تباہی اک دن وچ نہیں آندی

مناسب گل تے ایہو اے کہ جے کوئی بندہ مصیبت دا شکار ہووے یاں مشکل وچ پھسیا ہووے تے اوہدے تے طعنہ زنی کرن دی تھاں اوہنوں اوس ویلے مصیبت چوں کڈھنا تے اوہدی مشکل دا کوئی حل لبھنا چاہیدا اے پر جے معاملہ کسے اجہی مشکل یاں مصیبت نال جڑیا ہووے جو اپنی پیدا کیتی ہووے تے اگوں اوہدا حل کڈھنا وی بہت ضروری اے تاں جے مستقبل وچ اوہدے توں نجات حاصل کیتی جا سکے۔ جنوبی پنجاب وچ کوہ سلیمان دے آل دوالے تے سوات چ دریائے سوات دے کنڈھیاں تے ہون والی تباہی وچ بہت وڈا حصہ ساڈا اپنا اے تے جے اسیں قدرت دے راہواں وچ کندھاں کھڑیاں کرن دی کوشش نہ کردے تے ایہ تباہی بڑی حد تک گھٹ کیتی جا سکدی سی کہ قدرت نال لڑائی دا نتیجہ کدی وی بنی نوع آدم لئی فتح دی صورت وچ سامنے نہیں آندا۔
اللہ دا اک نظام اے تے میرے مالک نے زمین تخلیق کرن ویلے اوہدی اک خاص ساخت ترتیب دتی تے قدرت دا ایہ قائم کردہ نظام اک توازن دے نال لکھاں کروڑاں سال توں وڈی سہولت دے نال چلدا آ رہیا اے۔ ایس طے شدہ نظام وچ وی اونچ نیچ اوہدی مرضی تے خواہش نال ہوندی رہندی اے تے غیرمعمولی صورتحال وچ ایس توازن وچ گڑ بڑ ہو جاندی اے پر قدرت دا نظام ایس ساری گڑ بڑ نوں وی اپنے اندر سمو لین دی صلاحیت رکھدا اے جیویں دریا وچ طغیانی تے سیلاب آوے تے پانی دریا دے کنڈھیاں توں باہر نکل کے آل دوالے کھلر جاندا اے پر ایہ وی قدرت دا ای نظام اے کہ ایہ پانی دریا دے متوازی بنے ہوئے قدرتی راہواں توں ہو کے دوبارہ دریا وچ شامل ہو جاندا اے پر جے اسیں دریا دے متوازی بنے ہوئے ایہناں قدرتی راہواں نوں بند کر دیئے’ اوہناں تے تعمیرات کر لیے یاں اوہناں دی ساری قدرتی ترتیب الٹ پلٹ کر دیئے تے فیر اوس طغیانی یاں سیلاب پاروں ہون والی تباہی تے بربادی اوہدے توں ڈھیر خوفناک ہوندی اے جو ایہناں قدرتی راہواں دے جاری ہون دے نتیجے وچ ہوندی سی۔
لکھاں کروڑاں سال توں چلن والے ندی’ نالے تے دریا اوہناں دے معاون چشمے’ جھیلاں’ گلیشیرز توں پگھلن والی برف تے اسمان توں برسن والی بارش’ ایہناں ساریاں نے اپنے توازن دے حساب نال اپنیاں گزرگاہواں بنائیاں ہوئیاں نیں۔ ایہ سب قدرت دا حسن ترتیب اے جو اوس سارے نظام نوں بخیروخوبی چلاندا رہندا اے تے تسیں جدوں تک ایس توازن نوں انسانی کاوشاں توں خاص حد توں ودھ خراب نہیں کر دیندے ایہ کسے نہ کسے طور چلدا رہندا اے پر جدوں معاملہ حد توں گزر جاوے تے فیر اوہو کجھ ہوندا اے جو ہویا اے۔
جے ورھیاں تک حالات تے معاملات نارمل یاں اوس توں گھٹ سطح تے چلدے رہن تے ایہدا مطلب بالکل نہیں کہ قدرت نے اپنے حساب نال جو گزرگاہ بنائی ہوئی ہووے اوہ فالتو اے تے تسیںاوہنوں اپنی مرضی نال بدل لوو یاں اوہدے وچ رکاوٹاں کھڑیاں کر دیو۔ جیویں کہ میں پہلے کہہ چکیا واں ایہ راہ تے گزرگاہواں اک دو دن یاں ورھیاں دے عمل نال وجود وچ نہیں آئے۔ ایہ صدیاں دے معمولات دے بعد وجود وچ آندے نیں۔ خالق کائنات دے ایس نظام وچ ایہ گزرگاہواں اوہناں لکھاں کروڑاں ورھیاں وچ ان گنت واری اپنی آخری حد والی گنجائش نوں آزما چکیاں ہوندیاں نیں تے فیر جا کے ایہ گزرگاہواں اوہ صورت اختیار کردیاں نیں جو ساڈے سامنے نیں۔ اسیں اوہ لوک آں جو اک دو عشرے آرام نال گزر جان تے اوس معمول نوں معیار بنا لینے آں تے فیر اپنی مرضی نال اوہدے وچ تبدیلیاں شروع کر دینے آں۔ قدرت دے طے شدہ تے متھے نظام نوں خراب کرن’ وگاڑن یاں بدلن دے بعد ایہ امید رکھی جاوے کہ ایہ خراب شدہ نظام سلامتی دا کارن بنے گا تے ساڈی حماقت توں علاوہ کجھ نہیں۔
میں عشریاں پہلے تونسہ شہر دے نیڑیوں تے منگروٹھہ دے نالوں گزردے ہوئے نالہ سنگھڑ نوں اپنی اکھاں نال ویکھیا اے۔ عام دناں وچ خشک رہن والا ایہ نالہ جو اصل وچ رودکوہی یعنی پہاڑاں توں آن والے بارشاں دے پانی دی گزرگاہ اے صرف بارشاں دے دناں وچ چلدا اے تے ایس علاقے وچ عموماً بارشاں بہت زیادہ شدت نال نہیں ہوندیاں پر ایہ گزرگاہواں حیران کن حد تک چوڑیاں سن۔ میں وی اودوں حیران ہویا سی کہ آخر ورھے وچ اک دو مہینے لئی چلن والا ایہ پہاڑی نالہ ایناں چوڑا کیوں اے؟ فیر اوس نالے وچ لگن والے بجری دے کرشرز تے تجاوزات نے اوہدا سارا حلیہ ای بدلا تے اوہدی گھٹو گھٹ استعداد نوں سامنے رکھ کے بنائے گئے پلاں نے اوہدے وچوں گزرن والے پانی دی استعداد نوں ہور گھٹ کر دتا تے سیلابی ریلے دی صورت وچ ایہناں پلاں پاروں پانی نہ صرف کنڈھیاں چوں نکل کے آبادیاں نوں اپنے نال روڑھ کے لے گیا سگوں نال ای پلاں نوں وی تباہ کردا گیا۔
تباہی اک دن وچ نہیں آندی۔ ایس ملک وچ جتھے ہر ادارہ تے ہر بندہ پلاٹاں دے پچھے اے تے ایہ لاوارث نالے’ رودکوہیاں تے دریا کیویں بچ سکدے سن؟ انج تے ایہ پانی دسے بناں آ گیا سی جے پہلے توں دس کے آندا تے یار لوکاں نے اوہدی آمد توں پہلاں حکم امتناعی لے لینا سی۔٭