تیجاپنجابی صوفی سیمینار

پنجابی زبان، ادب، رہتل، تے پنجابی صوفی شاعراں دے کلام نوں اگے ودھائون لئی، پنجابی سورمیاں دی حیاتی، پنجابی تواریخ، نابر پنجابناں بارے جانکاری دین تے نویں پنجابی نسل نوں اصل پنجابی ورثے توں جانوں کروان لئی وڈے پنجابی آگو، سینکڑے کتاباں دے لکھاری، ہزاراں ایوارڈ لین والے ، پنجابی زبان دے ودھاء لئی پنج اداریاں دے مالک، پنج پنجابی رسالیاں دے چیف ایڈیٹرمحترم جناب چودھری الیاس گھمن ہوراں دی اگوائی ہیٹھ ”پنجاب قومی ستھ” تے ”پنجابی زبان تحریک” دی سانجھ نال جہڑا پندھ چھوہیا گیا اے۔ اوس پندھ دا تیجا ”پنجابی صوفی سیمینار” گورنمنٹ پیر بہارشاہ ایسوسی ایٹ کالج فار وومن (شیخوپورا) وچ،3 ستمبر2022 نوںہفتے والے دن کروایا گیا۔
ایس” پنجابی صوفی سیمینار” دی صدارت مہان پنجابی کہانیکار، جہناں کئی کتاباں لکھیاں، پاکستان پنجابی ادبی بورڈ لاہور دی سیکرٹری محترما باجی ”پروین ملک” ہوراں کیتی۔
اُچیچے پروہنیاں وچ پنجابی زبان دے وڈے ناولسٹ، کہانیکار تے وارث شاہ عالمی ایوارڈ جتن والے لمز یونیورسٹی دے پروفیسر محترم جناب زاہد حسن صاحب تے 3 شعری پراگیاں دی خالق ، معروف شاعرا محترما نرگس نور شامل سن۔
”پنجابی صوفی سیمینار” دے پہلے مرحلے وچ سٹیج سیکرٹری دی ذمے واری کالج وچ ”شعبا پنجابی ” دی انچارج محترما پروفیسر مسسز ناہید صائقہ ہوراں نبھائی ۔
”پنجابی صوفی سیمینار” دا باقاعدا آغاز تلاوت کلام پاک توں کیتا گیا جہدی سعادت کالج وچ پڑھن والی ”رحیبہ اسلم” نے سعادت حاصل کیتی۔ جدوں کہ اک ہور پڑھیارن مہوش ذوالفقار نے سرور کونین، شافعی محشر، کوثر دے والی، حضرت محمدمصطفی ۖ دے حضور ہدیہ نعت ”اج سِک متراں دی ودھیری اے۔ کیوں دلڑی اُداس گھنیری اے” پیش کیتا۔
سب توں پہلاں گورنمنٹ پیر بہار شاہ ایسوسی ایٹ کالج فار وومن دی پرنسپل میڈم فرح نصیر نے بطور مجمان ”باجی پروین ملک صاحبا، پروفیسر زاہد حسن صاحب، محترما نرگس نور صاحباتے ڈاکٹر ایم ایچ بابر ہوراں نوں ”جی آیاں نوں آکھیا تے پھُلاں دے گلدستے پیش کیتے۔
میڈم فرح نصیر نے اپنی گل بات وچ سٹوڈنٹس نوں مخاطب کر کے آکھیا : ”اج مینوں ڈھیر خُشی ہوئی اے کہ ساڈے کالج وچ باجی پروین ملک جی (سیکرٹری پاکستان پنجابی ادبی بورڈ، پنجابی کہانیکار) ، پنجابی ناولسٹ، پنجابی کہانی کار تے لمز یونیورسٹی دے پروفیسر محترم زاہد حسن صاحب تے پنجابی شاعرا محترما نرگس نور تشریف لیائے نیں۔ میں ایہناں سارے پروہنیاں دا دلوں نگھا سواگت کردی ہاں تے اُمید کردی ہاں کہ ایہ لوک ساڈے کالج وچ آئوندے رہن گے تے ساڈے کالج دیاں بچیاں نوں پنجاب دی تواریخ بارے دس پائوندے رہن گے۔ اج میرے لئی دوہری خُشی دا ویلا اے کیوں جے اج توں پہلاں میں اپنیاں بچیاں نال اردو گل بات کردی ساں تے اج مینوں اپنی ماں بولی بولدیاں فخر محسوس ہو رہیا اے۔ چونکہ ساڈے اداریاں وچ ماحول بن چُکیا اے ایس پاروں سانوں اُردو بولنی پیندی اے۔ جدوں کہ پنجابی ساڈی ”ماں بولی” اے تے اسیں سامنے والے بندے نوں اپنی گل بہت چنگے طریقے نال سمجھا سکدے ہاں۔ سٹوڈنٹس واسطے میرا سنیہا اے کہ اوہ اپنی ماں بولی نوں وسرن نہ دین”۔
ایس توں بعد ”پنجابی صوفی سیمینار” وچ گورنمنٹ پیر بہار شاہ ایسوسی ایٹ کالج فار وومن شیخوپورا دیاں پڑھیارناں نے مزاحمتی صوفی شاعر حضرت بلھے شاہ رحمة اللہ علیہ تے حضرت وارث شاہ رحمة اللہ علیہ دی حیاتی بارے نہ صرف بھرویں گل بات کیتی سگوں حضرت شاہ حسین (مادھولعل حسین)، حضرت سید بلھے شاہ تے حضرت سید وارث شاہ دا کلام گا کے سنایا۔
پروفیسر میڈم ناہید صائقہ(انچارج شعبا پنجابی) نے پنجابی صوفی شاعراں بارے گل بات کیتی تے نال نال صوفی شاعراں دا کلام پڑھن لئی طالبات نوں مائیک تے وی سدیا۔ پنجابی صوفی شاعر حضرت میاں محمد بخش رحمة اللہ علیہ دا کلام ”اریبہ مسعود” نے پیش کیتا، جدوں کہ حضرت بلھے شاہ رحمةا للہ علیہ دی حیاتی بارے جانکاری نال بھریا ہویا پرچا ”بریرہ نذیر” نے پڑھیا۔ ایس توں بعد کالج وچ پڑھن والیاں دو طالبات ”سنیناں امتیاز تے مہوش ذوالفقار” نے حضرت بلھے شاہ رحمة اللہ علیہ دا کلام پیش کیتا۔
جدوں کہ حضرت سید وارث شاہ رحمة اللہ علیہ دی حیاتی بارے ”سحر اسد” نے بڑی بھرویں گل بات کیتی تے اک واری فیر حضرت شاہ حسین دا کلام ”مائے نی میں کہنوں آکھاں درد وچھوڑے دا حال” مہوش ذوالفقار نے ترنم نال گا کے سب نوں حیران کر دتا۔
دوجے مرحلے وچ سٹیج سیکرٹری دی ذمے واری جاوید پنچھی (چیئرمین : پنجاب قومی ستھ) نے سنبھالی تے اپنی گل بات کردیاں دسیا کہ :
ایہ سلسلا اساں ”پنجابی زبان تحریک” دے قائد محترم جناب چودھری الیاس گھمن ہوراں دی اگوائی ہیٹھ شروع کیتا اے ۔ ”پنجابی صوفی سیمینار” دے ایس سلسلے دا مقصد اج دی نویں نسل نوں ”ماں بولی تے خطے دی اہمیت بارے دسنا، پنجاب دی تواریخ توں جانوں کروانا،پنجابی رہتل بارے جانکاری دینا، پنجابی ورثے بارے دس پائونا، پنجابی صوفی شاعراں دی حیاتی بارے دسنا تے اوہناں دا سنیہا پنجاب دے ہر بال تک اپڑائون دے نال نال ایہ دسنا وی اے کہ پنجاب دے اصل ہیرو کون نیں تے پنجابی بولی وچ پڑھائی کیوں ضروری اے؟۔
اللہ تعالیٰ نے اپنی مخلوق دی بھلائی واسطے ، اپنی مخلوق نوں سدھا رستا وکھائون تے اللہ دا سنیہا صاف صاف لوکائی تک اپڑائون لئی اک لکھ چوی ہزار پیغمبر دنیا تے بھیجے تے ہر پیغمبر نوں اوہناں دی ماں بولی وچ وحی کیتی گئی۔ جسراں سورة ابراہیم دی چوتھی آیت وچ اللہ ارشاد فرماندا اے: ”اساں ہر قوم وچ اک رسول گھلیا جہڑا اوہناں دی ہی بولی بولدا سی تاں جے ساڈا سنیہا اوہناں نوں صاف صاف دس سکے”۔
انج ماں بولی وچ گل کرنا، ماں بولی پڑھنا تے پڑھائونا اک لکھ چوی ہزار پیغمبراں دی سُنت اے۔ جدوں کہ اک سُنت ادا کرن دا اجر سو شہیداں دے برابر ثواب ملدا اے۔ سوچن والی گل اے جے اسیں اک لکھ چوی ہزار پیغمبراں دی سُنت سمجھ کے ماں بولی بولاں گے تے سانوں کنا ثواب ملے گا تے نال ای ساڈی ماں بولی کنی ودھے پھُلے گی؟”۔
جاوید پنچھی نے اپنی گل بات وچکار ایہ وی آکھیا کہ ”پنجابی زبان دا ودھا ء اوس ویلے تک ممکن نہیں جدوں تک ”پنجابی زبان تحریک” دا سدا پنجابی سٹوڈنٹس تک نہیں اپڑدا۔ کیوں جے کسے وی تحریک نوں کامیاب بنائون وچ سٹوڈنٹس دا بہت حصا ہوندا اے۔ سو اسیں ہر طرح جتن کر کے ”پنجاب بھر دے کالجاں تے یونیورسٹیاں وچ پنجابی صوفی سیمینار کراواں گے”۔
”پنجابی صوفی سیمینارز” دے ذریعے جتھے نویں نسل نوں پنجاب دی تواریخ تے صوفی شاعراں بارے بھرویں جانکاری ملے گی اوتھے بہت سارے سٹوڈنٹس ”پنجابی زبان تحریک” دے بانہ بیلی وی بنن گے۔
ایس توں بعد مقامی شاعر محترم جناب ڈاکٹر ایم ایچ بابر ہوراں اپنی اک مزاحیا نظم سنا کے حاضرین توں داد کھٹی تے اک واری فیر جاوید پنچھی نے مائیک سنبھالیا تے لاہور توں آئی ہوئی 3شعری پراگیاں دی خالق معروف شاعرا محترما نرگس نور نوں دعوت کلام دتی۔ محترما نرگس نور نے اپنی اوہ شاعری سنائی جہدے وچ نویں نسل نوں ماں بولی بولن ول پریرنا دتی گئی اے۔
جاوید پنچھی نے مائیک سنبھالیاتے پنجابی ناولسٹ، پنجابی کہانیکار ، وارث شاہ عالمی ایوارڈ جتن والے ، لمز یونیورسٹی دے پروفیسر محترم جناب زاہد حسن صاحب نوں گل بات کرن لئی سدیا۔
محترم جناب پروفیسر زاہد حسن ہوراں گل بات کردیاں دسیا کہ : ”لمز یونیورسٹی برصغیر دیاں سب توں وڈیاں یونیورسٹیاں وچوں اک اے تے حیران کُن گل ایہ ہے کہ میں اوتھے پنجابی پڑھائوناں”
اوہناں ایہ وی آکھیا کہ : ”جہڑے سٹوڈنٹس اگے نکلدے نیںاوہ اپنی ماں بولی وچ پڑھدے نیں۔ ساری دنیا وچ ایہ قانون اے سوائے ساڈے پنجاب دے کہ ہر تھاں ”ماں بولی” وچ تعلیم دتی جاندی اے۔
پروفیسر زاہد حسن ہوراں دسیا کہ : دنیا بھر دے ماہرین تعلیم کہندے نیں : ”بچے نوں اوہدی ماں بولی وچ پڑھائو تے اوہ چھیتی سکھدا اے۔ پر ساڈے ایتھے عجیب سسٹم اے کہ سپریم کورٹ آف پاکستان دے فیصلا دین توں بعد وی ساڈے بالاں نوں مادری بولی وچ تعلیم نہیں دتی جاندی۔
پروفیسر زاہد حسن ہوراں دے گل بات کرن مگروں کالج وچوں پرچا پڑھن والیاں تے عارفانا کلام سنائون والیاں طالبات نوں ”پنجاب قومی ستھ” تے ”پنجابی زبان تحریک ” ولوں حضرت ”بلھے شاہ ایوارڈ” ورتائے گے تے نال ای اوہناں نوں پنجاب دے خاص رنگ دیاں چُنیاں وی دتیاں گئیاں۔
شعبا پنجابی دی انچارج میڈم ناہید صائقہ ہوراں نوں وی پنجابی چنی دتی گئی تے سیمینار وچ نظم و ضبط قائم رکھن والی طالبا نوں وی پنجابی چُنی دتی گئی۔ ایہ سارے ایوارڈ تے ساریاں چُنیاں باجی ”پروین ملک، پروفیسر زاہد حسن، محترما نرگس نور تے ڈاکٹر ایم ایچ بابر” نے اپنے ہتھ نال ورتائیاں۔ ایس توں بعد صدارتی خطاب واسطے محترما باجی پروین ملک جی نوں سدیا گیا۔ باجی پروین ملک ہوراں نے طالبات نال گل کردیاں آکھیا۔
”ساڈی نویں نسل نوں چاہیدا اے کہ اوہ اپنی ماں بولی نوں اگے لے کے چلے۔ ساڈی ماں بولی نال بہت دھرو ہویا اے۔ جدوں انگریز نے 1849وچ پنجاب تے قبضا کیتا تے فر سکول کھولے اوس ویلے تائیں ادھی صدی گزر چُکی سی۔ اوس ویلے انگریزحاکماں نے ایتھوں دے ڈی سیز نوں پُچھیا کہ سکولاں وچ کہڑی زبان رائج کیتی جائے؟ ڈی سیز نے نمبرداراں توں پُچھیا۔ نمبرداراں دے تِن طبقے سن ۔ پہلا طبقا اوہ جہڑا انگریز حکمراناں توں ڈردا سی۔ دوجا اوہ جہڑا چاپلوسی کر کے اوہناں دے نیڑے ہونا چاہندا سی تاں جے اوہناں دی نمبرداری بحال رہوے۔ تیجا طبقا جہڑا اپنے علاقیاں وچ پاورفُل سی تے انگریز حکمراناں نے اوس طبقے نوں مراعات، پیسے تے زمیناں دے کے خرید لیا سی۔ ایہو جہی صورت حال وچ نمبرداراں وچوں انگریز حکمراناں سامنے کون بولدا؟ سو اوہناں اکو گل آکھی”جسراں حضور دی مرضی”…..۔
رہندے کسر اوہناں کڈھ دتی جہڑے حضور دے چمچے کڑچھے یوپی سی پی توں اوہناں دے نال آئے سن۔ اوہ کہن لگے : ”اُردو اور پنجابی دونوں ملتی جُلتی زبانیں ہیں لہٰذا آپ سکولوں میں اُردو رائج کر دیں”۔ لو جی فر سکولاں وچ اُردو رائج کر دتی گئی ۔ فر ایہ ہویا کہ جہڑا پنجابی نصاب اوس ویلے تک پڑھایا جاندا سی اوہ راتو رات بدل دتا گیا۔ ”
باجی پروین ملک ہوراں آکھیا کہ: ”اسیں کسے زبان دی کوئی مخالفت نہیں کر دے فر پچھلیاں پونے دو صدیاں توں پنجابی زبان ول کسے نے دھیان کیوں نہیں دتا؟ ”
اوہناں دسیا کہ : ”اساں پنجاب ہائیکورٹ وچ رٹ کیتی سی جسراں دوجے صوبیاں وچ اوہناں دی ماں بولی لازمی مضمون وجھوں پڑھائی جاندی اے ایسے طرحاں پنجاب دے بالاں نوں وی ماں بولی لازمی مضمون وجھوں پڑھائی جائے، الحمد للہ اوہ کیس پنجابی جِت گئے نیں۔ فر صوبائی پدھر تے سکولاں تے کالجاں وچ پنجابی زبان پڑھائون لئی سپریم کورٹ آف پاکستان وچ کیس کیتا گیا۔ سپریم کورٹ آف پاکستان نے فیصلا جاری کیتا کہ سارے صوبیاں نوں حق حاصل اے پئی اوہ اپنے بالاں نوں ماں بولی وچ تعلیم دین”۔
اوس فیصلے دی روشنی وچ اساں سارے پنجاب دے سکولاں کالجاں توں پنجابی پڑھن والے بالاں دا ڈیٹا کٹھا کیتا سی تے جتھے پنجابی پڑھائون والے اُستاد نہیں اوتھے پنجابی اُستاد لائون لئی پنجاب سرکار تے زور پایا ۔ جہدا سِٹا ایہ نکلیا کہ ہُن تک پرائمری توں ہائی سکولاں تک چار ہزار اُستاد بھرتی کرن لئی منظوری دے دتی گئی اے۔اسیں اُمید کردے ہاں کہ بہت چھیتی پنجابی دیاں ہور سیٹاں وی کڈھیاں جاون گیاں۔ انج پنجابی زبان روز گار نال وی جڑ جائے گی تے فیر پنجابی زبان ترقی ول ٹر پئے گی۔ امید کیتی جا سکدی اے کہ ساڈے بال پنجابی زبان دا چنگا بھلک ضرور ویکھن گے۔ آخرتے ایتھے بیٹھیاں ساریاں کُڑیاں نوں اک گل ضرور آکھاں گی کہ اپنے گھراں وچ گل بات اپنی ماں بولی وچ کریا کرو ۔