اللہ دا عذاب کیوں آندا اے؟

خالد مسعود خاں

روزانہ دی بنیاد تے گھٹ ہوئی قوت برداشت تے تحمل و بردباری دی ڈگدی ہوئی صورتحال پاروں ہن ایہ لکھدے ہوئے وی متوقع فتویاں توں ڈر محسوس ہوندا اے کہ حالیہ بارشاں دے نتیجے وچ آن والے سیلاب دے بارے اللہ تعالیٰ دے عذاب دی جے ٹھیک تشریح کیتی جاوے کہ ساڈے تے اللہ تعالیٰ دا ایہ عذاب ساڈیاں مسلسل نالائقیاں’ نااہلیاں تے بے ایمانیاں دے پاروں آیا اے تے ایہناں ساریاں چیزاں دا تعلق ساڈی نماز’ روزہ’ حج’ زکوٰة تے دوجیاں عبادتاں نال نہیں سگوں مسلسل اکھاں بند کرکے بیٹھے رہن نال اے۔ دریاواں تے ندی نالیاں تے تجاوزات نال اے۔ پانی لئی اللہ دے بنائے ہوئے قدرتی راہواں وچ رکاوٹاں کھڑیاں کرن نال اے تے پانی نوں ذخیرہ کرن لئی دنیا بھر وچ ایس قسم دی صورتحال دے مستقل حل لئی بنائے جان والے ڈیماں توں نظراں چران پاروں اے۔ دنیا بھر وچ سیلاباں تے بارشاں دے پانی نوں ریلیاں دی صورت تباہی مچان توں روکن دا مستقل حل ایس پانی نوں ذخیرہ کر کے کڈھیا جاندا اے۔ پانی نوں ذخیرہ کرن یعنی ڈیم بنان دی ایہ تکنیک ای ایس تباہی تے بربادی نوں روکن دا واحد لانگ ٹرم حل اے۔ ڈیم تن بنیادی کم سرانجام دیندا اے پہلا تے ایہ کہ فالتو تے نقصان د ہ سیلابی پانی نوں آبادیاں تباہ کرن دی آزادی دین دی تھاں اوہنوں ذخیرہ کر کے پابند کر دتا جاندا اے۔ دوجا کم ایہہ وے کہ ایہ پانی جو عام حالات وچ پہلے تباہی پھیلاندا اے تے ایہدے بعد سمندر وچ ڈگ کے ضائع ہو جاندا اے۔ ایس پانی نوں اوہناں دناں وچ کم وچ لیایا جاندا اے جہناں دناں ایہدی کمی ہوندی اے جیویں ساڈے ایتھے سردیاں وچ دریاواں دا پانی بہت ای گھٹ رہ جاندا اے۔ تریجا فائدہ ایہہ وے کہ ایہدے نال دنیا دی سستی ترین بجلی یعنی ہائیڈل پاور حاصل کیتی جاندی اے۔
کالاباغ ڈیم دے مخالفین ایہدی تعمیر دے خلاف جو سب توں وڈی دلیل دیندے سن اوہ ایہ سی کہ جے ایہ ڈیم بن گیا تے ایہدے نال نوشہرہ’ پبی’ مردان تے چارسدہ شہر ڈب جان گے۔ ڈبے تے اوہ ہن وی نیں پر ڈیم بنن پاروں نہیں سگوں ڈیم نہ بنن پاروں ڈبے نیں۔ جے اپ سٹریم ڈیم بن گئے ہوندے تے ایہ سیلابی ریلے آبادیاں نوں تباہ و برباد کرن دی تھاں سردیاں وچ ملک دی آبپاشی دی لوڑ پوری کرن دے کم آندے۔ پر مصیبت ایہہ وے کہ ساڈے ایتھے ڈیم سیاست تے سازش دا شکار ہو کے رہ گئے نیں۔
پاکستان وچ حالیہ غیرمعمولی بارشاں تے موسم دی تبدیلیاں پاروں گلیشیرز توں آن والے پانی نال جو تباہ کن سیلاب دی صورتحال پیش آئی اے اوہدے بارے جس صاحب علم نال گل کیتی اوہ ایہدا واحد مستقل تے پکا حل صرف ڈیم ای دسدا اے۔ ایہ صرف مقامی ماہرین ای نہیں سگوں دنیا بھر دے آبی مسئلے تے اوہناں دا حل کڈھن والے ماہرین یک زبان ہو کے ایہو کہہ رہے نیں کہ پاکستان وچ ایہ تباہی اوس نالائقی تے نااہلی پاروں آئی جو اوہنے پانی ذخیرہ کرن لئی ڈیم نہ بنا کے آپ اپنے لئی پیدا کیتی اے۔ اُتوں سونے تے سہاگہ ایہ کہ ساڈے دریا بھل نال بھر چکے نیں۔ ندی نالے تجاوزات دی زد وچ نیں۔ پہاڑی دریاواں دے وچکار ہوٹل بن چکے نیں۔ پہاڑاں نوں بلڈوزراں نال برابر کرکے ہائوسنگ سکیماں بنان دے خبط نے پانی دے قدرتی بہائو دا جو بیڑا غرق کیتا ایہدا نتیجہ ایہ نکلیا کہ پانی نے سب دا بیڑہ غرق کر دتا اے۔
اللہ رحیم و کریم اے تے یقینا مینوں معاف کر دیوے گا پر ڈر تے اوہناں توں آندا اے جو خدائی احکامات دی اپنی تشریح کردے نیں تے فیر اوہناں دی ایس تشریح نال اختلاف کرن والے دی خیر نہیں ہوندی۔ مینوں ایس گل توں کوئی اختلاف نہیں کہ ایہ سیلاب تے بارشاں ساڈے بھیڑے اعمال دے نتیجے وچ ای تباہی پھیلا رہیاں نیں پر اختلاف بھیڑے اعمال دی تشریح اُتے اے۔ اللہ تعالیٰ نے سانو ںاشرف المخلوقات بنایا عقل سلیم نال نوازیا برے بھلے دی پچھان عطا کیتی پہاڑ سر کرن تے سمندراں دی تہہ کھنگالن دی صلاحیت بخشی۔ خلاء توں پار جان دی قوت دتی تے زمین دا سینہ چیر کے چھپیاں نعمتاں نوں کڈھن تے مامور کیتا۔ سائنس دے حیرت ناک کارنامے سرانجام دین دی توفیق دتی تے بناں کسے مادی رابطے دے تصویر تے آواز نوں لکھاں میل دور اپڑان تے قدرت بخشی۔ اجہے وچ کوئی قوم مالک کائنات دیاں دتیاں گئیاں صلاحیتاں توں فائدہ نہ چکے اوہدی بخشی ہوئی عقل نوں استعمال نہ کرے’ سامنے آئی ہوئی مشکل تے مصیبت دا حل کڈھن تے قادر ہون دے باوجود ہتھ تے ہتھ دھرے بیٹھی رہوے تے مالک کائنات دے دتے ہوئے اختیار نوں استعمال کرکے ایس تباہی تے قابو پان دی تھاں خیرات دا کٹورا چک کے ساری دنیا وچ بھیک منگدی پھرے تے تسیں آپ دسو اوہدے توں ودھ بداعمالی ہور کیہ ہو سکدی اے۔
جے کوئی قوم اللہ تعالیٰ دیاں دتیاں ان گنت نعمتاں نوں بنی نوع انسان دی بھلائی تے بہتری لئی استعمال نہ کرے تے بھلا اللہ دیاں نعمتاں دی ایس توں وڈی ناقدری ہور کیہ ہو سکدی اے؟ اللہ تعالیٰ دیاں دتیاں نعمتاں تے آسانیاں توں منہ پھیرن والا دنیا وچ مشکلات تے اوکڑاں دا شکار نہیں ہووے گا تے بھلا ہور کیہ ہووے گا۔ بھلا اوہدیاں دتیاں صلاحیتاں تے کرم نوازیاں توں فائدہ نہ چکن نال عذاب نہیں آوے گا تے ہور کیہ آوے گا۔٭٭