ضمنی الیکشن تے منہ ماری

سعد اللہ شاہ

برابر گھورتے رہنا خلائوں میں
ہمارا کام اڑنا ہے ہوائوں میں
کہیں سے ٹوٹ آئے گا ستارا بھی
کہ ہم نے آنکھ رکھی ہے دعائوں میں
انج وی نہیں کہ ہار من لئی جاوے پر مریم نواز فرماندیاں نیں کہ فرد جرم نہیں عمران نوں سزا ملنی چاہیدی اے زیادہ بہتر ہووے کہ محترمہ کجھ کم عدلیہ تے چھڈ دین۔ ہاں تسیں ایہہ کہہ لوو کہ ایہ تہاڈی خواہش تے فیر ہزاوں خواہشیں ایسی کہ ہر خواہش پر دم نکلے۔ بہت نکلے مرے ارمان لیکن پھر بھی کم نکلے۔ ہن تہاڈے دور دی عدلیہ تے نہیں لیاندی جا سکدی۔ عدلیہ اپنی تھاں سوچ وچار کر رہی اے کہ ایہناں دے سامنے مثالاں نیں پر ایہ کم عدلیہ تے چھڈ دینا اہیدا اے۔
میں تے اج کجھ ہور طرح دا کالم لکھنا اے سیاست تے ہوندی رہندی اے تے ہو رہی اے اجے تے ضمنی الیکشن تے منہ ماری ہو رہی اے۔ حکومتی رہنما فرما رہے نیں کہ الیکشن ملتوی کرن دا فیصلہ ٹھیک اے کہ ملک پانی وچ ڈبیا ہویا اے یعنی ہن اوہناں نوں وی ڈبونا ضروری تے نہیں۔ کسے نے ٹھیک کہیا کہ لوکاں نوں تے مہنگائی نے مار رکھیا اے۔ اوہناں دے نیڑے عمران حکومت توں لوک تنگ سن تے شہباز حکومت توں کجھ ہور تنگ ہو گئے دلیل ایہدی کہ ایہ کہ اودوں ایس مہنگائی اپروں پی ٹی آئی ضمنی الیکشن ہار رہی سی تے ہن ن لیگ وچ منطق اے۔ دوجے پاسے اپوزیشن ملتوی فیصلے نوں غلط قرار دے رہی اے کہ ایہو وقت اے الیکشن جتن دا حکومت مشکلات وچ پھسی ہوئی اے تے عمران مقبولیت دی بلندیاں تے اے پر سراج الحق صاحب وی ٹھیک فرماندے نیں کہ ایہ وقت جنگ دا نہیں رَل کے متاثرین لئی کم کرن دا اے۔ کہن دا مطلب ایہ کہ غلط کوئی وی نہیں کہندا۔ باقی گلاں تے ساڈی سمجھ وچ آندیاں نیں پر اسدعمر دے مشورے بالکل سمجھ وچ نہیں آندے کہ اوہناں نوں سقراط تے بقراط بنا کے پیش کیتا گیا سی پر اوہ کجھ دناں وچ ہتھ کھڑے کر گئے فیر اک لمی چپ دے بعد اوہ کرونا دیاں لہراں گنن تے لا دتے گئے۔ کجھ قنونی ماہرین عمران نوں غلط تسلیاں دے رہے نیں دلوں کہنا واں کہ جے عمران خان معافی منگ لیندے تے اوہ قنون نوں نہیں اپنے آپ نوں اچا کر دیندے۔
اک خوشی تے مینوں ہوئی کہ ساڈے شہر دی وی سنی گئی کہ ساڈی جم پل وی چشتیاں وچ اے طمانیت ہوئی کہ خان نے اوتھے پاورشو کیتا تے بقول اوتھوں دے مبصرعلی شاہ ایہ چشتیاں دی تریخ دا سب توں وڈا جلسہ سی ایہدے بعد بی بی مریم وی اوتھے اپڑی تے اوہناں آکھیا کہ چشتیاں ن لیگ دا اے ہن ویکھو لوک کیہ فیصلہ کردے نیں جس دیے وچ جان ہووے گی اوہ دیا رہ جاوے گا۔ چشتیاں بزرگاں دا شہر اے بابا تاج الدین چشتی تے خواجہ نور محمد مہاروی’ میں پی ٹی وی لئی ایہناں مزاراں تے شہر دی ڈاکیومنٹری وی بنائی سی ایہ اپنے ضلع توں وی ودھ اہم شہر اے ایتھے علی شاہ ورگے نوجوان پی ٹی آئی ول رجحان رکھدے نیں۔ ہن ذرا ٹی ٹونٹی وچ نمبرون دی گل ہو جاوے رضوان نے مختصر گل کرکے سب کجھ سمیٹ دتا کہ اوہنوں اللہ نے ٹی ٹونٹی وچ نمبرون بنایا ایہ تے ہوندا اے یقین تے ایمان۔ رضوان ای ایسا پیارا تے من موہنا کردار اے کہ اوہنے دشمناں دے وی دل جت لئے’ کوئی نفرت دا شبہ تک نہیں’ ہسی مذاق تے اپنی آبرو دی حفاظت کہ الٹا اوہ منڈیاں توں شرماندا ہویا اک پاسے ہو جاندا اے اصل و چ اوہدا کھیڈ ول انہماک اے اوہ بیماری وچ وی پاکستان لئی کھیڈن نوں تیار ہو جاندااے۔ اوہنے کہیا کہ لوک کہندے سن رضوان چھکا نہیں مار سکدا فیر لوکاں نے ویکھیا کہ اوہنے کیویں دشمن دے چھکے چھڑائے۔ بس ایویں ای اپنے دوست اظہارشاہین دا شعر یاد آ گیا:
چاند کچھ دیر تو ٹھہر گھر میں
آسماں سے تجھے اتارا ہے
اصل وچ تہاڈے رویے تہاڈا مقام طے کردے نیں۔ اپنا پسندیدہ بائولر محمد عامر نظر آیا کہ اوہ اپنی تھاں من موجی اے۔ محمد عامر ایس ویلے کریبین لیگ کھیڈ رہے نیں۔ اسیں تے سن رہے سی کہ رمیض راجہ اوہنوں واپس ٹیم وچ لیان دے جتن کر رہے نیں اسیں ایہ سن کے خوش سی پر لگدا اے پاکستان کرکٹ ٹیم وچ نسیم شاہ نے اپنی تھاں پکی کر لئی اے تے فیر شاہین آفریدی تے ہے ای ہن تے دو شاہین سانوں مل چکے نیں۔ نسیم شاہ تے چنگا بھلا بلے باز وی اے۔ انج ای خیال آیا کہ دنیا سب توں سٹائلش بلے باز ماجدخاں وی تے میڈیم پیسر آئے سی۔باقی جو فائنل میچ وچ ہویا اوہ تے تسیں ویکھ ای لیا سی۔
آخر وچ اک بڑی دلچسپ پوسٹ تے اک گل کرنا چاہواں گا کسے نے لکھیا اے کہ بخیل دے گھر دا سادہ پانی وی بھار ہوندا اے ایس لئی پین توں پوری پرہیز کرو۔ انج جو گھٹو گھٹ پانی ای پلا دیوے اوہ بخیل نہیں کہ اجہے وی بدبخت نیں کہ اوہ پانی وی نہیں پچھدے تہاڈے سامنے بہہ کے چائے پی رہے ہوندے نیں پر تسیں حیرت زدہ رہ جاندے او ساڈے اک دوست بڑے بزلہ سنج سن اک دن اوہ میرے دفتر وچ ہمیشہ وانگوں آئے تے کہن لگے تسیں میرے توں کیہ لینا دینا اے کہ تسیں چائے دا اہتمام کردے او میں کہیا واحد صاحب ایہ ساڈی روایت اے تے مہمان تے رحمت ہوندا اے۔ کہن لگے کہ اک بندے دے کول میں کدی ٹر جاواں تے اوہ چائے تے منگوا لیندا اے تے میں پی وی لینا واں پر ایہدے بعد اوس بندے دے چہرے تے جو اذیت ہوندی اے اوہ میرے توں ویکھی نہیں جاندی۔ بندے دا ناں میں جان بجھ کے نہیں لکھیا۔ مقصد تے کردار اے میں اپنی حیاتی وچ عارف عبدالمتین تے شہزاداحمد ورگیاں نوں ویکھیا جو حد توں ودھ کے آن والیاں دی خدمت کردے سن اک واری میری موجودگی وچ شہزاداحمد نوں حکومت ولوں چیک آیا کہ بیروزگار نیں۔ شہزاداحمد نے غصے وچ اوہ چیک واپس گھل دتا کیہ خوددار لوک سن۔ عارف عبدالمتین دا اک شعر:
تلوار کیا گری مرے دشمن کے ہاتھ سے
میں مسکرا کے خیمہ یاراں میں آ گیا