وڈے لوکاں سیلاب زدگان لئی کیہ کیتا؟

جان ڈی راک فیلر کدی دنیا دا امیر ترین بندہ سی۔ ایہ بندہ دنیا دا پہلا ارب پتی سی تے دنیا داگھٹ عمر دا ارب پتی بندہ سی۔ کامیابی نے ہمیشہ ایس بندے دے قدم چمے۔ نکامی دا لفظ ایس بندے دی زندگی دی ڈکشنری وچ نہیں سی۔ 25 ورھے دی عمر وچ ایہنے امریکہ دی سب توں وڈی آئل ریفائنریاں وچوں اک نوں کنٹرول کیتا۔ 31 سال دی عمر وچ اوہ دنیا دا سب توں وڈا تیل صاف کرن والا بن گیا سی۔ 38 ورھے دی عمر وچ ایہنے امریکہ وچ 90فیصد تیل نوں صاف کیتا۔ 1950ء تک اوہ ملک دا سب توں امیر بندہ سی۔ اک نوجوان دے طور تے ہر فیصلہ’ رویہ تے رشتہ اوہدی ذاتی طاقت تے دولت پیدا کرن لئی تیار کیتا گیا سی پر 53 ورھے دی عمر وچ اوہ بیمار ہو گیا۔ اوہدا پورا جسم درد نال کنب گیا تے اوہدے سارے وال جھڑ گئے۔ مکمل اذیت وچ دنیا دا واحد ارب پتی اپنی مرضی دے مطابق کجھ وی نہیں سی خرید سکدا پر اوہ صرف سوپ تے کریکر ہضم کر سکدا سی۔ اک ساتھی نے لکھیا’ اوہ سوں نہیں سی سکدا’ ہس نہیں سی سکدا تے زندگی وچ کوئی وی چیز اوہدے لئی کوئی معنی نہیں سی رکھدی۔ اوہدے ذاتی’ انتہائی ماہر ڈاکٹراں نے پیش گوئی کیتی سی کہ اوہ اک ورھے دے اندر مر جاوے گا۔ اوہ سال اذیت نال ہولی ہولی گزر گیا جدوں اوہ موت دے نیڑے اپڑیا تے اوہ اک صبح ایس مبہم احساس دے نال جاگیا کہ اوہ اپنی دولت وچوں کجھ وی اپنے نال اگلے جہان لے جان دے قابل نہیں اوہ بندہ جہڑا کاروباری دنیا نوں کنٹرول کر سکدا سی اچانک احساس ہویا کہ اوہدی اپنی زندگی اوہدے کنٹرول وچ نہیں۔ اوہدے کول اک انتخاب رہ گیا سی اوہنے اپنے اٹارنی’ اکائونٹنٹ تے منیجراں نوں سدیا تے اعلان کیتا کہ اوہ اپنے اثاثیاں نوں ہسپتالاں’ تحقیق تے خیراتی کماں وچ منتقل کرنا چاہندا اے۔
جان ڈی راک فیلر نے اپنی فائونڈیشن قائم کیتی۔ ایہ نویں سمت بالآخر پینسلین دی دریافت دا کارن بنی۔ ملیریا’ تپ دق تے خناق دا علاج پر شاید راک فیلر دی کہانی دا سب توں حیرت انگیز حصہ ایہہ وے کہ جس لمحے اوہنے اپنی کمائی ہوئی ساریاں چیزاں دا اک حصہ واپس دینا شروع کیتا اوہدے جسم دی کیمسٹری وچ اینی نمایاں تبدیلی آندی گئی کہ اوہ بہتر توں بہتر ہوندا گیا۔ اک وقت سی کہ انج لگدا سی اوہ 53 ورھے دی عمر وچ ای مر جاوے گا پر اوہ 98 ورھے دی عمر تک زندہ رہیا۔ مال خیرات کرن نال اوہ تندرست ہو گیا گویا ایہ خیرات ناں دی چیز وی اک طریقہ علاج اے’ ایہنوں وی آزما کے ویکھ لوو۔
اپنی موت توں پہلاں اوہنے اپنی ڈائری وچ لکھیا’ سپریم انرجی نے مینوں سکھایا کہ سب کجھ اوہدا اے تے میں اوہدی خواہشات دی تعمیل کرن لئی صرف اک چینل آں۔ میری زندگی اک طویل’ خوشگوار چھٹی رہی’ کم تے کھیڈ توں بھرپور میں پریشانی نوں راہ وچ چھڈ دتا ہن میں سی تے میرا خدا سی’ میرے لئی ہر دن چنگا سی پاکستان تے جدوں وی اوکھا ویلا آیا’ غریب لوکاں نے بڑھ چڑھ کے حصہ لیا’ مسئلہ قرض اتارو’ ملک سنوارو دا ہووے’ مسئلہ سیلاب زدگان دا ہووے’ مسئلہ کسے وبائی مرض دا ہووے’ مسئلہ کرونا دا ہووے’ مسئلہ ڈیم دی فنڈ ریزنگ دا ہووے’ مسئلہ زلزلہ زدگان دا ایس ملک دے لوکاں نے بڑھ چڑھ کے حصہ لیا تے ہم نفساں دی بھرویں مدد کیتی۔ اوہناں دے دکھ تے درد نوں اپنا دکھ درد سمجھیا۔ اوہناں دی بھکھ تے پیاس نوں اپنی بھکھ پیاس سمجھیا۔ اوہناں نوں سہارا دین دی کوئی کسر باقی نہیں چھڈی۔ حالیہ سیلاب دی صورتحال تہاڈے سامنے اے۔ پاکستانی لوکاں نے دل کھول کے عطیات دان کیتے۔ بیرون ملک وچ رہندے مسلماناں نے سیلاب زدگان د ی مدد کیتی۔ پر افسوس ایس گل دا اے کہ ملک وچ جاگیرداراں’ سرمایہ داراں’ سیاستداناں’ بیورو کریٹاں تے ملک ریاض ورگے پراپرٹی ٹائیکون دی کوئی کمی نہیں۔ ملک ریاض تے کجھ سیاستدان تے کھڑے کھڑے ایس ملک نوں خرید کے ایس غریب لوکاں دے دنیاوی آقا بن سکدے نیں؟ پر کسے نے دل کھول کے اوہناں لئی کجھ نہیں کیتا؟ ملک ریاض’ آصف علی زرداری’ شریف برادران’ چوہدری برادران ای اینے لوکاں نوں سنبھالا دے سکدے سن۔ ساڈے سرمایہ دار’ جاگیردار اوہناں دے مسیحا بن سکدے سی پر ایہناں دی مثال اوس امام مسجد ورگی جو مقتدریاں تے پنڈ توں مسجد دی خدمت دا بار بار اعلان کردا اے پر آپ اوہنے مسجد دی کدی خدمت نہیں کیتی۔ ایہو حال ساڈے ملک دے آقاواں دا اے۔ ایہ ایہناں لوکاں دی بدنیتی’ بے ایمانی’ کرپشن تے لٹ دا نتیجہ اے کہ اج لوک ایس حال نوں اپڑے ہوئے نیں۔ لوکاں دی ایس کسمپرسی دی ذمہ داری حکمراناں دے سر جاندی اے جہناں نے ایس ملک لئی کوئی منصوبہ سازی کیتی تے نہ ای آئین دی پاسداری کرائی جے سیاسی صورتحال دی بدتری تے معاشی غنڈیاں دی اجارہ داری انج ای قائم رہی تے آن والیاں نسلاں روٹی دے ٹکڑے نوں ترسن گئیاں پر ایہناں نوں اک گل یاد رکھنی ہووے گی کہ موت اک اٹل حقیقت اے تے اکائونٹ وچ پئے ارباں ڈالر روپیے بے سود ہون گے۔ روئے زمین تے پئے ہزاراں ایکڑ کسے ہور دی ملکیت ہون گے۔ اللہ دا ناں ای ہمیشہ ای رہن والا اے تے ہمیشہ رہوے گا: بقول غالب
درد ہو دل میں تو دوا کیجیے
دل ہی جب درد ہو تو کیا کیجیے