خالص آزادی تے جمہوریت کیویں ممکن اے؟

دنیا چن دے بعد مریخ نوں تسخیر کر رہی اے۔ جدید ٹیکنالوجی نال دنیا فتح ہو رہی اے۔ اسیں جتھے سی اوتھے ای آں۔ کدی تے لگدا اے کہ تن قدم اگے گئے آں تے چار قدم پچھے ہٹ گئے آں۔ بلاشبہ پاکستان نے ایٹم بمب بنا لیا۔ پاکستان عالم اسلام دی اج وی واحد ایٹمی قوت اے۔ ایہ ایٹم بمب صرف اک بندے دی کاوش تے دوجے بندے دی معاونت دا نتیجہ اے۔ ایہ پاکستان دی محسن شخصیات بالترتیب ڈاکٹر عبدالقدیر خان تے ذوالفقارعلی بھٹو نیں۔ دوہاں دے نال جو کجھ کیتا گیا اوہ قوم و ملت نوں شرمسار کرن لئی کافی اے۔
میری نظر توں اج اک رپورٹ گزری اے جہدے وچ کہیا گیا اے کہ پنجاب حکومت نے چائلڈ لیبر دے خاتمے لئی اقدامات کرن دا فیصلہ کیتا اے۔ چائلڈ لیبر وچ ملوث اداریاں دے مالکان نوں سخت سزاواں دی تجویز زیرغور اے۔ محکمہ سکول ایجوکیشن نال حکومت رابطہ کرکے بچیاں نوں داخلہ دوائے گی۔ چائلڈ لیبر دے خاتمے لئی عالمی سطح تے کوششاں ہوندیاں رہیاں نیں۔ پاکستان ورگے ملکاں نوں چوکھی گنتی وچ فنڈ وی جاری ہوندے رہے نیں پر چائلڈ لیبر دا خاتمہ تے کیہ خاتمے دا آغاز وی نہ ہو سکیا۔ فنڈز توں مینوں یاد آندا اے کہ پاکستان دی اک معتبر سیاسی خاتون نوں امریکہ (مشعل اوباما) ولوں ست ملین ڈالر تعلیم دے فروغ لئی فنڈ دتا گیا سی اوہدا کدی پتہ نہ چل سکیا کتھے خرچ ہویا۔ کسان پریشان اے’ اوہنوں خالص دوائیاں تے کھاد ملی اے نہ ای معیاری بیں۔ نہری پانی دی کمی ہو رہی اے ڈیزل تے بجلی اینی مہنگی کہ کسان ٹیوب ویل چلان توں قاصر نیں تے فیر بجلی دی لوڈشیڈنگ دہرا عذاب اے۔ شہراں وچ تجاوزات خودار جھاڑیاں وانگوں اگدیاں نیں تے پھیلدیاں ای چلیاں جاندیاں نیں۔ شہراں وچ چوک چوراہے بھکاری بلاک کر دیندے نیں۔ معاشرے دے اصلاح دی ضرورت اے۔ ایس پاسے تحریک انصاف دی حکومت دوران پیش رفت ہو رہی سی کہ ایس حکومت نوں بدل دتا گیا۔ اج صورتحال بہوں ماڑی اے۔ عالمی سطح تے پٹرول سستا ہون دا رجحان اے پاکستان وچ مہنگا کر دتا گیا۔ اودھر بجلی دی قیمت وچ وی ڈھیر وادھا ہویا اے۔ لوکاں دی زندگی حقیقت وچ اجیرن ہو گئی اے۔
عمران خان دی سیاست نال اختلاف کریئے’ اوہناں دی شخصیت تے گل کریئے’ اوہناں دے کجھ اقدامات تے سوال اٹھائیے پر ایہ حقیقت اے کہ مہنگائی دا جن اج وانگوں بے قابو نہیں سی۔ عمران خان معیشت دی بربادی دا الزام اپنے پہلیاں نوں دیندے سن۔ اج اوہ حکومت وچ آئے نیں تے سارا ملبہ عمران خان تے سٹ رہے نیں۔ خزانہ خالی دی گل کیتی جا رہی اے۔ خزانہ خالی سی’ عمران خان نے کیویں طعام گاہواں کھول دتیاں’ کیویں ہیلتھ کارڈ جاری کر دتے۔ احساس پروگرام’ کامیاب نوجوان پروگرام ورگے منصوبے شروع کر دتے۔ حکومت چل رہی سی مہنگائی یقینا ہے سی پر جنی تنقید ہوندی سی تے تحریک انصاف دے کول اوہدا جواب نہیں بن پاندا سی پر اوہناں دے بعد جو آئے ایس دوران مہنگائی دا جو طوفان اٹھیا اوہدے سامنے اوہ مہنگائی گھٹ گئی۔ عمران خان دا اج بیانیہ اوہناں نوں سب توں منفرد کر رہیا اے۔ خاص طور تے اوہ آزاد تے خودمختار معاشرے دی گل کردے نیں۔ اوہ روس ول جھکائو رکھدے نیں’ امریکہ نال وی دشمنی نہیں چاہندے۔ امید نہیں کیتی جا سکدی اوہ روس دی ہاں وچ ہاں ملاندے ہوئے کجھ اجیہا کرن گے جہدے نال روس دی غلامی دا تاثر ابھرے۔ عمران خان ٹھیک کہندے نیں کہ دوستی ساریاں دے نال پر جنگ کسے دے نال نہیں تے جنگ ساریاں دی اپنی اپنی اے جہدی ہے اوہ آپ لڑے۔اج دے حکمران عمران خان دا مقابلہ کرنا چاہندے نیں تے عمران خان دے بیانیے دا توڑ چاہندے نیں تے لوکاں دی دادرسی کرن۔
دوستو! میری بڑی دردمندانہ اپیل اے کہ ہور کجھ نہیں تے ساریاں سیاسی پارٹیاں بہہ کے اک نکتے تے متفق ہو جان کہ ملاوٹ زدہ کھان پین والیاں شیواں تے دوائیاں وچ ملاوٹ کرن والیاں نوں چوک وچ لمکا کے پھاہے لایا جاوے۔ پاکستان توں باہر رہن والے پاکستانیاں دے سر اوس ویلے شرم نال جھک جاندے نیں جدوں سانوں لفظ خالص دا ترجمہ یورپین زبان وچ کرنا پیندا اے کیوں جے یورپ’ نارتھ امریکہ تے ترقی یافتہ ملکاں وچ ایہ سب توں ودھ سزا والا جرم اے تے یورپین معاشرے دے لوک اوس ویلے کنفیوژ ہو جاندے نیں جدوں اسیں اوہناں نوں دسنے آں کہ پاکستان وچ خالص ددھ’ خالص خوردنی تیل تے تے خالص مصالحے تے دور خالص دوائی وی نہیں ملدی۔ حالاں کہ وڈے وڈے میڈیکل سٹورز اپنا منافع ودھان لئی اپنے سٹاک وچ ویہہ توں پنجی فیصد جعلی دوائیاں شامل کر لیندے نیں۔ ایسے طرح پاکستان دے کمرشل بینک وی اپنا نقصان پورا کرن تے انھے واہ منافع کمان دے چکر وچ جعلی نوٹاں نوں اپنے سٹاک وچ شامل کر لیندے نیں تے بینک توں ملے ہوئے ایہ نوٹ چھیتی ای پورے ملک وچ پھیل جاندے نیں۔ میری ادنیٰ جہی رائے دے مطابق پاکستان دے اسی فیصد مسئلے اوس ویلے حل ہو جان گے جدوں اسیں جعلی دوائیاں تے جعلی کھان پین والیاں شیواں تے قابو پا لواں گے پر انج صرف اودوں ممکن اے کہ اسیں ایہناں اقدامات لئی کرڑے ہتھ استعمال کریئے۔ یقین کرو خالص آزادی تے خالص جمہوریت وی تاں ای ممکن اے کہ اسیں ایس ناسور تے قابو پا لیئے۔٭٭