اے جہدے توں مختلف ملکاں وچ رہن والے لوکاں وچ اک دوجے لئی نہ صرف دلچسپی پیدا ہوندی اے بلکہ ملکاں دے تعلقات ہور مضبوط ہوندے نیں۔ یگانگت تے بھائی چارہ جنم لیندا اے ایہدے علاوہ اوتھے موجود اوہ کمیونٹی جہڑی وطن توں دور وطن نوں یاد کردی اے اوہناں لئی ایسی کوئی وی تقریب کسے نعمت توں گھٹ نہیں ہوندی۔پاکستان فیسٹیول مسقط’ عمان دا آغاز میں پچھلے سفیر پاکستان علی جاوید دے دور وچ کیتا۔ علی جاوید زبردست شخصیت دے مالک سن۔ ہر ویلے تازہ دم کجھ وی کرن لئی تیار تے تقریبات تے اوہناں دی جان ہوندی سی تے فیر خود پرفیکشن دا اینا خیال کردے سن کہ چھوٹی توں چھوٹی گل وی اوہناں دی کوشش ہوندی کہ اوہناں دی نظراں دے سامنے توں لنگھے۔ میری ایس لئی وی اوہناں دے نال بہت بندی سی کہ مینوں خود وی ذرا جئی غلطی وی گراں گزردی اے تے کوشش ہوندی اے کہ غلطی نوں سدھار لیتا جاوے ایسے لئی اوہناں کولوں سکھن دا بہت موقع ملیا۔ کئی لوکاں دی ناراضی وی مول لیتی جہڑی ہن تک جاری اے مگر علی جاوید لئی ایہہ ناراضی لینا وی مینوں کدی گراں نہیں لنگھیا بلکہ ایہدے وچ وی سبق ملیا کہ اوکھے ویلے وچ حق تے سچ دے نال کھڑا ہونا تہانوں وقار بخشدا اے۔ بس خیال ایہہ رہوے کہ ساڈے تہذیب و تمدن نال جڑی کوئی وی روایت غلط نہ ہووے۔ علی جاوید حال ای وچ اٹلی دے سفیر تعینات ہوئے نیں۔
عمان دے پچھلے سفیر پاکستان علی جاوید دے دور وچ پہلا پاکستان فیسٹیول مسقط’ عمان وچ میں تے میری ٹیم نے رل کے 2019 وچ سفارت خانہ پاکستان نال رل کے منعقد کیتا جہدے وچ پاکستان بھر توں جید صحافی’ علم و ادب نال تعلق رکھن تے فن موسیقی نال جڑی شخصیات شریک ہوئیاں۔ اوہناں وچ طلعت حسین’ جاوید چودھری’ سہیل وڑائچ’ عطاالحق قاسمی’ پروفیسر یوسف خالد’ڈاکڑ انعام الحق جاوید، پروفیسر یوسف خالد ، طارق چوہدری، گوہر زاہد ملک ، عقیل عباس جعفری ، خالد شریف ، علی یاسر، سید سلیمان گیلانی ، گوہر رشید بٹ ، فرخ شہباز وڑائچ، مخدوم شہاب الدین دے علاوہ فن ومسیقی دے گھرانے توں حامد علی خان تے عمان دے مقبول سنگر ہیتم رفیع نے رلت کیتی جد کہ ستار نواز وجیہہ نظامی تے طلبہ نواز عرفان وی شریک ہوئے۔ ایہہ عمان دی ایسی تقریباتی تریخ دا ایہہ پہلا موقع سی کہ جہدے وچ اینی وڈی تعداد وچ پاکستان دی نامور شخصیات اکٹھے عمان کسے تقریب وچ شریک ہوئے۔ ہال فل سی تے بوہے ٹھیک 7وجے بند کردتے گئے سن۔ ایس فیسٹیول نے تریخ رقم کیتی جہڑی اج وی یوٹیوب اتے موجود اے۔
ویلا لنگھدا گیا کووڈ19نے ایسی تقریباں نوں نہ صرف سرے توں ختم کر دتا بلکہ لوکاں نوں اپنی جان دے لالے پئے رہے ۔ میں خود وی بڑی مشکل نال ایس عفریت توں بچیا۔ ایس کووڈدے پیریڈ وچ اسیں سفارتخانہ پاکستان دے شانہ بشانہ کمیونٹی دے گھر گھر راشن پہنچان دا کم کردے رہے جہناں وچ کلیدی کردار میرے دوستاں نے ادا کیتا جد کہ دوجے گروپ نال جڑے لوکاں نے وی چنگا کم کیتا۔ دو بنیادی ٹیماں سفارتخانہ پاکستان ولوں تشکیل دتی گئیاں۔ اک دی قیادت راقم (قمر ریاض) دے ذمہ تے دوجی کاشف زعیم دے سپرد سی۔ اسیں دونواں نے اپنی اپنی ٹیماںنال رل کے بھرواں کم کیتا۔ ایتھوں تک کہ اک ویلا آیا کہ راشن بوہتا سی تے لین والے گھٹ سن۔ ویسی ایہناں دناں اک رویہ ایہہ وی ویکھن وچ آیا کہ کجھ لوک کم گھٹ تے اخباراں وچ راشن چکے اپنی وڈی وڈی تصویراں لگوان اتے بوہتا زور دیندے رہے۔ ایہہ اوہ لوک سن جہڑے راشن تے دوجیاں کولوں منگواندے سن جہڑے سامنے نہیں آنا چاہندے سن مگر تقسیم کرن لئی اوہناں ولوں خود کھڑے ہو کے نمائشی کم بوہتا کردے سن۔
کووڈ19 دا ایہہ دور پچھلے سفیر پاکستان احسان و گن دا سی۔ اوہناں نے کووڈ دے دناں وچ بلاشک و شبہ بہت زیادہ کم کیتا۔ عمان وچ پھسے لوکاں نوں پاکستان پہنچان لئی خصوصی فلائٹس شروع کروائیاں۔ قیدیاں دی رہائی تے سفارتخانہ پاکستان دے ذریعے لاک ڈائون والے علاقیاں وچ پاکستانی کمیونٹی تک گھر گھر راشن پہنچایا۔ ایس مشن وچ مقامی پلس تے دوجے اداریاں دی مدد وی لیتی گئی۔ اوہ تجارت تے کامرس نال جڑی بزنس کمیونٹی دا اک وفد عمران خان دے دور حکومت وچ پاکستان وی لے گئے جہنوں پاکستان وچ غیر معمولی پذیرائی حاصل ہوئی۔ اوہ وکھری گل ایس توں اوہ کاروباری فیدے تاحال حاصل نہیں ہو سکے کیوں جے ایس وفد وچ ہور کاروباری شخصیات دا شامل ہونا شاید ضروری سی جہڑے اوس ویلے ڈائریکٹ عمان دے نال پاکستانی تجارت کر رہے نیں۔ ہو سکدا اے موجودہ سفیر عمران علی چوہدری ایہدے اتے کوئی کم کرن۔
اج کل عمان وچ عمران علی چوہدری سفیر پاکستان تعینات نیں جہڑے غیر معمولی تریخ دان ہون دے علاوہ علم و ثقافت دے دلدادہ تے عوامی طبیعت دی حامل شخصیت نیں۔ اوہناں دے آفس تک ہر عام پاکستانی نوں رسائی حاصل اے جتھے کدی تالے سن۔ اوتھے ہن کھلے بوہے سائلین دا کھلے بازو استقبال کردے نیں۔ اوہناں نال پاکستان فیسٹیول دے حوالے نال گل بات ہوئی تے اوہناں نے فوری طور تے اپنے عملے نوں بلایا تے مکمل تعاون کرن دا آکھیا سو اسیں ٹھان لئی کہ ایس واری فیر ادبی تے ثقافتی پاکستان فیسٹیول منعقد کراں گے۔ دعوتاں دتی گئیاں تے اوہدے اتے کم شروع ہویا۔ 20توں 25 لوکاں نوں دعوت دینا اوہناں دے ویزے کڈوانا ٹکٹاں کروانا ‘ اوہناں دے رہن دا انتظام کرنا’ ٹرانسپورٹیشن فیر جتھے پروگرام ہونا اوتھے دے انتظامات کسے وی طور آسان نہیں ہوندا مگر جتھے مخلص دوست ہون اوتھے ناممکن وی کجھ نہیں ہوندا تے ایس فیسٹیول توں پاکستان دا نام عمان وچ تے عمان دا نام پاکستان وچ ہر دوجے دن ایس فیسٹیول دے حوالے نال آن لگدا اے تے ایہو اصل مقصد ہوندا اے کہ دونویں ملکاں وچ جتھے ادبی تے ثقافتی تعلقات قائم ہو سکدے نیں اوتھے تجارتی تعلقات وی وسیع پیمانے اتے جے اسیں چاہیے تے استوار ہو سکدے نیں خلیجی ملکاں وچ عمان ساڈا سب توں قریبی ملک اے جہڑا باقی خلیج ملکاں تے یورپ دے نال تعلقات وچ بہت قریب اے۔ ایہدا ساڈی حکومت نوں فیدہ چکنا چاہیدا اے لیکن آخری واری ایتھے یوسف رضا گیلانی بطور وزیراعظم آئے سن ۔ایہدے مگروں کسی وزیراعظم نے آن دی زحمت نہیں کیتی۔ امید اے مستقبل وچ ایس پاسے وی کسی دا دھیان جاوے۔ ایتھے سفارتخانہ پاکستان لئی زمین الاٹ ہو چکی اے تے ایہدا افتتاح وی کئی واری مختلف وزراء خارجہ کر چکے نیں مگر بنیاد دا پہلا پتھر تے کئی واری رکھیا گیا اے مگر بنیاد کھڑی نہیں کیتی جا سکی۔ ایہدے اتے میں پچھلے سفیر پاکستان دی ہدایت تے صدر پاکستان دے نام خط وی لکھیا مگر جتھے دلچسپی نہ ہووے اوتھے اک چھوٹے جئے ملک وچ بیٹھے گمنام قمر ریاض دے خط نوں کون اہمیت دیندا اے لیکن شاید کدی کسے حکومت نوں سفارت خانہ پاکستان دی بلڈنگ بنان دا خیال آئے تے ایس ویلے کرائے دی بلڈنگ توں جان چھٹے جتھے پارکنگ نہ ہون دے برابر اے۔
گل واپس فیسٹیول اتے لیانے آں۔ ایس واری پاکستان فیسٹیول وچ رلت کرن والیاں وچ جناب عطاالحق قاسمی’ ڈاکٹر صغریٰ صدف’ عباس تابش’ یاسر پیرزادہ’ گل نوخیز اختر’ڈاکڑ پرویز چوہدری ، وائلن نواز استاد رئیس ، طبلہ نواز استاد امانت علی خان ، فرخ شہباز وڑائچ، مخدوم شہاب الدین، ثاقب تبسم ثاقب، ناصر کٹرا ، وسیم شیخ ، کاشف مصطفی ، رفاقت جنید مرزا تے اجمل شاہ دین شامل سن۔ پچھلے پاکستان فیسٹیول وچ بوہتے صحافتی تے ایس واری بوہتے ادبی شخصیات اتے مشتمل شخصیات شریک ہوئیاں تے سماں بنھ گیا۔
عطاالحق قاسمی تے ڈاکٹر صغریٰ صدف دی محبت کہ علالت دے باوجود عمان میری دعوت تے تشریف لیائے تے لوکاں نے اینی ای محبت نال اوہناں نوں سنیا۔ عطاء الحق قاسمی نے اپنی یادداشتاں اتے مبنی ادیباں’ شاعراں نال جڑے واقعات سنائے جہدے توں شاید ای کوئی چہرہ ہووے جہدے اتے مسکراہٹ نہیں سی۔ ایہہ سلسلہ گل نوخیز اختر توں جاری ہویا جہناں دی شگفتہ گل بات تے لوکی لوٹ پوٹ ہوندے رہے۔ جناب من عباس تابش دی شاعری ہووے’ مخدوم شہاب دا ولولہ انگیز خطاب ہووے یا سفیر پاکستان عمران علی چوہدری دی تریخی تقریر’ سب کجھ لاجواب سی۔ ہر کسی نے سفیر پاکستان عمران علی چوہدری دی تقریر دی تعریف کیتی۔ ایہدے تے یاسر پیرزادہ دا مقابلہ ہووے یا فرخ شہباز دی مختصر نظامت سب نے اپنے اپنے رنگ بکھیرے تے ایہناں رنگاں وچ ہور وادھا استاد رئیس خان تے امانت علی نے کر کے محفل نوں چار چن لا دتے۔ عذیر احمد ثاقب تبسم ثاقب عذرا سلیم تے راقم دی شاعری وی جستہ جستہ چلدی رہی۔ احسان شاہد خاص طور تے لندن توں تشریف لیائے تے ہر اک نوں اپنا گرویدہ بنا لیا۔
ایہہ وفد صلالہ وی گیا جتھوں دی محبتاں تے سیرو سیاحت اپنی جگہ خوبصورت رہی اوتھے صلالہ سکول دے چیئرمین عدیل بھائی نے ساڈی بھرواں خاطر داری کیتی جد کہ راجہ محمد اشرف’ پرویز احمد’ فضل حسین تے دوجے معززین نے پروہنیاں دا استقبال کیتا۔ زیب حسن انتظامات لئی دو دن پہلاں ای صلالہ چلے گئے۔
جہناں دوستاں نے ایس فیسٹیول دے انتظامات وچ اپنا کردار ادا کیتا اوہناں وچ امیر حمزہ آفتاب گیلانی ، عامر مظہر ، عامر امیر ، ولید شاہ بنوری ، زیب حسن ، عذرا علیم ، محمد علیم ، ابراہیم احمد ، زاہد شکور ، ڈاکڑ مظہر حسین تے عمران طور خاص طور تے شامل نیں۔جہناں کاروباری شخصیات نے ایس فیسٹیول دی میرے نال رک کے مالی معاونت وچ حصہ پایا اوہناں وچ نامور کاروباری شخصیات چوہدری محمد اسلم ، میاں محمد ریاض ، عامر مظہر تے زاہد شکور شامل نیں جدکہ سفارت خانہ پاکستان دے سارے عملے نے سفیر پاکستان ولوں عمران علی چوہدری دی ہدایت اتے تعاون کیتا۔
محترم یٰسین بھٹی اوہناں دے پتر یاسر بھٹی ولوں پروہنیاں دے اعزاز وچ ظہرانی وی دتا گیا جد کہ میاں ریاض نے اپنے گھر اتے عشائیہ دتا۔ اک ہور عشائیہ سفیر پاکستان عمران علی چوہدری نے فیسٹیول دی تقریب توں اک دن پہلاں دتا جہنوں اوہناں دی مسز تے ساڈی بھابھی نے بہت عمدہ تقریب دتا۔ ایہہ فیسٹیول اپنی مہمان نوازی’ سلیقے تے اسلوب دے حوالے توں وی ہمیشہ یادگار ہوندا اے۔عمان وچ مشاعریاں دی ریوات اپنی جگہ وکھری قائم اے مگر پاکستان فیسٹیول دا لوک ہن بیرون ملک ایسی تقریباں پاکستان دی پہچان تے نام تے مرتبے نوں اچا رکھن وچ اہم کردار ادا کردیاں نیں۔ اللہ دا شکر اے کہ میں تے میرے مخلص دوستاں دی والہانہ ٹیم شانہ بشانہ ایس چانن وچ اپنی کرناں بکھیر رہی اے۔ ساڈے قریبی دوست جناب امیرحمزہ ایس ویلے چیئرمین پاکستان سکولز نیں جہناں نوں پاکستان سکول دی ہئیت نوں اپنی تعیناتی دے مختصر ترین عرصے وچ جدید کردتا اے۔ سمارٹ بورڈ ہون یا بچیاں لئی صاف ستھرے کلاس رومز’ باتھ رومز یا نویں سکول مصنعہ دی چھیتی توں چھیتی تعمیر امیر حمزہ دی کوششاں ٹیکنیکل کمیٹی دے راجہ اخمت حیات تے خادم حسین جھکڑ تے پورے بورڈ دے ڈائریکٹراں دے نال رل کے شاندار نیں۔ پورا بورڈ ایس ستائش دا مستحق اے کہ جہڑا کم پچھلے کئی سالاں نہ کر سکے اوہ اوہناں عمدہ لوکاں نے سرانجام دتے۔
میرے سنے میرے دوستاں دی پاکستانی کمیونٹی لئی خدمت جاری رہوے گی کیوں جے پاکستان میرا دل اے تے عمان میری اکھاں تے دونواں دے نال زندگی شاندار اے۔