انتظامی ڈھانچے دی بربادی دا کھیڈ

میرے دوست بیوروکریٹ نے پانی دا گلاس پیتا’ گلاس ختم ہوندیاں ای اوہنے آہ بھری تے فیر کہن لگا’ پچھلے تریہہ ورھیاں وچ افسرشاہی دے کم کرن دا انداز اوہ نہیں رہیا جو کدی ہوندا سی۔ خاص طور تے پنجاب وچ تے ستیاناس ای ہو گیا اوتھے تے افسراں نوں اک خاندان دی اکھ دا تارا بن کے رہنا پیا۔ جو افسر ایس خاندان نوں پسند نہ آیا اوہنوں راندہ درگاہ بنا دتا گیا۔ تہانوں یاد اے کہ نوازشریف 1985ء وچ پہلی واری وزیراعلیٰ بنے تے فیر 1988ء وچ وزیراعلیٰ منتخب ہوئے۔ ایہناں دوہاں ادوار وچ نوازشریف نے اپنے ہر ایم پی اے نوں دو دو اے ایس آئی تے دو دو نائب تحصیلدار دیاں پوسٹاں تحفے وچ دتیاں۔ ارکان صوبائی اسمبلی نے اپنے لاڈلیاں نوں بھرتی کروا دتا۔ ایہو لاڈلے ترقی کردے کردے پنجاب دے وکھووکھ ضلعیاں وچ ڈپٹی کمشنر بن گئے جو پولیس وچ سن اوہ ڈی پی او بن گئے۔ کجھ تے ڈی آئی جی تک اپڑ گئے۔ ہن جدوں ایس طرح پروموشن پان والے تے جانبدار افسران انتظامی ڈھانچے دا حصہ بن گئے تے فیر کس طرح انتظامی ڈھانچہ بربادی توں بچ سکدا سی۔
پنجاب وچ انج دا ای کھیڈ کھیڈیا گیا۔ اک سیاسی جماعت نے اپنے وفاداراں نوں نوازیا تے فیر اوہناں وفاداراں نے جواباً ظلم دی حد تک محبت نبھائی۔ ایہدے نال ملدا جلدا کھیڈ سندھ وچ کھیڈیا گیا۔ اوتھے کوٹہ سسٹم نے بربادیاں تے انھیریاں وچ وادھا کیتا۔ دیہی سندھ نال تعلق رکھن والے زمینداراں دے بچے تعلیم کراچی دے اعلیٰ اداریاں وچ حاصل کردے پر مقابلے دے امتحان دے وقت اوہ دیہی سندھ دا ڈومیسائل لے آندے۔ ایس طرح حقداراں نوں حق توں محروم رکھیا گیا۔ ایس طرح پنجاب وچ پروموٹی لاڈلیاں تے سندھ وچ کوٹی لاڈلیاں دے راہیں نظام چلان دی کوشش کیتی گئی جہدے نال پورا انتظامی ڈھانچہ تباہ ہو کے رہ گیا۔ سب توں وڈا ظلم ورھیاں توں جاری اے تے اوہ ظلم ایہہ وے کہ ایس ملک وچ مقابلے دے امتحانات وچ قومی زبان نوں بالکل نظرانداز کر دتا گیا۔ عام سرکاری سکولاں توں پڑھن والے لائق فائق بچے انگریزی میڈیم سکولاں دے پڑھے لکھے طالب علماں دے ادنیٰ معیار تے وی پورا نہیں اتردے’ اوہناں دے ذہین و فطین ہون وچ تے شک نہیں پر صرف زبان اوہناں دے راہ وچ رکاوٹ بن جاندی اے۔
کئی ورھیاں توں ویکھیا جا رہیا اے کہ سرکاری سکولاں دے ذہین بچے میٹرک تے ایف اے وچ انگریزی وچ فیل ہو جاندے نیں۔ ایس طرح ملک دے وکھووکھ کونیاں توں ٹیلنٹ ضائع ہو جاندا اے تے ایہدے ضائع ہون دی واحد وجہ انگریزی زبان اے۔ مقابلے دے امتحانات وچ پاس ہون والیاں دی اکثریت اوہناں بچیاں دی اے جو شروع توں انگریزی سکولاں وچ پڑھدے رہے۔ اوہناں نے تعلیم ای انگریزی میڈیم وچ حاصل کیتی۔ ملک دے اندر یاں باہر انگریزی پڑھن والے مقابلے دا امتحان پاس کر کے انتظامی ڈھانچے دا حصہ بن جاندے نیں پر ایتھوں نکامی دا اک ہور سلسلہ شروع ہوندا اے۔ انگریزی سکولاں وچ پڑھن والے بچیاں نوں پاکستان دے عام مسئلیاں توں واقفیت نہیں ہوندی ایس لئی اوہ نکام ہو جاندے نیں ایہناں افسراں نوں عام بندے تے عام بستیاں بارے کوئی پتہ نہیں ہوندا ایس لئی ایہ افسر کجھ ٹھیک نہیں کر پاندے۔ میں اپنے دوست افسر دیاں گلاں غور نال سنیاں تے فیر کہیا کہ جناب والا تہاڈیاں گلاں ٹھیک نیں تسیں آپ ایس نظام دا حصہ رہے او تہانوں دوران ملازمت ایہناں گلاں دا خیال کیوں نہ آیا۔ تہانوں لوکاں نوں آخر ریٹائرمنٹ دے بعدای سچ بولنا کیوں یاد آندا اے۔ ہن ایس وگڑے ہوئے’ ڈگدے ہوئے انتظامی ڈھانچے نوں بچان دا کوئی حل وی اے۔ ریٹائرڈ افسر نے میریاں کڑویاں گلاں نوں نگلیا تے فیر بولیا۔ دوران ملازمت تے سانوں پروٹوکول دا نشہ ہوندا اے عام ملازم ساڈے سامنے کنبدے نیں عوامی نمائندے وی سانوں جی سر کہہ کے گل کردے نیں۔ سیکرٹریاں دے کول وزیراں توںبہتر گڈیاں ہوندیاں نیں۔ دوران ملازمت لوک سانوں ملن لئی ترسدے نیں تے ملازمت دے بعد اسیں ترسنے آں کہ کوئی ملن آ جاوے تے فیر لوک وعدہ کرکے وی ملن نہیں آندے۔ ایہو اوہ لمحہ ہوندا اے جدوں سچ ساڈے سامنے ہوندا اے ایسے لمحے سانوں خوف خدا وی ہوندا اے ایس لئی اسیں ریٹائر ہو کے حق تے سچ ول راغب ہو جانے آں۔ تسیں حل پچھیا اے ایہدا سادہ جیہا حل اے۔ صوبائی تے قومی سطح تے مقابلے دے امتحانات علاقائی تے قومی زبان وچ لئے جان۔ سانوں صرف وزارت خارجہ لئی انگریزی دی ضرورت اے انج تے اوتھے وی ترجماناں نال کم چلایا جا سکدا اے۔
یاد رکھنا چاہیدا اے کہ دنیا دے بہت سارے ملکاں نے انگریزی دے بناں ترقی کیتی اے تے اسیں غلامی دے ایس منحوس سفر توں نکل ای نہیں پا رہے۔ سانوں ترقی لئی غلامی چوں نکلنا ہووے گا۔ دنیا وچ ترقی کرن والیاں نے غلامی دیاں زنجیراں نوں توڑیا تے اپنی زباناں راہیں ترقی کیتی۔ میرے دوسست دی گل ختم ہوئی تے میں دیر تک ایہو سوچدا رہیا کہ چین’ جاپان’ جرمنی تے فرانس نے انگریزی دے بناں ترقی کیتی۔ روس تے ہالینڈ سنے ایرانیاں نے وی اپنے آپ نوں انگریزی توں دور رکھیا۔ پاکستان وچ انگریزی زبان نوں ذہانت دی علامت سمجھیا جاندا اے پر انگلستان دے پاگل خانیاں وچ وی لوک انگریزی بولدے نیں۔ ذہانت تے زبان وچ فرق اے پر غلام ایہ فرق سمجھن توں قاصر نیں کہ بقول اقبال
دل توڑ گئی ان کا دوصدیوں کی غلامی