اک صدی دا انتقال

مصر دے آخری بادشاہ شاہ فاروق نال ایہ فقرہ منسوب اے کہ دنیا وچ بالآخر پنج بادشاہ ای رہ جان گے۔ چار تاش دے تے اک برطانیہ دا۔ پچھلے دیہاڑے اک صدی دا قصہ لپٹ گیا۔ ملکہ برطانیہ ستر ورھے توں زائد حکمرانی دے بعد اگلے جہان ٹر گئیاں۔ اوہناں نے پرانی دنیا نوں نویں دنیا وچ ڈھلدے ویکھیا۔ کئی سلطنتاں’ بادشاہ’ ڈکٹیٹر تے منتخب رہنما اوہناں دے سامنے آئے تے گزر گئے۔ کنیاں سرحداں پھیلیاں تے سکڑیاں۔ کیسیاں کیسیاں انقلابی ایجادات مقبول ہوئیاں تے ویکھدے ای ویکھدے پرانیاں وی ہو گئیاں۔ جدوں چھ فروری 1952ء نوں 57 سالہ شاہ جارج ششم دا انتقال ہویا تے اوہناں دی پنجی سالہ صاحبزادی شہزادی الزبتھ تے شریک حیات شہزادہ فلپ تن ملکی شاہی دورے تے نکلے ہوئے سن۔ دوویں کینیا دے اک گیم ریزرو وچ شکار کر رہے سن جدوں اوہناں نوں بادشاہ دے انتقال دی خبر ملی۔ جس مہمان خانے وچ اوہ رہ رہے سن اوسے تھاں شہرہ آفاق انگریز شکاری جم کاربٹ وی ٹھہرے ہوئے سن۔ جم کاربٹ اپنی یادداشتاں وچ ذکر کردے نیں کہ اک دن پہلے میں اک من موجی کڑی نوں رُکھاں تے چڑھدے اتردے خوش خوش ویکھیا تے پچھلے دن اوہو کڑی میری ملکہ بن چکی سی۔ تقریباً ڈیڑھ ورھے بعد جون 1953 وچ ملکہ دی باقاعدہ تاج پوشی ہوئی۔ ایہ پہلی شاہی تقریب سی جہنوں ٹیلی ویژن تے لکھاں برطانوی لوکاں نے ویکھیا۔ اوس ویلے دوجی جنگ دی تھکن نال نڈھال برطانیہ ہولی ہولی دوبارہ کھڑا ہو رہیا سی۔
جدوں شہزادی الزبتھ ملکہ بنیاں اودوں وی ستر توں ودھ سمندر پار ملک تے خطے تاج برطانیہ دی قلم رو وچ شامل سن پر جدوں ملکہ نے اکھاں بند کیتیاں تے صرف چوداں چھوٹے چھوٹے سمندر پار جزیرے ای براہ راست برطانوی انتظام وچ باقی بچے سن۔ ایہ وکھری گل اے کہ دولت مشترکہ وچ شامل کینیڈا’ آسٹریلیا’ نیوزی لینڈ تے جمیکا سنے پندراں ملک تے خطیاں دی آئینی سربراہ ملکہ ای سن۔ ملکہ نے دوجی واری عہدہ حاصل کرن والے سرونسٹن چرچل توں لزٹرس تک پندراں برطانوی وزرائے اعظم نوں سند مسند عطا کیتی۔ آئزن ہاور توں جوبائیڈن تک پندراں امریکی صدراں نوں جاندے تے آندے ویکھیا۔ جدوں اوہ ملکہ بنیاں تے سرد جنگ دا آ غاز ہو چکیا سی تے سوویت یونین تے جوزف اسٹالن دی حکمرانی سی۔ جدوں ملکہ نے اکھاں بند کیتیاں اودوں سوویت یونین دے خاتمے نوں وی 31 ورھے گزر چکے سن تے اک سابق سوویت ریاست روس’ یوکرین تے چڑھ دوڑی سی۔
ملکہ نے سو توں ودھ ملکاں تے خطیاں دا دورہ کیتا۔ جدوں 2015ء وچ بڑھاپے پاروں اوہناں نے بیرونی دورے چھڈے اودوں تک اوہ کرہ ارض دے 42 چکراں دے برابر سفر کر چکیاں سن۔ نومبر 1953ء توں مئی 1954ء تک ملکہ تیراں ملکاں دے دورے تے مسلسل 168 دن ملک توں باہر رہیاں۔ اوہناں نے مجموعی طور تے اک سو باراں سربراہان مملکت تے حکومت دا بکنگھم پیلس وچ سواگت کیتا۔ ملکہ چرچ آف انگلینڈ دی وی سربراہ سن۔ ایس حیثیت وچ اوہناں نے پوپ جان پال توں پوپ فرانسس تک چار کیتھولک اسقف عظام دی میزبانی کیتی۔ چھبی مارچ 1976ء نوں ملکہ نے وزارت دفاع دے اک تحقیقی مرکز دے دورے وچ اوتھوں پہلی ای میل گھلی۔ 2014 ء وچ ٹویٹر تے 2019ء وچ انسٹاگرام اکائونٹ بنایا۔ ملکہ دے پاکستان نال دو رشتے سن۔ اک تے اوہ سابق برطانوی نوآبادیات تے مشتمل دولت مشترکہ دی مستقل سربراہ سن تے چھ فروری 1952ء توں 23مارچ 1956ء تک چار ورھے توں اُتے پاکستان دی آئینی سربراہ رہیاں۔ اوہناں دی مقامی نمائندگی گورنر جنرل غلام محمد تے سکندر مرزا نے کیتی۔ جدوں 1956ء دے آئین دے تحت پاکستان ڈومینین توں ری پبلک بن گیا تے سکندر مرزا نے صدر دا عہدہ سانبھ لیا۔ ایس طرح ملکہ دا پاکستان توں علامتی آئینی رشتہ ختم ہو گیا۔ ملکہ دوبارہ پاکستان آئیاں۔ یکم توں 16فروری 1961ء نوں اوہ پندرہ روزے دورے تے شہزادہ فلپ دے نال دارالحکومت کراچی وچ اتریاں۔ فوجی صدر ایوب خان تے ملکہ کھلی کار وچ دو رویہ کھڑے لوکاں نوں ہتھ ہلاندے ہوئے مرکز شہر صدر دیاں سڑکاں توں وی گزرے۔ قائد دی قبر تے پھل چڑھائے۔ کورنگی ٹائون شپ دا دورہ کیتا۔
پشاور وچ قیام دوران شاہی جوڑے نے یونیورسٹی ویکھی تے طورخم بارڈر تک گئیاں۔ کوئٹہ دے چھ گھنٹے دے دورے وچ سڑک تے دو رویہ منتظر تریہہ ہزار دے نیڑے شہریاں نے اوہناں دا سواگت کیتا۔ سردار محمد خان جوگیزئی تے نواب خیربخش مری نے شاہی مہماناں نوں بھیڈاں دا روایتی تحفہ دتا۔ کجھ وقت کوئٹہ کمانڈ اینڈ سٹاف کالج وچ وی گزاریا۔ جد کہ لہور وچ ملکہ نے علامہ اقبال دے مرقد تے پھُل چڑھائے۔ ملکہ برطانیہ نے مریداقبال نال جڑی بادشاہی مسجد تے شاہی قلعہ وی ویکھیا۔ شالامار باغ وچ زندہ دلان لہور دے استقبالیے وچ وی شرکت کیتی۔ ملکہ دا دوجا چھ روزہ دورہ پینتی ورھے بعد 1997ء وچ قیام پاکستان دی گولڈن جوبلی دی مناسبت نال ہویا۔ اودوں فاروق احمد خان لغاری صدر سن تے نوازشریف دوجی واری وزیراعظم بنے سن۔ ملکہ نے پارلیمنٹ دے مشترکہ اجلاس نال خطاب کیتا۔ ایوان صدر دی اک خصوصی تقریب وچ ملکہ نوں اعلیٰ ترین سویلین ایوارڈ نشان پاکستان تے شہزادہ فلپ نوں نشان امتیاز پیش کیتا گیا۔ ایوان صدر وچ شاہی جوڑے نوں دتے گئے عشائیے وچ محترمہ بینظیر بھٹو نے وی شرکت کیتی اوہناں دی حکومت نوں صدر لغاری نے کجھ مہینے پہلاں ای برطرف کیتا سی۔ اصل وچ ملکہ نوں پاکستان دے دورے دی دعوت وزیراعظم بینظیر بھٹو نے ای دتی سی۔٭