سیلاب زدگان ساڈے منتظر نیں

بدقسمتی نال اج وطن عزیز دے طول و عرض وچ سیلاب جئی ہولناک قدرتی آفت نے پوری شدومد دے نال پنجے گاڑ رکھی نیں۔ اوہدے بپھرے ہوئے بے رحم ریلے اپنے رستے وچ ان والی ہر شے نوں صفحہ ہستی توںمٹاندے جا رہے نیں۔ جون توں تباہی و بربادی دا سلسلہ شروع کرن والے سیلابی ریلیاںنے ہن تک لگ بھگ چار کروڑ لوکاں نوں شدید متاثر کیتا اے۔ اک ہزار توں ودھ لوک زندگی دی بازی ہار گئے نیں۔ چار لکھ توں ودھ گھر سیلابی پانی دی نظر ہو گئے نیں۔ ایسے طرح سیلابی پانی وچ بہہ جان والے مویشیاں دی تعداد سولہ لکھ توں تجاوز کر چکیا ے۔ سیلاب توں متاثرہ علاقیاں وچ کھڑی فصلاں’ سڑکاں’ پل’ بجلی دی تنصیبات سب کجھ طوفانی لہراں دی نذر ہو گئے نیں۔ متاثرین سیلاب بھک تے پیاس دے نال نال کئی طرحاں دی بیماریاں دا شکار ہو رہے نیں۔ الغرض موجودہ خوفناک سیلاب بلوچستان’ سندھ’ جنوبی پنجاب تے خیبر پختوانخواہ وچ جیویں تباہی تے بربادی کر رہیا اے اوہ شاید پچھلے سارے ریکارڈ توڑ دیوے۔ پاکستان وچ سیلاباں دی اک لمی تریخ اے جہناں وچ ہن تک تقریباً 38وڈے تے تباہ کن سیلاب پاکستان توں ہو گزرے نیں جہناں وچ 2010دے سیلاب دی تباہی تریخی سی جہنے لکھاں لوکاں دی زندگیاں نوں برباد کیتا سی۔ لیکن مصیبت تے دکھ دی ایہناں گھڑیاں وچ جیویں پاکستانی عوام نے اپنے میبت زدہ بھراواں دی مدد کیتی اوہ اپنی مثال آپ اے۔ ایس قدرتی آفت ویلے پاکستانیاں نے بڑی دریادلی تے سخاوت دا مظاہرہ کیتا سی۔ پاکستانی قوم دوجیاں دی مدد کرن دے حوالے نال دنیا بھر وچ 142 ویں نمبر تے سی مگر 2010دی ریکارڈ ڈونیشن مگروں 34ویں نمبر اتے براجمان ہو گئی تے انج ایس قوم نے دنیا اتے ایہہ ثابت کر دیا کہ اسیں اک دردمند’ زندہ’ایثار تے قربانی دے جذبے نال سرشار قوم آں۔ اج پاکستان دا شمار خیراتی تے فلاحی کماں وچ امداد دین والے صف اول دے ملکاں وچ ہوندا اے۔ جنوبی ایشیا وچ سری لنکا مگروں پاکستانی شہری خیرات تے امداد دین دے حوالے نال دوجے نمبر تے نیں جہڑا کہ مجموعی قومی پیداوار دے اک فیصد دے برابر اے۔ جہڑا سالانہ تقریباً 246 ارب روپے خیرات دی مد وچ اپنے غریب ہم وطناں دی فلاح و بہبود تے امداد اتے صرف کردے نیں۔ اج سارے پاکستانیاں نوں اک وڈی آزمائش دا سامنا اے۔ سیلاب زدگان دی تکلیفاں تے مسائل ناصرف ودھدے جا رہے نیں بلکہ اوہناں دی تعداد وچ وی تیزی نال وادھا ہو رہیا اے۔ ساڈی فلاحی تنظیماں’ سرکاری تے نیم سرکاری ادارے ہر دم آفت زدہ علاقیاں وچ متحرک نیں لیکن اوہناں نوں اینی وڈی قدرتی آفت دا مقابلہ کرن تے متاثرین سیلاب دی دادرسی لئی مالی تے مادی وسائل دی شدید کمی دا سامنا اے گو کہ ایس سلسلے وچ سیلاب زدگان دی امداد لئی ہر متحرک تنظیم نے ریلیف فنڈ قائم کیتا اے تے ساڈے مخیر حضرات وی حسب روایت ایس کارخیر وچ حصہ لین لئی سرگرم نیں لیکن ایس واری سیلاب زدگان دی
امداد لئی ساری جماعتاں دے سربراہان تے مراعات یافتہ طبقے دے افراد نوں پہل کرنی چاہیدی اے تے ذاتی حیثیت نال اپنی جیب خاص توں نقدی تے امدادی سامان دے سوشل میڈیا اتے اعلانات’ ٹویٹس تے ٹرینڈ چلانے چاہیدے نیں۔ ایہناں ساریاں نوں اپنے کپڑے’ آٹے’ چینی تے گھی دے کارخانیاں دے منہ مصیبت وچ گھرے ہوئے ہم وطناں لئی کھول دینے چاہیدے نیں تاں جے اوہناں نوں یقین ہو جاوے کہ ساڈے رہنما تے امرا صرف زبانی کلامی ای نہیں بلکہ عملی طور تے وی ساڈے دکھ درد ونڈن لئی ساڈے پچھے کھڑے نیں۔ ایتھے میں سمندر پار پاکستانی بھراواں نوں وی اپیل کرنا واں کہ اوہ کوئی لمحہ ضائع کیتے بغیر سیلاب زدگان دی دل کھول کے مالی مدد کرن۔ مینوں یقین اے کہ قوم دے سارے افراد اک واری فیر اپنی حیثیت تے استطاعت دے مطابق بلا تامل سیلاب زدگان دی مدد کرن گے۔ سارے رل کے ہمت کرن تے اپنے اپنے دائرہ کار وچ پاکستان دے عوام دے حالات توں آشنا کرن تاں جے ایس واری خیرات تے امداد دے حوالے نال اپنے پچھلے سارے ریاکرڈ توڑ کے مخیر قوماں دی صف وچ سب توں اگے آ جان۔