گلاں نہیں، کردار نال اپنا آپ منوائو

عسکری قیادت دی تقرری نوں چوپال وچ زیر بحث لیانا دانشمندی نہیں کیوں جے ایسے فیصلے کسی دی عوامی مقبولیت ویکھ کے نہیں حالات تے اہلیت و صلاحیت نوں مدنظر رکھ کے کیتے جاندے نیں۔ بدقسمتی نال پاکستان وچ جدوں وی نویں عسکری قیادت دی تقرری دا موقع آندا اے تے ملک وچ زلزلے جئی کیفیت پیدا ہو جاندی اے۔ ایس روایت دی ستائش نہیں کیتی جا سکدی۔ بہتر ایہہ اے کہ سیاسی قیادت حدودو قیود توں تجاوز تے ہر جگہ مداخلت کرن دی بجائے ذمہ داریاں تک محدود رہوے۔ ایسے حالات وچ جدوں ملک دا تہائی حصہ پانی وچ ڈُبیا ہویا اے تے حکومت اقوام عالم کولوں امداد دی التجا کر رہی اے۔ ملک دے مقبول رہنما عمران خان دا بھرے جلسے وچ ایہہ کہنا کہ زرداری تے نواز تگڑے محب وطن آرمی چیف کولوں ڈردے نیں۔ کسے طور مناسب نہیں۔ ایہدے وچ ابہام نہیں رہیا کہ نومبر وچ عسکری قیادت تبدیل ہون والی اے تے موجودہ عسکری سربراہ ہور عرصہ عہدہ اتے رہن دے خواہشمند نہیں بلکہ باعزت طور تے ہن رخصت دے خواہاںنیں۔ نویں حساس تقرری لئی ہدایات جاری کرنا تے غیر ذمہ دارانہ بیان تے تبصرے توں عمران خان دی عزت و وقار وچ وادھا نہیں ہویا۔ چیف جسٹس اسلام آباد ہائیکورٹ’ ڈی جی آئی ایس پی آر توں لے کے سیاسی قیادت نے غیر ذمہ دارانہ بیان بازی نوں محسوس کردے ہوئے ناپسندیدگی ظاہر کیتی اے۔ پی ڈی ایم دے اوہ رہنما جہڑے قبل ازیں عسکری قیادت اتے تنقید کر چکے نیں۔ اوہناں نوں وی بیان نوں غیر ذمہ دارانہ کہن دا موقع ملیا اے۔ ملک بھر توں منفی ردعمل آن دی بنا تے ہن واقفان حلقیاں دا آکھنا اے کہ عمران خان اپنے بیان اتے ثابت قدم رہن دے بجائے پھرن نوں آمادہ اے مگر گل ایہہ اے کہ بولن توں پہلاں سوچن دی زحمت کرن سنے جے قول و فعل دے تضاد نوں دور کر لوو تے بار بار شرمندگی دا سامنا نہ کرنا پوے۔
عسکری سربراہ دی تقرری داختمی اختیار وزیراعظم دی صوابدید اے۔ ایہہ استحقاق اوہناں نوں ملک دا آئین دیندا اے۔ 15 اگست نوں اک ٹی وی انٹرویو وچ ایس حوالے نال دریافت کیتے گئے اک سوال دا جواب دیندے ہوئے خود عمران خان نے آکھیا کہ ایہہ میرا مسئلہ نہیں بلکہ ایہہ فیصلہ حکومت نے کرنا اے ہن اچانک معینہ مدت توں پہلاں حکومت ولوں انتخابی عمل ول جان توں گریز کرنا آرمی چیف دی تقرری نال جوڑ کے اوہناں نے چنگا تاثر نہیں دتا۔ ماضی وچ اک توں ودھ حکمراناں تے سیاستداناں نے آرمی چیف دے منصب اتے مفلفوف تے محتاط ایسے انداز وچ گل کیتی تاں جے منصب دے احترام وچ کمی نہ آوے۔ ایسے احتیاط دی بنا تے زیادہ تر اشارے کنائے وچ گل کرن دی کوشش کیتی گئی لیکن عمران خان نے پرویز مشرف دے دتے این آر او دا حوالہ دے کے ایس انتہائی اہم منصب اتے نومبر وچ ہون والی تقرری نوں متنازعہ بنان دی کوشش کیتی اے جہدے تے ہر مکتبہ فکر ولوں تشویش دا اظہار کیتا جا رہیا اے۔ سوشل میڈیا جتھے ہمیشہ عمران خان دی طرفداری دا رجحان ویکھن وچ آندا اے پہلی واری ناراضگی تے برہمی ویکھن وچ آئی اے مگر کیہ اوہ مستقبل وچ گل کردے ہوئے محتاط رویہ اختیار کرن گے؟ ایہدا حتمی طور تے ہاں وچ جواب دینا اوکھا اے کیوں جے جدوں اوہ مائیک اتے آندے نیں تے بے تکان تے بغیر سوچے سمجھے گل کردے نیں اپنی گل نوں طول دین تے پراثر بنان لئی ایسے حوالے دیندے نیں جہڑے کئی واری غلط ثابت ہو چکے نیں۔ جرمنی تے جاپان نوں ہمسایہ ملک کہنا تے تقسیم ہند ویلے پاکستان دی آبادی 40کروڑ کہن پاروں عوام نوں چنگا تاثر نہیں گیا بلکہ گفتار توں جہنا اوہ اپنا سیاسی قد تے کردار ودھان دی کوشش وچ نیں۔ ایہناں کوششاں دے توقع دے منافی نتائج سامنے آ رہے نیں۔ بہتر ایہہ اے کہ ملک دے مقبول ترین رہنما ہون دے ناطے یا تے سوچ سمجھ کے گل کیتا کرن۔ جے خطاب نوں طول دینا ضروری اے تے کسے کولوں درست حوالے پتہ کر لیا کرن، جے انج ممکن نہیں تے جہنا پتہ اے اوہ اختصار تے جامع لفظاں دے نال دسیا کرن تاں جے بار بار جگ ہنسائی نہ ہووے۔
پچھلے وزیراعظم دے منصب اتے فائز رہن والے مقبول رہنما نوں غیر ذمہ دارانہ طرز عمل زیب نہیں دیندا۔ ایہناں نوں مقبولیت دے زعم دے نال ہن ذمہ داریاں دا وی احساس کرناچاہیدا اے۔ بے باکی چنگی گل اے لیکن غیر ذمہ دارانہ طرزعمل دی تائید یا حوصلہ افزائی نہیں کیتی جا سکدی۔ جے گفتار نال کردار منوایا جا سکدا تے اج سارے باتونی لوگ دنیا دی رہنمائی کر رہے ہوندے۔ ماضی وچ عمران خان کئی واری ایسی گلاں کرچکے نیں جہناں دا منفی ردعمل آن تے اوہناں نوں اپنے موقف توں پچھے ہٹنا پیا اے لیکن اوہ تے یوٹرن نوں وی خوبی دَسن لگے نیں ۔ انج لگدا اے اوہناں نے نہ تے بار بار ہون والی شرمندگی توں کجھ سکھیا اے تے نہ ای مستقبل وچ اوہ ایسی کسے شرمندگی توں بچن دے خواہاں نیں۔ سری لنکا دے دورے دے اختتام اتے میزبان صدر کولوں مہنگائی گھٹ کرن دے گر سکھن دا انکشاف کردے ہوئے وطن واپس جا کے عمل کرن دا عزم ظاہر کیتا مگر سیاسی عدم استحکام آن مگروں اوسے سری لنکن صدر نوں لیہ دے جلسے وچ نہ صرف چور آکھ دتا بلکہ متشدد مظاہریاں مگروں جان بچا کے نسدے ہوئے ائیرپورٹ اتے روکن دے واقعہ دی تفصیل سناندے ہوئے مذاق اڈایا۔ ایسے طرح بھارت وچ عام انتخابات دے دوران نریندر مودی دی کامیابی نوں مسئلہ کشمیر دے حل لئی ناگزیر قرار دیندے ہوئے تعاون دا عندیہ دتا فیر ٹیلیفون اتے گل نہ کرن اتے تنقید کردے وکھائی دتے جدوں اک متنازعہ تے یکطرفہ فیصلے توں کشمیر نوں بھارت نے ضم کر لیا تے عمران خان نے سفارتی تعلقات محدود کرن اتے اکتفا کیتا۔ آکھن دا مطلب ایہہ اے کہ رہنما سطحی سوچ نہیں رکھدے بلکہ اوہ اپنے فیصلیاں توں ایسے انداز وچ کردار منواندے نیں جہدے مگروں اوہناں نوں تصدیق لئی گفتار وچ قصے تے کہانیاں سنان دی لوڑ نہیں رہندی۔
وعدیاں دے حوالے نال اوہ گفتار وچ ایسا بہت کجھ کہہ چکے نیں جہدے تے حکومت وچ ہوندے ہوئے عملدرآمد نہ کر سکے۔قرضہ لین توں اجتناب دے وعدے کیتے مگر جیویں حکومت ملی تے چین’ سعودی عرب’ امارات تے آئی ایم ایف سنے کئی دوجے ملکاں تے عالمی اداریاں توں بخوشی قرض لیتا۔ بجلی’ گیس تے پٹرول سستے کرن دا وی کوئی وعدہ پورا نہیں کر سکے۔ ہالینڈ دے وزیراعظم وانگوں سائیکل اتے دفتر جان دا وعدہ وی چار سال دے اقتدار وچ ایفا نہیں ہو سکیا۔ وزیراعظم ہائوس تے گورنر ہائوس وی اج تک پوری شان و شوکت نال موجود نیں حالانکہ اک توں ودھ واری اوہناں نے ایہناں عمارتاں نوں تعلیمی اداریاں وچ بدلن دا وعدہ کیتا۔ ڈالر دی قیمت نوں ودھن توں روکن وچ وی وی نکام رہے۔ احتساب دے ذریعے لٹیریاں کولوں دو سو ارب ڈالر واپس لیان دا وعدہ وی ہنوز تشنہ تکمیل اے۔ ایس توں پہلاں جہناں اداریاں دی غیر جانبدار ہون تے تعریف کردے رہے۔ ہن ایہناں دی غیر جانبداری نوں اوہ ہدف بنا رہے نیں۔ سوال ایہہ اے کہ اوہ کہڑے عوامل نیں جہڑے اوہناں نوں گرجن تے اُکساندے نیں؟ ایس سوال دا جواب تلاش کرنا بوہتا اوکھا نہیں۔ دراصل وڈے وڈے اجتماع ویکھ کے عمران خان نوں آمدہ عام انتخابات وچ تحریک انصاف دی دو تہائی اکثریت نال کامیابی دا یقین ہو گیا اے لیکن دوبارہ اقتدار وچ آن توں پہلاں اوہ ایسے حالات بنان دے خواہشمند نیں کہ ہر ادارہ کسی ردوقد اوہناں دے احکامات دی تعمیل وچ ای عافیت جانے۔ ایہہ سدھی سادی بائو پان تے زیرنگین لیان دی دانستہ کوشش اے مگر ایس رویے دے سیاسی نتائج نقصان دہ ہو سکدے نیں کیوں جے اداریاں دا ذمہ داریاں چھڈ کے کسی دے اگے کورنش بجا لیانا ناممکن اے ایس لئی بہتر ایہو اے کہ گفتار نال کردار منوان دی بجائے ایسا طرزعمل ا ختیار کرن جہدے توں عوام تے اداریاں دا اوہناں اتے اعتماد ودھے جے انج نہیں کردے تے کسے خوش فہمی وچ نہ رہن۔ سیاسی خسارے دا سامنا ہونا یقینی اے۔