سیلاب زدگان دے مصائب وزیراعظم تے آرمی چیف دیاں کاوشاں

اسلام آباد پاکستان دا دارالحکومت ای نہیں سب توں جدید خوبصورت ترین شہر وی اکھواندا اے۔ ایہنوں پاکستانی حکمراناں نے اپنے آرام تے عوامی ہنگامیاں توں دور رکھن لئی تعمیر کیتا۔ ایس توں پہلاںکراچی پاکستان دا پہلادارالحکومت سی جہڑا مہاجراں دی آمد مگروں اک گنجان آباد شہر بن گیا’ جتھے عوامی سیاسی شعور دی سطح وی ملک دے دوجے حصیاں توں ودھ اُچی سی۔ ایس لئی جمہوری غیر جمہوری حکمراناں نوں ایس جھنجھٹ توں بچان لئی اسلام آباد جئے پرسکون شہر نوںوسان دا پربندھ کیتا گیا مگر افسوس 40,30 ورھیاں مگروں ای ایہہ شہر وی عوامی ردعمل دی زد وچ آن لگیا جدوں اک مذہبی تنظیم نے اپنے مطالبات دے حق وچ اسلام آباد ول مارچ کیتا فیر اوہدے مگروں تے چل سو چل خاص طور تے عمران خان دے دھرنیاں تے جلوساں نے تے اسلام آباد دا کراچی سنے ملک دے دوجے شہراں توں فرق ای مٹا دتا۔ ہن جہدا دل کردا اے منہ چک کے چلو چلو اسلام آباد چلو داراگ الاپدا ہویا اسلام آباد دا رخ کر لیندا اے’ اوتھے دھرنا دیندا اے۔ ایس سلسلے وچ ڈی چوک نوں تے برطانیہ دے ہائیڈ پارک دا درجہ حاصل ہو گیا اے۔ ایس شہر نے ایوب خان’ یحییٰ خان’ ذوالفقار علی بھٹو’ بینظیر’ ضیا الحق’ نواز شریف’ مشرف تے عمران خان نوں حکمرانی کردے ویکھیا۔ اسلام آباد دے ایوان صدر تے وزیراعظم ہائوس نے غلام گردشاں وچ طاقتور حکمراناں دی دھاک ویکھی تے سازشی عناصر دے پیراں دی چاپ سنی۔
اج کل ایتھے ن لیگ دے وزیراعظم میاں شہباز شریف وزیراعظم ہائوس وچ جد کہ ایوان صدر وچ عارف علوی جہڑے پی ٹی آئی توں نیں’ براجمان نیں۔ میاں
شہباز شریف اک سخت گیر حکمران دی شہرت رکھدے نیں۔ اوہناں دی سخت تے ویلے تے مانیٹرنگ دے قصے اجے تک عوام نوں یاد نیں۔ اوہناں دے انداز سیاست نوں شہباز سپیڈ آکھ لوو یا طرز حکمرانی عوام وچ مقبول اے۔ جدوں اوہ وزیراعلیٰ سن چاراں صوبیاں وچ اوہناں دا طرز حکومت پسند کیتا جاندا تے باقی صوبیاں دے عوام وی پنجاب وانگوں حکومت دے سفنے ویکھدے سن۔ فیر کرنا ایہہ ہویا کہ عمران خان برسراقتدار آئے تے نہ رہے گا بانس نہ وجے گی بانسری دے مصداق سب کجھ بدل گیا۔ ویلے نے فیر پلٹا کھاہدا اج کل اقتدار دا ہما شہباز شریف دے سر اتے بیٹھیا اے۔ اوہ بطور وزیراعظم اسلام آباد وچ فروکش نیں مگر ایس واری اوہناں نے شہباز کرے پرواز لئی کھلی فضا میسر نہیں۔ اسلام آباد دے چاراں پاسے اوہناں دے مخالف عمران دے حامیاں تے اتحادیاں دی صوبائی حکومتاں نیں۔
ایہدے باوجود اوہناں دی کوشش اے کہ اوہ ملک دے تباہ حال معاشی نظام نوں درست کر دین۔ عرب ملک تے چین دے علاوہ تارکین وطن دی بھرویں امداد دے کارن معاشی حالت مضبوط ہوئی تے اک نواں امتحان درپیش سی۔ مون سون دی شدید بارشاں دی وجہ نال ملک دا اک تہائی رقبہ ایس ویلے شدید سیلاب دی لپیٹ وچ اے۔ ملک وچ قومی ایمرجنسی یعنی ہنگامی حالت نافذ اے مگر پانی اے کہ طوفان نوح وانگوں اُبل رہیا اے۔ لکھاں لوک بے گھر ہوئے نیں’ ہزاراں ہلاک ہو چکے’ ارباں دا نقصان ہویا’ کروڑاں دے لکھاں جانور مر گئے’ لوک کھان پین لئی محتاج ہو گئے نیں۔ ایسے نازک ویلے وچ وی میاں شہباز شریف اپنی بیماری دے باوجود ملک دے کونے کونے وچ متاثرین سیلاب دی دادرسی لئی اوہناں دی امداد لئی جاری سرگرمیاں دی نگرانی کرن پہنچ رہے نیں۔ ایس دے علاوہ پاک فوج وی ہمیشہ وانگوں چاراں صوبیاں تے گلگت بلتستان وچ دن رات مصروف عمل اے۔ ایہدے برعکس چاراں صوبیاں دی پی ٹی آئی دی قیادت اپنے قائد دے جلسے جلوساں نوں کامیاب بنان وچ سرگرداں نیں۔
ایس سیلاب وچ اک تہائی ملک پانی وچ ڈبیا ہویا اے۔ سیکڑاں ہلاکتاں ہو چکیاں نیں۔ متاثرین دی مدد لئی مسلح افواج جنرل قمر جاوید باجوہ دی سربراہی وچ انتہائی محنت کر رہیاں نیں۔ جنرل باجوہ ناصرف خود سیلاب زدگان دے دکھ مسائل اوہناں دے کول پہنچ کے سن رہے نیں بلکہ سارے کور کمانڈراں نوں وی متحرک کر رکھیا اے۔ حال ای وچ تعینات ہون والے کور کمانڈر کوئٹہ جنرل آصف غفور نے بلوچستان وچ بدترین سیلاب دی تباہ کاریاں دی بحالی لئی دن رات کم شروع کر رکھیا اے۔ جنرل آصف غفور تے بلوچستان دے وزیراعلیٰ عبدالقدوس بزنجو دی ورکنگ ریلیشن شپ وچ سیلاب زدگان دی بحالی دا کم جاری اے۔
شہباز شریف بلوچستان وچ سیلاب دی تباہ کاریاں توں خاصے پریشان نیں جد کہ دوجے پاسے وزیراعظم نوں انتہائی چیلنجاں دا سامنا اے۔ اک پاسے ملک وچ سیلاب دی تباہ کاریاں توں رعایا نوں درپیش مشکلاں تے دوجے پاسے معیشت دی بحالی تے ملک نوں ڈیفالٹ ہون توں بچان دا انتہائی سخت سامنا اے۔ مشکل دی ایس گھڑی وچ جدوں شہباز شریف دا دل خون دے آنسو رو رہیا اے قیمتی جاناں دا ضیاع عوام دے مال مویشی گھراں دی بربادی عوام روٹی لئی ترس رہے نیں۔ عین اوسے ویلے اپوزیشن بھرویں سیاست کر رہی اے۔ عمران خان نوں حکومت بارہا درخواست کر رہی اے کہ آئو رل کے ملک تے عوام نوں ایس مشکل توں کڈئیے مگر اوہ سرکاری اخراجات دے ذریعے جلسے جلوساں دا انعقاد کر کے ملک وچ ہور افراتفری پھیلا رہے نیں۔ وزیراعلیٰ پنجاب چودھری پرویزالٰہی تے اک نیک دل منجھے ہوئے عوام دے دکھ درد دا مداوا کرن والے سیاست دان نیں۔ اوہناں نوں خان صاحب نوں سمجھانا چاہید ااے کہ مشکل دی ایس گھڑی وچ پارٹی نوں متاثرین دے ریلیف لئی امداد تے بحالی دا ٹاسک سونپیا جاوے۔
میں اج کل وفاقی دارالحکومت وچ پڑائو پائے بیٹھیا آں۔ مختلف حکومتی محکمیاں دے افسراں نال ملاقاتاں دے علاوہ سیاستداناں نال وی ملاقاتاں جاری نیں۔ وزیراعظم میاں شہباز شریف نے سارے محکمیاں نوں ہدایت کر رکھی اے کہ اوہ اپنے اپنے لیول تے سیلاب زدگان دی مدد دے پروگرام ترتیب دین۔ ایسے طرح محکمہ اطلاعات نوں وی ہدایات ملیاں نیں کہ اوہ وی ایہدے وچ اپنا حصہ پان۔ جہدے تے وزیر اطلاعات مریم اورنگزیب نے سیکرٹری اطلاعات شاہیرا شاہد دی سربراہی وچ اک کمیٹی تشکیل دے دتی۔ محترمہ شاہیرا شاہد اپنے سارے افسراں نوں سیلاب زدگان دی امداد توں لے کے اوہناں دی مدد لئی مخیر حضرات تے اداریاں نوں متحرک کرن داجامع پروگرام تشکیل دتا اے۔ سیکرٹری اطلاعات و نشریات محترمہ شاہیرا شاہد دی مضبوط ٹیم جہدے وچ طاہر حسن’ سہیل علی خان’ مبشر حسن’ رئیسہ عادل اورنگزیب ہرل شامل نیں سیلاب زدگان دی بہتری لئی بھرویں خدمات انجام دے رہے نیں۔ وفاق دے ماتحت ایسے بہت سارے محکمے نیں جہناں دے کول ارباں روپے دے بجٹ موجود نیں۔ اوہناں دے مقابلے وچ محکمہ اطلاعات دے کول اونٹ دے منہ وچ زیرہ برابر بجٹ اے جہڑا اوہناں دی اپنی ضروریات لئی وی ناکافی اے مگر وزیراعظم دی ہدایات اتے صرف وفاقی محکمہ اطلاعات و نشریات ای دیانتداری نال ملک و قوم دی خدمت کرن وچ دن رات مصروف عمل اے۔ محترمہ شاہیرا شاہد تے دوجے افسران اپنے ذاتی اثرو رسوخ استعمال کر کے ناصرف معیشت دی بحالی دی جدوجہد نوں اگے ودھا رہے نیں بلکہ اوورسیز پاکستانیاں وچ ایہنوں چنگے طریقے نال پیش کر کے اپنی پروفیشنل خدمات انجام دے رہے نیں۔ ویسے وزیراعظم شہباز شریف نوں تجویز مناسب لگے تے اوہ سیلاب زدگان دی بہتری تے متاثرین لئی امدادی کماں وچ ودھ چڑھ کے حصہ لین والے سرکاری اداریاں اتے مشتمل وزیراعظم سیکرٹریٹ وچ مانیٹرنگ سیل قائم کرن تاں جے چنگی کارکردگی وکھان والے افسران تے محکمیاں نوں تعریفی سرٹیفکیٹس دتے جان۔ تاہم چنگی خبر ایہہ اے کہ سہیل علی خان نوں وفاقی حکومت نے تالاب توں کڈ کے دریا وچ لیان دا خوش کن اقدام کیتا اے۔ اوہناں دی پیشہ وارانہ صلاحیتاں دے پیش نظر اوہناں نوں ای ڈی پی ٹی وی دا چارج وی سونپیا گیا اے۔ اوہناں دے ایڈیشنل سیکرٹری اطلاعات و نشریات تقرر نال میڈم شاہیرا شاہد دی ٹیم ہور مضبوط ہووے گی۔ ریڈیو ٹی وی وچ موجود سقم نوں وی ٹھیک کرن دا موقع ملے گا تے انفارمیشن ڈیپارٹمنٹ وزیراعظم شہباز شریف’ وفاقی کابینہ دی حقیقی ترجمانی کر کے ملک و قوم لئی بہتر خدمات انجام دے سکے گا۔وزیراعظم سیکرٹریٹ وچ انفارمیشن گروپ دی گریڈ اکیس دی اک سیٹ تاحال خالی پئی اے جہدے اتے پریس سیکرٹری ٹو وزیراعظم تعیناتی دا ازسر نو نوٹس لینا چاہیدا اے تاں جے حکومتی کارکردگی ہور اجاگر کیتی جا سکے۔ ایس دوران ملک و قوم دا شکر گزار آں کہ گلگت بلتستان وچ سیلابی ایمرجنسی ختم ہون تے نقصانات دے ازالے لئی سروے شروع کردتا گیا اے۔ جی بی دے چیف سیکرٹری محی الدین وانی تے اوہناں دی ٹیم سیلاب وچ قابل تعریف کارکردگی اتے مبارکباد دے مستحق نیں۔ مصیبت توں نکلن مگروں گلگت بلتستان وچ تریخ وچ پہلی واری زنانیاں دے سپورٹس گالا دا انعقاد کیتا گیا اے جہدی دوجے صوبیاں نوں وی تقلیدکرنی چاہیدی اے۔