سیاسی بیان

اقتدار جاوید

بادشاہی زمانے وچ ہاتھی سوار نوں فیل بان کیہا جاندا سی کہ اوہ ایس طاقتور ترین جانور تے سواری کردے سن۔ اوہناں دے اشارے تے ای ہاتھی صاحب حرکت فرما سکدے سن اوہناں نوں مہابت وی کہیا جاندا سی۔ ہاتھی نوں سدھا رکھن لئی مہابت دے کول چابک یاں چھڑی نہیں سی ہوندی اک سوآ ہوندا اے جہنوں آنکس کہندے نیں تے موقع محل دے مطابق مہابت اوہنوں ہاتھی دی موٹی دھون وچ کھوبدا اے۔ اوہدے نال ہاتھی نوں کنٹرول کیتا جاندا اے۔ اپنے سیاستداناں نوں وی سیاست بان کہنا زیادہ مناسب اے۔ اگلے کالماں وچ اسیں ایہناںنوں ایہناں الفاظ نال یاد کراں گے۔ انج وی سیاست بان یعنی سیاستدان ساڈا پہلا عشق وی نیں تے ساڈی کمزوری وی تے دکھدی رگ وی۔ اسیں اوہناں دے خلاف کوئی گل سنن دے روادار نہیں۔ اپنے ملک عزیز وچ ساڈی جان دی قیمت نہ ہون دے برابر اے ایس لئی سیاست باناں دا معاملہ وی ساڈی جان ورگا اے۔
سیاست بان کہندا کجھ اے تے اوہدا مطلب کجھ ہور ہوندا اے۔ ایسے ”کچھ ہور” دی تشریح اسیں ہلکے پھلکے انداز وچ کیہ کراں گے۔ روئے سخن کسے ولوں ہووے تے روسیاہ دے مصداق عرض اے کہ ساڈے تے یاراں جماعتاں دے اتحاد دے وزیراعظم شہبازشریف نے کہیا اے ”ہن نچھ وی آوے تے آئی ایم ایفتوں پچھنا پیندا اے” ایس لئی اسیں کوشش کر رہے آں کہ نچھ آوے ای نہ کہ نہ رہے بانس نہ بجے بانسری۔ نچھنا آداب محفل دے خلاف اے۔ اہل مغرب محفل وچ نچھن نوں روا نہیں سمجھدے تے نچھ دے خارج ہون دے نال ای ”سوری سوری” کہنا شروع کر دینے آں۔ ایس لئی سوری کرن دی تھاں نچھ نوں روک لینا زیادہ مناسب اے اسیں مشرق والے تے پوری قوت نال نچھدے نیں تے اللہ دا شکر ادا کردے نیں۔ ہن آئی ایم ایف نہیں چاہندا کہ اسیں اللہ دا شکر ادا کریئے۔ ہن ایہدا اک ای طریقہ اے کہ اپنے منہ تے ہتھ رکھ لیا جاوے تے نچھ دا کم اوسے طرح ختم کر دتا جاوے جس طرح اسیں بائی واری عزیزی آئی ایم ایف دے کول جا کے لوکا ںدا کم تمام کر دتا اے۔ پوری امید اے کہ ساڈے موجودہ اک ڈیڑھ سالہ دور حکومت وچ بقایا عوام دا وی مکو ٹھپن دا چنگا پربندھ ہو جاوے گا۔
کشتیاں ٹوٹ گئی ہیں ساری
اب لیے پھرتا ہے دریا ہم کو
چیئرمین پیپلزپارٹی بلاول زرداری نے کہیا اے کہ پہلے انسان بنو فیر سیاستدان’ چیئرمین بلاول زرداری دا اشارا ظاہر اے کہ عمران خان ول اے۔ اوہناں دے کہن دا مطلب ایہہ وے کہ انسان دی پہلی ضرورت ڈھڈ ہوندا اے۔ ایسے لئی کہیا جاندا اے ایہ بڑا پاپی پیٹ اے۔ تہانوں سیاست وچ آئے جمعہ جمعہ اٹھ دن ہوئے نیں جے اک جمعہ کڈھ دیو تے ایہ صرف ست دن بن دے نیں۔ اسیں ایس دشت وچ کئی نسلاں توں سیاحی کیتی اے۔ ایہ وی دسدا جاواں کہ ساڈی ماں تے ساڈے نانا سیاست دان سن ۔ اوہناں نوں سمجھ ای نہیں آئی کہ پہلے انسان بننا ضروری اے۔ ایس راز توں پردہ قبلہ اباجان نے اٹھایا۔ اللہ اوہناں دا سایہ ساڈے سراں تے تادیر رکھے۔ اوہ ہے نیں تے ایہ انسانیت اے۔ انسان اک سماجی جانور اے اوہنوں اجہے سماج دی ضرورت اے جتھے اوہدی لوڑ پوری ہوندی اے۔ اباجان نے نہ صرف مینوں سگوں سارے سندھی وزیراں خاص کر چاچا شرجیل میمن تے چاچا مرادعلی شاہ نوں ایہ گل دسی۔ چاچا ناصرشاہ تے چاچا سعیدغنی پہلے ای ایس گل توں چنگی طرح واقف سن۔ مینوں گہوارے وچ ای روشن روشن اشارے آنا شروع ہو گئے سن۔ ایہ سب قبلہ مدظلہ دی کرامت سی نہیں تے خاکسار ایس قابل کتھے۔ نانا ابا لوکاں دی سیاست کردے رہے تے اپنا انجام ساڈے لئی اک عبرت بنا گئے۔ بی بی وی ایس گل دی قائل نہیں سن مجبوراً اوہناں نوں راہ چوں اک پاسے کرنا پیا۔ ہن راوی چین لکھدا اے۔ ہن ساڈی پارٹی دا منشور روٹی ‘کپڑا تے مکان دی تھاں انسان بنن تے سارا دھیان اے۔
مریم اورنگزیب نے کہیا اے ”ملک نوں سری لنکا بنان دی سازش نکام ہو چکی اے”۔ الحمدللہ ملک نوں سری لنکا بنان دی سازش وی اساںای تیار کیتی سی۔ ایس قسم دی سازشاں دے نسخے ساڈے کول اک نہیں اک سو اک نیں۔ عمرو بن عیار دی زنبیل ساڈی دماغی کاوش دے سامنے پانی بھردی اے۔ اسیں ہزار کوششاں نال ایس سازش دا خاتمہ عمران خان دے خلاف تحریک عدم اعتماد دی صورت وچ کر دتا سی۔ جے اللہ نہ کرے دوبارہ تحریک انصاف دی حکومت آئی تے نویں سرے توں اوہنوں سری لنکا بنان دی کوشش کراں گے۔ وما توفیقی الا باللہ۔٭