سب کجھ ٹٹ بھج گیا اے

پاکستان وچ ایس ورھے ڈیماں وچ تے زمین وچ پانی دی سطح بڑی گھٹ چکی سی۔ ہر کوئی سوچ رہیا سی کہ ہن ساڈا کیہ بنے گا؟ اسیں پانی دے بناں کیویں جیواں گے۔ ایسے دوران پاکستان وچ موسم برسات شروع ہویا۔ ایس موسم وچ باقی موسماں دی نسبت ہمیشہ توں ای زیادہ بارشاں ہوندیاں نیں پر ایس ورھے 61 سالہ بارشاں دا ریکارڈ ٹُٹ گیا باراں ورھے پہلاں ستمبر 2010ء وچ بارشاں نال پورے پاکستان وچ تباہی دے منظر دنیا بھر نے ویکھے سن۔ اقوام متحدہ دی سفیر اداکارہ انجیلا جولی تشریف لیائی تاں جے پاکستان دی امداد دا تعین کیتا جاوے۔ اسیں اوہنوں سفیر نہیں اداکارہ دے طور تے ملدے رہے جنہے پاکستان دے حکمراناں دے بارے منفی رپورٹ دتی کہ اوہناں نوں آپ پاکستان دی تباہ کاریاں دا احساس نہیں۔ ایس ورھے جے اقوام متحدہ کوئی اپنا نمائندہ تباہ کاریاں دا اندازہ لان گھلے تے اوہدا تعلق افریقہ نال ہووے اداکارہ نہ ہووے نہیں تے رپورٹ فیر اوہو آوے گی۔ ایس ورھے بارشاں نے سارے پچھلے ریکارڈ تباہی دے بھن دتے نیں پر غیرملکی امداد دا اعلان کسے ملک نے نہیں کیتا۔ قدرت نے اپنا کم کر وکھایا’ سُکے دریا ڈیم بھر دتے۔ ہن جو کجھ کرنا ہووے گا اپنی مدد آپ دے تحت کرنا ہووے گا۔ ہن پانی دی زیادتی دی وجہ نال ملک دے بہت سارے حصیاں وچ سیلاب اے جہدے نال پنڈاں’ شہراں دیاں گلیاں’ سڑکاں’ نہراں تالاب دا روپ دھار چکیاں نیں۔ پنڈاں وچ کچے مکان صفحہ ہستی توں مٹ چکے نیں’ لوگ در بدر ہو چکے نیں۔ ہزاراں جانور مر چکے نیں’ سینکڑوں انسان اللہ نوں پیارے ہو چکے نیں۔
بابا کرمو نے کہیا تسیں پریشان وکھائی دے رہے او۔ دسیا ایس لئی کہ اج تسیں وی پریشان وکھائی دے رہے او۔ کہیا جے کہیا جاوے کہ ہر پاکستانی سیلاب دی تباہ کاریاں نال پریشان حال اے تے غلط نہیں ہووے گا۔ بابا کرمو نے کہیا میرا سوال ایہہ وے کہ عذاب پہلے کچے گھراں وچ رہن والیاں تے ای کیوں آندا اے سیلاب نال دوجے ملکاں وچ اینی تباہی نہیں ہوندی جنی ساڈے ایتھے ہوئی اے۔ انج کیوں اے۔ میں کہیا کہ ایس لئی کہ اسیں مسلمان آں اوہ ذات ساڈے توں دوجیاں دے مقابلے وچ زیادہ پیار کردی اے۔ زیادہ امیداں رکھدی اے۔ اوہ ذات سانوں سمجھان لئی سیلاب’ زلزلے لیاندی اے کہ اسیں مسلمان نما انسان سدھر جائیے۔ ملاوٹ’ جھوٹ’ مکروفریب’ رشوت ساڈی نس نس وچ اے۔ جد کہ جہڑے ملک غیرمسلم نیں اوتھے ملاوٹ’ جھوٹ’ فریب’ رشوت والے لوگ آٹے وچ لون دے برابر نیں۔ اوہ لوک قنون توں ڈردے نیں’ قنون لاگو کرن والے اللہ توں ڈردے نیں تے اسیں دوہاں توں نہیں ڈردے۔ اوہ ذات سیلاب لیا کے’ زلزلے لیا کے سانوں سمجھاندی اے کہ اے بندے اک لمٹ وچ رہو میں جو رزق تینوں دینا واں اوہنوں دوجیاں وچ وی تقسیم کیتا کرو’ ہر جاندار چیز دا خیال رکھیا کرو۔ اوس ذات نے سانوں حلال حرام دی تمیز دے رکھی اے فرق دس دتا اے پر اسیں اوہناں ساریاں نوں مٹا رکھیا اے۔ ایس لئی اوہ سیلاب لیاندا اے’ زلزلے لیاندا اے کہ اے بندو تسیں سدھر جائو’ ایہ زندگی عارضی اے تہانوں میں خالی ہتھ ایس عارضی دنیا وچ گھلیا سی تے میں ای تینوں خالی ہتھ واپس بلا لینا اے۔ میں تیرے توں ایس دنیاوی سفر دا حساب لواں گا’ جے پاس ہوئے تے انعام میں جنت دیواں گا تے حساب وچ جے پاس نہ ہوئے’ کسے یتیم دا مال کھایا’ فراڈ نال پیسے بنائے’ ملاوٹ دو نمبر طریقیاں نال کاروبار کردے رہے تے ایہ سب ثابت ہو جان تے سزا دے تسیں حق دار ہوو گے فیر تہانوں جنم وچ رکھیا جاوے گا۔سانوں زندگی گزارن لئی تریہہ سپاریاں تے مشتمل خوبصورت رہنما کتاب قرآن پاک دتی ایہدے وچ سب کجھ زندگی گزارن دے طریقے دس دتے گئے نیں فیر انسان دے اندر اک آلہ وی لا دتا اے جو برے تے غلط کم کرن تے تہانوں اپنے اندروں گھڑی دی طرح ٹک ٹک دی آواز دیندا اے۔ ایس آواز نوں ضمیر دا ناں دتا گیا اے۔ ایہ مشین ساڈے اندر اوس ویلے خراب ہو جاندی اے جدوں اسیں بار بار اوہ غلطی کرنے آں جو کم کرن توں سانوں اوس ذات نے منع کر رکھیا اے اوہنوں جاری رکھنے آں۔
اک محکمہ موسمیات دے پروفیسر دے ناں توں میسج چل رہیا اے کہ مینوں شک نہیں یقین اے کہ موجودہ برسات دے سسٹم قدرتی نہیں ایہنوں کلاڈسینڈنگ یعنی بارب ٹیکنالوجی راہیں لیاندا گیا۔ ایہ عالمی سازش اے اجہی بارشاں دا الزام ایران پہلے ای لا چکیا اے جے انج اے تے سانوں اجہے نالے’ نہراں’ پل’ بلڈنگاں بند بنانے چاہیدے نیں جو نہ ڈگن۔ بلوچستان وچ انگریزاں دے دور پل ایہناں طوفانی بارشاں توں اج وی محفوظ نیں پر ساڈے بنائے ہوئے ڈیم’ سڑکاں’ بند’ بلڈنگاں سب ٹُٹ بھج چکیاں نیں ایس لئی کہ کسے ٹھیکیدار توں کسے نے رشوت نہیں لئی ہووے گی۔ ملکی اداریاں نوں ٹھیک کرو’ لوک آپ ٹھیک ہو جان گے۔
ذرا نم ہوتو یہ مٹی بڑی زرخیز ہے ساقی