کیہ سیاست ای سب کجھ اے ؟

سیاسی جماعتاں کدی کارکردگی نال عوام دے دل جتن دی کوشش کردیاں سن ہن صرف دشنام طرازی ہوندی اے۔ ساری سیاسی جماعتاں دے اطوار دا جائزہ لے لوو تسیں ایہو نتیجہ اخز کرو گے کہ عوامی بھلائی توں ودھ اوہناں نوں انتخابی فتح غرض اے چاہے ملک معاشی گرداب وچ پھسیا تے عوام غربت’ مہنگائی تے بے روزگاری جئے مسائل نال دوچار رہوے۔ سیاسی رہنماواں نوں پرواہ نہیں البتہ انتخابی جت دا کوئی موقع ہاتھ توں جان نہیں دتا جاندا۔ ساری بدعنوانی دے باوجود اپنی نیک نامی دی ایسی ایسی کہانیاں گھڑیاں تے سنائیاں جاندیاں نیں کہ لوک سن کے دنگ رہ جان حالانکہ ایہناں کہانیاں وچ رتی بھر صداقت نہیں ہوندی۔ ملک وچ ایسا کوئی سیاسی چہرہ نہیں جہنوں صحیح معنیاں وچ نیک نام کہہ سکیے۔ مذہبی قیادت اتے وی بدعنوانی دے الزامات نیں۔ دوجے مسائل ودھن دے نال اک ہور سچ ایہہ اے کہ ملک وچ نیک نام سیاسی قیادت دا مسئلہ وی شدت اختیار کردا جا رہیا اے ۔ کوئی ہور نہیں سیاستدا ن ای اک دوجے اتے غداری تک دے الزامات لاندے نیںجہدے توں رواداری تے برداشت ختم ہو رہی اے۔ دلیل نال نکتہ نظر منوان دی بجائے اختلاف رائے داجواب گالی نال دتا جاندا اے۔اخلاقی روایات دے خاتمے نال ملک دی سیاسی فضا اینی پراگندہ ہو چکی اے کہ سیاست یکسر تبدیل ہو گئی اے۔ کوئی کسی دی سنن لئی تیار نہیں صرف اپنی سنان دی کوشش کردے نیں۔ لوڑ ایس امر دی اے کہ دشنام طرازی نال اک دوجے نوں بدنام کرن تے انتخاب جتن دے چور رستے تلاش کرن دے بجائے کارکردگی نال عوام دا دل جتیا جاوے۔ سیاسی تقسیم نوں ہوا دین دی روش چھڈ کے کارکناں دی فکری تربیت اتے توجہ دتی جاوے۔ حریف سیاسی جماعتاں دی کمزوریاں اجاگر کرن دے بجائے منشور تے خدمت نال عوام دی توجہ حاصل کرن کیوں جے قول و فعل دے تضاد نال ملکی مسائل حل نہیں ہو رہے۔
جون توں شروع ہون والی طوفانی بارشاں نال ملک وچ ایسی سیلاب کیفیت اے جہدے توں تہائی حصہ پانی وچ ڈب چکیا اے۔ جانی تے مالی نقصان دا درست اندازہ لانا تے اک پاسے اجے تک کئی علاقیاں وچ امدادی سرگرمیاں دا آغاز تک نہیں ہو سکیا۔ بدترین سیلاب دی تباہ کاریاں نال نمٹن لئی ضروری اے کہ سیاسی قیادت سب کجھ سیاست سمجھن دی بجائے متاثرین دی بحالی لئی ایسی متفقہ تے مربوط سرگرمیاں شروع کری جہناں توں متاثرین دے مصائب تے مشکلات جے ختم نہیں تے کسی حد تک گھٹ ضرور ہوجان لیکن بے رحم سیاسی اشرافیہ بدستور اپنے اپنے مفاد دی آسیر اے۔ کجھ ادارے سیلاب وچ پھسے لوکاں دی مدد لئی متحرک ضرور نیں لیکن سچ ایہہ اے کہ اجے تک ہر متاثرہ فرد تک پہنچیا نہیں جا سکیا جہدی وجہ نال نہ صرف موتاں ودھن دا خدشہ اے بلکہ وبائی امراض دا خطرہ وی سر اتے منڈلان لگیا اے۔ ایہدے باوجود پیش بندیدے طور تے کوئی طریقہ کار نہیں بنایا جا سکیا جہدے توں متاثرین دی مشکلات وچ کجھ کمی آوے۔ حکومتی اپیل دا مثبت جواب دیندے ہوئے کئی ملکاں نے امدادی سامان روانہ کیتا اے۔ اقوام متحدہ نے وی ابتدائی تخمینہ لا کے عالمی برادری نال تعاون دی اپیل کر دتی اے مگر مشکل دے ایہناں لمحیاں وچ وی سیاسی قیادت سب کجھ سیاست نوں ای سمجھدے ہوئے اک دوجے نوں بدعنوان ثابت کرن دی کوشش وچ اے حالاں جے ایس طرح عالمی امداد دے حصول وچ رخنہ آ سکدا اے۔ ساڈے ملک دی سیاست اینی بدل گئی اے کہ متاثرین دی بحالی توں ودھ سیاسی قیادت لئی حریفاں نوں نیچا وکھانابوہتا اہم اے۔
عمران خان نے اپنی مقبولیت تے تجربے دی وجہ نال متاثرین دی بحالی لئی ارباں دے عطیات جمع کیتے لیکن ایہہ عطیات تباہ ہون والے سکولاں’ نیست و نابود انفراسٹرکچر تے برباد اسباب زندگی دی بحالی لئی ناکافی نیں فیر وی ایہہ اک چنگی کاوش اے مگر حکومت دا زور ایہدے تے اے کہ کسی طرح عطیات جمع کرن دی ایس مہم نوں نکام ثابت کیتا جاوے۔ ایہدے لئی حکومتی وزیر تے مشیر متحرک نیں۔ ایہہ سفاکی دی انتہا اے۔ ہونا تے ایہہ چاہیدا اے جو وی چنگا کم کرے اوہنوں سراہیا جاوے تے رل کے سیلاب متاثرین دی بحالی لئی ٹھوس تے نتیجہ خیز طریقہ کار بنان مگر ملک دی سیاست اینی تبدیل ہو گئی اے کہ پانی وچ ڈبے عوام ویکھ کے وی سیاسی قیادت دے دل وچ رحم دا جذبہ پیدا نہیں ہو سکیا حالانکہ سچ ایہہ اے کہ عمران خان اقدار توں محروم ہون دے باوجود اج وی اہم نیں کیوں جے ملک دے وڈے حصے اتے اج وی اوہناں دی جماعت یا اوہناں دے اتحادیاںدی حکومت اے۔ کے پی کے ‘ گلگت بلتستان’آزادکشمیر تے پنجاب دی حکومتاں دا تعاون حاصل کرن لئے عمران خان نوں راضی کیتے بنا ممکن نہیں۔ ایہدا ادراک معمولی فہم و فراست رکھن والے نوں وی اے لیکن ایہہ واضح نکتہ حکومت ویکھن توں قاصر اے ایسے لئی سیلابی تباہ کاریاں دے باوجود دست تعاون ودھان توں گریز کردے ہوئے اپنے سیاسی مفاد دے خول وچ بند اے۔
عالمی برادری نوں پاکستان وچ ان والے سیلاب دا کسی حد تک احساس اے۔ اقوام متحدہ دے جنرل سیکرٹری انتونیو گوتریس نے دفتر خارجہ دے پربندھ ہیٹھ ویڈیو لنک نال خطاب کردے ہوئے آکھیا اے کہ محدود وسائل دے باوجود پاکستان نے لکھاں افغان مہاجرین نوں پناہ دے کے جہڑی کشادہ دلی دا مظاہرہ کیتا اے اوہ کسی طور فراموش نہیں کیتا جا سکدا۔ اوہناں نے ماحولیاتی تبدیلی دے نتیجے وچ آن والی سیلابی آفت دے کارن ہون والی موتاں’ زخمیاںتے نقصانات دا ذکر کردے ہوئے سیلاب زدہ علاقیاں دا دورہ کرن دا وی اعلان کیتا ۔ جے اعلان دے مطابق دور ہ ہو جاندا اے تے ایس توں کسی حد تک متاثرین دی بحالی ہو سکدی اے۔ نیز نہ صرف تباہ کاریاں دا ایسا درست تخمینہ لایا جا سکے گا جہدے تے اقوام عالم تے عالمی ادارے اعتماد کرن بلکہ عالمی امداد نوں وی یقینی بنا یا جا سکے گا۔ انج ہو جاندا اے تے خوراک’ پین دے پانی’ صحت تے تعلیم جئی ضروریات دی فراہمی وی ممکن ہو جاوے گی لیکن ایہدے لئی لازم اے کہ سیاسی قیادت اک دوجے اتے الزام تراشی داجاری سلسلہ گھٹ توں گھٹ وقتی طور تے ای سہی موقوف کر دیوے تے اختلافات بھلا کے ساری توانائیاں متاثرین دی بحالی لئی وقف کر دیوے ۔ ملک دی بدلی سیاست دے تناظر وچ ایسا ممکن نظر نہیں آرہیا کیوں جے آزمائش دی ایس گھڑی وچ وی سیاسی قیادت دے نزدیک ملک تے عوام توں ودھ اک دوجے نوں رگیدنا زیادہ اہم ا۔ ایہہ سوچ یا رویہ کسی طور قابل تحسین یا قابل رشک نہیں۔
سیاسی قیادت دی نااتفاقی دی وجہ نال ای عالمی ادارے مطالبہ کرن لگے نیں کہ بھارت کولوں امدادی سامان دی ترسیل لئی زمینی راستہ فراہم کیتا جاوے حالانکہ یکطرفہ فیصلے نال کشمیر نوں بھارت وچ ضم کرن نال پاکستان لئی ایسی اجازت دینا ممکن نہیں رہیا مگر سیاسی قیادت دی نااتفاقی نال جائز و ناجائز مطالبات سامنے آن لگے نیں۔ ایسے حالات وچ جدوں موسمیاتی تبدیلیاں دی وجہ نال ملک نوں سیلاب تے خشک سالی دی ملی جلی کیفیت دا سامنا اے۔ محکمہ موسمیات ولوں ستمبر وچ ہور بارشاں دی پیشگوئی سامنے آگئی اے۔ ایہناں حالات وچ لوڑ ایس امر دی اے کہ سیاسی وابستگیاں توں بالاتر ہو کے امدادی کماں وچ حصہ لیتا جاوے۔ ملک دے کئی علاقے اجے تک زیر آب نیں۔ علاوہ ازیں کے پی کے’ پنجاب تے سندھ وچ دریاواں وچ پانی دی سطح ڈگن دے بجائے اچی ہو رہی اے جہدے توں قریبی آبادیاں خطرے وچ نیں۔ کئی علاقیاں وچ تاحال لوک کھلے اسمان تھلے امداد دی امید لائے بیٹھے نیں ایس لئی گھٹ توں گھٹ ایس آزمائش دی گھڑی وچ ای وقتی طور تے ای سہی سیاسی قیادت ہوش دے ناخن لوے تے اک ہو جاوے۔ متاثرین دی مکمل بحالی مگروں بے شک اپنی سیاستی چمکان لین۔