عمران خاں تے بند گلی

ایس ملک وچ دو فتوے بڑے آسانی نال لائے جا سکدے تے لائے جاندے نیں۔ پہلا فتویٰ کفر دا اے تے دوجا غداری دا۔ دوہاں قسماں دے فتویاں دی نہ تے ایس ملک وچ کمی اے تے نہ ای کوئی روک تھام۔ جدوں چاہو’ جیویں چاہو تے جتھے چاہو ایہ فتویٰ جڑ دیو۔ نہ کوئی پچھن والا اے تے نہ روکن والا۔ کفر والے معاملے تے ایس عاجز نوں کجھ وی لکھدے ہوئے اپنے آپ تے ایس فتوے دا ڈر روک دیندا اے ایس گنہگار دی بھلا اوقات ای کیہ اے کہ ایس فتوے دا سامنا کر سکے تے اپنا دفاع وی کر سکے کہ فتویٰ لان والے تے ایہ کم کرکے فارغ ہو جان گے باقی کم اوہناں دے مریدین تے عقیدت مند کر دین گے۔ عقیدت سب توں پہلاں عقل دا خاتمہ کردی اے۔
ہن رہ گئی گل غداری دے فتویاں دی تے ملک عزیز وچ ایہدی اجہی افراط اے کہ ملک نہ صرف ایس قسم دے فتویاں وچ خودکفیل اے سگوں عالم ایہہ وے کہ ایس فتوے نوں برآمد کرکے کافی زرمبادلہ کمایا جا سکدا اے۔ میں اپنے بچپن توں ایہ فتوے سن رہیا واں۔ شیخ مجیب الرحمن’ عبدالغفار خان’ ولی خان’ شیر محمد مری’ عطاء اللہ مینگگل’ جی ایم سید’ الطاف حسین تے ایہدے بعد موجودہ سیاستداناں دی ساری لاٹ اک دوجے نوں وکھووکھ اوقات وچ غدار قرار دے چکی اے۔ بس تہاڈا سیاسی اختلاف ہونا ضروری اے ایہدے بعد غداری دا الزام ایناں سوکھا اے کہ سائیکل چلانا ایس توں ڈھیر اوکھا کم اے۔ کسے مخالف نوں غدار قرار دین لئی اوہدے کسے وی بیان دا کوئی حصہ وی کم آ سکدا اے۔ پہلے درجے تے اوہ غیر محب وطن قرار پاندا اے فیر دوجے درجے تے اپڑ کے غدار قرار پاندا اے پر ایہ غداری دی سند صرف اوس ویلے تک کارآمد اے جدوں تک اوہ تہاڈا سیاسی مخالف اے۔ جے اوہ تہاڈا حلیف بن جاوے تے فیر تہانوں اوہدے کردار تے لگے غداری دے فتوے نوں دھون دی وی زحمت نہیں کرنی پیندی۔ جیویں ای اوہ تہاڈا حلیف بن دا اے اوہدا سارا کردار مع غداری’ آٹومیٹک پلانٹ تے دھل دھلا کے صاف شفاف ہو جاندا اے۔
ہن دور کیہ جائیے’ شیخ مجیب وغیرہ تے خیر نال ہن قصہ ماضی نیں تے اجہے قصیاں نوں دہرانا بے فائدہ اے۔ سجرا قصہ تے اپنے عمران خان تے قائد متحدہ دا اے جدوں عمران خان ثبوتاں دا پلندہ لے کے لندن گئے تے ایس دعوے دے باوجود کہ اوہ انگریزاں نوں دنیا بھر وچ سب توں ودھ جاندے نیں تے سمجھدے نیں تے انگلستان دے قنون نوں وی اوہناں توں ودھ کے کوئی نہیں جان دا اوہ نہ صرف ایہ کہ اوتھوں نکام تے نامراد پرتے سگوں 2018ء دے الیکشن وچ حکومت بنان لئی مطلوبہ ارکان اسمبلی دی گنتی پوری کرن دی غرض نال اوہناں نے ایم کیو ایم والیاں نال اوہناں دی شرط تے صلح کیتی ”جپھی” پائی تے اوہناں نوں حکومت وچ شامل کر لیا۔ مزے دی گل ایہہ وے کہ اوہناں نے صرف حصول اقتدار دے لالچ وچ متحدہ قومی موومنٹ نال غیرمشروط صلح کیتی سگوں جس پارٹی نوں اوہ بھتہ خور’ بوری بند لاشاں دے موجد تے ملک دی غدار قرار دیندے سن اوس پارٹی دے ارکان اسمبلی نوں پاکستان دی قومی اسمبلی دے نفیس ترین ارکان قرار دتا۔ غداری دے فتوے تے باراں مئی دے قتل عام وچ براہ راست ذمہ دار قرار دتے جان والے ارکان اسمبلی دے ساڑھے تن ورھے توں ودھ عرصے تک ناز نخرے برداشت کیتے تے اوہناں نوں ایس عرصے وچ سینے نال وی لائی رکھیا تے اپنی حکومت نوں قائم رکھن دے بدلے اوہناں نوں ساری اسمبلی وچ سب توں زیادہ پڑھے لکھے تے مہذب ارکان دی اسمبلی ہون دی سند فاخرہ وی عطا کیتی۔
مینوں ایس گل نال غرض نہیں کہ ایم کیو ایم غدار اے یاں نہیں مینوں تے صرف ایس گل نال غرض اے کہ عمران خان صاحب نے اوہناں تے ایہ فتویٰ لایا تے اوہناں نوں ایس دوران حب الوطنی دا کوئی قابل ذکر کارنامہ سرانجام نہ دین دے باوجود صرف شریک اقتدار ہون تے حب الوطنی دا سرٹیفکیٹ وی عطا کیتا تے وزارتاں وی بخشیاں۔ یعنی دوجے لفظاں وچ مسئلہ غداری تے حب الوطنی دا نہیں سگوں اپنے اقتدار نوں قائم کرن تے فیر اوہنوں دوام دین دا اے۔ جے اوہ تہاڈے نال نیں تے نفیس ترین لوک نیں نہیں تے غدار نیں’ قاتل نیں’ بھتہ خور نیں تے لوکاں نوں یرغمال بنائے ہوئے نیں۔ بالکل انج ای جیویں پرویزالٰہی جدوں مخالف سن تے پنجاب دے سب توں وڈے ڈاکو سن تے ہن اوہ اوہناں دی پارٹی ولوں پنجاب دے وزیراعلیٰ نیں۔ ڈاکو توں وزارت اعلیٰ دا سفر جس صفائی نال چوہدری پرویزالٰہی نے طے کیتا تے عمران خان نے پنے نام نہاد اصولاں توں دستبرداری اختیار کیتی اوہدی گھٹو گھٹ ایس توں پہلاں کوئی مثال نہیں ملدی۔ ایہدے توں ایہ ثابت ہویا کہ عمران خان دی ایجاد کردہ ڈرائی کلین شاپ توں زیادہ صاف کردار دی دھلائی کرن والی دکان دنیا وچ ہور کدھرے نہیں۔
ہن بندہ کیہ کیہ یاد کرے’ شیخ رشید صاحب نوں اوہ چپڑاسی رکھن لئی راضی نہیں سن بعد وچ اوہناں نوں وزیرداخلہ دا منصب عطا کیتا تے جہناں دے موڈھیاں تے بہہ کے اوہ اپنا قد ودھاندے رہے اقتدار وچ آن دے بعد اوہناں دی اجہی شاندار نوکری تے تابعداری دا مظاہرہ کیتا کہ سانوں اپنے برادر عزیز مستحسن خیال دا اک جملہ یاد آ گیا اوہناں نے کسے دا ذکر کردے ہوئے آکھیا کہ موصوف بہترین ماتحت تے بدترین افسر سن۔ خان صاحب دی تابعداری تے تکبر دے حسین امتزاج نال برادرم مستحسن خیال دی گل یاد آ گئی۔٭٭