افغان باشندیاں دا پاکستانیاں اُتے تشدد

شارجہ میچ ہارن دے ردعمل وچ افغان باشندیاں دا پاکستانیاں اتے تشدد ایسا فعل اے جہدی جنی وی مذمت کیتی جاوے گھٹ اے کیوں جے لٹے پٹے افغاناں لئی پاکستان اک ایسی جائے پناہ اے جتھے بلا تفریق ساریاں نوں گلے لایا جاندا اے۔ روس دے کابل اتے حملے پاروں جدوں پوری دنیا وچ سراسمیگی دی لہر پھیل گئی تے پاکستان کلا ملک اے جہنے سارے خطریاں نوں بالائے طاق رکھدے ہوئے افغان بھراواں دا ساتھ دین دا فیصلہ کیتا تے نہ صرف افغان مہاجراں لئی اپنی سرحداں کھول دِتیاں بلکہ عملی طور تے جانی مالی قربانیاں وی دتیاں حالانکہ ایہناں قربانیاں دے عوض پاکستان نوں منشیات تے کلاشنکوف کلچر ملیا فیر طول و عرض وچ دھماکیاں دا لامتناہی سلسلے دا سامنا کرنا پیا مگر سارے نقصانات دے باوجود پاکستانی حکومت تے عوام ثابت قدم رہے تے افغان بھراواں نوں آزادی دوان دے جذبے وچ کمی نہیں آئی۔ ایہہ ایسا ویلا سی جدوں بھارت وی افغانستان اتے روسی قبضے دی حمایت وچ پیش پیش تے اوہدی سرزمین نوں پاکستان دے خلاف استعمال کرن دی منصوبہ بندی وچ مصروف رہیا۔ نیٹو حملے نوں روکن لئی پاکستان دی مخلصانہ سفارتکاری توں دنیا آشنا اے۔ امریکی حملے دے باوجود پاکستان نے وڈے بھرا دا کردار ادا کردے ہوئے افغان بھراواں دی مشکلات گھٹ کرن دی ہر ممکن کوشش کیتی جہدی وجہ نال امریکی اکثر بدظن تے شاکی رہے مگر پاکستان بساط بھر افغاناں دی خیر خواہی وچ ثابت قدم رہیا۔ امریکہ تے طالبان معاہدہ کران وچ وی پاکستان دا کلیدی کردار اے حالانکہ بھارت نے پوری کوشش کیتی کہ امریکی تے نیٹو افواج افغانستان توں نہ جان تاں جے اوہ ایس ملک نوں اپنے ناپاک منصوبیاں دی تکمیل لئی استعمال کردا رہوے۔ اج کل طالبان حکومت نوں عالمی تنہائی توں کڈن وچ پاکستان پیش پیش اے مگر افغاناں ولوں مسلسل ایسے اشارے مل رہے نیں کہ اوہ پاکستان نال پرخاش رکھدے تے بھارت نوں اپنا محسن تصور کردے نیں۔ ایہہ سراسر حماقت تے بدترین احسان فراموشی اے۔ جے بھارت نے لمے عرصہ دی سرمایہ کاری نال اپنی جڑاں بنا لیتیاں نیں تے وی افغان حکومت دا فرض اے کہ اوہ اغیار دے آلہ کاراں نوں آ ہنی ہتھاں نال قابو کرے تاں جے دو برادر اسلامی ملکاں وچ اعتماد دا رشتہ کمزور نہ ہووے۔
روسی تے امریکی حملے دے دوران کٹھ پتلی حکومتاں نے اپنی عوام نوں کچلن وچ ودھ چڑھ کے حملہ آور افواج دا ساتھ دتا تے ہر واری بیرونی حملہ آور افواج دی پشت پناہی کرن والے بھارت ولوں دست تعاون ودھایا۔ ایہناں کٹھ پتلی حکومتاں نے سوچے سمجھے منصوبے دے تحت کدی سرحدی مسائل نوں ہوا دتی تے کدی پاکستان دے مٹھی بھر شرپسنداں نوں گلے لا کے اپنے محسن ملک وچ انتشار تے افراتفری پھیلان دی کوشش کیتی۔ حامد کرزئی تے اشرف غزنی جئے سیاہ کردار دے مالک حکمراناں نے منظور پشتین جئے غداراں تے کجھ بلوچ شرپسنداں دی نہ صرف مالی مدد کیتی بلکہ نفرت پھیلان لئی ذرائع ابلاغ وچ منگ گھڑت کہانیاںپھیلائیاں۔ ایہہ کٹھ پتلی حکمران اغیار دے کارندے بن کے بھارتی ہتھیار باغیاں تک پہنچان وچ وی ملوث رہے۔ اینے زخم سہن تے احسان فراموشی دے باوجود پاکستان نے ہمیشہ صبرو تحمل’ درگزر تے فراخ دلی دا مظاہرہ کیتا تے افغان عوام دا مقدمہ لڑیا مگر افسوس ایس گل دا اے کہ سارے احساناں دے جواب وچ نفرت’ کم ظرفی تے اشتعال دا مظاہرہ کیتا جاندا اے حالانکہ کسے جانور نال وی پیارو محبت تے بھلائی کیتی جاوے تے اوہ وی جواب وچ نقصان پہنچان توں گریز دا مظاہرہ کردا اے لیکن جانے افغان کہڑی مٹی دے بنے نیں جہڑے اوہ پیارو محبت تے بھلائی دی زبان سمجھن توں انکاری نیں۔
ویلا آگیا اے کہ پاکستان وی یکطرفہ فریفتگی اتے نظرثانی کرے تے جہنوں جہڑی ز بان سمجھ آندی اے اوہنوں اوسے زبان وچ سمجھایا جاوے۔ جہناں احسان فراموشاں نوں اک ہمسایہ اسلامی ملک کھٹکدا تے بھارت بوہتا پسند اے تے کجھ عرصہ لئی اوہناں نوں اوہناں دے حال اتے چھڈ دتا جاوے۔ بھارت تے کسے اتے احسان کرن دا عادی ای نہیں بلکہ خون چوسن والی ایسی جونک اے جہدے نال ہوندی اے اوہنوں ای کمزور کردی اے۔ اج نہیں تے کل افغاناں نوں وی ایس حقیقت دا پتہ چل جاوے گا۔ بنگلہ دیش دے کول زرمبادلہ دے ذخائر ویکھ کے اجکل بھارت اوہدے اتے فریفتہ اے تے نہ صرف تجارت ودھا کے ڈالر لٹ رہیا اے بلکہ وقفے وقفے نال دفاع مضبوط بنان دے نام اتے ناکارہ اسلحہ تے گولہ بارود ویچ کے وی دولٹ بٹو ررہیا اے حالانکہ بنگلہ دیش دے تنوں پاسے بھارت جد کہ اک پاسے سمندر اے اوہنوں کسے پاسوں حملے دا خطرہ نہیں لیکن بھارت نے حال ای وچ پنج سو ملین دا دفاعی سازوسامان دے کے ممنون احسان کیتا اے۔ ہن سوال ایہہ اے کہ جدوں بنگلہ دیش نوں کسے پاسوں خطرہ ای نہیں تے اوہنوں فوجی سامان ویچن دی کوئی وجہ اے؟ صاف ظاہر اے نہیں ایسے لئی تجزیہ کار ایس سازوسامان نوں محض گودام بھرن تے ڈالر ہتھیان دی چال قرار دیندے نیں۔ ایسی ای چالاں دی وجہ نال بنگلہ دیش نوں عالمی اداریاں کولوں قرض حاصل کرن دی مجبوری نے آ دبوچیا اے۔ افغاناں نوں جہنی چھیتی ایہہ گل سمجھ آ جاوے بہتر اے کیوں جے افغاناں نال پیارو محبت دی پینگاں ودھان دے پس پردہ وی اخلاص نہیں بلکہ پاکستان دشمنی تے اوہناں دی معدنیات اتے ہتھ صاف کرنا اے۔
پاکستان دی دریا دلی نال بنگلہ دیش تے افغانستان دی کرکٹ ٹیماں اپنے پیراں اتے کھڑی ہوئیاں تے عالمی کرکٹ دے مقابلیاں وچ رلت دے قابل وی لیکن مذکورہ دونویں ملکاں نے پاکستان دے بے لوث اخلاص دا کدی مثبت جواب نہیں دتا بلکہ مکار تے چالباز بھارت دا آلہ کار بنن نوں ترجیح دتی۔ ایہہ طرز عمل محسن دی حوصلہ شکنی دے مترادف اے۔ پاکستان حکومت نوں چاہیدا اے کہ میچ دے اختتام اتے افغان تماشائیاں دے طرزعمل اتے صدائے احتجاج بلند کرے تے ایس امر نوں یقینی بناوے کہ عالمی مقابلیاں وچ ایسی شدت پسندی دا مظاہرہ کرن والیاں نوں روکن لئی تادیبی قنون بنوان دی تجویزاں دیوے تاں جے ایسی کسے حرکت دے مرتکب ذمہ داراں نوں قرار واقعی سزا ملے۔ نیز اخلاص دے جواب وچ بار بار اہانت آمیز رویہ اختیار کرن والیاں اتے ہور احساناں دی روش چھڈ کے اوہناں نوں کلیاں چھڈ دینا ای بہتر اے۔
دبئی پلس نے توڑ پھوڑ دے الزام وچ کئی افغاناں نوں حراست وچ لے کے کارروائی دا آغاز کردے ہوئے گرفتار افراد نوں سزاواں سنان تے ملک بدر کرن دا عندیہ دتا اے۔ قرار واقعی سزا دین نال ای آئندہ ہور ایسے واقعات نوں روکیا جا سکدا اے۔ پاکستان نوں افغان حکومت دے نال ایہ مسئلہ چکن دے نال دبئی پلس نوں حقائق دی کھوج وچ اعانت کرنی چاہیدی اے۔ گرفتار افغانیاں دے کول پاسپورٹ تے دوجی دستاویزات پاکستانی نیں۔ ایسے سارے غیر ملکی بشمول افغان’جہناں دے کول پاکستانی پاسپورٹ یا شناختی کارڈ نیں فی الفور منسوخ کرنا نہایت ضروری اے۔ افغان ٹیم دی شکست اتے اسلام آباد وچ پاک جھنڈے دی بے حرمتی دے واقعات ہوئے۔ ایہناں واقعات دے ذمہ داران کسی معافی دے مستحق نہیں۔ اوہناں نوں ملک توں کڈن دے نال ایسا انتظام کیتا جاوے کہ ایہہ شرپسند دوبارہ نہ آ سکن۔ اک واری قومی جھنڈے دی بے حرمتی کرن والیاں نوں ملک بدرکر دتا گیا تے امید واثق اے کہ دوبارہ ایسی گری ہوئی حرکت دی کسے نوں جرات نہیں ہووے گی۔ نیشنل دارالحکومت اسلام آباد وچ نیشنل پریس کلب دے سامنے افغان مہاجراں ولوں قومی پرچم دی بے حرمتی سنگین جرم اے۔ ہن ایہہ انتظامیہ دی ذمہ داری اے کہ سختی نال افغاناں دے کیمپ اکھاڑ کے رستے واگزار کران کیوں جے حساس تے اہم ترین علاقیاں وچ افغان مہاجراں دا رہائش پذیر ہونا سراسر سکیورٹی رسک اے۔
افغان ساڈے اسلامی بھرا اوہدوں نیں جدوں اوہ ساڈے جذبات دا وی کجھ خیال رکھن۔ جے پروہنا اپنے میزبان نوں ہر تھاں بے عزت کردا رہوے تے اخلاقیات دے مظاہرے دی لوڑ نہیں رہندی۔ سعودیہ وانگوں پاکستان وی اقامہ طرز دا طریقہ کار اپنا کے مستقبل وچ افغاناں نوں شر انگیزیاں توں روک سکدا اے۔ جے چاراں صوبیاں وچ افغانیاں نوں پابند بنایا جاوے کہ اوہ اپنے کفیل نوں نہ صرف جواب دہ ہون گے بلکہ کفیل دے کول ملک بدردی سفارش دا وی اختیار ہووے۔ علاوہ ازیں ہر سال اقامہ دی تجدید دی باقاعدہ فیس وصول کیتی جاوے۔ مینوں یقین اے کسے نوں قومی پرچم دی بے حرمتی دی فیر ہمت نہیں ہووے گی۔جہڑے پروہنے اپنے میزبان دی عزت ناں کرن اوہ کسے ہمدردی یا رحم دلی دا مستحق نہیں۔