ساڈے شہیداں نوں سلام

شہادتاں تے 1947توں سرزمین پاکستان دا سہرا بنیاں نیں تے اج تک اوہناں دی بارات اپنے گھوڑیاں دی لگاماں چھڈن نوں تیار نہیں۔ اوہدے ڈھول دی تھاپ اتے رقص کردے’ جذبہ ایمان اتے دھمال پاندے’ خون آلود پیراں نال خارزار رستیاں نوں پار کردے’ اک لگن تے مستی و عشق وچ انج محو نیں کہ دنیا حیران اے کہ ایہہ کیہڑی قوم اے۔ پوری دنیا اتے ایہہ گل واضح اے کہ ایہہ قوم صرف قوم مسلمان تے امت رسول حضرت محمدۖ اے۔ سمجھ نہیں آندا کہ 6ستمبر نوں اسیں عظیم شہادتاں اتے خوشیاں منائیاں یا وِچھڑن والیاں دی جدائی وچ ہچکیاں تے آہ زاریاں دی محفلاں سجائیاں۔ شہادتاں دا سفر تے نجانے کدوں توں عشق و ایمان دے نال ہتھاں دی زنجیر بنائے جارہی اے۔
1947 مگروں 1971, 1965, 1948 تے 1999دی جنگاں وچ پاکستانی فوج تے عوام دی قربانیاں بے مثال نیں۔ بزرگاں نے وی جیویں 1947 وچ جوان پتراں دے زخمی جسماں نوں چک کے سرحد پار کیتی تے سجدہ ریز ہو کے نعرہ تکبیر بلند کیتا نہ اوس ویلے اوہناں نوں اپنے خاندان دے قتل کیتے جان دا احساس سی نہ اپنی جائے پیدائش چھڈ کے ہجرت کرن دا غم سی۔ سارے جاندے سن کہ وطن اوہناں دے تعمیر ہوندے نیں جہناں دی ملت اوہدی معمار ہووے تے گل اوس ویلے اک وطن دی سی فیر آن والے ہر نویں معرکے وچ پاکستان دی سلامتی مطمع نظر رہی۔ مگر شہادتاں تے خاکی وردی پان والے محافظاں توں وی بہت اَگے نکل گئیاں۔
وطن دی سرحداں توں نکل کے شہراں تے گلیاں’ مسجداں تے سکولاں تک پھیل گئیاں۔ یوم شہدا وچ اک عشرہ پہلے جہنے شہیداں نوں خراج تحسین پیش کیتا گیا اج اوہناں دی تعداد کئی گنا ودھ چکی اے۔ اَت گردی دا اوہ گھمسان دا رن پیا اے کہ دھمکیاں دی آواز نال کن مانوس جئے ہو گئے نیں۔ سرحداں اتے دشمن اسلام نال مقابلہ تے جاں فروشی جہاد’ فرض مسلمان دے زمرے وچ آندا اے مگر ایہہ ات گرد مسلماناں دے حلیے وچ کلمہ حق پڑھدے ہوئے جدوں ظلم و بربریت دی مثال بن جاندے نیں تے اسلام پھیلن دا اوہ زمانہ یاد آندا اے جدوں نبی کریمۖ نے فرمایا سی کہ منافق توں وڈا دشمن مسلمان دا کوئی نہیں’ ایہہ تے سارے منافقین نیں جہناں نے اپنی مرضی دی جنت تے دوزخ بنا رکھی اے۔ قنون تے اصول تے ضابطے مقرر کر رکھے نیں۔ اوہناں دی گھٹی وچ شاید شہد دی جگہ بارود دا سفوف چٹایا جاندا اے۔ معصوم تے نوعمر انساناں نوں ظلمت دی بھینٹ چڑھاناکتھے دی انسانیت اے۔ مسجداں لئی جمعہ دی نماز ویلے جتھے ایان تے عبداللہ جئے بچے سکول توں صرف ایس لئی چھیتی واپس آئے کہ ساڈی جمعے دی نماز قضا نہ ہو جاوے۔ جتھے زبیری صاحب دے والد وہیل چیئر اتے باوجود بیماری دے جمعہ پڑھن جاندے نیں۔ ایس مسجد نوں ات گردی دا نشانہ بنانا کتھے دی مسلمانیت اے؟ تے جدوں بچے آکھن کہ اسیں ماں دے کول جانا اے اوہ ساڈے انتظار وچ اے تے گردن توں پھڑ کے اوہنوں اتے چک کے اوہدی پیشانی اتے جتھے ماں اپنے ممتا بھرے ہونٹاں نال چمدی سی’ بندوق دی گولی داغ دینا وحشت تے بربریت دا غماز اے کہ نہیںتے فیر کیہڑے کیہڑے شہیداں نوں یاد کرئیے؟ گیاری سیکٹر وچ گلیشیئر دے تھلے دب جان والی سپاہ نوں یا فیر اوہناں نوں جہڑی بھارت دے خلاف محاذ جنگ وچ کئی راتاں سوندے نہیں’ برف دے اگلو وچ کھڑا نہیں ہو سکدے جہڑے خطرناک حد تک اُچی برفیلی چوٹیاں اتے صرف اپنے جذبے تے اللہ دی مدد نال انج چڑھ جاندے نیں جہدا گمان وی ناممکن اے۔ ہزاراں فٹ گھاٹیاں وچ گونجدی آوازاں تے شہیداں دی زندہ روحاں اوتھے اج وی اپنیاں نوںپکاردیاں نیں۔ فیر وزیرستان وچ جام شہادت نوش فرمان والی ساڈی سپاہ ‘ افسر تے جوان جہڑے مشکل محاذ اتے قدم رکھدے نیں اوتھوں فتح لے کے نکلدے نیں۔ اپنے شہیداں نوں موہنڈیاں اتے چکے زخم خوردہ سپہ نوں نال لئے ہوئے اپنے اسلحے دا اک پرزہ وی دشمن دی زمین اتے نہیں چھڈ کے آندے۔ بریگیڈیئر بابر امین دے پتر فصیح نے جہڑا معرکہ ماریاکہ فتح یاب ہون مگروں جدوں پتہ چلیا کہ دشمن دی زمین اتے شہید دا جسد خاکی رہ گیا اے تے اوہ اوہنوں لین واسطے واپس پلٹے تے شہادت نوش فرمائی۔ ساڈی اوہ بھیناں جہڑیاں شہیداںدی بیگم کہلاندیاں نیں زمانے دے سامنے بہت بہادری نال زندگی گزاردیاں نیں مگر جدوں چھوٹے یتیم بچے ایہہ کہندے نیں کہ ساڈے بابا کدوں آن گے؟ یا کسے دے سوال اتے کہندے نیں اسیں تے بابا نوں صرف تصویر وچ ویکھیا اے تے اوہ ٹٹ جاندیاں نیں۔ گل شہیداں تے ات گردی اتے کرئیے تے شاید صفحے گھٹ پے جان مگر جدوں اک نظر اسیں ضرب عضب تے ردالفساد اتے پائیے تے انج جیویں مردہ جسماں وچ جان آ جاندی اے۔ شہیداں دے اہل خانہ دی اکھاں توں ڈِگن والے اَتھرو تھم جاندے نیں۔ اسیں اپنے پیاریاں دے لہو دے مقروض آں تے ایہہ قرض افواج پاکستان دے نال نال حکومت تے عوام وی رل کے اتار رہے نیں۔