ہنگامی طور تے فنی تربیت دی ترویج کرو

علم حاصل کرن نال علمیت’ لیاقت تے قابلیت پیدا ہوندی اے۔ نتیجتاً ہم عصراں وچ انفرادیت تے ممتاز حیثیت کنفرم ہو جاندی اے جد کہ فنی تربیت انسان دے اندر لکی صلاحیتاں نوں بروئے کار لیاندے ہوئے اوہنوں باعزت روزگار کمان دے قابل بناندی اے تاں جے اوہ معاشی طور تے خوشحال زندگی بسر کرسکے۔ قارئین تریخ گواہ اے کہ جہناں ملکاں نے فنی تعلیم نوں اپنی بنیادی تعلیم دا حصہ بنایا اوتھے معاشی ترقی دی رفتار بہت زیادہ اے۔ پاکستان دے پچھلے صدر جنرل ضیا الحق جاپان دے سرکاری دورے اتے گئے تے اوہناں نے اوتھے دی حیرت انگیز ترقی توں متاثر ہو کے جاپانیاں کولوں اوہناں دی ترقی دا راز پچھیا۔ جاپانی ترجمان نے واضح کیتا کہ پنجویں تے چھیویں صدی عیسوی دے دوران کجھ جاپانی ساڈے پنج سو کلومیٹر سمندری سفر کر کے چین پہنچے۔ چین دے فنی ماہر استاداں کولوں ہنر دی نزاکتاں’ باریکیاں تے نفاست سکھی تے جدید ٹیکنالوجی دی تعلیم مغرب توں حاصل کیتی۔ا یس طرح اوہ دونویں علوم دے امتزاج توں ہنرمندی دی انتہائی بلندیاں تک پہنچے۔ جاپانیاں دی فنی تعلیم دے کارن برق رفتار ترقی تے اک سائیڈ تے رہی ساڈے ایتھے ایہہ تاثر پایا جاندا اے کہ تعلیم ہر مسئلہ دا حل اے لیکن کڑوا سچ تاں ایہہ اے کہ تعلیم یافتہ بیروزگار نوجواناں نوں ویکھ کے نویں نسل تعلیم توں اکتان لگی اے۔ چینی زبان وچ اک مثال اے کہ بندے نوں مچھی نہ دیو بلکہ اوہنوں مچھی پھڑنا سکھائو۔ ایس توں اوہ خود کفیل ہووے گا۔ ساڈے لئی سب توں وڈی عبرت سری لنکا اے کہ جہدے وچ 98 فیصد شرح خواندگی اے مگر فیر وی بیروزگاری’ پسماندگی نے اوس ملک نوں آکٹوپس وانگوں جکڑیا ہویا اے۔ وجہ صرف اک اے کہ اوہناں نے عمومی تعلیم دے نال فنی تعلیم نوں یکسر فراموش کر دتا۔ قائد ملت محمد علی جناح نے قیام پاکستان مگروں فنی تربیت وچ مہارت حاصل کرن تے شدید زور دتا تاں جے ملک دی معاشی حالت دے مستقبل نوں مضبوط بنایا جا سکے۔ بدقسمتی تاں ایہہ اے کہ پاکستانی قوم بدترین معاشی حالات توں دلبرداشتہ ہو کے فارغ البالی نوں اپنا وطیرہ بنا چکی اے۔ لہٰذا ویلے دی دکھدی رگ اتے ہتھ رکھدے ہوئے اوہناں نوں دلچسپ امور ول موڑنا ہووے گا۔ میرے نزدیک فنی تربیت توں بہتر کوئی ہور حل نہیں ہو سکدا۔
یقین کرو کہ فنی تربیت دے شعبے اتے توجہ دین نال نہ صرف اندرون ملک روزگار دے موقعے ودھ سکدے نیں بلکہ اوہدے فروغ نال اسیں بیش قیمت زرمبادلہ کما سکنے آں جہڑا ساڈے ملک نوں ترقی دی راہ اتے گامزن کرن وچ معاون ثابت ہو سکدا اے۔ اج پاکستان نوں درپیش چیلنجاںوچوں اک بیروزگاری اے۔ مزید برآں ایہہ کہ کلائمیٹ چینج دے نتیجے وچ سیلاب دی تباہ کاریاں کسے کولوں لکیاں نہیں۔
انٹرنیشنل میڈیا اتے چہ مگوئیاں ہو رہیاں نیں کہ پاکستان نوں ہن 2025 تک شدید قحط سالی دا سامنا کرنا پے سکدا اے۔ عوام الناس وچوں کثیر تعداد دی جمع پونجی’ کھڑی فصلاں’ مویشی سب بہہ گئے۔ سیلاب زدگان بے یارومددگار کھلے اسمان تھلے سسک سسک کے جی رہے نیں۔ کیہ تسیں سوچیا اے جدوں سیلاب دا پانی اتر جاوے گا تے بیروزگاری دا گراف کس حد تک ہووے گا۔ اوہ لوک جہڑے اپنا مال و متاع گوا بیٹھے نیں اوہ بالاں دی کفالت کیویں کرن گے۔ یاد رکھو کہ نوجوان نسل جو کسے وی ملک دی سب توں وڈی طاقت ہوندی اے۔ مایوسی تے کم ہمتی دا شکار ہو کے مستقبل دے معمار ایسی سرگرمیاں تے ایسے عناصر دے ہتھے چڑھ جاندے نیں جہڑے ملک وچ معاشی وگاڑ دا موجب بندے نیں۔ بدقسمتی نال عمومی تعلیم دے اداریاں دے مقابل فنی تربیت دے اداریاں دی تعداد آٹے وچ نمک دے برابر ہون دی وجہ نال طلبہ تے طالبات دی تعداد وچ ہر سال بتدریج کمی ہو رہی اے۔ ایہو وجہ اے کہ اج وی والدین اپنے بالاں نوں بچپن توں ای ڈاکٹر’ انجینئر بنان دے سفنے ویکھن تک ای محدود نیں۔ اوہناں نوں ٹیکنیکل بنان دا کوئی نہیں سوچدا۔ معاشرے وچ فرسٹریشن دی جڑ ای بیکار تے فارغ رہنا اے۔ لوڑ ایس امر دی اے کہ صنعتی شعبے نوں تعلیمی اداریاں دے نال براہ راست جوڑیا جاوے۔ نجی سیکٹر اپنے تئیں آپ ایہہ فریضہ سرانجام دے رہیا اے لیکن جدوں تک حکومت دی شراکت داری تے سرپرستی نجی سیکٹر دے نال نہ ہووے ایس سلسلے نوں کامیاب نہیں بنایا جا سکدا۔ حکومتی سطح اتے تکنیکی کورسز تے تربیتی ورکشاپ دا پربندھ ہر سطح اتے بے حد ضروری ہو چکیا اے۔ ہنگامی بنیاداں اتے نوجواناں نوں فنی تعلیم جئے تھری ڈی ڈیزائننگ’ فیشن ڈیزائننگ’ الیکٹریکل اپلائنسز’ موبائل ریپئرنگ تے سافٹ ویئر ڈویلپمنٹ جئے کورساں ول راغب کرنا بہت ضروری اے۔ نیز ٹیکنالوجی تے مارکیٹ دی ضروریات دے مطابق مختلف فنون و شعبہ جات وچ ٹریننگ دے کے پیش آمدہ بیروزگاری نال جڑے مسائل اتے قابو پایا جا سکدا اے۔ ارباب اختیار نوں استدعا اے کہ سیلاب نال بیروزگاری تے اوہدے نال ملحقہ کسی وڈے المیے اتے ویلے توں پہلاں قابو پان لئی ایمرجنسی طور تے روزگار فنی تربیت دے مرکز قائم کرن دی منظوری دتی جاوے تاں جے اقوام عالم دے سامنے ساڈی مینجمنٹ ”ہن پچھتائے کیاہوت جب چڑیاں چگ گئیں کھیت ”والی مثال نہ بنے۔