سیاست اتے اک طائرانہ نظر پائو

سیاست اک طرز عمل دا نام اے جہڑا کہ جمہوری کلچر دا اہم حصہ ہوندا اے۔ دنیا دے اوہ سارے ملک جتھے جمہوریت کسی نہ کسی صورت وچ موجود اے اوتھے سیاستدان وی نیں تے سیاسی جماعتاں وی۔ ساڈے ہاں چونکہ جمہوریت اج تک صحیح معنیاں وچ جڑاں نہیں پھڑ سکی ایس وجہ نال سیاسی جماعتاں تے سیاستدان وی اپنے اندر حقیقی سیاسی کلچر پیدا نہیں کر سکے۔ سیاسی جماعتاں دے اپنے اندر جمہوریت نظر نہیں آندی جس وجہ نال سیاستداناں دے رویے وی غیر جمہوری نظر آندے نیں۔ ایتھے سیاست کسی نظریے توں ودھ شخصیات دے گرد گھُمدی اے جہنوں دوجے لفظاں وچ شخصیت پرستی دا نام وی دتا جا سکدا اے۔ ایسے شخصیت پسندی توں فیر انھی تقلید جنم لیندی اے۔ ایہناں سیاسی رہنماواں دے سپورٹرتے فالوورز اپنے رہنماواں دی گلاں تے بیانات دا دفاع کردے نظر آندے نیں۔ بہت سارے بیانات ایسے ہوندے نیں جہناں دا دفاع ممکن وی نہیں ہوندا مگر فیر وی لوک اپنے لیڈراں نوں خوش کرن تے اوہناں دی خوشنودی حاصل کرن لئی ایسا کردے نظر آندے نیں۔ ایہہ طرز عمل معاشرے وچ اوہ وگاڑ’ تنا ئو تے تفریق پیدا کردا اے جہدا شکار اسیں اج کل ہوندے ہوئے نظر آ رہے نیں تے ملک وچ جاری سیاسی تنائو تے بے چینی نے صورتحال نوں ہور گھمبیر کر دتا اے۔ سیاستداناں دا مجموعی طرزعمل قطعاً حوصلہ افزا نہیں مگر اوہناں وچ سب توں ودھ غیر ذمہ دارانہ بلکہ خطرناک طرزعمل پچھلے وزیراعظم تے تحریک انصاف دے چیئرمین جناب عمران خان دا اے اوہ اقتدار گواچ جان پاروں صحیح معنیاں وچ حواس باختگی دا شکار نیں تے اک محاذ آرائی تے نفرت دی سیاست اتے گامزن نیں۔ جہدا بنیادی مقصد معاشرے وچ تفریق’ نفرت تے وگاڑ نیں کر کے اپنی اقتدار وچ واپسی دی راہ ہموار کرنی اے۔ دوبارہ اقتدار لئی اپنے مخالفاں دی ذات تے ملک دی ترقی و سالمیت اتے حملے کسی صورت وی قابل برداشت نہیں۔ ملک داک وڈا حصہ بدترین سیلاب دی زد وچ اے۔ کروڑاں لوک اپنے گھراں توں بے گھر ہو چکے نیں’ فصلاں تباہ ہو گئیاں نیں تے گھر منہدم ہو چکے نیں جد کہ خوراک دی شدید کمی تے بیماریاں پھیلن دا شدید خطرہ موجود اے۔ ساری سیاسی جماعتاں تے اوہناں دے رہنماواں دا فرض اے کہ اوہ مصیبت دی ایس گھڑی وچ اپنے عوام دے نال ہون تے وقتی طور تے ساری سیاسی سرگرمیاں معطل کر دتیاں جان۔ جدوں صورتحال نارمل ہو جاوے تے فیر دوبارہ توں اپنی سیاسی سرگرمیاں شروع کیتی جا سکدیاں نیں۔ ایس ویلے اتحاد یکجہتی دی لوڑ اے نہ کہ تفریق ‘ انتشار تے نفرت دی۔ ایہدے برعکس جے ویکھیا جاوے تے جناب عمران خان ہر دن جلسے کردے نظر آندے نیں قطعہ نظر ایس دے کہ عوام دی کیہ حالت اے جدوں اوہناں دی توجہ سیلاب ول دوائی جاندی اے تے موصوف فرماندے نیںکہ قدرتی آفات آندی رہندیاں نیں تے سیاسی سرگرمیاں وی جاری رہنی چاہیدیاں نیں۔ اوہناں دے آئے دن دے بیانات نہ صرف قابل اعتراض ہوندے نیں مگر ایہناں وچ سب توں تشویشناک گل مسلح افواج تے عدلیہ جئے اداریاں نوں براہ راست تنقید دا نشانہ بنانا اے۔ ایہناں بیانات توں اداریاں وج اشتعال تے بے چینی پائی جاندی اے جہڑی کہ اک قابل فہم گل اے’ جدوں کوئی عدالت اوہناں نوں یا اوہناں دے قریبی ساتھی نوں طلب کردی اے یا جے کوئی فیصلہ اوہناں دے خلاف آن دا خدشہ وی ہووے تے اوہ فوراً عدلیہ اتے شدید تے براہ راست تنقید کردے نیں’ ایس توں عدلیہ متنازعہ بن جاندی اے تے ججز آزادانہ فیصلے نہیں کر سکدے۔ کسی وی ممکنہ فیصلے یا صورتحال توں پہلاں ایس بارے جارحانہ بیانات دینا اک انتہائی قابل مذمت گل اے۔ ایہدا مقصد صرف تے صرف اداریاں اتے اثرانداز ہونا ہوندا اے۔
حالیہ دناں وچ آئی ایم ایف نال ڈیل بارے بہت چرچے سن تے ملکی معیشت دی بہتری تے ملک نوں ڈیفالٹ جئی صورتحال توں بچان لئی آئی ایم ایف نال معاہدہ بہت ضروری سی۔ عمران خان دے پچھلے وزیر خزانہ تے موجودہ سینیٹر جناب شوکت ترین دی اپنے دو صوبائی وزرائے خزانہ نال ٹیلیفون اتے ہون والی گل بات اتے تے ہر محب وطن پاکستانی نوں ہور حیرت وچ پا دتا اے۔ کوئی پاکستانی تصور وی نہیں کر سکدا۔
پچھلے دناں فیصل آباد وچ اک جلسے نال خطاب کردے ہوئے عمران خان نے نویں آرمی چیف دی تعیناتی دے حوالے نال انتہائی قابل اعتراض گل کیتی اے۔ اپنے طرزعمل تے سوچ دے عین مطابق اوہناں نے پاک فوج دے اعلیٰ افسران نوں حب الوطنی تے صلاحیت اتے سوالیہ نشان چکن دی کوشش کیتی اے۔ اوہناں نے ایہہ تاثر دین دی کوشش کیتی اے کہ موجودہ وزیراعظم تے اوہناں دے اتحادی جہنوں نواں آرمی چیف تعینات کرن گے ۔ اوہ غالباً محب وطن تے ایس عہدے دا اہل نہیں ہووے گا کیوں جے بقول اوہناں دے ایہہ لوک کرپٹ نیں جہدی وجہ نال ایماندار تے محب وطن شخص نوں آرمی چیف نہیں بنا سکدے۔ ایہہ بیان انتہائی خطرناک اے جہنوں صرف سیاست دے تناظر وچ ویکھ کے نظرانداز نہیں کیتا جا سکدا۔ عمران خان دے ناعاقبت اندیش حمایتی انھی تقلید کردے ہوئے ایس بیان دا وی دفاع کر رہے نیں۔ پاک فوج دا ہر فرد جذبہ حب الوطنی نال سرشار تے وطن لئی مر مٹن نوں ہر ویلے تیار اے۔ نویں آرمی چیف دی تقرری دا اک آئینی تے قنونی طریقہ کار موجود اے جہنوں متنازعہ بنا کے عمران خان اپنی خطرناک سیاست نوں پروان چڑھا رہے نیں اوہناں دا طرز سیاست ہن ساری حدود پار کر رہیا اے جہنوں بہرحال روکنا ہووے گا۔ ایس توں پہلاں کہ ملک دا نظام ای درہم برہم ہو جاوے۔ اک اک کر کے اوہناں نے ملک دے سارے اداریاں نوں متنازعہ بنان دی کوشش کیتی اے جہدے وچ ہر دن تیزی آ رہی اے اوہ اپنے مقبولیت دا پرچار کر کے ہر کسی نوں بلیک میل کرن دی کوشش کردے نیں۔ کوئی کنا ای مقبول کیوں نہ ہووے بہرحال ریاست تے نظام توں وڈا نہیں ہو سکدا۔ اک ایسا شخص جہڑا ساڈے تن سال توں بوہتا عرصہ تک ملک دا وزیراعظم رہیا ہووے ایس توں ایس طرزعمل دی قطعاً توقع نہیں کیتی جا سکدی۔ اوہ ہن اپنی ایس طرز سیاست توں پچھے ہٹدے نظر نہیں آندے لہٰذا قنون نوں حرکت وچ آ کے اوہناں نوں روکنا ہووے گا ایس توں پہلاں کہ ملک وچ افراتفری تے پہچان دی اک ایسی صورتحال پیدا ہو جاوے جہنوں روکنا فیر کسی لئی وی ممکن نہ رہوے کیوں جے ہر کسی نوں متنازعہ بنان دی عمران خان دی ایہہ مہم ملک لئی اک شدید خطرہ بندی جا رہی اے۔